Ditari 02.12.2025

Ditarin e përgatiti, Violeta Gjokaj

ARRESTOHET FEDERICA MOGHERINI, DYSHOHET PËR MASHTRIM NË PROJEKTE TË BE-SË

Autoritetet belge kanë arrestuar ish-shefen e diplomacisë evropiane, Federica Mogherini, nën dyshimin për mashtrim. Së bashku me të është arrestuar edhe ish-sekretari i përgjithshëm i Shërbimit Evropian të Veprimit të Jashtëm (EEAS), diplomati italian Stefano Sannino. Sipas Zyrës së Prokurorit Publik Evropian (EPPO), dyshimet lidhen me formimin e Akademisë Diplomatike të Bashkimit Evropian – një program trajnimi për diplomatë të rinj, i cili iu dha Kolegjit të Evropës në Belgjikë nga Shërbimi Evropian i Veprimit të Jashtëm, gjatë periudhës 2021–2022, pas një procedure tenderimi. Autoritetet po hetojnë nëse Shërbimi Evropian i Veprimit të Jashtëm ka shkelur rregullat e tenderimit duke ndarë informacione me Kolegjin e Evropës para se projekti t’i jepej zyrtarisht këtij institucioni. Në orët e mëngjesit është bastisur selia e Shërbimit Evropian të Veprimit të Jashtëm, si dhe ndërtesa e Kolegjit të Evropës, i cili financohet pjesërisht nga institucionet e BE-së. Zyra e Prokurorit Publik Evropian ka konfirmuar bastisjet dhe identitetin e personave të ndaluar. Bastisje janë zhvilluar gjithashtu edhe në shtëpitë private të individëve të arrestuar. Zyra e Prokurorit Publik Evropian ka kërkuar këto veprime si pjesë e një hetimi për mashtrim të dyshuar në lidhje me një projekt trajnimi të financuar nga BE për diplomatë të rinj. Federica Mogherini u emërua rektore e Kolegjit të Evropës menjëherë pasi përfundoi mandatin si shefe e diplomacisë evropiane.

VESNA MEDENICA DËNOHET ME NJË VIT E NËNTË MUAJ BURGIM

Ish-kryetarja e Gjykatës Supreme, Vesna Medenica, u dënua me një vit e nëntë muaj burg, ndërsa gjyqtarja e Gjykatës Tregtare, Milica Vllahoviq Millosavleviq, mori një dënim prej gjashtë muajsh, tha Gjykata e Lartë për Portalin e RTMZ. Vendimi u dha nga gjyqtari i Gjykatës së Lartë në Podgoricë, Branisllav Lekoviq, i cili deklaroi se gjykata padyshim kishte vërtetuar përgjegjësinë e tyre penale. Prokuroria kishte kërkuar tre vjet burg për Medenicën për këtë vepër penale. Gjykata vendosi që Medenica e kishte nxitur Vllahoviq Millosavleviq të abuzonte me detyrën e saj zyrtare. Aktakuza pretendonte se Medenica, si kryetare e Gjykatës Supreme, kishte ndikuar të gjyqtares që të merrte një vendim në favor të kumbarit të saj, Rade Arsiq, në dëm të kompanisë ruse "Ten Corporation".Prokuroria pretendoi se kjo kishte penguar mbledhjen e kërkesave të kompanisë ruse dhe kërkoi dy vjet burg për gjyqtarin e pezulluar Vllahoviq Millosavleviq.

ZYRA E PROKURORIT TË SHTETIT URDHËROI NJË AUTOPSI TË TË PORSALINDURIT DHE KËRKOI DËSHMI SHTESË NGA EKSPERTËT E BEOGRADIT

Prokuroria e Lartë Shtetërore në Podgoricë ka nxjerrë urdhër për autopsinë e trupit në rastin e hapur për shkak të vdekjes së një të porsalinduri në Spitalin e Përgjithshëm në Nikshiq. Prokuroria ka kërkuar gjithashtu ekspertizë mjeko-ligjore nga Instituti i Mjekësisë Ligjore i Fakultetit të Mjekësisë të Universitetit të Beogradit, për dhënien e ekspertizës, me qëllim të përcaktimit të shkakut të vdekjes së të porsalindurit.

