Ditari 24.11.2025

Ditarin e përgatiti Marash Dedvukaj

Grupi i punës për hartimin e Traktatit të Anëtarësimit me Malin e Zi do të krijohet deri në fund të këtij viti

Grupi i punës për hartimin e Traktatit të Anëtarësimit me Malin e Zi do të krijohet deri në fund të këtij viti, sipas projekt-konkluzioneve të Këshillit të BE-së për zgjerimin, nëse Mali i Zi përparon sipas dinamikës së planifikuar dhe mbyll pesë kapituj shtesë në konferencën e ardhshme ndërqeveritare. Këto përfundime duhet të miratohen në takimin e Këshillit të Çështjeve të Përgjithshme në Bruksel më 16 dhjetor. Në versionin e përfundimeve, i cili mund të ndryshojë dhe në të cilin korrespondenti i RTMZ-së pati qasje, shtohet se Këshilli i BE-së mirëpret faktin që Mali i Zi ka përparuar në negociatat për zgjerim. Pritet që 12 kapituj të mbyllen deri në kohën e miratimit të tyre. "Bazuar në këtë, Këshilli vendos që një grup pune ad hoc për hartimin e Marrëveshjes së Anëtarësimit me Malin e Zi do të krijohet në vitin 2025", thuhet në draft përfundimet. Vlerësohet se kur të përmbushen kushtet, Këshilli pret mbylljen e përkohshme të kapitujve të mëtejshëm sa më shpejt të jetë e mundur. Gjithashtu, në pjesën e përfundimeve që lidhen me Malin e Zi, Këshilli inkurajon Podgoricën zyrtare të bëjë përparim të mëtejshëm në përmbushjen e kritereve përfundimtare, veçanërisht në kapitujt 23 dhe 24. Theksohet se Mali i Zi tani duhet të vazhdojë të përparojë në rrugën e reformave, veçanërisht në fushën e lirisë së shprehjes, medias, luftës kundër korrupsionit dhe krimit të organizuar, si dhe administratës publike.

M.Spajiq - Mali i Zi aktualisht po kalon procesin më të rëndësishëm të transformimit, të përqendruar në zbatimin e reformave

Ne duam ta transformojmë Malin e Zi mundësisht në një shoqëri për të gjithë qytetarët - një vend ku reformat, zhvillimi dhe integrimi evropian krijojnë shanse të barabarta për përparimin e individëve, ekonomisë dhe komunitetit, tha kryeministri Millojko Spajiq. "Mali i Zi aktualisht po kalon procesin më të rëndësishëm të transformimit, të përqendruar në zbatimin e reformave që synojnë përmirësimin e cilësisë së jetës, sigurimin e anëtarësimit të plotë në BE dhe ndërtimin e një shoqërie të bazuar në sundimin e ligjit. Edhe pse i vogël në territor, Mali i Zi - me pozicionin e tij të favorshëm gjeografik, burimet natyrore dhe politikën stimuluese tatimore - është gati, përmes reformave, të zhbllokojë potencialin e tij të plotë ekonomik dhe të sigurojë prosperitet për qytetarët e tij. Në këtë rrugë, ne e shohim madhësinë tonë si një avantazh: të shndërrojmë specifikat tona në forcë dhe, me një vizion të qartë dhe me veprime vendimtare, po e transformojmë Malin e Zi në një shoqëri me mundësi për rritje dhe zhvillim të përshpejtuar ekonomik", tha Spajiq në një intervistë për "CorD Magazine". Spajiq tha se kjo ishte edhe arsyeja, që nga fillimi i mandatit të Qeverisë së 44-të, të ndërtojmë themelet për zhvillimin ekonomik dhe tërheqjen e investitorëve të besueshëm, me qëllim diversifikimin e ekonomisë së Malit të Zi dhe sigurimin e rritjes afatgjatë dhe të qëndrueshme. "Anëtarësimi i plotë në BE, zhvillimi i infrastrukturës dhe një politikë tatimore e parashikueshme dhe stimuluese janë shtyllat mbi të cilat ndërtojmë një klimë investimi. Me anëtarësimin në Bashkimin Evropian, Mali i Zi do të bëhet pjesë e tregut të vetëm të BE-së, duke hapur mundësi për të hyrë në tregun e pothuajse gjysmë miliardi njerëzish dhe kjo kërkon forcim të vazhdueshëm të konkurrueshmërisë së ekonomisë sonë, theksoi pos tjerash Spajiq.

