Nikita Ošujev  [ DW ]

07. 02. 2025. 12:32

Plakati s likom Putina u njemačkoj izbornoj kampanji

Plakate je postavila mala satirična njemačka partija pod imenom „Partija“ (Die Partei). Postavljeni su početkom januara i dio su predizborne kampanje za vanredne izbore za Bundestag koji će se održati 23. februara.

Na plakatima na kojima se vide Olaf Šolc i Vladimir Putin piše: „Najjači glasovi Njemačke za Evropu“ i „Glasajte za Partiju – ne prepuštajte Evropu Lajen!“ To „Lajen“ zapravo je igra riječi, što na njemačkom može da znači i „laik“ – nevješt, amater – i trebalo bi da bude aluzija na prezime predsjednice Evropske komisije Ursule fon der Lajen. Dakle, u slobodnom prevodu: „Ne prepuštajte Evropu amaterima!“

Partija trenutno nije zastupljena ni u Bundestagu, ni u pokrajinskim parlamentima. Međutim, 2020. i 2021. u Bundestagu je imala jednog predstavnika, Marka Bilova. U Evropskom parlamentu Partija pak ima dva poslanika.

Ovogodišnji slogani na njenim ironičnim predizbornim plakatima su: „Bez Njemačke nema svjetskog rata!“, „Glasajte za Partiju – veoma je dobro!“ ili na primjer „Ne zajebavaj se sa svojim krstom!“

Ovaj posljednji slogan ispisan je na plakatu koji prikazuje dugokosog čovjeka sa krunom od trnja na glavi – što je aluzija na Isusa. Igra sa riječju „krst“ ukazuje na to koga ćete da „zaokružite“ na saveznim izborima, odnosno da stavite krstić u kvadratić ispred imena.

Šta znače plakati s Putinom?

Bonski ogranak Partije je u odgovoru na upit DW saopštio da su plakati s fotografijama Šolca i Putina prvi put korišćeni u junu 2024. uoči izbora za Evropski parlament. „Oni ilustruju najjače glasove Njemačke kada je riječ o oblikovanju Evrope“, kažu iz Partije. Ističu da je to ironija, ali i kritika Šolca.

Partija Putina naziva „šupkom“ i ističe za DW da je on „započeo agresorski rat“. Ona smatra da Šolc pomaže Putinu tako što ne šalje dovoljno oružja Ukrajini, ali naglašava da njeni plakati s Putinom vise samo u Bonu, a ne u čitavoj Njemačkoj.

Putin i na plakatima drugih stranaka

Iako Putin nije prikazan na izbornim plakatima drugih njemačkih stranaka, on se pominje na nekima – na primjer na plakatima stranke Volt Njemačka. To je njemački ogranak panevropske partije Volt Evropa, koja se zalaže za veću integraciju unutar Evropske unije. Stranka trenutno ima pet mandata u Evropskom parlamentu, ali nije zastupljena u njemačkom Bundestagu niti u pokrajinskim parlamentima.

„Hajde da vratimo budućnost s jakom Evropom protiv Trampa i Putina“, poručuje se sa jednog od njihovih predizbornih plakata.

„Zaustavite Putina i NATO! Nema isporuke oružja!“, napisano je na plakatu ultraljevičarske Marksističko-lenjinističke partije Njemačke (MLPD). Ni ta stranka nije zastupljena u Bundestagu, a ni u pokrajinskim parlamentima.

Ta stranka je, inače, pod nadzorom Saveznog ureda za zaštitu ustavnog poretka. „Ciljevi MLPD su usmjereni protiv suštinskih komponenti slobodnog demokratskog osnovnog poretka“, obrazloženje je dato na sajtu Ministarstva unutrašnjih poslova njemačke pokrajine Sjeverna Rajna-Vestfalija. Odlikuju ih „tri ključne tačke: revolucija, diktatura proletarijata i komunizam“, navode iz Saveznog ureda za zaštitu Ustava.

Rat u Ukrajini nije fokus predizborne kampanje

DW je takođe pregledao predizborne plakate drugih stranaka u nekoliko njemačkih gradova, kao i predizborne reklame na internetu i društvenim medijima, ali nije pronašao da još neko pominjanje Putina ili rat koji je Rusija pokrenula protiv Ukrajine.

Od stranaka zastupljenih u Bundestagu, samo Savez Sara Vagenkneht na predizbornom plakatu poručuje „Naša zemlja želi mir“, ali bez objašnjenja šta je tačno ta želja i da li je ta želja povezana s Ukrajinom.

„To što je tema Ukrajine skoro potpuno nestala iz predizborne kampanje je poražavajuće. Ne smijemo dozvoliti da se to dogodi“, kritikovao je 29. januara na njemačkom na društvenoj mreži Iks Andrij Melnik, bivši ukrajinski ambasador u Berlinu.

On je nedavno postao stalni predstavnik svoje zemlje pri Ujedinjenim nacijama, a poznat je i po svojim kontroverznim izjavama o Stepanu Banderi, kojeg jedni u Ukrajini vide kao fašistu, a drugi kao heroja.

*ovaj članak je najpre objavljen na ruskom, a preuzet je s nemačkog jezika