[ Izvor: Beta, Objavila: M.M.Lj. ]

NAREDNE SEZONE

Dva kluba dijele stadion u Čempionšipu

Engleski fudbalski klubovi Birmingem siti i Koventri siti igraće sljedeće sezone u Čempionšipu na istom stadionu - Sent Endrus.

Koventri je produžio saradnju sa Birmingem sitijem na još jednu sezonu, pošto su propali pregovori sa vlasnicima stadiona Riko arena u Koventriju.

"Bili su odlični prema nama prošle sezone i ne sumnjamo da će tako ostati. Mi, naravno, nismo željeli da budemo tamo, ali smo ponovo na to prisiljeni, kako bismo osigurali sve utakmice u rasporedu", naveo je Koventri.

Navijači Koventrija će tako i sljedeće sezone putovati 35 kilometara kako bi gledali svoj klub na domaćem terenu.

Koventri je ove sezone osvojio Ligu jedan i izborio povratak u drugu ligu - Čempionšip. U istoj ligi takmiči se i Birmingem.

Koventri je 2005. godine napustio Hajfild roud i prešao na Riko arenu, odakle je otišao zbog neslaganja oko uslova iznajmljivanja, pa je kao domaćin u sezoni 2013/2014 igrao u Nortemptonu. Klub se 2014. godine vratio na Riko arenu, ali je ponovo došlo do nesuglasica, pa je prošle sezone igrao kao domaćin u Birmingemu.

Koventri planira da napravi svoj stadion i postigao je dogovor sa Univerzitetom Vorvik oko zemljišta.

Nova sezona u Premijer ligi i Engleskoj fudbalskoj ligi počinje 12. septembra.