Ditari 15.08.2025

Ditarin e përgatiti Marash Dedvukaj

Pavlloviq - Edhe sot në Mal të Zi ka zjarre aktive në gjashtë komuna

Edhe sot në Mal të Zi ka zjarre aktive në gjashtë komuna, njoftoi kreu i njësisë ajrore-helikopterike të Ministrisë së Punëve të Brendshme (MUP), Darko Pavlloviq, duke shtuar se ekipet janë në terren dhe po vëzhgojnë situatën nga ajri. Pavlloviq, në konferencën për shtyp të Ministrisë së Punëve të Brendshme (MUP), tha se ka zjarre aktive në Podgoricë, Nikshiq, Danillovgrad, Bijelo Polje, Pljevle dhe Shavnik."Në Podgoricë, kemi zjarre në Gornje Mrke, Blizna, Petroviqi, Dinoshë, Kuç, Gjurkoviqi, Radek, Piper dhe Ubla", tha Pavloviq. Siç tha ai, ka zjarre aktive edhe në Nikshiq në Velimlje, Dubravë, Crveno Zhdrijello dhe në fshatin Petroviqi, kështu në terren gjendën tre automjete dhe 15 zjarrfikës. Sipas Pavlloviqit, në Topollovë të Danillovgradit ka një zjarr aktiv dhe në këtë terren gjendën  tre automjete dhe 12 zjarrfikës. Në Shavnik, siç tha Pavlloviq, ka një zjarr aktiv në Lojanik dhe Dragishnicë, dhe në Bijelo Polje në Zhuber, ku dy ekipe zjarrfikësish janë në terren. Duke folur për aktivitetet e planifikuara për sot, ai tha se në orën shtatë të mëngjesit ata kishin një helikopter të Bosnjës dhe Hercegovinës (BiH) që u ngrit në zonën e Dinoshes dhe Tuzit, si dhe aeroplanët e Njësisë së Helikopterëve Ajrorë në zonën e Kosorit dhe Ublave të poshtme. Gjithashtu helikopteri hungarez u ngrit në rajonin e Gornje Mrke dhe do të punojë në bashkëpunim me helikopterin e MPM-it të Serbisë", tha Pavlloviq. Ai tha se dy helikopterë të Ushtrisë së Malit të Zi (VCG) do të përfshihen në shuarjen e zjarrit mbi Koritë. "Një helikopter i Ushtrisë së Malit të Zi do të përfshihet në zbulimin e vendeve  dhe përcaktimin e përparësive operacionale nga ajri", shtoi Pavlloviq.

Sharec - Autoritetet në Mal të Zi deri më tani e kanë bërë mirë punën e tyre gjatë shuarjes së zjarreve

Autoritetet në Mal të Zi deri më tani e kanë bërë mirë punën e tyre gjatë shuarjes së zjarreve, të cilat kanë qenë aktive për të gjashtën ditë me rallë në disa vende, tha raportuesi i përhershëm i Parlamentit Evropian për Malin e Zi, Marjan Sharec. Në deklaratën e dhënë për median, ai shprehu ngushëllimet e tij familjes së ushtarit të rënë Dejan Bozhoviq, i cili vdiq gjatë kryerjes së guximshme të detyrës së tij ushtarake. "Ne të gjithë e dimë se çdo ushtar është gati të japë jetën e tij për vendin e tij, por kjo nuk mund ta zvogëlojë dhimbjen e humbjes", tha Sharec. Ai kujtoi se ishte Ministër i Mbrojtjes i Sllovenisë dhe zjarrfikës vullnetar, duke deklaruar se në atë vend shërbimi i zjarrfikësve, Mbrojtja Civile dhe ushtria janë nën autoritetin e Ministrit të Mbrojtjes. Sharec deklaroi se, kur mbërriti në Mal të Zi ditën e hënë, pa zjarrin që përfshiu pyllin dhe se si kryeqyteti ishte mbuluar nga tymi. Ai tha se tre vjet më parë në Slloveni ata përjetuanë zjarrin më të madh në historinë e këtij vendi, i përfshirë nga intensiteti i paparë i zjarrit dhe se pati momente kur nuk dihej nëse do të ishin në gjendje të mbronin pronën dhe jetët. "Ne ia dolëm mbanë me përpjekjet e mëdha të të gjithëve të përfshirë. Por sigurisht që Sllovenia nuk ishte vetëm në atë kohë, ne kërkuam ndihmë ndërkombëtare dhe kishim më shumë nevojë për aviacionin", tha Sharec.

