Ditari 28.08.2025

Ditarin e përgatiti Marash Dedvukaj

Kabineti i Presidentit mbështet dialogun midis përfaqësuesve të Sindikatës së Pavarur të Policisë dhe Qeverisë

Kabineti i Presidentit të Malit të Zi, Jakov Millatoviq, mbështet dialogun midis përfaqësuesve të Sindikatës së Pavarur të Policisë dhe Qeverisë dhe çdo marrëveshje që ata arrijnë, njoftoi kabineti. Kabineti i Millatoviqit tha se me iniciativën e Sindikatës së Pavarur të Policisë, ata pritën kryetarin dhe nënkryetarin e kësaj organizate, Igor Rmandiq dhe Gjorgjija Vukiqeviq."Tema e diskutimit ishte kërkesa e Sindikatës së Pavarur të Policisë, me afër 1.3 mijë nënshkrime të punonjësve të Administratës së Policisë dhe Ministrisë së Punëve të Brendshme, të cilët janë të pakënaqur me të ardhurat e tyre financiare, kushtet e punës dhe statusin shoqëror", thuhet në deklaratë. Zyra e presidentit, siç u shtua, shprehu mirëkuptimin e saj për kërkesat e lartpërmendura. "Kabineti i Presidentit mbështet dialogun midis përfaqësuesve të sindikatave dhe Qeverisë së Malit të Zi dhe çdo marrëveshje që ata arrijnë", thuhet në deklaratë.

M.Knezheviq - jam kundër ndërtimit të kolektorit në Botun

Kryetari i Partisë Demokratike Popullore, Millan Knezheviq, e hodhi poshtë deklaratën e kryetarit të komunës Sasha Mujoviq në lidhje me impiantin e trajtimit të ujërave të zeza që duhet të ndërtohet në Botun, duke theksuar se ai njoftoi në takimin e lartpërmendur me kreun e delegacionit të BE-së se nuk po i organizon banorët e këtij fshati për të mbrojtur të drejtën për një jetë të shëndetshme, por se i mbështet plotësisht ata dhe është kundër ndërtimit të një kolektori në këtë fshat. Ai gjithashtu njoftoi se nëse ndërtimi i kolektorit fillon në këtë fshat, do t'i kërkojë klubit të këshilltarëve të PDP-së të largohet nga qeveria e koalicionit në Podgoricë."Ekskluzivisht për hir të qytetarëve të Botunit dhe opinjonit malazez, dhe jo për hir të kryetarit të bashkisë Mujoviq, e mohoj këtë gënjeshtër të tij, të cilën ai e mbrojti pa sukses kundër PDS-së. Dhe e vërteta është si më poshtë, në takimin në të cilin më ftoi z. Satler, dhe në të cilin, përveç Satler dhe Mujoviq, morën pjesë kryeministri Spajiq, kryetari i Kuvendit Andrija Mandiq dhe deputeti Bogdanoviq, unë i informova qartë dhe pa mëdyshje se Lëvizja Evropa Tani fitoi në zgjedhjet e fundit në Botun, se nuk i informova vendasit e këtyre fshatrave për të mbrojtur të drejtën për një jetë të shëndetshme, por për t'i mbështetur plotësisht. Se ata kanë të drejtë për një fushatë mediatike rreth domosdoshmërisë që Podgorica të ketë një kolektor dhe se unë nuk do dhe nuk mund të ndikoj në paraqitjet e tyre mediatike, dhe ua përsëris tani, dhe nëse ata arrijnë të bindin të gjithë Botunin të jetë në favor të ndërtimit të një kolektori, unë do të jem kundër kësaj, siç isha që nga dita e parë", tha Knezheviq.

Ibrahimoviq dhe Tiso – Mali i Zi ka i forcuar dukshëm kapacitetet institucionale

Mali i Zi, duke u mbështetur në ekspertizën e sistemit të Kombeve të Bashkuara (OKB), i forcoi ndjeshëm kapacitetet e tij institucionale dhe zbatoi standarde të kërkuara në fusha të ndryshme, përfshirë sundimin e ligjit, vlerësuan Zëvendëskryeministri Ervin Ibrahimoviq dhe koordinatorja e sapoemëruar rezidente e OKB-së në Mal të Zi, Karolin Tiso. Ibrahimoviq, i cili priti Tison në vizitën e tij të parë, tha se është i bindur se bashkëpunimi i Malit të Zi me sistemin e OKB-së do të vazhdojë të zhvillohet përmes një partneriteti të fortë. Siç u njoftua nga Ministria e Punëve të Jashtme, Ibrahimoviq theksoi se Mali i Zi, përmes misioneve, monitoron proceset brenda sistemit të OKB-së me vëmendje të veçantë, përfshirë iniciativën e shpallur OKB 80, si dhe i kushton rëndësi të veçantë ruajtjes së dialogut politik të rregullt dhe me cilësi të lartë me këtë organizatë ndërkombëtare në nivelin më të lartë. Duke folur për bashkëpunimin e mëtejshëm, Ibrahimoviq theksoi se Mali i Zi vlerëson orientimin e angazhimit të sistemit të OKB-së në vend drejt ofrimit të mbështetjes në zbatimin e reformave në rrugën drejt anëtarësimit në Bashkimin Evropian (BE), që është qëllimi kryesor i politikës së jashtme të vendit.

