Ditari 05.07.2024

Ditarin e përgatiti, Violeta Gjokaj

PËRFUNDOI TAKIMI I LIDERËVE TË PARTIVE PARLAMENTARE ME PRESIDENTIN MILLATOVIQ

Ka përfunduar takimi i liderëve të partive parlamentare me presidentin e Malit të Zi Jakov Millatoviq në Vilën Gorica. Në takim morën pjesë krerët e Partisë Demokratike të Socialistëve, Socialdemokratëve, Lëvizjes qytetare URA, Iniciativës qytetare kroate, Forcës dhe deputetes së pavarur Jevrosima Pejoviq. Ftesës së Millatoviqit për t'i informuar mbi përfundimet e bisedimeve që ai pati në Bruksel me partnerët evropianë, nuk iu përgjigjën përfaqësuesit e Lëvizjes Evropa Tani, Demokracisë së Re Serbe, Demokratëve dhe të Partisë Demokratike Popullore. 

PERSPEKTIVA EVROPIANE ËSHTË PRIORITETI MË I RËNDËSISHËM I VENDIT TONË 

Njeriu i parë i BE-së e ka shtyrë vizitën në momentin kur ai duhej të prezantonte rezultatin final të marrjes së IBAR-it pozitiv. Dy ditë pas marrjes së IBAR-it dhe pasi kemi bërë hap të madh në rrugën evropiane, në parlament është marrë një vendim që dëmton interesat e Malit të Zi, tha Millatoviq. Perspektiva evropiane është prioriteti më i rëndësishëm i vendit tonë dhe unë jam i habitur nga qëndrimi i disa partive ndaj tij, ka deklaruar Millatoviq. Më vjen keq që disa përfaqësues partiakë nuk u përgjigjën. Nuk mendoj se ky është një mesazh i mirë, u tha Millatoviq gazetarëve pas takimit që zhvilloi sot në Vilën Gorica me përfaqësuesit e disa partive parlamentare. Ai shtoi se takimi u zhvillua në një atmosferë konstruktive. Pjesëmarrësve ua kam transmetuar përshtypjet e mia nga vizita në Bruksel, tha ai. 

QEVERIA AKTUALE KËRCËNOI RRUGËN EVROPIANE TË MALIT TË ZI

Qeveria aktuale ka kërcënuar rrugën e Malit të Zi drejt Bashkimit Evropian (BE) dhe ka vënë në pikëpyetje perspektivën e mëtejshme evropiane të vendit, thanë përfaqësuesit e opozitës pas takimit me presidentin malazez Jakov Millatoviq.

Kreu i Partisë Demokratike të Socialistëve, Danijel Zhivkoviq, u tha gazetarëve para Viles Gorica se në takim janë dëgjuar disa detaje që konfirmojnë qëndrimin se sjellja e shumicës parlamentare ka vënë në pikëpyetje perspektivën e mëtejshme evropiane të Malit të Zi. Ai tha se mospjesëmarrja e shumicës parlamentare në takim flet për qëndrimin ndaj integrimeve evropiane dhe se perspektiva evropiane është e dyshimtë. "Shumica parlamentare është më përgjegjëse për ndalimin e perspektivës evropiane," tha Zhivkoviq.

Kryetari i Partisë Socialdemokrate, Damir Shehoviq, tha se Mali i Zi ka një problem serioz dhe se falë pushtetit aktual, procesi i integrimeve evropiane është i diskutueshëm. “Pas marrjes së Raportit për përmbushjen e standardeve të përkohshme për kapitujt e sundimit të ligjit (IBAR), ne shkuam në rrugën e kundërt”, tha Shehoviq.

Siç tha ai, themelet e Malit të Zi dhe fqinjëve të tij të afërt janë prishur për shkak të interesave të njerëzve të tjerë.

Lideri i Iniciativës Qytetare Kroate, Adrijan Vuksanoviq, tha se rruga evropiane e Malit të Zi është dukshëm, nëse nuk kërcënohet, atëherë ngadalësohet. “Ne që jemi të përkushtuar ndaj integrimit evropian duhet të homogjenizohemi”, tha Vuksanoviq.