Zyrtarët e policisë do të ngrenë kallëzim kundërvajtjeje kundër prindërve të një të mituri të dyshuar për shkaktimin e një zjarri në Zetë

Zyrtarët e policisë do të ngrenë kallëzim kundërvajtjeje kundër prindërve të një të mituri të dyshuar për shkaktimin e një zjarri në Zetë, njoftoi Administrata e Policisë. Thuhet se gjatë ditës së djeshme janë identifikua tre të mitur të moshës 13 dhe 11 vjeç, njëri prej të cilëve, siç dyshohet, shkaktoi një zjarr në Zetë që u përhapë duke përdorur një mjet të përshtatshëm, ndërsa dy të miturit e tjerë ishin me të. "Duke pasur parasysh se, për shkak të moshës së tij, ai është një person i papërgjegjshëm penalisht dhe kundërvajtës, do të ngrihet një kallëzim kundërvajtjeje kundër prindërve të këtij të mituri, në përputhje me Ligjin për Mbrojtjen nga Dhuna në Familje dhe  për neglizhencë ndaj fëmijës", thuhet në deklaratë.

Admir Shahmanoviq u bëri thirrje kompanive të shumta që të ndihmojnë qytetarët dhe komunitetet e prekura nga zjarret

Ministri i Energjisë dhe Minierave Admir Shahmanoviq u bëri thirrje koncesionarëve, kompanive të naftës, kompanive të energjisë dhe partnerëve të biznesit nga sektorët e energjisë, naftës dhe minierave që të ndihmojnë qytetarët dhe komunitetet e prekura nga zjarret. Shahmanoviq, në një thirrje për solidaritet dhe ndihmë në riparimin e pasojave të zjarreve në vend, deklaroi se Mali i Zi po kalon kohë të vështira këto ditë dhe se zjarret kanë kërcënuar jetën e njerëzve, kanë shkatërruar shtëpitë dhe kanë dëmtuar burimet natyrore të vendit. "Ky është momenti kur matet forca jonë si komunitet, kur solidariteti dhe humanizmi bëhen vlera jonë më e madhe", tha pos tjerash Shahmanoviq.

Sistemi Elektrodistribuiv i Malit të Zi (CEDIS) ka paguar pesë mijë euro në llogarinë e dedikuar të Qeverisë, me qëllim që të ndihmojë në zbutjen e pasojave të zjarreve

Sistemi Elektrodistribuiv i Malit të Zi (CEDIS) ka paguar pesë mijë euro në llogarinë e dedikuar të Qeverisë, me qëllim që të ndihmojë në zbutjen e pasojave të zjarreve që kanë goditur Malin e Zi në ditët e fundit, njoftoi kompania. CEDIS tha se donacioni i tyre përfaqëson një shprehje solidariteti dhe mbështetjeje për qytetarët në riparimin e dëmeve nga zjarri. Ata thanë se në këto kohë të vështira është e rëndësishme të jemi me ata që kanë më shumë nevojë për ndihmë. "Ne ngushëllojmë thellësisht të gjithë ata që u është  shkatërrua prona e tyre dhe ndiejmë trishtim të veçantë për jetën e të riut që përfundoi tragjikisht. Momente të tilla na kujtojnë se sa e rëndësishme është të kemi mbështetje për njëri-tjetrin", thuhet nga CEDIS.

Gjeloshaj, u ka dërgua mediave një foto nga, siç shprehet, takimi zyrtar në selinë e Byrosë Federale të Hetimit (FBI) në Uashington me Drejtorin e FBI-së, Kash Patel

Zëvendëskryeministri për Politikë Ekonomike dhe Ministri i Zhvillimit Ekonomik, Nikë Gjeloshaj, u ka dërgua mediave një foto nga, siç thekson ai, nga  takimi zyrtar në selinë e Byrosë Federale të Hetimit (FBI) në Uashington me Drejtorin e FBI-së, Kash Patel. Gjeloshaj njoftoi se takimi u mbajt muajin e kaluar si pjesë e vizitës së tij në Shtetet e Bashkuara, me ftesë të institucioneve amerikane, dhe përfaqëson, siç shprehet, konfirmimin e partneritetit dhe besimit të fortë që Mali i Zi gëzon me aleatin e tij kryesor në fushat e sigurisë, sundimit të ligjit dhe zhvillimit ekonomik. Disa individë nga një pjesë e opinjonit dhe të ashtuquajturit ,,gazetarë" u përpoqën ta kontestonin dhe ta vinin në pikëpyetje këtë takim, duke përhapur insinuata, të pavërteta, si dhe disa akuza të rreme në lidhje me arsyet e mbajtjes së takimit. Nuk është e qartë pse një pjesë e opinjonit, politikanë të dështuar, disa media dhe të ashtuquajtur gazetarë u mërzitën kaq shumë nga takimi midis Zëvendëskryeministrit dhe Drejtorit të FBI-së, përveç nëse janë të shqetësuar për forcimin e bashkëpunimit dhe besimit ndërkombëtar", vlerëson Gjeloshaj.