Zyrtarët e policisë së Podgoricës kanë arrestua dy shtetas të huaj për sulm ndaj policisë

Zyrtarët e policisë së Podgoricës kanë arrestua dy shtetas të huaj për sulm ndaj oficerëve të policisë kufitare në Aeroportin e Podgoricës, njoftoi Administrata e Policisë. Thuhet se A.B. (29) dhe B.B. (21) ishin të dehur në aeroport, duke mbajtur shishe me pije alkoolike dhe duke ngacmuar pasagjerë të tjerë. Policia tha se mbikëqyrësit e fluturimit i informuan A.B. dhe B.B. se, për shkak të sigurisë së pasagjerëve të tjerë, ata nuk do të jenë në gjendje të udhëtojnë me fluturimin e planifikuar. "Ata u zemëruan, duke kundërshtuar me zë të lartë atë vendim, ndërsa ofruan rezistencë aktive ndaj oficerëve të policisë së Stacionit të Policisë Kufitare të Aeroportit të Podgoricës", thuhet në njoftim. Shtohet se oficerët e Departamentit të Sigurisë së Podgoricës arrestuan A.B. dhe B.B., të cilët akuzohen për veprën penale të sulmit ndaj personit zyrtar gjatë kryerjes së detyrës zyrtare.

Zyrtarët e policisë kufitare kanë sekuestrua në Bozhaj katër automjete që kërkoheshin ndërkombëtarisht

Zyrtarët e policisë kufitare kanë sekuestrua në Bozhaj katër automjete që kërkoheshin ndërkombëtarisht, njoftoi Administrata e Policisë. Policia tha se një person, të cilit iu gjet një pako e vogël me marihuanë dhe i cili po drejtonte nën ndikimin e substancave psikoaktive, u arrestua në kalimin kufitar Ranche."Në veçanti, në vendkalimin kufitar në Bozhaj, u kontrollua J.D. (35), i cili po drejtonte një automjet Jaguar me targa gjermane", thuhet në njoftim. Thuhet se një kontroll i detajuar, në bashkëpunim me oficerët e policisë së Interpolit Podgorica, përcaktoi se automjeti kërkohej nga Gjermania, kështu që u konfiskua. Policia tha se oficerët e tyre në të njëjtin kalim kufitar, gjithashtu në hyrje të Malit të Zi, kontrolluan X.U. (34) i cili po drejtonte një automjet Mercedes me targa gjermane. "Për këtë automjet, u krye edhe një kontroll i detajuar kur u përcaktua se ishte i kërkuar në nivel ndërkombëtar, nga autoritetet kompetente të Gjermanisë", thuhet në deklaratë.

Presidenti i Malit të Zi, Jakov Millatoviq, ka emëruar 21 anëtarë të Këshillit të Iniciativave Rinore

Presidenti i Malit të Zi, Jakov Millatoviq, ka emëruar 21 anëtarë të Këshillit të Iniciativave Rinore nga fusha të ndryshme, njoftoi kabineti i tij. Thuhet se midis të emëruarve janë studentë, sipërmarrës të rinj të suksesshëm, studiues, artistë, aktivistë qytetarë dhe mjedisorë. Siç tha zyra e Millatoviqit, secili prej tyre sjell njohuri, interesa dhe suksese, dhe të gjitha këto do të bashkohen në Këshillin e Iniciativave Rinore me qëllim krijimin e politikave për të ardhmen e Malit të Zi. "Millatoviq, pas një ftese publike dhe një diskutimi me të gjithë kandidatët, emëroi 21 anëtarë të Këshillit nga fusha të ndryshme, nga drejtësia, ekonomia dhe psikologjia, deri te ekologjia, kultura dhe marrëdhëniet ndërkombëtare", thuhet në njoftim. Zyra e presidentit tha se këta të rinj do të formësojnë të ardhmen e Malit të Zi me idetë, njohuritë dhe këmbënguljen e tyre. "Këshilli është një mundësi për të rinjtë e suksesshëm për të krijuar zgjidhje në fushën e arsimit dhe punësimit, shëndetësisë dhe kulturës, integrimit evropian dhe të drejtave të njeriut. Energjia dhe kreativiteti i tyre tani po bëhen pjesë integrale e vendimmarrjes", thuhet në njoftim.

