K. J.

NAKON RANJAVANJA

Slovački premijer Fico otpušten iz bolnice na kućni oporavak

Slovački premijer Robert Fico, koji je prije 16 dana ranjen iz vatrenog oružja, otpušten je u četvrtak iz bolnice u Banskoj Bistrici, gdje je bio hospitalizovan nakon napada, i nastaviće kućni oporavak u Bratislavi, prenosi Reuters.

Do napada je došlo 15. maja kada je Fico ušao među svoje pristalice nakon sjednice vlade u Handlovi, mjestu u centralnom dijelu Slovačke.

Odmah je podvrgnut dvijema operacijama od nekoliko sati u bolnici u Banskoj Bistrici.

"Robert Fico premješten je večeras [30. maja] iz naše bolnice prema Bratislavi", rekla je Ruzena Mataseje, portparolka bolnice, bez pojašnjenja o tome gdje je tačno Fico transportovan.

Tokom jutra direktorica bolnice Mirijam Lapunikova rekla je da je premijer izrazio želju da nastavi oporavak u svom domu nakon što napusti njihovu bolnicu.

Iz bolnice u Banskoj Bistrici rekli su da su zadovoljni stanjem predsjednika vlade, koje se popravlja.

Napadač na Fica, kojeg su slovački mediji identifikovali kao Juraja Cintulu (71), odmah je uhapšen i stavljen u pritvor pod optužbom za pokušaj ubistva.