Policia është në kërkim të shtetasit 18-vjeçar të Maqedonisë së Veriut, Andrej Tanaskovski, i cili dyshohet për tentativën e vrasjes së Marko Ljubisha Kan

Policia është në kërkim të shtetasit 18-vjeçar të Maqedonisë së Veriut, Andrej Tanaskovski, i cili dyshohet për tentativën e vrasjes së Marko Ljubisha Kan (56) nga Budva, njoftoi Drejtoria e Policisë. Ata u bënë thirrje qytetarëve të raportojnë nëse e shohin Tanaskovskin ose nëse ai kërkon strehim dhe paralajmëruan se çdo fshehje e vetëdijshme e informacionit mund të jetë vepër penale. "Administrata e policisë, pas identifikimit dhe ndjekjes penale të autorit të dyshuar të veprës penale të tentativës së vrasjes - A.T. (18), shtetas i Maqedonisë së Veriut, i cili u arratis i armatosur, u bën thirrje qytetarëve që menjëherë, nëse kanë informacion se ai ka marrë me qira banesë ose banon në objekte në territorin e Malit të Zi, të paraqesin informacion në lidhje me këtë person në stacionin më të afërt të policisë, nëpërmjet numrit kujdestar 122 ose në mënyrë anonime në numrin 19969", u njoftua nga Policia e Malit të Zi.

Prokuroria dorëzon aktakuzë në mungesë për dëbimin me forcë të mbi 800 mijë civilëve shqiptarë më 1999

Prokuroria Speciale e Kosovës e ka dorëzuar sot në Gjykatën Themelore në Prishtinë një aktakuzë në mungesë kundër 21 të dyshuarve për dëbimin me forcë të mbi 800.000 civilëve shqiptarë nga Kosova gjatë luftës së viteve 1998-’99. Në një konferencë për media në Prishtinë, prokurori që ka hetuar rastin, Atdhe Dema, tha se aktakuza është përgatitur pas pesë vjetëve hetime intensive. “Aktakuza është ngritur për krime lufte kundër popullsisë civile, e cila lidhet me ngjarjet e ndodhura gjatë periudhës janar – qershor 1999 gjatë luftës në Kosovë”, tha Dema. Dema tha se që të gjithë 21 të dyshuarit kanë pasur kontroll të plotë mbi ushtrinë e atëhershme jugosllave dhe mbi policinë serbe dhe se nuk i kanë parandaluar pjesëtarët e tyre nga kryerja e krimeve të luftës kundër popullsisë në Kosovë. Ai tha se nuk mund t’i bëjë të ditur emrat e të dyshuarve në këtë kohë. Veprimet për të cilat ata akuzohen përfshijnë shkatërrimin e pronës civile, sulme të drejtpërdrejta ndaj civilëve dhe vendbanimeve të tyre, përndjekje dhe ndalime arbitrare për arsye etnike, të cilat kanë rezultuar me dëbim të detyruar masiv të popullsisë shqiptare nga Kosova drejt shteteve fqinje. “Këto veprime përbëjnë pjesë të një fushatë të gjerë që ka rezultuar me zhvendosjen me dhunë të rreth 863.000 civilëve shqiptarë, sipas statistikave zyrtare”, tha Dema. Në vitet e fundit, numri i aktakuzave të ngritura në Kosovë për kryerjen e veprës penale “krim i luftës kundër popullatës civile” është rritur dukshëm.