Lideri i forcës, Genci Nimanbegu beson se Millatoviq bëri lëvizjen e duhur duke organizuar takimin. Mendoj se dialogu është e vetmja rrugë e drejtë për të dalë nga situata në të cilën rrezikohet rruga evropiane”, tha Nimanbegu.

GJELOSHAJ PËR MILATOVIQ: INTEGRIMI NË BE NUK DUHET TË PËRDORET PËR PROMOVIME PERSONALE DHE PARTIAKE

Kryetari i Forumit Shqiptar, Nik Gjeloshaj, ka bërë të ditur se nuk ka mundur të marrë pjesë në takimin e sotëm me presidentin e vendit, Jakov Milatoviq, për shkak të angazhimeve të tij të mëparshme. Në përgjigjen e tij drejtuar Milatoviqit, ai tha se Forumi Shqiptar do të mbështesë të gjitha projektet që shkojnë në rrugën e sigurt evropiane të Malit të Zi, por gjithashtu tha se integrimi në BE nuk duhet të përdoret për promovime personale dhe partiake.

Ai thotë se rruga jonë evropiane nuk ka alternativë dhe se e gjithë shoqëria jonë duhet të fokusohet dhe të kontribuojë që Mali i Zi të bëhet anëtar i BE-së deri në vitin 2028.

Forumi Shqiptar, si subjekt që përfaqëson shqiptarët në Mal të Zi dhe ka mbështetjen më të madhe të shqiptarëve, është shumë i interesuar për bashkëpunim me të gjithë aktorët e skenës shoqërore që Mali i Zi të mbetet në fokusin e integrimeve evropiane”, tha Gjeloshaj në përgjigjen e Millatoviqit.

Për këtë temë, siç thotë ai në Forumin Shqiptar, janë gjithmonë të gatshëm të kontribuojnë dhe gjithmonë do të mbështesin vetëm ato projekte që shkojnë në rrugën e sigurt evropiane të Malit të Zi.

PROCESI I BERLINIT ËSHTË MODELI MË I MIRË PËR PËRSHPEJTIMIN E PERSPEKTIVËS SË BE-SË

Procesi i Berlinit paraqet modelin më të mirë për përshpejtimin e perspektivës evropiane të Ballkanit Perëndimor, vlerësoi ministri i Punëve të Jashtme Filip Ivanoviq, duke shtuar se Mali i Zi përpiqet të jetë pjesëmarrës i besueshëm në aktivitetet që janë me interes të përbashkët për vendet e rajonit.

Ivanoviq tha në konferencën "Procesi i Berlinit dhe bashkëpunimi rajonal: Sfidat, mundësitë dhe rekomandimet për Malin e Zi", organizuar nga Bashkimi Pan-Evropian Malazez (CPEU), se bashkëpunimi rajonal është një nga prioritetet e politikës së jashtme të Malit të Zi dhe një katalizator i rëndësishëm për arritjen e prioriteteve të tjera shtetërore. "Procesi i Berlinit përfaqëson modelin më të mirë për përshpejtimin e perspektivës evropiane të Ballkanit Perëndimor," tha Ivanoviq.

Ai tha se Mali i Zi është pjesëmarrës aktiv në procesin e Berlinit.

Ambasadorja Fuqiplotë e Norvegjisë në Mal të Zi, Kristin Melsom, tha se Procesi i Berlinit nuk është alternativë ndaj anëtarësimit në BE, por është një superstrukturë e mirë politike.

Ajo tha se procesi i Berlinit është i rëndësishëm për Ballkanin Perëndimor dhe se është më shumë se një seri samitesh dhe marrëveshjesh.

MALI I ZI ËSHTË VENDI MË I PËRGATITUR PËR BE-NË

Mali i Zi është vendi më i përgatitur për pranim në Bashkimin Evropian (BE) dhe Hungaria dëshiron të ndihmojë dhe përshpejtojë procesin e anëtarësimit, tha ministri hungarez i Ekonomisë Kombëtare, Marton Nagj, në një takim me Ministrin e Turizmit, Ekologjisë, Zhvillimi të Qëndrueshëm dhe Zhvillimit të Veriut, Vlladimir Martinoviq, në Budapest.