RADUNOVIQ: ËSHTË E RËNDËSISHME TË THEKSOHET SE NUK ËSHTË E NEVOJSHME TË ZGJIDHEN TË GJITHA RASTET BRENDA AFATIT TË CAKTUAR

Ministri i Planifikimit Hapësinor, Sllaven Radunoviq, ka deklaruar se afati për dorëzimin e elaborateve tek Drejtoria për Patundshmëri vlen vetëm për ndërtuesit ilegalë që nuk e kanë të regjistruar objektin në listën e pronësisë, prandaj nuk ka të bëjë me të gjithë pronarët dhe nuk përfshin një numër të madh lëndësh, siç paraqitet shpesh në opinion. Duke iu përgjigjur pyetjeve të deputetëve në Kuvend, Radunoviq tha se ekziston një iniciativë e Bashkësisë së Komunave për të zgjatur afatin me rreth gjashtë muaj. Nëse vlerësohet se një zgjatje është e nevojshme, Ministria do ta shqyrtojë atë. Është e rëndësishme të theksohet se nuk është e nevojshme të zgjidhen të gjitha rastet brenda afatit të caktuar, por vetëm të dorëzohen elaboratet te shërbimet kadastrale lokale, të cilat më pas do t'i përpunojnë ato me ritmin e tyre. Ai thotë se nuk ka arsye që ata që mendojnë të legalizojnë ndërtimet e tyre, të mos e bëjnë këtë brenda një afati prej pesë vitesh.

SHIMUN: SISTEMI ËSHTË I QËNDRUESHËM DHE KA MJAFTUESHËM BARNA DHE MATERIAL MJEKËSOR TË DOMOSDOSHËM

Komisioni për Shëndetësi, Punë dhe Mirëqenie Sociale ka vazhduar seancën konsultative me temë: Gjendja financiare në sistemin shëndetësor të Malit të Zi, me fokus në çmimet dhe mungesën e barnave. Ministri i Shëndetësisë, Voisllav Shimun, vlerësoi se sistemi është i qëndrueshëm dhe se ka mjaftueshëm barna dhe material mjekësor të domosdoshëm. Mali i Zi kurrë nuk ka pasur më shumë terapi, sidomos për kanceret dhe sëmundjet kardiovaskulare. Sa i përket barnave, kemi përgatitur lisat për rreth 300 barna, përveç 1 mijë e 710 që janë në listën bazë. Çmimet e barnave nga lista i përcaktohen nga Cinmed-i në bazë të vendeve referencë: Serbisë, Rumanisë dhe Çekisë. Në këtë mënyrë janë rregulluar çmimet për më shumë se 1 mijë e 600 barna, kurse për vetëm 130 kërkohet pagesë shtesë. Kjo Qeveri ka miratuar një akt nënligjor edhe për barnat jashtë listës dhe po punohet në këtë drejtim, theksoi ministri.

KOMISIONI EVROPIAN PËRSHËNDETI PROCESET REFORMUESE TË MALIT TË ZI NË SHKENCË DHE INOVACION

Ministrja e Arsimit, Shkencës dhe Inovacionit, Angjela Jakshiq-Stojanoviq, tha se Mali i Zi po hyn në një cikël të ri zhvillimi në të cilin reformat në shkencë, inovacion dhe arsim do të kurorëzohen me Strategjinë e re të Specializimit të Mençur 2026-2031, duke e drejtuar ekosistemin e inovacionit dhe kërkimit shkencor drejt Zonës Evropiane të Kërkimit. Jakshiq-Stojanoviq u takua në Bruksel me Komisioneren Evropiane për Startup-et, Kërkimin dhe Inovacionin, Ekaterina Zaharieva. Takimi konfirmoi partneritetin e fortë të Malit të Zi me Komisionin Evropian dhe përputhjen e lartë të reformave tona me prioritetet evropiane në fushën e shkencës, inovacionit dhe zhvillimit të talenteve.

Një theks i veçantë i takimit, siç deklarojnë ata, ishte në forcimin e pjesëmarrjes së Malit të Zi në programin Horizon Europe.

Jakshiq-Stojanoviq prezantoi masat e zbatuara nga Ministria për të përmirësuar përgatitjen e propozimeve të projekteve, për të rritur konkurrueshmërinë e studiuesve dhe startup-eve, si dhe për të forcuar lidhjet me rrjetet evropiane të inovacionit, duke përfshirë EIC dhe EIT.