Edhe gjatë ditës së djeshme janë shënua incidente në Serbi

Disa incidente janë regjistrua dje në protestat antiqeveritare në Serbi, të cilat u thirrën nga studentët që kanë bllokuar institucionet e arsimit të lartë për muaj të tërë. Ministri i Punëve të Brendshme Ivica Daçiq tha se të paktën 42 policë u lënduan gjatë protestave, disa prej tyre rëndë, dhe se 37 persona u arrestuan. Pati disa incidente në Beograd, ndërsa në Novi Sad janë demolua tri ambiente të Partisë Progresive Serbe (SNS) në pushtet, raporton Radio Evropa e Lirë. Në Novi Sad, pati gjithashtu një konflikt midis demonstruesve dhe policisë, e cila hodhi gaz lotsjellës ndaj demonstruesve. Gaz lotsjellës u hodh disa herë edhe në Beograd, ku protesta u mbajt në disa vende. Disa kordone të Xhandarmërisë dhe policisë me pajisje për shpërndarjen e demonstratave ndanë pjesëmarrësit e protestës nga mbështetësit e qeverisë pranë ndërtesës së Shtabit të Përgjithshëm në Beograd. Incidente u regjistruan edhe në protestën në Beogradin e Ri, ku u hodh gaz lotsjellës edhe ndaj qytetarëve.

Putini niset drejt Alaskës për takim me Trumpin, ukrainasit presin të shqetësuar

Presidenti i Rusisë, Vladimir Putin, është  nis drejt Alaskës takim ballë për ballë me presidentin amerikan, Donald Trump, për bisedime që synojnë gjetjen e një zgjidhjeje të mundshme për t’i dhënë fund luftës pothuajse katërvjeçare të Rusisë kundër Ukrainës. Takimi i sotëm – pjesë e të cilit nuk do të jenë ukrainasit – do të mbahet në një bazë ajrore pranë Anchorage, dhe po del të jetë vendimtar për ukrainasit e rraskapitur nga lufta, për synimet e Trumpit për të bërë paqe dhe për përpjekjet e Putinit për ta riformuar pozitën e Rusisë në skenën botërore. Udhëheqësit evropianë, të cilët gjithashtu janë lënë jashtë bisedimeve, janë të shqetësuar se marrëveshja e mundshme nga ky takim mund ta lërë Ukrainën në pozitë më të dobët ose t’i minojnë aftësitë e Evropës për ta mbështetur Ukrainën dhe për t’u përballur me kërcënimet e Rusisë. Për rusët, simbolika që Putini po takohet në tokën amerikane – madje në territor që dikur ishte nën kontrollin e Rusisë – është një fitore e vogël në vete. Mundësia e Putinit për të udhëtuar jashtë vendit është e kufizuar nga një fletarrestim për krime lufte e lëshuar nga Gjykata Ndërkombëtare Penale, dhe Perëndimi e ka shndërruar atë në njëri të padëshiruar për shkak të luftës së tij të paprovokuar kundër Kievit.

Autoritetet turke arrestojnë kryetarin e një bashkie të Stambollit dhe 40 zyrtarë të tjerë

Autoritetet turke kanë arrestuar sot kryetarin e një bashkie të rëndësishme të Stambollit, së bashku me rreth 40 zyrtarë të tjerë, duke e zgjeruar fushatën kundër opozitës në vend.Inan Guney, kryetar i bashkisë së Beyoglut në Stambollë, u dërgua në paraburgim si pjesë e një hetimi për korrupsion, raportoi Agjencia shtetërore e lajmeve, Anadolu. Sipas gazetës Birgun dhe mediave të tjera turke, ndër të arrestuarit janë edhe truproja i Guney, këshilltari i tij dhe ndihmës të tjerë. Komuna e Beyoglut drejtohet nga partia kryesore e opozitës, Partia Popullore Republikane (CHP). Bashkitë nën kontrollin e CHP-së janë përballur me valë arrestimesh këtë vit, duke filluar me arrestimin e kryebashkiakut të Stambollit, Ekrem Imamoglu, në muajin mars. Imamoglu, një figurë e njohur opozitare, shihet gjerësisht si sfiduesi kryesor ndaj sundimit dydekadësh të presidentit Recep Tayyip Erdogan dhe është kandidati i CHP-së për zgjedhjet presidenciale të vitit 2028.