Nagj tha se në aspektin turistik, Mali i Zi është interesant për turistët hungarezë dhe theksoi rëndësinë e lidhjeve ajrore mes dy vendeve, thuhet në njoftim.

Ministrat pajtohen se duhet të punohet për nënshkrimin e një Memorandumi mes dy vendeve në fushën e turizmit, me qëllim të forcimit të bashkëpunimit në këtë fushë dhe marrëdhënieve dypalëshe dhe shumëpalëshe.

“Sa i përket investimeve, ne kemi një hotel në Mal të Zi dhe besoj se numri i investimeve duhet të rritet”, tha Nađ. Ministri Martinoviq u pajtua se do të ishte mirë nëse do të kishte më shumë investime, jo vetëm në bregdet, por edhe në veri, i cili ka potencial të jashtëzakonshëm, dhe theksoi se Mali i Zi është më se i hapur ndaj partnerëve hungarez dhe partnereve të tjerë evropianë.

Ai gjithashtu përmendi se dy vende janë anëtare të Strategjisë së BE-së për Rajonin e Danubit, kështu që takimet e Grupit të Punës për AP3, në punën e të cilit përfshihen përfaqësues të Ministrisë, një vend i mundshëm bashkëpunimi dhe shkëmbimi informacioni.

MË NË FUND ZGJIDHJA ËSHTË NË HORIZONT

Pas dy përpjekjeve të dështuara për gjetjen e një partneri strategjik për fabrikën e hekurit në Nikshiq, më në fund  një zgjidhje është në horizont. Mbrojtësja e interesave juridike- pronësore ka dhënë pëlqimin e saj për versionin e marrëveshjes për dhënien me qira të fabrikës së hekurit të Nikshiqiq, të cilën e ka harmonizuar Elektroekonomia me ofertuesin nga Zvicra, kompaninë 8b kapital s, sipas së cilës kompania mund të japë me qira repartin e çelikut dhe farkëtarinë, por nuk mund të arrij të drejtën e pronësisë. Ministri i Energjetikës, Sasha Mujoviq, tha për programin e mëngjesit të Radiotelevizionit të Malit të Zi se është bërë gjithçka për revitalizimin e fabrikës së hekurit, por edhe pas vlerësimit pozitiv të kontratës, ekipi juridik i Elektroekonomisë së Malit të Zi do të duhet të vlerësojë nëse gjithçka është në përputhje me thirrjen publike. Kjo histori do të konsiderohet e mbyllur, siç theksoi Mujoviq, kur punëtorët të jenë të kënaqur. 

RADULLOVIQ: PËRFUNDOI RIKONSTRUKTIMI I SEGMENTIT TË RRUGËS MAGJISTRALE NIKSHIQ-PLUZHINË

Rikonstruktimi i segmentit të rrugës magjistrale Nikshiq-Pluzhinë, nga Jasenovo Pole deri në Vidrovan, ka përfunduar, 70 ditë përpara afatit, njoftoi ministri i Transportit dhe Detarisë, Filip Radulloviq. Ai tha se ky projekt mund të shërbejë si shembull i respektimit të detyrimeve kontraktuale në vendin tonë, që duhet të ndjekin të tjerët. Drejtoria e Komunikacionit vëren se javën e ardhshme planifikojnë të hapin ofertë për vazhdimin e rrugës nga Jasenovo Pole deri në Pluzhinë.

