S.V.

ABA LIGA

SC Derbi nakon drame pao u Splitu

Nakon nevjerovatne drame i 45 minuta košarke, SC Derbi je pao u Splitu 88:85, pa ni u trećem pokušaju ove sezone nije stigao do trijumfa na gostujučem terenu u ABA ligi. U finišu meča dogodile su se i neke sumnjive sudijske odluke. Naš tim je u regularnom dijelu meča imao dva bacanja za pobjedu, ali Mirković je bio samo polovičan sa penala, pa se otišlo u produžetke, gdje je na kraju slavio domaćin.

SC Derbi je predvođe Nilom bolje otvorio meč i sredionom tog dijela igre stekao pet poena prednosti 11:6. Međutim, razigrao se potom Ljubići koji je trojkom i zakucavanjem donio izjednačenje domaćinu 13:13.

Finiš uvodne dionice pripao je "studentima", koji su serijom 6:0 vratili pet poena viška, a konačan rezultat nakon 10 minuta igre postavio je Tišma 19:16.

Drobnjak je trojkom otvorio drugu četvrtinu i donio rekordnih šest poena prednosti našem timu 22:16.

Ta razlika je bila u još dva navrata, da bi nakon poena Mirkovića bilo plus osam, a nedugo zatim i plus devet 34:25. Kod tog rezultata SC derbi je propustio šansu da se odvoji na dvocifrenu prednost, što su trojkama kaznili Šorter i Škara 34:31, na ulasku u posljednji minut.

Ni to nije bio kraj serije Splita, jer je Vuko pogodio u posljednjim sekundama, pa je SC Derbi na poluvrijeme otišao samo sa plus jedan . 34:33.

Nikolić je zakucao na startu drugog dijela, ali je uslijedila serija Splita 9:0 za vođstvo 42:36, što je natjeralo Mijovića da pozove tajm-aut.

Minut odmora je urodio plodom, jer je SC Derbi na krilima Drobnjaka napravio seriju 10:0 i poveo 46:42, sredionom treće dionice.

Split je, međutim, na dva i po minuta prije kraja tog perioda nakon bacanja Tišme izjednačio 53:53.

Nastavila se igra na mahove, pa je finiš tog dijela igre pripao SC Drrbij,koji se serijom 7:0 odvojio na 60:53, a u posljednju četvrtinu ušao sa plus pet 63:58.

Plus sedam naša ekipa je imala na startu odlučujućeg perioda, da bi Split nakon poena Šortera prišao na 67:64, na nešto malo više od šest minuta prije kraja.

U posljednja četiri minuta ušlo se sa neriješenim rezultatom 70:70. Uslijedili su promašena bacanja na obje strane, da bi Kapusta trojkom donio minimalnu prednost 73:72, na nešto malo manje od dva minuta do kraja.

Nil je na minut do kraja donio plus dva "studentima", ali je odmah u narednom napadu Tišma pogodio trojku 77:76. Potom izabranici Petra Mijovića nisu iskoristili napad, pošto su promašili Mirković i Nil.

Nakon toga fauliran je Kapusta, koji je na 17 sekundi do kraja promaši oba bacanja.

SC Derbi je dobio napad za pobjedu. Nil je promašio sa poludistance, ali je Mirković fauliran nakon ofanzivnog skoka, na 1.2 sekunde do kraja. Bio je polovičan sa linije bacanja, pa se otišlo u produžetak 77:77.

Nastavila se i u dodatnih pet minuta igra koš za koš. Kod rezultata 85:83, Mirković je promašio još dva bacanja, ali to nije kaznio Split, pa se sa tim rezultatom ušlo u posljednji minut. Nil je onda pogodio i donio izjednačenje 85:85. Sudije su gledale snimak da vide da li je bio i faul, koji je bio očigledan. Međutim, samo su dosudili dva bacanja.

Prethodno nije dosuđen ni faul u napadu Šorteru...

Dramu je na kraju okončao Jordano koji je pogodio trojku za 88:85. Nil je pokušao sa zvukom sirene da odvede meč u novi produžetak, ali nije uspio...

On je ujedno bio najefikasniji kod našeg tima sa 23 poena, na drugoj strani se istakao Šorter sa 24.