Tifozët izraelitë të futbollit shkaktojnë zemërim në Poloni me pankartën “vrasës”

Tifozët izraelitë e ngritën një pankartë ku shkruhej “Vrasës që nga viti 1939” gjatë ndeshjes së mbrëmshme të futbolli kundër një ekipi polak, duke shkaktuar zemërim në Poloni, pasi presidenti polak tha se ajo fyen kujtimin e polakëve, përfshirë hebrenjve, të vrarë në Luftën e Dytë Botërore. Polonia ishte e pushtuar nga Gjermania naziste gjatë Luftës së Dytë Botërore. Popullsia e saj hebraike prej 3.2 milionësh ishte më e madhja në Evropë në fillim të luftës. Pothuajse të gjithë u vranë, shumë prej tyre në kampet e vdekjes së Gjermanisë naziste, ndërsa edhe 3 milionë qytetarë të tjerë johebre humbën jetën gjatë pushtimit. Mosmarrëveshjet historike për Luftën e Dytë Botërore dhe Holokaustin kanë tensionuar marrëdhëniet mes Polonisë dhe Izraelit edhe më parë. Pankarta “Vrasës që nga viti 1939” u shfaq mbi një rresht ulësesh nga tifozët e klubit izraelit Maccabi Haifa gjatë ndeshjes së Ligës së Konferencës kundër Rakow Czestochowa, e cila u zhvillua në Debrecen të Hungarisë për arsye sigurie. “Pankarta skandaloze e shfaqur nga tifozët e Maccabi Haifa fyen kujtimin e qytetarëve polakë – viktima të Luftës së Dytë Botërore, përfshirë 3 milionë hebrenj”, shkroi në X presidenti polak, Karol Nawrocki. “Kjo është marrëzi që asnjë fjalë nuk mund ta arsyetojë”, shtoi ai.Ministri i Brendshëm i Polonisë, Marcin Kierwinski, tha se “anti-polonizmi dhe shtrembërimi skandaloz i historisë polake nga huliganët izraelitë kërkon dënim të ashpër”.Edhe Ambasada e Izraelit në Varshavë e dënoi pankartën.“Nuk ka vend për fjalë dhe veprime të tilla, nga asnjë palë, as në stadium e askund tjetër. Kurrë!” shkroi ambasada në X.

Të paktën 49 persona kanë vdekur në 24 orët e fundit nga shkaku i përmbytjeve të befasueshme dhe rrëshqitjeve të dheut

Të paktën 49 persona kanë vdekur në 24 orët e fundit nga shkaku i përmbytjeve të befasueshme dhe rrëshqitjeve të dheut të shkaktuara nga reshjet e dendura të shiut në Pakistanin veriperëndimor dhe pjesë të tjera të vendit, thanë autoritetet. Ekipet e shpëtimit evakuuan 1.3 mijë turistë që ishin bllokuar në një zonë malore të goditur nga rrëshqitjet e dheut. Shumica e viktimave u regjistruan në rajonet Gilgit-Baltistan, Bajaur dhe Batagram, raporton Tanjug. Në Gilgit-Baltistan, dhjetë persona u vranë në distriktin Gazar, ndërsa në Bajaur, 16 persona, përfshirë gra dhe fëmijë, u vranë dhe 17 janë ende të zhdukur. Dhjetë persona u vranë në Batagram, ndërsa shtatë vdekje u regjistruan në pjesën e Kashmirit të administruar nga Pakistani. Gilgit-Baltistan, një rajon i pasur me akullnaja me 75 përqind të furnizimit me ujë të Pakistanit, përballet me përmbytje dhe rrëshqitje të shpeshta të dheut përgjatë Autostradës Karakoram, një rrugë kyçe për në Kinë.

Për nesër parashihet të mbajë mot me vranësira të ndryshueshme dhe me intervale me diell

Sot në Mal të Zi mban mot me vranësira mesatere deri krejtësisht i vranët. Frynë erë e dobët deri e mesme nga drejtimet e ndryshme. Temperaturat e shënuara në orën 14: Podgoricë 35, B. Pole 33, Beranë 32, Budvë, Nikshiq,Plevle e Pluzhinë 31, Ulqin, Cetinë, Kollashin e Andrievicë 30, H.Novi e Rozhjajë 29, Guci e Petnicë 28 dhe në Zhablak 25.

                          Për nesër parashihet të mbajë mot me vranësira të ndryshueshme dhe me intervale me diell dhe shumë i nxehtë. Në orët e pasditës vende vende me reshje të shiut dhe bubullimë, krysisht në viset malore dhe në veri. Do të fryjë erë e dobët deri e mesme nga drejtim i lindjes. Temperature e mëngjesit prej 12 deri në 26 kurse më e  larta e ditës prej 28 deri në 38 gc.