Ministri e informoi gjithashtu Komisioneren rreth projektit "Stacioni M" - një kampus i ri kombëtar inovacioni që do të bashkojë mbështetje shumëfazore për startup-et, lidhje me partnerë dhe investitorë ndërkombëtarë, si dhe zhvillimin e aftësive brenda prioritetit S3.

Zaharieva përshëndeti proceset e reformave që Mali i Zi po zbaton, veçanërisht në integrimin e politikave kombëtare me instrumentet evropiane, dhe vlerësoi vendosmërinë e Qeverisë për të përmirësuar pjesëmarrjen e komunitetit shkencor dhe inovativ në programet evropiane.

DUKAJ: SIGURIA DIXHITALE ËSHTË NJË PARAKUSHT PËR SOVRANITETIN E NJË SHTETI MODERN

Siguria dixhitale nuk është luks, por një parakusht për sovranitetin e një shteti modern, tha Ministri i Administratës Publike Marash Dukaj në një konferencë kushtuar forcimit të bashkëpunimit rajonal në fushën e sigurisë kibernetike.

Duke folur në konferencën me titull "Analiza dhe Strategjia për Ballkanin Perëndimor - WB3C", Dukaj theksoi se siguria kibernetike sot përfaqëson një nga faktorët kryesorë në stabilitetin e institucioneve, qëndrueshmërinë e ekonomisë dhe sigurinë e shoqërive.

Ministria e Administratës Publike njoftoi se Dukaj kujtoi se tre vjet më parë, Mali i Zi u ekspozua ndaj njërit prej sulmeve kibernetike më të rëndësishme në historinë e tij.

Ai theksoi se që atëherë, janë bërë një sërë hapash kyç në fushën e zgjidhjeve normative, kushteve teknike, si dhe kapaciteteve për përmirësimin e kompetencave të punonjësve.

Dukaj tha se këto rezultate së shpejti do të mbështeten në themelimin e Agjencisë së Sigurisë Kibernetike, e cila do të jetë institucioni qendror përgjegjës për mbrojtjen e infrastrukturës kritike, vendosjen e standardeve dhe mbikëqyrjen, dhe kështu do të përfaqësojë një element kyç të rezistencës dixhitale sistemike të Malit të Zi.

Duke folur për inteligjencën artificiale, Dukaj theksoi se ajo sjell mundësi, veçanërisht kur zbatohet në një mënyrë të përgjegjshme dhe strategjike.

Ai tha se Mali i Zi mbetet një partner i përkushtuar dhe i besueshëm i rajonit, BE-së dhe NATO-s në forcimin e sigurisë së përbashkët kibernetike.

KËSHILLI PËRSHËNDETI PROGRESIN E RËNDËSISHËM TË MALIT TË ZI NË RRUGËN E REFORMAVE NË 33 KAPITUJ TË HAPUR DHE 12 TË MBYLLUR PËRKOHËSISHT

Raporti vjetor i Komisionit Evropian mbi zgjerimin tregoi se Këshilli evropian është serioz në lidhje me hapjen e derës për anëtarët e rinj deri në përfundimin e mandatit të tij pesëvjeçar në fund të vitit 2029, thuhet në draft-raportin, i cili duhet të miratohet më 16 dhjetor. Këshilli përshëndeti progresin e rëndësishëm të Malit të Zi në rrugën e reformave në 33 kapituj të hapur dhe 12 të mbyllur përkohësisht. Thuhet se Mali i Zi duhet të vazhdojë progresin në rrugën e reformave, veçanërisht në aspektin e drejtësisë, lirisë së shprehjes, lirisë së medies, luftës kundër korrupsionit dhe krimit të organizuar dhe administratës publike. Është vlerësuar përparim në fushën e politikës së azilit dhe menaxhimit të emigracionit, ndërsa u theksua nevoja për harmonizim të plotë të politikave të vizave me ato evropiane. Lidhur me politikën ekonomike, Këshilli inkurajon Malin e Zi të zbatojë reformat, të ulë borxhin publik dhe të vazhdojë përpjekjet për të forcuar menaxhimin financiar dhe transparencën.

