[ rtcg.me/Beta ]

POLUFINALE LŠ

"Građani" slavili preokretom u Parizu

Fudbaleri Pari Sen Žermena izgubili su od Mančester sitija u Parizu 1:2 (1:0) u prvom meču polufinala Lige šampiona.

PSŽ je poveo u 15. minutu golom Markinjoša, izjednačio je Kevin de Brujne u 64, a pobjedu Sitiju donio je Rijad Marez u 71. minutu.

PSŽ je bio bolji u prvom poluvremenu, a zaprijetio je već u drugom minutu preko Nejmara, ali je golman Sitija bio na pravom mjestu.

Francuski tim je poveo u 15. minutu golom Markinjoša. Poslije kornera koji je izveo Anhel di Marija, kapiten PSŽ-a je bio najbolji u skoku i glavom je poslao loptu u mrežu.

Siti je najbolju priliku u prvom poluvremenu imao u 42. minutu kada je Fil Foden šutirao sa desetak metara, ali direktno u Kejlora Navasa.

Engleski tim je izjednačio u 64. minutu pogotkom De Brujnea. Belgijanac je centrirao na drugu stativu, loptu niko nije dodirnuo što je prevarilo Navasa i ona je na kraju završila iza njegovih leđa.

Siti je u tim momentima preuzeo kontrolu na terenu i samo sedam minuta kasnije stigao je do potpunog preokreta. Marez je izveo slobodan udarac sa više od 20 metara, lopta je prošla kroz živi zid i završila u mreži.

Stvari su se dodatno zakomplikovale za PSŽ kada je Idrisa Gej u 77. minutu zaradio direktan crveni karton zbog oštrog starta nad Ilkajom Gundoganom.

Do kraja meča je bilo uzbuđenja, prekida i oštrih startova, ali se rezultat nije mijenjao pa Siti na revanš koji je na programu 4. maja nosi veliku prednost.

U drugom polufinalu sastaju se Real Madrid i Čelsi, a prvi meč tog duela završen je neriješeno 1:1.

Tok meča:

90' Kraj meča!

86' Žuti karton za De Brujnea.

83' Nova izmjena kod Parižana. Erera umjesto Paredesa.

79' Prva izmjena u PSŽ-u. Danilo ulazi umjesto Di Marije.

77' Gej dobio direktan crveni karton zbog oštrog starta nad Silvom.

74' Žuti karton za Nejmara.

71' GOOOL! 1:2 - Preokret u Parizu. Marez je uspio da provuče loptu kroz živi zid i savlada golmana PSŽ-a.

70' Žuti karton za Paredesa.

64' GOOOL! 1:1 - Uz malo više sreće, De Brujne je uspio centaršutom u kazneni prostor da zbuni Navasa i zatrese mrežu PSŽ-a.

56' Nova velika prilika za PSŽ. Mbape je lomio odbranu po desnoj strani i ubacio oštru loptu duž gol linije, ali Verati je bio kratak.

46' Počelo drugo poluvrijeme.

45' Kraj prvog poluvremena.

42' Najbolja šansa za Siti. Oduzeli su loptu ispred kaznenog prostora PSŽ-a i krenuli u kontranapad, ali Foden je šutirao pravo u golmana Sitija.

30' Prvi žuti karton za Kansela.

28' PSŽ opasan iz prekida. Nejmar je ubacio loptu iz kornera sa lijeve strane, ali Paredes je promažio veliku šansu.

21' Prva prilika za Siti. Silva je dugu loptu skrenuo ka bližem uglu gola, ali je Navas uspio da izbije loptu u korner.

15' GOOOL! 1:0 - Markinjoš je glavom uspio da matira Edersona nakon sjajnog centaršuta Di Marije.

13' Prva dobra prilika za PSŽ. Dobra kombinacija domaćih u kaznenom prostoru i odličan šut Nejmara pod prečku, ali Ederson brani i šalje loptu u korner.

1' Utakmica je počela.

PSŽ: Navas, Florenci, Markinjoš, Kimpembe, Baker, Paredes, Gej, Di Marija, Verati, Nejmar, Mbape.

Mančester siti: Ederson, Voker, Stons, Dias, Kanselo, De Brujne, Rodri, Gundogan, Marez, Foden, Bernardo Silva.

Stadion: "Park prinčeva" (Bez gledalaca)

Sudija: Feliks Brih (Njemačka)

Podsjetimo, duel Reala i Čelzija u Madridu završen je bez pobjednika, 1:1.