KQZ I HOQI MANDATIN FREDI BELERIT, KRYEMINISTRIA LETËR BEGAJT: SHPALLNI DATËN E ZGJEDHJEVE NË HIMARË

Komisioni Qendror i Zgjedhjeve ka marrë këtë të premte vendimin për mandatin e Fredi Belerit, i cili u zgjodh me 14 maj të vitit të kaluar në krye të bashkisë së Himarës, por dy ditë para ditës së zgjedhjeve, ai u arrestua për blerje votash. KQZ pas shqyrtimit të çështjes ka marrë vendimin që Fredi Beleri ti humbet mandatin si kryetar i Bashkisë së Himarës. “Nuk kanë asnjë nxitje jashtë asaj që KQZ e nxit ligji për dekriminalizimin”, tha Celibashi ndër të tjera, teksa shtoi se Komisioni Zgjedhor ka të gjitha kompetencat për të marrë këtë vendim. Jemi në kushtet e humbjes së mandatit të zotit Fredis Dhionisis Beleri, e shpallim të pavlefshëm këtë mandat. Kundër këtij vendimi mund të bëhet ankimim brenda 30 ditëve. Ky vendim do të publikohet në veb faqen e KQZ-së”, u shpreh ai më tej. Tashmë Himara pritet të shkojë drejt zgjedhjeve të reja.

ORBAN TAKON PUTININ NË MOSKË TEKSA BE-JA DISTANCOHET NGA VIZITA

Kryeministri hungarez, Viktor Orban, është takuar me presidentin rus, Vladmir Putin, në Kremlin sot si pjesë e asaj që udhëheqësi hungarez e përshkruan si “mision të paqes”. Por, kjo vizitë në Rusi ka zemëruar zyrtarët e Bashkimit Evropian, të cilët e cilësojnë si vizitë për çështje dypalëshe. Që kur u bë publike një ditë më parë informacioni për këtë vizitë të pakoordinuar, disa zyrtarë të lartë të BE-së kanë intensifikuar deklaratat për të distancuar bllokun nga planet dhe veprimet e Orbanit, ndërkaq Kievi tha se nuk ka dhënë “pajtimin” e tij për asgjë. Vizita u zhvillua më pak se një javë pasi Budapesti mori kryesimin e presidencës së Këshillit të BE-së dhe tri ditë pasi Orban prezantoi një marrëveshje të mistershme armëpushimi gjatë një vizite, po ashtu të befasishme, në Kiev. Orban ka mbajtur raporte të ngushta me Punin dhe u ka rezistuar sanksioneve të BE-së ndaj Rusisë. Ai po ashtu ka refuzuar që t’iu bashkohet përpjekjeve perëndimore për ndihmë ushtarake për Ukrainën, shtet që po përballet me pushtimin e urdhëruar nga Putini më 24 shkurt 2022. Zyrtarët e BE-së kanë shprehur zemërim për këtë vizitë të kryeministrit hungarez. Shefi i diplomacisë së BE-së, Josep Borrell, tha në një komunikatë sot se “kryeministri Viktor Orban nuk ka marrë mandat nga Këshilli i BE-së për ta vizituar Moskën”.

LABURISTËT SIGUROJNË SHUMICË TË QARTË NË ZGJEDHJET BRITANIKE, SIPAS "EXIT POLL"-I

Partia Laburiste ka siguruar një shumicë të madhe të votave në zgjedhjet parlamentare të Britanisë, duke shfrytëzuar një valë zhgënjimi me 14 vjet qeverisje nga Partia Konservatore, ka treguar rezultati i një “exit poll”-i që u publikua menjëherë pas mbylljes së vendvotimeve, në natën e së enjtes. Sipas këtij sondazhi, udhëheqësi i laburistëve, Keir Starmer, do të jetë kryeministri i ardhshëm britanik. Partia e tij, sipas "exit poll"-it, pritet t'i ketë 410 vende në Parlamentin britanik, që përbëhet prej 650 vendesh. Elektorati duket t’i ketë dhënë një goditje të madhe konservatorëve të kryeministrit Rishi Sunak, të cilët ndodhen në pushtet që nga viti 2010. Ata pritet t'i kenë 131 vende në përbërjen e ardhshme të Parlamentit, sipas sondazhit. Në zgjedhjet e vitit 2019, konservatorët fituan 365 vende dhe laburistët 202. Që atëherë, dorëheqjet, përjashtimet dhe disa ngjarje të tjera e reduktuan shumicën e konservatorëve. Aktualisht, konservatorët kanë 344 vende, kurse laburistët 205.Rezultatet e plota të zgjedhjeve të sivjetme priten gjatë orëve të ardhshme.

