D.B.

četvrtfinale plej-ofa Admiralbet ABA lige

Žakelj: Biće to sasvim drugačija utakmica

Košarkaši Budućnost Volija gostuju Zadru u drugoj utakmici plej-of serije ABA lige u petak u dvorani "Krešimir Ćosić" sa početkom od 19 časova, prenos je na TVCG2.

Momci Andreja Žakelja fenomenalnom igrom u prvom meču pobijedili su Zadar 100:69. Svi igrači su dali svoj doprinos i sada slijedi druga utakmica, koja ne smije da zavarava.

"Mislim da treba da ponovimo pristup kao u drugom poluvremenu, čak mislim da nije bio tako loš u prvom, ali u drugom smo se držali dogovora, igrali smo agresivnije, brže. Isto treba da razmišljamo i u drugom meču. Biće to sasvim drugačija utakmica, igraju pred svojom publikom, mislim da će biti puna dvorana, motivisani su, tako da se mi na ove stvari spremamo. Sa pravim pristupom i taktičkim detaljima želimo da privedemo četvrfinale kraju", rekao je Žakelj.

Neminovno je da Zadar ima nevjerovatnu publiku a sama dvorana napuni 9.000 ljudi. Košarkaši Zadra često nadmaše svoje jače protivnike.

"Imali smo vremena da se odmorimo i analiziramo utakmicu, uvidjeli gdje smo pravili greške, gdje možemo da budemo bolji. Mislim da će Zadar biti u drugačijem izdanju. Imali su vremena da se odmore, očekujem punu dvoranu i podršku domaćinima. Biće to težak meč ali mi ćemo dati sve od sebe da dobijemo ", zaključio je trener Budućnost Volija.

Bilo kako bilo, Budućnost vjeruje da može peti put ove sezone dobiti Zadar(ABA Superkup, dva puta ABA, jednom plej-of) a onda polako da se priprema za polufinale.