Ditari 11.07.2025

Ditarin e përgatiti Marash Dedvukaj

Bosnje: Varrosen shtatë viktima në 30-vjetorin e gjenocidit të Srebrenicës

Mijëra persona janë mbledhur sot në Srebrenicë të Bosnje-Hercegovinës për të shënuar 30-vjetorin e aktit të njohur të vetëm të gjenocidit në Evropë prej Luftës së Dytë Botërore. "E gjitha është ngulitur përgjithmonë në kujtesë", ka thënë Adem Mehmedoviq për Shërbimin e Ballkanit të Radios Evropa e Lirë. Në Qendrën Përkujtimore në Potoçari do të varrosen shtatë viktima të gjenocidit. Viktimat më të reja janë Senajid Avdiq dhe Hariz Mujiq, të cilët ishin 19 vjeç kur u vranë në korrik të vitit 1995. Përveç tyre, do të varrosen edhe Rifet Gabeliq, Hasib Omeroviq, Sejdalija Alliq dhe Amir Mujçiq. Viktima më e moshuar, dhe e vetmja grua që do të varroset këtë vit, është Fata Bektiq, e cila ishte 67 vjeç në korrik të vitit 1995. Anëtari i Presidencës trepalëshe të Bosnje-Hercegovinës, Denis Beqiroviq ka thënë se 30 vjet kanë kaluar prej gjenocidit, i cili ka qenë “kulmi i agresionit barbar kundër një shteti të njohur ndërkombëtarisht”. Duke folur në ceremoninë përkujtimore në Potoçari, ai ka thënë se gjenocidi nuk ka qenë koinçidencë historike, por diçka që është planifikuar, financuar dhe më pas kryer në mënyrë brutale. “E di që edhe sot shumë njerëz nuk duan të dëgjojnë për rolin e udhëheqësisë serbe në gjenocid. Obligimi im është të flas publikisht. Agresioni kundër Bosnje-Hercegovinës është nisur prej Beogradit. Pa mbështetje ushtarake, logjistike dhe financiare, gjenocidi në Srebrenicë nuk do të ishte i mundshëm”, ka thënë Beqiroviq.

Ibrahimoviq, udhëhoqi delegacionin e Qeverisë së Malit të Zi në përkujtimin me rastin e 30-vjetorit të gjenocidit në Srebrenicë

Zëvendëskryeministri dhe Ministri i Punëve të Jashtme, Ervin Ibrahimoviq, udhëhoqi delegacionin e Qeverisë së Malit të Zi në përkujtimin me rastin e 30-vjetorit të gjenocidit në Srebrenicë. Me mesazhe mbështetjeje për familjet e viktimave dhe të gjithë të mbijetuarit e krimit më të madh në tokën evropiane pas Luftës së Dytë Botërore, ministri Ibrahimoviq, në fjalimin e tij tha se 30 vjet më parë në Srebrenicë ndodhi një e keqe që mposhti arsyen dhe mundi njerëzimin, duke theksuar se gjenocidi kundër popullit boshnjak ishte një akt sistematik me qëllim shfarosjen e njerëzve vetëm për shkak të fesë, kombit dhe emrit të tyre.

"Është detyrimi ynë njerëzor dhe qytetërues të përsërisim pa u lodhur dhe qartë të vërtetën – se në Srebrenicë ndodhi gjenocid. Harresa nuk është një opsion, sepse nëse nuk kujtojmë, nëse nuk paralajmërojmë dhe nëse nuk paralajmërojmë, e keqja do të triumfojë përsëri mbi të mirën, mbi arsyen dhe mbi njerëzimin, sepse e keqja ka një tipar shumë specifik – se pa u përkujtuar dhe dënuar ajo kurrë nuk humbet, tha Ibrahimoviq.

Mujoviq,Ljiljaniq dhe Spaleviq vendosën sot kurorë me lule në monumentin e viktimave të luftërave të viteve 1991-2001 në territorin e ish-Jugosllavisë, në Parkun Memorial në Pobrezhje

Në kujtim të të vrarëve në Srebrenicë në korrik të vitit 1995, kryetari i bashkisë së Podgoricës, Sasha Mujoviq dhe nënkryetarët e bashkisë Nagja Ljiljaniq dhe Boris Spaleviq vendosën sot kurorë me lule në monumentin e viktimave të luftërave të viteve 1991-2001 në territorin e ish-Jugosllavisë, në Parkun Memorial në Pobrezhje, u njoftua nga Kryeqyteti. Duke vendosur kurorë me lule, shtojnë ata, Kryeqyteti u bën homazh viktimave të pafajshme të njërit prej krimeve më të errëta në historinë evropiane, kohëve të fundit, dhe  njëheri mbetet i përkushtuar për të kultivuar vlerat e paqes, tolerancës dhe solidaritetit, por edhe për të ndërtuar një shoqëri në të cilën krime të tilla nuk do të përsëritën më kurrë.