PROCESIN E BERLINIT ËSHTË I RËNDËSISHËM PËR VENDIN, POR EDHE PËR BALLKANIN PERËNDIMOR

Kryesimi i Malit të Zi me Procesin e Berlinit është i rëndësishëm për vendin, por edhe për Ballkanin Perëndimor, veçanërisht në kontekstin e politikës së zgjerimit, sfidave të sigurisë dhe nevojës për një bashkëpunim më të thellë rajonal, është bërë e ditur nga Ekipi Punues për koordinimin e aktiviteteve brenda këtij procesi. Ata kanë rikujtuar se Mali i Zi do të marrë kryesimin e Procesit të Berlinit vitin e ardhshëm, duke e vlerësuar këtë si një nga angazhimet më të rëndësishme të politikës së jashtme për vitin e ardhshëm. Për herë të parë në histori, Mali i Zi do të jetë nikoqir i këtij formati, i cili përfshin qeveritë e vendeve të Ballkanit Perëndimor, vendet anëtare të BE-së dhe Mbretërinë e Bashkuar, duke luajtur një rol të rëndësishëm në zhvillimet politike, ekonomike dhe të sigurisë në rajon.

KQZ: PARTITË POLITIKE KANË AFAT DERI MË 7 DHJETOR 2025 PËR TA DORËZUAR LISTËN E KANDIDATËVE QË DO TË GAROJNË NË ZGJEDHJET E PARAKOHSHME TË KUVENDIT TË KOSOVËS

Komisioni Qendror i Zgjedhjeve (KQZ) ka njoftuar se partitë politike kanë afat deri më 7 dhjetor 2025 për ta dorëzuar listën e kandidatëve që do të garojnë në zgjedhjet e parakohshme të Kuvendit të Kosovës që do të mbahen me 28 dhjetor. Ndryshe partitë politike kanë finalizuar paraqitjen në Komisionin Qendror të Zgjedhjeve për zgjedhjet e parakohshme të 28 dhjetorit. Ndërsa disa prej tyre garojnë të vetme, të tjera janë rreshtuar në koalicione parazgjedhore. Deri më tani, në KQZ kanë aplikuar gjithsej 23 subjekte politike. Partitë politike kanë përmbyllur afatin e paraqitjes së tyre në Komisionin Qendror të Zgjedhjeve, duke zyrtarizuar format e garimit në zgjedhjet e 28 dhjetorit. Lëvizja Vetëvendosje do të marrë pjesë në këto zgjedhje përmes një koalicioni parazgjedhor, i quajtur “Koalicioni Lëvizja Vetëvendosje”. Përveç Vetëvendosjes, pjesë e tij janë edhe partnerët e deritanishëm, Guxo dhe Alternativa si dhe Partia Shqiptare Demokristiane, PSHDK. Ndryshe nga Vetëvendosje, partitë e tjera parlamentare kanë vendosur të hyjnë të vetme në garë. Partia Demokratike e Kosovës, Lidhja Demokratike e Kosovës dhe Aleanca për Ardhmërinë e Kosovës do të garojnë secila me listën e vet të kandidatëve. Edhe Nisma Socialdemokrate e Fatmir Limajt, e cila në zgjedhjet e fundit ishte pjesë e një koalicioni me AAK-në, këtë herë ka vendosur të konkurrojë e pavarur.

