N.R. [ Beta ]

Splitska policija privela više od 100 osoba zbog tuče navijača Dinama i Hajduka

Policija u Splitu privela je danas više od 100 osoba zbog tuče navijača Dinama i Hajduka u gradskoj četvrti Pujanke uoči prvenstvene utakmice dva fudbalska kluba, a nekoliko ljudi zatražilo je ljekarsku pomoć.

Tuča se dogodila uoči utakmice Hajduka i Dinama, koja počinje u 16 časova. Policija je taj duel proglasila utakmicom visokog rizika, prenijela je Hina.

Nakon što je policija brzim dolaskom na Pujanke sprečila dalji sukob, na mjestu događaja zadržan je veći broj navijača koji su učestvovali u tuči, naveli su iz splitske policije.

Do 11 sati policija je privela više od 100 navijača, na mjestu događaja će se obaviti uviđaj i sprovešće se kriminalističko istraživanje.

Nekoliko osoba je zatražilo ljekarsku pomoć, saopštili su iz Policijske uprave splitsko-dalmatinske.

Prema navodima lokalnih medija, na splitske Pujanke jutros je stiglo pedesetak navijača Dinama, Bed Blu Bojsa, koji su se sukobili sa navijačima Hajduka.

U hrvatskom šampionatu vodi se neizvjesna borba za titulu, prva na tabeli je Rijeka koju predvodi Radomir Đalović sa 56 bodova, koliko ima i drugoplasirani Hajduk, a Dinamo je treći sa 55 bodova.