B.B. [ Beta ]

NABAVLJAO DJELOVE ZA DRONOVE

U Njemačkoj uhapšen osumnjičeni član Hezbolaha

Njemačko pravosuđe saopštilo je danas da je uhapšen navodni član libanskog Hezbolaha u Njemačkoj, osumnjičen da je pokušao da isporuči opremu namijenjenu proizvodnji dronova za napade na Izrael.

Identifikovan kao Fadel Z, državljanin Libana, uhapšen je u nedjelju u Salcgiteru, na sjeveru zemlje, saopštilo je njemačko savezno tužilaštvo.

Muškarac se sumnjiči da se pridružio redovima Hezbolaha u Libanu 2016. godine i da je od ove godine nabavio djelove za bespilotne letjelice, posebno motore, namijenjene za slanje u Liban za "terorističke napade" na Izrael, navodi se u saopštenju.

Uhapšeni je priveden sudiji koji je podigao optužnicu i odredio mu istražni zatvor.

Mnoge zemlje, među kojima SAD, Evropska unija, Velika Britanija i države članice Arapske lige, Hezbolah smatraju terorističkom organizacijom.

Od početka rata između Izraela i palestinskog pokreta Hamas 7. oktobra 2023. godine, Hezbolah, saveznik Hamasa, svakodnevno razmjenjuje prekograničnu vatru sa Izraelom, što izaziva strah od rata većih razmjera.