Bashkimi Evropian - Kujtimi i Srebrenicës është thirrje për përgjegjësi, njohje pa kompromis të gjenocidit dhe ndëshkim të të gjithë atyre që janë përgjegjës

Kujtimi i Srebrenicës është thirrje për përgjegjësi, njohje pa kompromis të gjenocidit dhe ndëshkim të të gjithë atyre që janë përgjegjës për atë akt të shëmtuar, tha Bashkimi Evropian. Sot, me rastin e Ditës Ndërkombëtare të Përkujtimit të Viktimave të Gjenocidit në Srebrenicë, delegacioni i këtij koalicioni vendosi kurorë në monumentin e viktimave të luftërave të viteve 1991-2001 në territorin e ish-Jugosllavisë, në Pobrezhje në Podgoricë. "Kujtimi i Srebrenicës është një thirrje për përgjegjësi, për njohje pa kompromis të gjenocidit, dënimin dhe ndëshkimin e të gjithë atyre që janë përgjegjës për këtë akt të shëmtuar", thuhet në deklaratë.

Vujoviq - Mali i Zi, si anëtar i përgjegjshëm i bashkësisë ndërkombëtare 

Mali i Zi, si anëtar i përgjegjshëm i bashkësisë ndërkombëtare, është i përkushtuar ndaj pajtimit dhe paqes së qëndrueshme, tha Ministrja e Kulturës dhe Medias, Tamara Vujoviq. Ajo tha se 30 vjet nga gjenocidi në Srebrenicë detyron të ruajë kujtesën, të ndërtojë një kulturë paqeje dhe të jetë një zë i ndërgjegjes që nuk harron kurrë. "Në këtë moment të dhimbshëm për familjet e viktimave, për Bosnjën dhe Hercegovinën dhe të gjithë rajonin, shprehim respektin tonë më të thellë për viktimat e pafajshme dhe solidaritetin me ata që humbën të dashurit e tyre", deklaroi Vujoviq.

Gjukanoviq - Injorimi i drejtësisë dhe i të vërtetës dhe mosrespektimi i ligjit ndërkombëtar mbart me vete një rrezik real të përsëritjes së ngjarjeve tragjike

Injorimi i drejtësisë dhe i të vërtetës dhe mosrespektimi i ligjit ndërkombëtar mbart me vete një rrezik real të përsëritjes së ngjarjeve tragjike të viteve 1990, tha ish-Presidenti i Malit të Zi Millo Gjukanoviq. Ai deklaroi në rrjetin social X se kanë kaluar tre dekada që nga krimi i tmerrshëm në Srebrenicë, i cili u kualifikua si gjenocid nga gjykata e lartë ndërkombëtare. "Bashkohem me të gjithë ata që përkujtojnë Ditën Ndërkombëtare të Përkujtimit të Gjenocidit në Srebrenicë, me respekt të thellë për viktimat dhe keqardhje të sinqertë për familjet e tyre. E njëjta gjë vlen edhe për të gjithë ata që dënojnë mohimin e gjenocidit", tha Gjukanoviq.

M.Dukaj - Dita e Përkujtimit të Viktimave të Gjenocidit të Srebrenicës është një kujtesë se ku mund të çojnë ekskluziviteti kombëtar, mitet dhe shovinizmi

Dita e Përkujtimit të Viktimave të Gjenocidit të Srebrenicës është një kujtesë se ku mund të çojnë ekskluziviteti kombëtar, mitet dhe shovinizmi, tha Ministri i Administratës Publike Marash Dukaj. Dukaj është pjesë e delegacionit malazez që po merr pjesë në përkujtimin e sotëm me rastin e Ditës së Përkujtimit për viktimat e gjenocidit në Srebrenicë."Dita e Përkujtimit të Gjenocidit në Srebrenicë na bën thirrje të kujtojmë me keqardhje të thellë të gjithë ata që humbën jetën, por edhe të përballemi me një paralajmërim - ku mund të na çojnë ekskluziviteti kombëtar, mitet dhe shovinizmi", tha Dukaj. Siç tha ai, ide të tilla ishin shkaku i vuajtjeve dhe konflikteve të paimagjinueshme në të kaluarën tonë.

"Është detyra jonë të mësojmë nga ato ngjarje tragjike, në mënyrë që ato të mos ndodhin më kurrë. Ne duhet të luftojmë kundër urrejtjes dhe të ndërtojmë ura mirëkuptimi, respekti dhe solidariteti të ndërsjellë", tha Dukaj.

