S.V.

Vučević: Uspjeli smo da se izborimo sa agresivnom igrom Kameruna

Najbolji igrač Crne Gore Nikola Vučević kazao je da je ekipa u prvom dijelu upala u ritam Kameruna, ali da je uspjela na vrijeme da se trgne i stigne do važne pobjede.

Igrač Čikaga je danas upisao dabl-dabl učinak, sa 14 poena i 11 skokova.

"Dosta teška utakmica, u prvom dijelu smo igrali u njihovom ritmu, što nama ne odgovara. Njihova agresivna igra nas je natjerala da donesemo neke ishitrene odluke u napadu,zbog toga smo dali mali broj poena u prvih 20 minuta", kazao je Vučević.

Nastavak je donio bolju igru naše selekcije, poruka je asa Čikaga.

"To smo ispravili u drugom dijelu, pojačali smo i defanzivu i iz takve igre smo stigli do lakih poena. Žao mi je što utakmicu nismo priveli na mirniji način, nakon što smo stekli deset poena prednosti. Čestitke Kamerunu, igrali su sa dosta energije, pogađali su i dosta šuteva, ali najvažnija je pobjeda. Nadam se da idemo u polufinale", kazao je Vučević.

Marko Simonović, centar Crne Gore, kazao je da je ekipa bila umorna, jer je drugi dan uzastopno igrala utakmicu.

"Nije bilo lako, juče smo se puno potrošili protiv Brazila, a već danas smo morali opet na teren. Sada imamo dva dana da se odmorimo i nadam se dobro pripremimo za polufinale. Najvažnije je da smo pobijedili", poručio je naš centar.