Gjyqtari Branko Vujaçiq është zgjedhë kryetar i Gjykatës për Kundërvajtje në Podgoricë

Gjyqtari Branko Vujaçiq është zgjedhë kryetar i Gjykatës për Kundërvajtje në Podgoricë, ndërsa postin e kryetarit të Gjykatës për Kundërvajtje në Bijelo Polje do ta ushtroj Vukajllo Smoloviq, ka njoftua Këshilli Gjyqësor. Këshilli Gjyqësor njoftoi se në seancën e sotme, ky organ zhvilloi një intervistë me Vujaçiqin dhe Ana Radulloviq - gjyqtarë të Gjykatës për Kundërvajtje në Podgoricë. "Këshilli Gjyqësor, pasi kreu procedurën ligjore dhe në përputhje me renditjen, mori vendimin për të zgjedhur Vujaçiqin si kryetar të Gjykatës për Kundërvajtje në Podgoricë", thuhet në njoftim.

Ndërpritet seanca konstituive e Kuvendit, pasi Rashiq sërish dështon të zgjidhet nënkryetar

Deputetët e kuvendit të Kosovës kanë dështua sot të zgjedhin nënkryetarin serb për ta përmbyllur konstituimin e Kuvendit. Kryetari i Kuvendit, Dimal Basha, e ndërpreu seancën dhe tha se administrata do të njoftojë se kur vazhdon ajo. Në vazhdimin e seancës, më 26 gusht, ata zgjodhën kryetarin dhe katër nënkryetarë. Konstituimi ngeci te votimi i kandidatit për nënkryetar nga pakica serbe. Konstituimi i Kuvendit do t'i hapte rrugë formimit të Qeverisë së re, pas një ngërçi të gjatë politik, pas zgjedhjeve të 9 shkurtit. Deputeti i Listës Serbe, Igor Simiq, deklaroi pas seancës së Kuvendit të Kosovës se po shkelen të drejtat themelore të njeriut të komunitetit serb, rendi kushtetues dhe Rregullorja e punës së Kuvendit.“Ata e dinë mirë se çfarë po bëjnë. Në seancën e kaluar kam biseduar disa herë me kryetarin e Kuvendit dhe i kam tërhequr vërejtjen për shkeljet dhe parregullsitë. Nënkryetari duhet të ketë mbështetjen e shumicës së deputetëve serbë, dhe në këtë rast ai është Sllavko Simiq”, tha Simiq. Siç shtoi ai, e gjithë kjo po bëhet për t’u zgjedhur Nenad Rashiq, të cilin, megjithatë, Lista Serbe nuk e mbështet. Simiq shtoi se Lista Serbe do të paraqesë ankesë në Gjykatën Kushtetuese."Lista Serbe dhe populli serb nuk janë pengesë e as dikush që dëshiron të bllokojë proceset, por vetëm kërkojnë që të respektohen të drejtat tona", tha Simiq.

Krasniqi: Vetëvendosje do vazhdimin e bllokadës

Kryetari i partisë së dytë më të madhe në Kuvendin e Kosovës, PDK, Memli Krasniqi, e ka akuzuar partinë fituese të zgjedhjeve, Lëvizja Vetëvendosje, se “dëshiron” ta vazhdojë ngërçin politik. Duke folur pas dështimit të radhës për ta konstituuar Kuvendin, Krasniqi tha për gazetarë: “Ju po e vëreni që ka një tentim për të mos shkuar tutje me konstituimin e Kuvendit, por çfarë më befason mua është fakti se si krejt Vetëvendosja, nga Kurti deri te deputeti i fundit, po angazhohen për ta bërë nënkryetar një deputet të komunitetit serb, që, nëse e krahasoj, shumë më pak janë angazhuar për Albulena Haxhiun apo Dimal Bashën”. Seanca e sotme u ndërpre pasi Nenad Rashiq nga pakica serbe nuk i mori votat për t’u emëruar nënkryetari i pestë i Kuvendit. Krasniqi shpjegoi se deputetët e partisë së tij po abstenojnë nga votimi për Rashiqin, “sepse mënyra e votimit është jokushtetuese”. “Ajo çfarë e ka karakterizuar sjelljen e Vetëvendosjes nga 15 prilli është veprimi jokushtetues dhe këtë e ka dëshmuar dy herë Gjykata Kushtetuese”, tha Krasniqi.

