L.V.

Mateus: Kompani je preporodio Bajern, mogu da osvoje Ligu šampiona

Vensan Kompani je preporodio Bajern Minhen i pretvorio bundesligaškog giganta u jednog od glavnih kandidata za osvajanje Lige šampiona ove sezone, izjavio je klupski velikan Lotar Mateus.

Bavarci ove sezone još uvijek imaju savršen učinak, a prema riječima bivše zvijezde njemačke reprezentacije, za takav sjajan početak najzaslužniji su belgijski trener i njegova "iskrenost i jasnoća".

Pod Kompanijevim vođstvom, Bajern je briljantno otvorio sezonu 2025/26. Subotnja pobjeda od 3:0 protiv Borusije Menhengladbah bila je njihova trinaesta uzastopna u svim takmičenjima, čime su izjednačili rekord u top ligama Evrope koji je Milan postavio u sezoni 1992/93.

Domaćin je ostao s igračem manje u prvih 20 minuta, ali Bajernova demonstracija moći počela je tek nakon sat vremena igre, kada je Džošua Kimih načeo mrežu, a Rafael Gereiro povisio pet minuta kasnije. Lenart Karl je u 81. minutu stavio tačku na meč i tako donio Kompanijevom timu treću pobjedu u samo sedam dana — poslije trijumfa 2:1 u “Klasikeru” protiv Borusije Dortmund i ubjedljivih 4:0 nad Klub Brižom u Ligi šampiona.

Mateus, koji je s Bajernom osvojio šest titula Bundeslige i bio svjetski prvak s Njemačkom sve prepisuje Belgijancu na klupi.

"S Kompanijem smo napravili sjajan posao. Kompani je ponovo uključio igrače u proces odlučivanja i govori jasno, otvoreno i iskreno. On je ponovo izgradio Bajern poslije četiri ili pet godina turbulencija i uradio mnoge stvari koje su nedostajale u tom periodu. Ako zadrže ovaj nivo igre, biće među glavnim favoritima za Ligu šampiona“.

Novo ime u prvom timu, 17-godišnji Karl, sada je postigao gol u dvije utakmice zaredom. Protiv Klub Briža proglašen je igračem utakmice, a zatim je i protiv Menhengladbaha pogodio samo tri minuta nakon što je ušao s klupe umjesto Luisa Dijasa.

Reprezentativac Njemačke do 17 godina, sa sedam golova na 13 nastupa, Karl je prošao kroz Bajernovu omladinsku akademiju i ove sezone konačno postao dio Kompanijevog seniorskog tima.

"Sada je postigao dva gola zaredom, ima dobar momentum. Kada se pojavi mnogo medijske pažnje, što je normalno u klubu kao što je Bajern, ključno je imati mirno okruženje i nastaviti raditi. A kada dođe kritika, radiš isto. Tada će sve biti u redu za Lenija“, kazao je Kompani.

Bajern trenutno zauzima prvo mjesto na tabeli Bundeslige sa 24 boda iz osam mečeva. Imaju najbolji napad i odbranu u ligi - 30 postignutih i samo četiri primljena gola. Ipak, u narednih deset dana čeka ih zahtjevan raspored: utakmica u DFB-Pokalu, duel Lige šampiona i težak bundesligaški ispit.

Bajern gostuje Kelnu u drugom kolu domaćeg kupa, a nakon samo dva dana pauze vratiće se na Alijanc Arenu gdje će 1. novembra dočekati preporođeni Bajer Leverkuzen. Tri dana kasnije, 4. novembra, slijedi možda i najveći izazov sezone — duel sa PSŽ-om Luisa Enrikea, aktuelnim šampionom Evrope koji je u sjajnoj formi u Ligi šampiona, sa tri pobjede iz tri meča i 13 postignutih golova. Bajern trenutno ima istu gol-razliku kao francuski velikan i pokušaće da preuzme čelnu poziciju kada otputuje u Pariz.