Shimun - Ministria e Shëndetësisë ka vepruar me përgjegjësi dhe transparencë në të gjitha vdekjet në institucionet shëndetësore

Ministri i Shëndetësisë Vojislav Shimun tha se Ministria e Shëndetësisë ka vepruar me përgjegjësi dhe transparencë në të gjitha vdekjet në institucionet shëndetësore në dy vitet e fundit, me dëshirën për të "kënaqur drejtësinë, para së gjithash për hir të familjeve dhe pastaj për hir të opinjonit". Ai theksoi se drejtësia do të vendoset dhe se është e rëndësishme të përcaktohet me saktësi përgjegjësia individuale aty ku ekziston. Ne nuk mund ta rregullojmë sistemin nëse, në rastet e përgjegjësisë individuale, ai nuk njihet dhe nuk përpunohet. Tani është nën juridiksionin e organeve hetimore, por gjithçka që i takonte Ministrisë së Shëndetësisë është bërë, tha ministri. Pika e parë e ditës së sotme të punës së Kuvendit është Seanca e Dytë e Jashtëzakonshme e Seancës së Dytë të Rregullt në vitin 2025 (dita e tetë), ku Ministri i Shëndetësisë Vojisllav Shimun do t'u përgjigjet pyetjeve parlamentare. Zoran Mikiq pyet se kush do të jetë përgjegjës për gjithçka që ka ndodhur në kujdesin shëndetësor kohët e fundit dhe nëse do të japë dorëheqje pas vdekjes së dytë të një të porsalinduri në Spitalin e Përgjithshëm të Nikshiqit vetëm në dy vjet. Shimun tha se përgjegjësia duhet të përcaktohet dhe se ajo është përcaktuar në disa raste, siç është vdekja e një gruaje në lindje nga Ulqini. Shimun përmendi rastin e vdekjes së një foshnje nga Nikshiqi në vitin 2023 kur ai nuk ishte ministër përkatës, por, siç tha ai, iu dha një përgjigje shumë e saktë se për çfarë bëhej fjalë dhe se nuk kishte përgjegjësi penale. “Pra, Ministria e Shëndetësisë ka marrë gjithçka që ishte në procedurë ligjore, ka formuar një komision të jashtëm nga Sllovenia që paraqiti raportin e tij dhe ne ia kemi dorëzuar familjes dhe prokurorisë”, tha pos tjerash ministri Shimun.

Mandiq ka caktua seancën për të enjten, më 27 nëntor, kushtuar orës së kryeministrit

Kryetari i Kuvendit Andrija Mandiq ka caktuar seancën për të enjten, më 27 nëntor, kushtuar orës së kryeministrit dhe pyetjeve parlamentare që lidhen me një temë të caktuar. Ai kujton se afati i fundit për t'i dërguar pyetje me shkrim Kryeministrit është jo më vonë se 72 orë para fillimit të seancës. Seanca do të fillojë në orën 12:00.

Për shkak të njoftimit për bombë, mësimi në gjimnazin dhe shkollën e mesme profesionale në Cetinë është pezullua

Për shkak të njoftimit për bombë, mësimi në gjimnazin dhe shkollën e mesme profesionale në Cetinë është pezullua. Nxënësit janë largua nga ndërtesa shëndoshë e mirë. Ekipet e policisë kanë shkuar në terren për të inspektuar ndërtesën, ndërsa nxënësit dhe profesorët e institucionit arsimor janë evakuuar si masë paraprake. Në mesazhin në Viber që morën prindërit, thuhej se të gjithë fëmijët e lanë objektin në mënyrë të sigurt dhe se nuk u vunë re parregullsi në klasa. Si përkujtesë, këtë mëngjes për shkak të një raporti për pajisje shpërthyese, edhe nxënësit dhe stafi mësimdhënës i Shkollës së Mesme "Stojan Ceroviq" të Nikshiqit dhe Shkollës së Mesme të Parë Profesionale u evakuuan nga objektet shkollore.