Basha distancohet sërish nga artikulli kundër UÇK-së

Kryetari i porsazgjedhur i Kuvendit të Kosovës, Dimal Basha, e ka distancuar sërish veten nga një artikull që flet për ish-Ushtrinë Çlirimtare të Kosovës (UÇK). Në punimin ku ai është bashkautor, thuhet se “sipas rasteve të hetuara, fondet për UÇK-në erdhën nga shqiptarë të zakonshëm në diasporë, por edhe nga trafikantët e drogës që operonin në gjithë Evropën Perëndimore dhe në Shtetet e Bashkuara”. Basha tha se “distancohem nga të gjithë ata që kanë shkruar kundër kësaj vlere”. “Dua të deklaroj me përgjegjësinë më të madhe qytetare dhe kombëtare që kurrë në jetën time nuk është shkruar dhe nuk do të gjendet asnjë përmbajtje që bie ndesh me vlerën e shenjtë të popullit tonë”, tha Basha. Një ditë më parë, ai kishte thënë në Facebook se kontributi i tij në këtë punim ishte vetëm në Kapitullin 3, “i cili trajton depërtimin e Islamit fundamentalist në Evropën Juglindore, me fokus Kosovën”.

Të paktën 16 të vrarë dhe 48 të plagosur nga një sulm i madh rus në Kiev

Të paktën 16 njerëz janë vrarë dhe 48 të tjerë janë plagosur nga një sulm i madh rus me dronë dhe raketa në kryeqytetin e Ukrainës mëngjesin e sotëm, njoftuan autoritetet lokale. Rusia e kreu këtë sulm të madh në një kohë kur përpjekjet e udhëhequra nga Shtetet e Bashkuara për t’i dhënë fund luftës mbi trivjeçare po hasin vështirësi. Katër fëmijë, të moshës 2, 14 dhe 17 vjeçe, janë në mesin e të vrarëve, tha Tymur Tkachenko, kreu i administratës së qytetit të Kievit. Numri i viktimave pritet të rritet teksa ekipet për shpëtim po punojnë në vendngjarje për t’i nxjerrë njerëzit e mbetur nën rrënoja. “Rusia i zgjedh raketat balistike në vend të tryezës së bisedimeve”, tha presidenti i Ukrainës, Volodymyr Zelensky, në një postim në X pas sulmit.“Ne presim reagim nga të gjithë ata që kanë bërë thirrje për paqe nga e gjithë bota, por që sot gjithnjë e më shpesh po heshtin në vend se të mbajnë qëndrim parimor”, theksoi Zelensky. Rusia përdori dronë mashtrues, raketa lundruese dhe raketa balistike, tha Tymur Tkachenko, kreu i administratës së qytetit të Kievit. Të paktën 20 zona në shtatë rajone të Kievit u goditën. Pothuajse 100 ndërtesa u dëmtuan, përfshirë një qendër tregtare në qendër të qytetit, dhe mijëra dritare u thyen, tha Tkachenko.

Delegacioni ukrainas do të takohet me ekipin e Presidentit të SHBA-së Donald Trump të premten në Nju Jork

Delegacioni ukrainas do të takohet me ekipin e Presidentit të SHBA-së Donald Trump të premten në Nju Jork, njoftoi Presidenti ukrainas Volodymyr Zelensky. Ai tha në një video-adresim se të dy delegacionet do të diskutojnë garancitë e sigurisë për Ukrainën, raporton Tanjug. "Sot, vazhdon puna jonë diplomatike, Ministrisë së Punëve të Jashtme, Këshillit për Sigurinë dhe Mbrojtjen Kombëtare - me partnerë që mbështesin nevojën për një format në nivelin e udhëheqësve - një format për t'i dhënë fund luftës", tha Zelenski.

Ushtria izraelite kryen operacion në Bregun Perëndimor

Dhjetëra ushtarë izraelitë kanë kryer një operacion në qytetin Nablus të Bregut të pushtuar Perëndimor, thanë dëshmitarët dhe zyrtarët palestinezë, ndërkaq Gjysmëhëna e Kuqe ka raportuar për të paktën shtatë të plagosur gjatë këtij operacioni. Ushtria izraelite ka konfirmuar për AFP-në se forcat e saj po kryejnë një operacion në këtë qytet në veri të Bregut Perëndimor, por nuk kanë dhënë detaje se cili është qëllimi i tij. Banorët vendas kanë raportua se ushtarët me autoblinda ia kanë mësyrë disa lagjeve të qytetit të vjetër të Nablusit, që ka një popullsi prej rreth 30.000 banorësh. Operacioni vjen një ditë pasi forcat izraelite në Ramallah, ku gjendet selia e Autoritetit Palestinez, bën bastisje në një këmbimore në qendër të qytetit, duke lënë të plagosur dhjetëra palestinezë, sipas Shoqatës palestineze të Gjysmëhënës së Kuqe. Guvernatori i Nablusit, Ghassan Daghlas, i tha AFP-së se “sulmi i së mbrëmshëm është thjesht një shfaqje force pa asnjë justifikim”.