ANKIMI NË KUSHTETUESE PËR ZV.KRYEMINISTREN, PD KËRKON INTERPELANCË URGJENTE ME KRYEMINISTRIN

Kolegji i Gjykatës Kushtetuese vendosi kalimin e ankimimit të Kryeministrisë për pezullimin nga GJKKO të zëvendëskryeministres, njëherazi ministre për Infrastrukturën dhe Energjinë, Belinda Balluku, në Mbledhjen e Gjyqtarëve për të vlerësuar nëse plotësohen bashkërisht të gjitha kriteret e pranueshmërisë së saj për shqyrtim në seancë plenare. Vendimi u mor në përputhje me nenin 31 të ligjit organik të Gjykatës Kushtetuese dhe nenin 24 të Rregullores për Procedurat Gjyqësore. Kolegji i përbërë nga Sandër Beci (relatori), Sonila Bejtja dhe Marsida Xhaferllari, sipas medieve vendosi të kalojë çështjen në mbledhjen me tetë gjyqtarë të Kushtetueses. Sipas njoftimit nga Kushtetuesja, vendimmarrja e Mbledhjes së Gjyqtarëve do të njoftohet rregullisht në faqen zyrtare të Gjykatës Kushtetuese. Qeveria kërkon zgjidhjen e mosmarrëveshjes së kompetencës së krijuar ndërmjet Kryeministrit dhe Këshillit të Ministrave, nga njëra anë, dhe Gjykatës së Posaçme kundër Korrupsionit dhe Krimit të Organizuar (GJKKO), nga ana tjetër, lidhur me pezullimin e ushtrimit të detyrës së anëtarit të Këshillit të Ministrave. Gjithashtu qeveria kërkon shfuqizimin e vendimit të GJKKO-së për pezullimin e ministres Balluku nga detyra. GJKKO ka vendosur dy masa sigurie për Ballukun, atë të pezullimit nga detyra dhe ndalimin e lëvizjes jashtë vendit.

INDUSTRIA E NAFTËS ËSHTË ENDE DUKE E PRITUR NJË PËRGJIGJE NGA AUTORITETET AMERIKANE PËR KËRKESËN E SAJ

Presidenti serb, Aleksandar Vuçiq, njoftoi sot se Shtetet e Bashkuara nuk kanë marrë ndonjë vendim për zgjatjen ose jo të licencës së punës për Industrinë e Naftës së Serbisë, të cilën e sanksionuan muajin e kaluar për shkak të pronësisë së saj ruse. Industria e naftës është ende duke e pritur një përgjigje nga autoritetet amerikane për kërkesën e saj për ta lejuar atë të veprojë derisa po i vazhdon bisedimet për t’i shitur aksionet e veta ruse. “Rusët nuk duan t’i shesin aksionet e tyre në Industrinë e Naftës në Serbi . Nuk ka të bëjë me paratë, ka të bëjë me politikën”, tha Vuçiq në një konferencë për shtyp të martën, pas një takimi me ekipet përgjegjëse për stabilitetin dhe sigurinë energjetike të vendit. Vuçiq theksoi se nuk ka ndonjë tregues se SHBA-ja do t’ia vazhdojë licencën Industrisë së Naftës të Sebisë . Pa licencë, rafineria e naftës në Pançevë, e cila operon brenda INS-it, do të detyrohet ta pushojë veprimtarinë plotësisht, për shkak të mungesës së naftës së papërpunuar. Vuçiq tha se ministrja e Minierave dhe Energjisë së Serbisë, Dubravka Gjedorviq Handanoviq, do ta njoftojë industrinë për këtë dhe se është dhënë leja që rafineria në Pançevë ta ndërpresë punën. “Industria e Naftës së Serbisë do të vendosë nëse rafineria do ta pushojë veprimtarinë sot apo në ditët në vijim”, tha Vuçiq. Ai tha se është dita e 54-të qëkurse u vendosën sanksione ndaj Industrisë së Naftës dhe se nuk ka probleme me furnizimin me karburant, “gjë që tregon se sa serioz është shteti dhe sa para janë investuar në rezervat e naftës dhe produkteve të naftës”. As pala amerikane dhe as ajo ruse nuk kanë publikuar informacione rreth përparimit të bisedimeve, dhe qytetarët janë njoftuar për këtë gjendje nga zyrtarët serbë, kryesisht nga presidenti Vuçiq.

PUTIN DHE I DËRGUARI I TRUMPIT DISKUTOJNË NË MOSKË PËR LUFTËN NË UKRAINË

Presidenti i Rusisë, Vladimir Putin do të takojë të martën të dërguarin e posaçëm amerikan, Steve Witkoff në Moskë, pasi Shtëpia e Bardhë ka thënë se është “shumë optimiste” për mundësinë e arritjes së një marrëveshjeje që i jep fund luftës në Ukrainë. Edhe Jared Kushner, dhëndri i presidentit amerikan, Donald Trump, i cili ka shërbyer si këshilltar i jashtëm në bisedimet diplomatike, pritet të marrë pjesë në takim. Samiti do të zhvillohet dy ditë pas negociatave në Florida mes zyrtarëve ukrainas dhe amerikanë, përfshirë Witkoffin dhe Kushnerin, me qëllim të ridefinimit të një plani amerikan, i cili nga disa ukrainas është përshkruar si shumë i favorshëm për Rusinë. Presidenti ukrainas, Volodymyr Zelensky i ka përshkruar bisedimet si “konstruktive”, por ka thënë se janë disa “tema të vështira në të cilat ende duhet punuar”.

