L.V.

Spektakularan završetak maratona i zlato za Simbu u foto-finišu

Maraton je obično priča o izdržljivosti, o tome ko bolje rasporedi snagu kroz 42 kilometra. Ali jutro u Tokiju donijelo je nešto drugačije – sprint u posljednjim metrima, kao da se radi o trci na 100 metara.

Tamo gdje se noge obično pretvaraju u olovo, Alfons Feliks Simbu pronašao je još jedan trk. Ispisao je istoriju.

Tanzanijac je u cilj ušao sa identičnim vremenom kao i Amanal Petros iz Njemačke – 2:09:48. Ali foto-finiš je pokazao da je Simbu bio brži za tri stotinke. Dovoljno da postane prvi osvajač zlatne medalje za Tanzaniju na svjetskim prvenstvima.

"Danas sam ispisao istoriju – prva tanzanijska zlatna medalja na svjetskom prvenstvu“, rekao je kroz osmijeh i nevjericu. Italijan Ilijas Aouani stigao je treći, pet sekundi kasnije.

Trka je krenula sa 88 takmičara iz 47 zemalja, ali je vruće i sparno jutro lomilo i najjače. Čak 22 maratonca nije došlo do cilja. Najveće iznenađenje bio je Tadese Takele, Etiopljanin koji je u martu osvojio Tokijski maraton sa vremenom 2:03:23 i stigao u Japan kao najbrži učesnik. Na 33. kilometru stao je, isključio sat i preskočio ogradu – bol je bio jači. Nedugo zatim, odustao je i njegov sunarodnik Deresa Geleta, drugi na istom maratonu.

Do tada, ritam je držao Ugandanac Abel Čelangat. Vodio je većinu trke, čak povukao odlučujuće ubrzanje na 39,5 km koje je vodeću grupu svelo na petoricu. Tu su ostali i svi kasniji osvajači medalja.

Posljednji krug za pamćenje

Na ulasku na stadion, Čelangat i Izraelac Hajmro Alame otpali su iz borbe. Ostali su Petros, Simbu i Aouani. Nijemac je izgledao kao pobjednik – na zadnjoj ravnini otvorio je korak, gledao samo ka cilju. Ali iz drugog plana pojavio se Simbu, čovjek koji je u aprilu bio drugi u Bostonu sa 2:05:05.

Metar po metar, smanjivao je razmak. Petros je u nevjerici pogledao preko ramena, ali tijelo mu je zakazalo baš tada. Tanzanijac je presjekao liniju prije njega, dok je Nijemac posrnuo i pao. „Nikada nisam vidio nešto ovakvo u maratonu – kao sprint na 100 metara“, rekao je Petros, dodajući da je tužan što je izgubio zlato u posljednja tri metra, ali i srećan zbog rivala.

Za Simbua, ovo nije priča o iznenadnom junaku. On već ima bronzu iz Londona 2017. Sada, sa 33 godine, pokazao je da upornost i strpljenje mogu da nadjačaju i najteže uslove. Njegova pobjeda je simbol – za malu atletsku naciju koja je čekala trenutak ponosa na najvećoj sceni.

Dok se maraton pretvarao u sprinterski spektakl, na stazi su svoje zadatke obavljali i drugi. Holanđanka Femke Bol rutinski je prošla kvalifikacije na 400 m s preponama i sada je prva favoritkinja za zlato, u odsustvu Sidni Meklaflin-Levrone. U skoku s motkom, Kejti Mun, dvostruka svjetska šampionka i olimpijska pobjednica, predvodila je grupu od 14 atletičarki koje su preskočile 4,60 m. Među njima su i Amerikanke Sendi Moris i Hana Mol.

Loša vijest stigla je iz britanskog tabora – Moli Kodri povrijedila je članak tokom zagrijavanja i morala da odustane. Olimpijska šampionka Nina Kenedi iz Australije uopšte nije ni doputovala u Tokio, jer se oporavlja od povrede zadnje lože.