Dy kallëzime të tjera penale për shkak të dyshimit të bazuar se personat A.H. dhe S.O. kanë paraqitur dokumente arsimore të rreme

Ministria e Arsimit, Shkencës dhe Inovacionit i paraqiti Prokurorit Themelor të Shtetit në Podgoricë dy kallëzime të tjera penale për shkak të dyshimit të bazuar se personat A.H. dhe S.O. kanë paraqitur dokumente arsimore të rreme dhe të pavërteta, për të cilat, në procesin e njohjes së dokumenteve të huaja arsimore, institucionet kompetente kanë përcaktuar se ato nuk ishin dokumente publike autentike. Bazuar në këtë, siç thuhet nga MPNI, ekziston dyshimi i arsyeshëm se këta persona kanë kryer veprën penale të falsifikimit të dokumenteve sipas nenit 412 të Kodit Penal. "Ne presim që autoritetet kompetente të veprojnë në përputhje me kompetencat dhe fuqitë e tyre, me qëllim zgjidhjen e këtij problemi të rëndësishëm institucional", tha ministria.

Policia ka arrestua M.G. (34), një shtetas rus për të cilin është lëshuar një urdhër arresti ndërkombëtar për vrasje

Në fluturimin nga Stambolli, gjatë përpjekjes për të hyrë në Mal të Zi në aeroportin e Podgoricës, policia ka arrestua M.G. (34), një shtetas rus për të cilin është lëshuar një urdhër arresti ndërkombëtar për vrasje. Zyrtarët e Qendrës Rajonale të Policisë Kufitare "Centar", duke ndërmarrë aktivitete të shtuara për të luftuar krimin ndërkufitar, në pikën kufitare të Aeroportit të Podgoricës, me një fluturim nga Stambolli, gjatë një përpjekjeje për të hyrë në Mal të Zi, kontrolluan shtetasin rus M.G. (34), njoftoi policia. "Kontrollimi i të dhënave për M.G. në të dhënat elektronike zbuloi se ekziston një urdhër-arresti ndërkombëtar i lëshuar për të nga NCB Interpol Moska, për veprën penale të vrasjes", thuhet në deklaratën e policisë. Policia njoftoi se M.G. brenda afatit ligjor do të sillet te gjyqtari hetues i Gjykatës së Lartë në Podgoricë me qëllim përcaktimin e paraburgimit për ekstradim.

Në referendumin që do të mbahet në Zetë më 14 dhjetor për ndërtimin e impiantit në Botun, qytetarët do të mund të votojnë në 26 qendra votimi

Në referendumin që do të mbahet në Zetë më 14 dhjetor për ndërtimin e impiantit të trajtimit të ujërave të zeza (kolektori) në Botun, qytetarët e kësaj bashkie do të mund të votojnë në 26 qendra votimi, ndërsa tri në njësi të burgjeve. Kështu ka bërë të ditur për “Vijesti” kryetari i Komisionit për Referendum, Pavle Çavniq. Qytetarët e Zetës do të mund të votojnë në vendvotimet në Golubovci, Mahala, Mojanoviq, Goriçani, Anovi, Goshiq, Srpska, Mitroviqi, Botun, Ljajkoviq, Donja Cijevna, Balaban, Mataguzh, Berisllavci, Policje, Gostilj, Bistilj, Vukovci dhe Vraninë, si dhe në burgjet në Spuzh dhe Bijello Pole.

Zgjedhjet e 28 dhjetorit në Kosovë, fillon certifikimi i subjekteve politike dhe dorëzimi i listave të kandidatëve

Nga sot ka nisë afati për çertifikim të subjekteve politike për zgjedhjet e parakohshme parlamentare që do të mbahen në Kosovë më 28 dhjetor. KQZ u ka lënë një afat 6 ditor, nga data 24 nëntor deri më 30 nëntor subjekteve politike (partitë politike, koalicionet, nismat qytetare dhe kandidatët e pavarur) për plotësimin online të formularit të aplikimit për çertifikim për pjesëmarrje në zgjedhje. “Duke filluar nga data 24 nëntor dhe deri më 30 nëntor, subjektet duhet të dorëzojnë në KQZ, respektivisht në Zyrën për Regjistrim, Çertifikimin dhe Kontrollin Financiar, aplikimin për çertifikim për pjesëmarrje në zgjedhjet e parakohshme për Kuvendin e Kosovës. Formulari, i cili është i ngjashëm me atë të proceseve të kaluara zgjedhore, është i vendosur në platformën elektronike të KQZ-së dhe i njëjti duhet të plotësohet online”, deklaroi për RTK zëdhënësi i KQZ-së, Valmir Elezi.