Papa Leo XIV i bëri thirrje Izraelit të ndalojë luftën

Papa Leo XIV i bëri thirrje Izraelit të ndalojë luftën dhe, siç tha ai, ndëshkimin kolektiv dhe zhvendosjen me forcë të palestinezëve në Gaza. Sipas Radioe Europa e Lirë, Papa u ndërpre dy herë nga duartrokitjet ndërsa lexoi me zë të lartë apelin e tij të fundit për t'i dhënë fund luftës 22-mujore, gjatë audiencës së tij të përgjithshme javore ku morën pjesë mijëra njerëz në një auditor të Vatikanit. Papa i parë amerikan në histori bëri thirrje gjithashtu për lirimin e pengjeve të marra nga Hamasi në Izraelin jugor dhe që të dyja palët dhe fuqitë ndërkombëtare t'i japin fund luftës "e cila ka shkaktuar kaq shumë terror, shkatërrim dhe vdekje". "Unë po kërkoj që të arrihet një armëpushim i përhershëm, që të lehtësohet hyrja e sigurt e ndihmës humanitare dhe që ligji humanitar të respektohet plotësisht", tha Papa. Ai deklaroi se ligji ndërkombëtar urdhëron detyrimin për të mbrojtur civilët dhe "ndalimin e ndëshkimit kolektiv, përdorimit pa dallim të forcës dhe zhvendosjes me forcë të popullsisë".

Kim Jong Un dhe Putin do të marrin pjesë në një paradë ushtarake në Kinë javën e ardhshme

Lideri i Koresë së Veriut, Kim Jong Un, do të udhëtojë në Kinë për herë të parë pas gjashtë vjetësh, për të marrë pjesë në një paradë ushtarake javën e ardhshme, njoftuan sot të dyja vendet. Kim dhe presidenti i Rusisë, Vladimir Putin, do të jenë mesin e 26 liderëve të huaj që do të marrin pjesë në paradën e 3 shtatorit në Pekin, për të shënuar 80-vjetorin e përfundimit të Luftës së Dytë Botërore dhe qëndresës së Kinës ndaj agresioneve të Japonisë gjatë luftës, sipas Ministrisë së Jashtme të Kinës.“Ne e mirëpresim ngrohtësisht sekretarin e përgjithshëm Kim Jong Un në Kinë, për të marrë pjesë në aktivitetet përkujtimore”, tha Hong Lei, zëvendësministër i jashtëm i Kinës, në një konferencë për shtyp. Agjencia shtetërore e lajmeve e Koresë së Veriut, KCNA, tha se Kim do ta vizitojë Kinën me ftesë të presidentit kinez, Xi Jinping, për të marrë pjesë në festimet e 80-vjetorit të përfundimit të luftës. Në mesin e të ftuarve të tjerë janë edhe Vlladimir Putin i cili do të marrë pjesë, pastaj liderët e Iranit, Bjellorusisë, Serbisë, Kubës, Indonezisë, Mianmarit, Pakistanit dhe Malajzisë. Asnjë lider nga Shtetet e Bashkuara apo vendet kryesore të Evropës Perëndimore nuk pritet të marrë pjesë, kryesisht për shkak të mosmarrëveshjeve me Putinin mbi luftën në Ukrainë.

Nesër mot i ngjashëm me të sotmin

Sot në Mal të Zi mban mot kryesisht me diell. Frynë erë e dobët deri e mesme nga drejtimi i jugut. Temperaturat në orën 14: Podgoricë 34 gradë, Plevle 32, Budvë, B.Pole, Rozhajë e Beranë 31, Nikshiq e Andrievicë 30, Tivar, Ulqin, Kollashin, Shavnik, Guci e Petnicë 29, H.Novi 28 dhe në Zhablak 25 gradë.
Për nesër pritet mot kryesisht me diell dhe vranësira kalimtare. Do të fryjë erë e dobët deri e mesme e vende vende deri e forte nga drejtimi i jugut. Temperatura e mëngjesit do të sillet prej 9 deri në 21 kurse më e larta e ditës prej 26 deri në 35 gc