Ivan Đerković  [ DW ]

02. 05. 2025. 07:49

Odlazeći kancelar Olaf Šolc traži samo malo poštovanja

U Njemačkoj se najviši državni zvaničnici, kao i generali Bundesvera, tradicionalno ispraćaju sa dužnosti na svečanosti poznatoj kao Veliko povečerje (Großer Zapfenstreich). Ta ceremonija, čiji koreni siježu još u 16. vijek, uključuje orkestarsku muziku, baklje, državnu himnu i oproštajne govore. Posebnu pažnju pritom uvijek privlače tri muzičke numere koje sam zvaničnik bira.

Ovog ponedjeljka uveče, njemačka vojska na taj način će se oprostiti od Olafa Šolca, dosadašnjeg kancelara iz redova Socijaldemokratske partije (SPD). Prema pisanju njemačkih medija, Šolc je za tu priliku izabrao zanimljivu i lično obojenu kombinaciju –klasičnu i pop-muziku, uz simboliku jednog političkog slogana.

Bitlsi, Bah i Areta Frenklin

Ceremoniju će otvoriti pjesma Bitlsa „In My Life“, a zatim slijedi odlomak iz „Drugog brandenburškog koncerta“ Johana Sebastijana Baha, što je omaž Potsdamu, glavnom gradu njemačke pokrajine Brandenburg, gdje Šolc živi.

Na kraju, sviraće se „Respect“ Arete Frenklin – pjesma u kojoj se traži „samo malo poštovanja“. To je u stvari podsjećanje na centralnu poruku njegove kampanje na izborima za Bundestag iz 2021. godine, nakon koje je imenovan za kancelara.

Prije same ceremonije, u dvorištu Ministarstva odbrane u Berlinu, govore će održati i Šolc i aktuelni ministar odbrane Boris Pistorijus, (SPD).

Već narednog dana, u utorak, za novog njemačkog kancelara trebalo bi da bude izabran lider Hrišćansko-demokratske unije (CDU) Fridrih Merc.

Šta je odabrala Merkel?

U njemačkoj javnosti se, inače, već povlače paralele sa ceremonijom oproštaja od Angele Merkel 2021. godine. Ona je tada, osim crkvene pjesme „Tebe, Bože, hvalimo“ (Großer Gott, wir loben dich), izabrala i hit Hildegard Knef „Nek‘ za mene padaju kiše crvenih ruža“ (Für mich soll's rote Rosen regnen), kao i pjesmu Nine Hagen „Zaboravio si film u boji“ (Du hast den Farbfilm vergessen), koja je svojevremeno bila hit u Istočnoj Njemačkoj.

Šolc, izgleda, bira uzdržaniju, ali jasnu poruku: na kraju svega – samo malo poštovanja.