Kurti, Turner dhe Norcross flasin për fuqizimin e marrëdhënieve Kosovë–ShBA

Kryeministri në detyrë i Republikës së Kosovës, Albin Kurti, i shoqëruar nga zëvendësministrja në detyrë e Punëve të Jashtme dhe Diasporës, Liza Gashi, mirëpriti sot një delegacion të Shteteve të Bashkuara të Amerikës, të përbërë nga kongresisti republikan Mike Turner dhe kongresisti demokrat Donald Norcross. Të dy kongresistët janë pjesë e Asamblesë Parlamentare të NATO-s dhe Komitetit të Shërbimeve të Armatosura të Dhomës së Përfaqësuesve (House Armed Services Committee), dhe kanë luajtur rol të rëndësishëm në angazhimin ushtarak të ShBA-së në lidhje me NATO-n dhe më gjerë. Pika qendrore e diskutimeve ishte fuqizimi i marrëdhënieve Kosovë–ShBA, me theks të veçantë në fushën e mbrojtjes. Kryeministri njoftoi se në katër vitet e fundit mbi 1000 pjesëtarë të Forcës së Sigurisë së Kosovës (FSK) kanë marrë pjesë në trajnime në programe ushtarake të SHBA-së, përfshirë edukimin ushtarak në West Point dhe U.S. Army War College. Gjithashtu, Kosova ka mirëpritur tre edicione radhazi të ushtrimeve ushtarake Defender Europe, njofton zyra e Kreyministrit.

Sinisha Karan i fiton zgjedhjet presidenciale në Republikën Sërpska

Sinisha Karan, aleati i ngushtë i Millorad Dodikut, presidentit të shkarkuar të Republikës Sërpska të Bosnjës, i ka fituar zgjedhjet e djeshme të parakohshme presidenciale në një garë të ngushtë me kandidatin e opozitës. Karan i fitoi 50.89% të votave, sipas rezultateve paraprake të shpallura para mesnatës nga Komisioni Qendror Zgjedhor i Bosnje e Hercegovinës. Kundërshtari i tij nga Partia Demokratike Serbe, Branko Blanusha, i fitoi 47.81 për qind të votave. Dodiku u largua nga posti i presidentit të Republikës Sërpska në gusht, pasi u dënua për mosrespektim të vendimeve të përfaqësuesit ndërkombëtar, Christian Schmidt, që e mbikëqyr marrëveshjen e paqes, e cila e ka mbajtur Bosnjën të bashkuar që nga përfundimi i luftës ndëretnike të viteve ‘90. Zgjedhjet e parakohshme në Republikën Sërpska (RS) - një nga dy entitetet gjysmautonome të Bosnjës, përkrah federatës boshnjakokroate – shiheshin si provë vendimtare e mbështetjes për partinë nacionaliste të Dodikut, e cila ka qenë në pushtet për gati dy dekada. Karan do të shërbejë për më pak se një vit, deri në zgjedhjet e përgjithshme në tetor të vitit 2026.

SHBA-ja thotë se propozimi për paqe është “përditësuar” për ta mbrojtur plotësisht Ukrainën

Shtëpia e Bardhë ka thënë se bisedimet në Gjenevë me Kievin shënuan “përparim domethënës” drejt përfundimit të luftës në Ukrainë dhe kanë rezultuar me një kornizë “të përditësuar dhe ridefinuar” që parasheh sovranitetin e plotë të Ukrainës dhe arritjen e paqes. Në deklaratën e 23 nëntorit të lëshuar nga Uashingtoni nuk janë përmendur specifika të ndryshimeve që janë bërë në planin e paqes prej 28 pikash që është çuar përpara nga presidenti amerikan, Donald Trump dhe i cili është kritikuar nga mbështetësit e Kievit, të cilët e kanë konsideruar dokumentin shumë miqësor për Rusinë. Propozimi amerikan raportohej se përfshinte edhe zvogëlimin e numrit të forcave të armatosura ukrainase dhe njëkohësisht zvogëlim të ndihmës ushtarake nga Shtetet e Bashkuara, e cila ka qenë thelbësore në luftën e Ukrainës kundër ushtrisë ruse. “Bisedimet kanë qenë konstruktive, të fokusuara dhe të zhvilluara me respekt dhe nënvizojnë përkushtimin e përbashkët për të arritur paqe afatgjatë”, është thënë në deklaratën e përbashkët të lëshuar nga Shtetet e Bashkuara dhe Ukraina.

