Bernd Rigert  [ DW ]

04. 09. 2024. 14:49

Desna skretanja? Njemačka u stvari samo prati evropski trend

Nakon pokrajinskih izbora u Tiringiji i Saksoniji, na kojima je desno-populistička, a djelimično i desno ekstremna Alternativa za Njemačku (AfD) bila najjača ili druga najjača stranka, italijanske novine „La Republika“ napisale su da Njemačku preplavljuje neonacistički talas. Francuske novine „Mond“ ocjenjuju da je ishod izbora „uznemirujući“ zbog nacionalsocijalističke prošlosti Njemačke i njene današnje težine u Evropi. Španske novine „El Pais“ ukazuju da je to ozbiljno upozorenje: postoji opasnost da se Njemačka pretvori u političkog bolesnika Evrope.

U tim zemljama se izražava zabrinutost, iako su se baš u tim trima velikim članicama Evropske unije, Italiji, Francuskoj i Španiji – a i ne samo tamo, već odavno etablirale desno ekstremne i populističke tendencije.

S pokrajinske na savezni nivo?

Uspon AfD-a sigurno se neće nastaviti samo na pokrajinskom nivou, ta stranka bi mogla da trijumfuje i na izborima na saveznom nivou iduće godine. Prema aktuelnim ispitivanjima javnog mnjenja, AfD je druga najjača stranka (sa 16 do 19 odsto podrške) iza Hrišćansko-demokratske unije (31 do 34 odsto).

Nik Alipur s internet-platforme „Euraktiv“ ukazuje da Njemačka nije izuzetak u Evropi, već da slijedi evropski trend. „Njemačka nije preteča. To smo imali u Holandiji, u Italiji, u Francuskoj, u Švedskoj. Njemačka slijedi trend i nije izuzeta od toga“, ocijenio je dopisnik „Euraktiva“ u svom najnovijem podkastu.

U Italiji su na vlasti desni ekstremisti

Određene paralele postoje u Italiji. Tamo je nekad regionalna stranka Lega već više puta učestvovala u nacionalnoj vladi. Ona je istovremeno jaka u sjevernim italijanskim regionima, a iz te stranke su predsjednici pokrajina Veneta, Lombardije, Furlanije-Julijske krajine i Umbrije. Zabrane sklapanja koalicija s desničarima, kao što je to slučaj u Njemačkoj, tamo nikad nije bilo.

Lega je vladala zajedno s demohrišćaninom Silviom Berluskonijem. Lega je kao manji partner vladala čak i s lijevim populistima iz pokreta Pet zvezdica. To je kao kada bi u Njemačkoj koaliciju formirali AfD i ljevičarski Savez Sare Vagenkneht. Od 2022. su desno-ekstremna Braća Italije nadmašili Legu. Na nacionalnim izborima oni su postali najjača stranka, ispred Lege. Otada je premijerka Đorđa Meloni, koja predvodi desnu koaliciju u kojoj su Braća Italije, Lega i demohrišćani.

U Austriji bi kancelar mogao biti iz FPÖ

Ni u Austriji nema zabrane sklapanja koalicija s desničarima. Naprotiv. Desno-ekstremna Slobodarska partija Austrije (FPÖ) već 1980-ih godina vladala je u koaliciji sa socijaldemokratama. Od 2000. su onda postojale četiri vlade u koaliciji FPÖ s demohrišćanima.

FPÖ je krenuo kao regionalna stranka u Koruškoj. Nakon više raskola i novih programskih orijentacija – slično kao i kod njemačke AfD – u međuvremenu FPÖ ima poslanike u devet pokrajinskih parlamenata, a u tri savezne pokrajine i učestvuje u vladi.

Uprkos brojnim skandalima, FPÖ je, prema ispitivanjima javnog mnjenja, uoči izbora za nacionalni parlament koji se održavaju krajem septembra, najjača stranka s 27 do 31 odsto glasova. Na drugom mjestu su demohrišćani. Šef FPÖ Herbert Kikl smatra da ima dobre izglede da postane „narodni kancelar“ Austrije, kako on to kaže. Njemačka AfD i austrijska FPÖ prisno sarađuju. Kikl bi mogao da bude uzor šefu tirinške AfD Bjernu Hekeu.

