A.B. [ Portal RTCG ]

MINISTAR ODBRANE HRVATSKE

Anušić: Otkazao sam sastanak sa Krapovićem zbog izjava o Morinju

Ministar odbrane Hrvatske Ivan Anušić otkazao je predviđeni sastanak sa crnogorskim kolegom Draganom Krapovićem zbog Krapovićevih javno izrečenih stavova o postavljenoj spomen-ploči u logoru Morinj i o vlasništvu broda Jadran.

“Sastanak s crnogorskim ministrom obrane Draganom Krapovićem otkazao sam zbog njegovih izjava i o ploči u Morinju i o brodu Jadran. Stavovi ministra Krapovića, koje je proteklih dana iznio u medijima, ne ostavljaju prostor za razgovor i potpuno odudaraju od stavova Republike Hrvatske i povijesnih činjenica”, napisao je na Fejsbuku. 

Podsjećamo, crnogorski ministar iz redova Demokrata je nedavno kazao da je napravljena greška kada je postavljena ploča u nekadašnjem logoru Morinj i da natpis, na kojem, između ostalog, piše da su događanja u tom logoru “posljedice velikosrpske agresije”, ne odgovara činjenicama.

Anušić je stigao danas u Crnu Gori i sastao se sa predsjednikom Hrvatske građanske inicijative Adrijanom Vuksanovićem, koji je Anušića dočekao u Kotoru.

Krapović se nije danas sastao sa hrvatskim kolegom Ivanom Anušićem u Tivtu, kako je bilo planirano.

Grlić Radman: Za Hrvatsku nesporna granica sa Crnom Gorom na kopnu, pitanje granice na moru moramo riješiti

Za Hrvatsku je nesporna granica sa Crnom Gorom na kopnu, ali pitanje granice na moru moramo riješiti, kazao je ministar vanjskig poslova Hrvatske Gordan Grlić Radman koji je prisustvovao obilježavu Dan hrvatskoga naroda u Crnoj Gori.

On je u Tivtu je imao sastanak s potpredsjednicima opština Tivat i Kotor, a nakon toga je održao sastanak s ministrom vanjskih poslova Filipom Ivanovićem.

"Razgovarali smo o onim otvorenim pitanjima koja već 34 godine opterećuju odnose dvije države. Iako je Hrvatska od samih početaka podržavala Crnu Goru na putu prema NATO-u, članstvu u NATO-u i što je Crna Goru postala, i naravno, Hrvatska takođe podržava Crnu Goru na ostvarivanju članstva u EU-u. Međutim, sva pitanja koja su nasljeđe Domovinskog rata, otvorili smo i prije par godina, stavljena je ploča u Morinju za koju iskazujemo želju da će ona naravno i dalje ostati na tom objektu zloglasnog logora Morinj. Razgovarali smo takođe i o granicama, da treba da se formiraju što prije s crnogorske strane članovi komisije za granicu. Za nas je nesporna granica na kopnu, ali pitanje granice na moru moramo riješiti", rekao je nakon sastanka Grlić Radman, prenosi HRT.

Grlić Radman će u nedjelju prisustvovati misi u katedrali svetog Petra u Baru, nakon čega će se sastati s hrvatskom zajednicom u kripti katedrale.

Dan hrvatskoga naroda obilježava se 13. januara jer je taj dan poznat kao Dan prenosa mošti svetoga Tripuna u Kotor 809. godine, poznat kao Karike.