NIZ CEREMONIJA

Srbija obilježava Dan državnosti

Nizom manifestacija Srbija obilježava Dan državnosti, u spomen na dan kada je na zboru u Orašcu 1804. podignut Prvi srpski ustanak, i dan kada je u Kragujevcu 1835. donijet Sretenjski ustav.

Predsjednik Srbije Tomislav Nikolić prisustvovaće ceremoniji polaganja vijenaca na spomeniku Neznanog junaka na Avali i dodijeliti odlikovanja. Premijer te zemlje Aleksandar Vučić položio je lovorov vijenac na spomenik Dimitriju Davidoviću, tvorcu Sretenjskog ustava, na Zemunskom keju.

"Ne postoji veća vrijednost ni radost od borbe za modernu i uspešnu Srbiju. Ponosan sam na činjenicu što možemo bar malo da učinimo za našu zemlju da bude još bolja i da pokažemo da smo naučili nešto od naših slavnih predaka", rekao je premijer Vučić, prenosi RTS.

Predsjednica Narodne skupštine Maja Gojković će položiti vijenac na sarkofag vožda Karađorđa u crkvi svetog Đorđa na Oplencu. Ceremonija polaganja vijenca biće obavljena uz najviše državne i vojne počasti koje će, tom prilikom, odati počasna jedinica Garde Vojske Srbije i Reprezentativni orkestar Garde Vojske Srbije.

Posjetioci imaju priliku besplatno da posjete aktuelne izložbe Istorijskog muzeja Srbije na Trgu Nikole Pašića i u Konaku kneza Miloša u Topčideru. Na Trgu Nikole Pašića posjetioci imaju priliku da vide postavku "Srbija 1914." i njenu tematsku ekstenziju izložbe "Žensko lice Velikog rata".