Francuska između ekstremnih polova

U Francuskoj se još drže zabrane sklapanja koalicija. Francuski predsjednik Emanuel Makron ne želi da sarađuje ni sa desno-ekstremnim Nacionalnim okupljanjem, niti sa lijevo-ekstremnim Novim narodnim frontom. Zato nakon prijevremenih izbora održanih u julu još nema većine u francuskom parlamentu, jer Makron ne uspijeva da pronađe partnere za koaliciju. To pomalo podsjeća na stanje u pokrajinskim parlamentima u Erfurtu i Drezdenu.

U Francuskoj je Nacionalno okupljanje prošlo lošije nego što se očekivalo: tek na trećem mjestu. Ali ta stranka, nastala iz Nacionalnog fronta, posljednjih godina bivala je sve jača. Ona je zastupljena u brojnim opštinama i regionalnim parlamentima, ali nigdje ne može sama da vlada. Marin Lepen, bivša šefica te stranke, na svakim je predsjedničkim izborima bivala sve jača. Ona želi da se 2027. ponovo kandiduje i ima dobre izglede da iz trećeg pokušaja (nakon 2017. i 2022.) i postane francuska predsjednica.

U Španiji su desni ekstremisti u regionalnim vladama

U Španiji se socijaldemokrate drže na vlasti, s manjinskom vladom koju tolerišu lijeve separatističke stranke. Desno-ekstremna stranka Voks već godinama stalno raste i na nivou čitave zemlje je na trećem mjestu. U julu je došlo do spora s demohrišćanima s kojima je vladala u više od 100 opština i pet regiona. O zabrani sklapanja koalicija nikad nije bilo ni govora.

U julu je šef te stranke Santijago Abaskal objavo razlaz s demohrišćanima, jer su oni pristali na prihvat migranata s Kanarskih ostrva na španskom kopnu. Da li je taj razlaz bio samo prividan ili stvaran – tek će se pokazati. Jer, Voks i demohrišćani zapravo žele zajedno da smijene socijaliste na nacionalnom nivou.

Mađarska reforma

Desni ekstremisti su zastupljeni u vladama i u Holandiji, Švedskoj, Finskoj i drugim članicama EU. U Mađarskoj je desno-nacionalistička do desno-ekstremna stranka Fides već 14 godina bez prestanka na vlasti. Iz nje dolazi mađarski premijer. Viktor Orban je tokom svoje duge vladavine i stranku i Mađarsku radikalizovao i krenuo u sukob s Evropskom unijom. Mađarska je trenutno evropska država s najstabilnijom desno-populističkom vladom.

U Poljskoj je ta faza prošla. Tamo su demohrišćani nakon izbora prošle godine smijenili desno-ekstremnu stranku PiS.

Populizam, ali lijevi, savladala je i Grčka. Lijevo-ekstremnu vladu Sirize, koja je bila u koaliciji s desno-ekstremnom strankom Anel, zamijenila je 2019. demohrišćanska vlada.

Nikakav izuzetak na istoku Njemačke

U brojnim evropskim zemljama uočava se, dakle, trend rasta desno-ekstremnih stranaka, a to je posljedica politike prema migracijama, ekonomskih kriza i opšteg osjećaja brojnih birača da su ostavljeni na cjedilu.

Bivši predsjednik Njemačkog Bundestaga, socijaldemokrata Volfgang Tierze, ne uočava težnju prema ekstremima samo u Tiringiji i Saksoniji. AfD je jaka i u Bavarskoj i Hesenu, dakle u pokrajinama koje nijesu s područja bivšeg DDR-a. A to se vidi i u Evropi, ocijenio je Tierze: „To ne važi samo za istok Njemačke, nego i za Holandiju, Francusku, Italiju i skandinavske zemlje. Svuda doživljavamo jačanje ekstremnih stranaka, populističkih stranaka. Kad bi to bila izuzetak samo na istoku Njemačke, onda bi smo mgli da se smirimo i da kažemo: to može da se preživi. Ali ne, to je tektonski poremećaj.“

*ovaj članak je najpre objavljen na nemačkom jeziku