L.V.

Leće i Bolonja bez golova, Krstović igrao svih 90 minuta

Fudbaleri Lećea osvojili su bod protiv Bolonje odigravši bez golova u 24. kolu Serije A. Ekipa Marka Đanpaola nastavila je borbu za opstanak, dok je Bolonja propustila priliku da se dodatno približi vrhu tabele.

Nikola Krstović je odigao cijeli meč, bio je individualno dobar, ali nekako odsječen od ostatka tima. Našem napadaču jednostavno fali taj jedan igrač koji bi nagradio njegovu odličnu kretnju.

Domaćin je meč otvorio agresivno i već u prvoj minuti mogao doći do vođstva, ali je pokušaj Morentea iz blizine izblokiran. Iako su imali samo 36% posjeda lopte u prvom poluvremenu, igrači Lećea stvorili su nekoliko opasnih situacija.

Najbliži pogotku bili su kada je Skorupski odbranio pokušaj Pjerotija nakon oduzete lopte Likojanisu, a potom i šut Helgasona iz nastavka akcije. S druge strane, Bolonja je tek iz prekida uspjela zaprijetiti, ali De Silvestri nije uspio da savlada Falkonea.

U drugom poluvremenu ritam igre je opao, a prilike su bile rijetkost.

Bolonja nije uspjela nametnuti svoju igru, dok je Leće disciplinovanom defanzivom kontrolisao situaciju. Najveća uzbuđenja desila su se u finišu – Dalinga je postigao gol nakon kornera, ali je VAR utvrdio da je bio u ofsajdu. U posljednjim sekundama meča Falkone je odbranio udarac Kastra i tako sačuvao vrijedan bod za Leće.

Ovim remijem Leće je napravio korak dalje od opasne zone, ostajući na 14. mjestu sa četiri boda prednosti u odnosu na timove u zoni ispadanja. S druge strane, Bolonja je ostala četiri boda iza šestoplasirane Fiorentine, propustivši priliku da se primakne Milanu.