Netanyahu zotohet se Izraeli do t’i vazhdojë sulmet ndaj Hamasit dhe Hezbollahut

Kryeministri i Izraelit, Benjamin Netanyahu, është zotuar dje se vendi i tij do të bëjë “gjithçka që është e nevojshme” për ta parandaluar rigrupimin e Hezbollahut në Liban dhe Hamasit në Rripin e Gazës. Gjatë javës së kaluar Izraeli ka goditur disa shënjestra në Libanin fqinj, ndërsa ushtria izraelite tha se goditi raketahedhës dhe caqe ushtarake të Hezbollahut. Agjencia e mbrojtjes civile në Gazë tha se 21 persona u vranë dhe dhjetëra të tjerë u plagosën në disa sulme ajrore izraelite të shtunën. Hamasi dhe Izraeli sërish morën akuza për shkeljen e armëpushimit të brishtë që është në fuqi që nga 10 tetori. “Ne po vazhdojmë ta godasim terrorizmin në disa fronte”, tha Netanyahu në hapje të mbledhjes së kabinetit të tij qeveritar. Fundjavën që lame pas ushtria izraelite goditi në Liban, dhe ne do të vazhdojmë të bëjmë gjithçka që është e nevojshme për ta penguar Hezbollahun ta rikthejë aftësinë e tij kërcënuese ndaj nesh”. “Këtë po e bëjmë edhe në Rripin e Gazës. Që prej armëpushimit, Hamasi nuk ka ndaluar së shkelë armëpushimin dhe ne po veprojmë në përputhje me rrethanat”, tha Netanyahu.

Lukashenko liron 31 ukrainas të burgosur në Bjellorusi, pas një ujdie të ndërmjetësuar nga SHBA-ja

Udhëheqësi autoritar i Bjellorusisë, Aleksander Lukashenko, i ka falur dhe liruar 31 shtetas ukrainas që po mbaheshin në Bjellorusi, një veprim që Minsku tha se ishte pjesë e një marrëveshjeje të arritur me presidentin amerikan, Donald Trump. Komiteti ukrainas për koordinimin e shkëmbimit të të burgosurve e konfirmoi lirimin e tyre, duke thënë se i kishte marrë civilët nga autoritetet bjelloruse. “Gratë dhe burrat e ndaluar në Bjellorusi dhe të dënuar me dënime të ndryshme prej dy deri në 11 vjet po kthehen në Ukrainë”, tha komiteti në Telegram. “Ne shprehim mirënjohjen tonë ndaj Shteteve të Bashkuara të Amerikës dhe presidentit Donald Trump për punën e tyre të frytshme për kthimin e civilëve dhe personelit ushtarak ukrainas nga Bjellorusia dhe Rusia”, shtoi ai. Akuzat konkrete me të cilat ishin mbajtur të burgosurit nuk u bënë të qarta. Zyrtarët ukrainas thanë se “këta janë burra dhe gra civilë që mbaheshin për qëndrimin e tyre proukrainas, të akuzuar për ndihmë dhe mbështetje ndaj Ukrainës”.

Nesër mot me shi

Në pjesën më të madhe të vendit mban mot kryesisht i vranët dhe vende vende me reshje të dobëta të shiut. Frynë erë e dobët deri e mesme nga drejtimi i jugut. Temperaturat në orën 13: Tivar 13 gradë, Budvë 12, H. Novi 11, Ulqin, Podgoricë e Beranë 10, Andrievicë 9, B. Pole e Rozhajë 8, Plevle 7, Nikshiq, Cetinë, Kollashin e Guci 4 dhe në Zhablak 3 gradë. Edhe për nesër pritet të mbajë mot i vranët dhe me reshje të shiut. Do të fryjë erë e mesme deri e forte e kohë pas kohe shumë e forte nga drejtimi i jugut dhe juglindjes. Temperatura e mëngjesit do të sillet prej 2 deri në 13 kurse më e larta e ditës prej 6 deri në 17 gc.