ADMINISTRATA E PRESIDENTIT TRUMP APEL IZRAELIT: MOS NDËRHYJ NË SIRI

Administrata e Presidentit Donald Trump i ka bërë apel Izraelit që të mos ndërhyjë në Siri teksa kjo pritet të jetë një nga temat kryesore gjatë vizitës së kryeministrit Benjamin Netanyahu në Shtëpinë e Bardhë, e cila do të mbahet këtë muaj. Në një postim në rrjetet sociale, Trumpi paralajmëron Izraelin të mos ndërhyjë në Siri. Qëndrimi i Trumpit vjen disa ditë pasi trupat izraelite u sulmuan gjatë një operacioni arrestimesh në Siri, duke shkaktuar përleshje në të cilat u vranë 13 persona, sipas raporteve siriane. Rrjeti “Channel 12” citon një zyrtar amerikan që thotë se “Siria nuk dëshiron probleme me Izraelin, situata nuk është si Liban”, por paralajmëron se Netanyahu duhet të ndryshojë kursin përpara se “të kthejë regjimin e ri në Siri në një armik të Izraelit”. Zyra e Netanyahut njoftoi sot vizitën e ardhshme, një ditë pasi ai kërkoi falje në gjyqin e tij për korrupsion nga presidenti Herzog, një lëvizje që Trump e mbështet gjithashtu.

BQE REFUZON KREDI PËR UKRAINËN – FRANKFURTI NUK PRANON TË PËRDORË ASETET E NGRIRA RUSE PËR 140 MILIARDË EURO FINANCIME

Banka Qendrore Evropiane ka refuzuar të japë një garanci për një kredi prej 140 miliardë eurosh për Ukrainën, e cila do të mbështetej në asetet e ngrira ruse. Sipas raportimeve të Financial Times, zyrtarët në Frankfurt arritën në përfundimin se propozimi i Komisionit Evropian do të shkelte mandatin e BQE-së. Brukseli kishte kërkuar që BQE të vepronte si huadhënës i fundit për degën belge të Euroclear, për të shmangur një krizë likuiditeti. Por banka qendrore refuzoi, duke theksuar kufizimet ligjore dhe rreziqet për stabilitetin financiar. Analiza e brendshme e BQE-së tregoi se plani do të ishte si financim i drejtpërdrejtë i qeverive. Një veprim i tillë është i ndaluar nga traktatet evropiane, sepse mund të rrisë inflacionin dhe të dëmtojë besueshmërinë e institucionit. Vendimi e lë në pikëpyetje strategjinë e Komisionit për të ofruar një “kredi riparimi” për Ukrainën. Shtetet anëtare të BE-së tani duhet të kërkojnë alternativa për mbështetjen financiare të Kievit.

NESËR MOT I VRANËT DHE ME RESHJE TË SHIUT

Në Mal të Zi ka mbajtur mot me vranësira mesatare deri plotësisht i vranët , vende-vende me reshje të dobëta të shiut. Frynë erë kryesisht e dobët e drejtimeve të ndryshme. Temperaturat e shënuar në orën 13: Tivar e Budvë 17, Herceg Novi 15, Podgoricë e Ulqin 13, Nikshiq 9, Cetinë 8, Rozhajë 7, Kollashin, Zhablak, Guci e Petnjicë 6, Beranë e Plluzhinë 5, Andrievicë 4, Bijello Pole 3 dhe në Plevle 2 gradë. Për nesër parashihet të mbaj mot me vranësira mesatare deri plotësisht i vranët , kohe pas kohe me reshje të shiut , në pjesët jugore me rrebesh dhe bubullimë, kurse në pjesët veriore dhe verilindore me reshje të pakta. Do të fryjë erë e dobët deri mesatare nga drejtimet e ndryshme , kurse në bregdet e fortë e drejtimeve lindore. Temperatura e mëngjesit prej 1 deri në 11, kurse më e larta e ditës prej 4 deri në 16 gradë.