Srđa Vuković

SERIJA A

Manćini presudio Laciju, Roma ne odustaje od plasmana u LŠ

Pogotkom Đanluke Manćinija u 45. minutu, Roma je slavila u gradskom derbiju protiv Lacija 1:0 i zadržala šanse za četvrto mjesto koje vodi u Ligu šampiona.

Lacio je imao inicijativu tokom većeg dijela prvog dijela, ali je lopta u finišu prvog dijela završila u njegovoj mreži.

Igrao se 45. minut, kada je Dibala sjajno izveo korner, a Manćini ostao neobjašnjivo sam na sedam-osam metara od gola i glavom matirao golmana Mandasa.

Lacio je pokušavao na sve načine u nastavku da dođe do izjednačenja. Anderson je iz slobodnjaka šutirao malo preko prečke, zaprijetio je i Pedro, ali rezultat se nije mijenjao.

Crnogorski reprezentativac Adam Marušić bio je na terenu do 80. minuta, kada ga je zamijenio Pelegrini.

Treba istaći da su i navijači dva tima. kao i uvijek napravili fenomenalnu atmosferu.

"Vučica" je sada peta sa 55 bodova, dva manje, uz meč više, od četvoroplasirane Bolonje.

Lacio je sedmi sa 46 poena.