SHEFI I NATO-S SHPRESON SE UKRAINA DO T’I BASHKOHET ALEANCËS BRENDA 10 VJETËVE

Shefi në largim i NATO-s, Jens Stoltenberg, ka thënë se shpreson se Ukraina do të mund t’i bashkohet aleancës ushtarake brenda dhjetë vjetëve të ardhshme. “Vërtet shpresoj se Ukraina do të bëhet aleat”, tha Stoltenberg duke iu përgjigjur pyetjes për zgjerimin e mundshëm të NATO-s në dhjetë vjetët e ardhshme. Ai u bëri thirrje aleatëve të NATO-s ta furnizojnë Ukrainën me më shumë armë dhe municione për t’i ndihmuar ta mposhtë pushtuesin rus. “Sa më e madhe që të jetë mbështetja, aq më shpejt do të përfundojë lufta”, theksoi ai. Stoltenberg, të cilit i mbaron mandati më 1 tetor, i bëri këto komente në një intervistë për agjencinë gjermane të lajmeve, DPA, e cila u publikua të premten. Liderët e NATO-s do të takohen javën e ardhshme në Uashington, për ta festuar 75-vjetorin e themelimit të aleancës, ku pritet të njoftojnë mbështetje të re për Ukrainën. Ukraina është duke trokitur në dyert e NATO-s qysh prej vitit 2008, kur iu premtua se një ditë do të jetë anëtare. Presidenti i Ukrainës, Volodymyr Zelensky, ndërkohë, ka thënë kohë më parë se Kievi duhet të ftohet për t’iu bashkuar NATO-s në samitin e Uashingtonit, pasi dështoi të marrë ftesën në samitin e 2023-ës në Vilnius, pavarësisht lobimit.

VRITEN PESË PALESTINEZË NGA NJË SULM IZRAELIT NË BREGUN PERËNDIMOR

Pesë njerëz janë vrarë gjatë një operacioni të ushtrisë izraelite në Bregun e uzurpuar Perëndimor gjate ditës se sotme. Ushtria e Izraelit tha në një komunikatë se forcat e saj e rrethuan një ndërtesë në qytetin Xhenin, ku militantët ishin barrikaduar dhe se një avionë luftarak izraelit e goditi këtë zonë.Së paku 12 palestinezë janë vrarë nga sulmet izraelite gjatë kësaj jave në Bregun Perëndimor, ku tensionet janë rritur shumë prej se nisi lufta në Rripin e Gazës në tetor. Trupat e rrethuan ndërtesën “ku terroristët u barrikaduan” dhe filloi një betejë me armë, tha ushtria izraelite. Bregu Perëndimor është duke u përballur me dhunë të rritur prej se nisi lufta në Gazë më 7 tetor. Sipas figurave të Autoritetit Palestinez, së paku 565 palestinezë janë vrarë në Bregun Perëndimor gjatë sulmeve izraelite dhe dhunës me kolonët izraelitë, prej se Hamasi – grupi i shpallur terrorist nga Shtetet e Bashkuara dhe Bashkimi Evropian – kreu sulme në Izrael më 7 tetor. Palestinezët duan që Bregu Perëndimor, Jerusalemi Jugor – zona që u morën nën kontroll nga Izraeli gjatë luftës së Lindjes së Mesme të vitit 1967 – të jenë pjesë e shtetit të tyre të pavarur.

NESËR MOT KRYESISHT I KTHJELLËT

Në Mal të Zi mban mot kryesisht me diell. Frynë erë e dobët deri mesatare nga drejtimet e ndryshme. Temperaturat e shënuara në orën 14: Podgoricë, Herceg Novi e Ulqin 30, Nikshiq 28, Bijello Pole 27, Cetinë e Beranë 26, Plevle e Andrievicë 25, Plluzhinë, Rozhajë, Guci e Petnjicë 24 dhe në Zhablak 18 gradë.

Për nesër pritet mot kryesisht i kthjellët. Gjatë paradites nëpër lugina me mjegull. Do të fryjë erë e dobët deri mesatare nga drejtime të ndryshme. Temperatura e mëngjesit nga 10 deri në 23, kurse më e larta ditore nga 24 deri në 34 gradë.