Kryeministri i Malit të Zi, Millojko Spajiq, është takua në Romë me  Kryeministrën e Italisë Djordja Meloni

Kryeministri i Malit të Zi, Millojko Spajiq, u takua me Kryeministrën e Italisë në Romë në konferencën për rindërtimin e Ukrainës. Siç theksoi ai, është kënaqësi të shoh përsëri Kryeministrën italiane, Djordja Meloni, dhe të konfirmojë mbështetjen për procesin integrues të Malit të Zi dhe zgjerimin e BE-së."Së shpejti presim forumin e biznesit të Malit të Zi dhe Italisë dhe forcimin e lidhjeve ekonomike midis dy vendeve. Në Romë, në konferencën për rindërtimin e Ukrainës, dërguam një mesazh mbështetjeje të fortë për unitetin e Evropës, domosdoshmërinë e paqes në Ukrainë sa më shpejt të jetë e mundur dhe rimëkëmbjen e saj ekonomike dhe institucionale", tha Kryeministri në rrjetin X.

Mali i Zi, në përputhje me rekomandimet e partnerëve të tij evropianë, duhet të bëjë urgjentisht ndryshime në legjislacionin zgjedhor

Mali i Zi, në përputhje me rekomandimet e partnerëve të tij evropianë, duhet të bëjë urgjentisht ndryshime në legjislacionin zgjedhor, veçanërisht në fushën e unifikimit të zgjedhjeve lokale dhe relaksimit të skenës politike nga proceset e shpeshta zgjedhore, tha zëvendëskryeministri Aleksa Beçiq. Ai në Bodrumin e Verës në Shipshanik, organizoi një pritje festive për delegacionin gjerman, të udhëhequr nga Ministrja e Brendshme e Saksonisë -Anhalt, Tamara Cishang. Kabineti i Beçiqit njoftoi se në përbërje të delegacionit ishin edhe anëtarët e delegacionit të parlamentit krahinor të Saksonisë së Poshtme, si dhe përfaqësues të Fondacionit Konrad Adenauer Stiftung. Beçiq tha se Qeveria e 44-të që nga fillimi ka vepruar në tre drejtime - Mali i Zi si faktor stabiliteti në Ballkanin Perëndimor, si anëtar i besueshëm i NATO-s dhe anëtari i parë i ardhshëm i Bashkimit Evropian (BE). "Kjo qeveri gëzon mbështetjen e rreth dy të tretave të parlamentit malazez, gjë që mundëson stabilitetin politik të domosdoshëm, i cili është veçanërisht i rëndësishëm për vazhdimin e integrimit evropian", theksoi Beçiq.

Nga viti 2014 deri në vitin 2020, Komisioni Evropian (KE) i ka nda Malit të Zi afërsisht 116 milionë euro në grante nga fondet IPA

Nga viti 2014 deri në vitin 2020, Komisioni Evropian (KE) i ka nda Malit të Zi afërsisht 116 milionë euro në grante nga fondet IPA, duke mbuluar një gamë të gjerë sektorësh, njoftoi Ministria e Çështjeve Evropiane.Departamenti qeveritar tha se të mërkurën dhe të enjten, me qëllim vlerësimin e progresit dhe udhëzimin e proceseve të reformave të mbështetura nga Instrumenti për Mbështetjen e Para-Anëtarësimit të Bashkimit Evropian (IPA), u mbajt Komiteti Sektorial Mbikëqyrës për IPA-n. Siç u tha, takimi mblodhi përfaqësues të institucioneve malazeze, përfitues të fondeve IPA dhe partnerë nga drejtoritë përkatëse të KE-së, me qëllim shqyrtimin e rezultateve të zbatuara deri më tani dhe diskutimin e hapave të ardhshëm në reformat e financuara nga fondet e BE-së."Eventi ishte një mundësi e rëndësishme për të prezantuar dhe analizuar rezultatet e arritura në fushat kryesore të mbështetura përmes instrumentit IPA, të cilat përfshijnë sundimin e ligjit, reformën e administratës publike, energjinë, mbrojtjen e mjedisit, transportin, tregtinë, arsimin, punësimin, mbrojtjen sociale, inovacionin, bujqësinë dhe zhvillimin rural", thuhet në deklaratë.

Oficerët e policisë kanë arrestua shtetasin amerikan P.G. (51)  në aeroportin e Podgoricës, tek i cili u gjet municion, u raportua nga Administrata e Policisë.

Thuhet se gjatë kontrollit të pasagjerëve në fluturimin e një linje ajrore të huaj, gjatë kontrollit të bagazhit të P.G., shtetasit të Shteteve të Bashkuara të Amerikës, oficerët e policisë i gjetën municion të kalibrit nëntë milimetër, i cili ishte fshehur në dollap. "Prokurori i shtetit në Prokurorinë Themelore të Shtetit në Podgoricë u njoftua për rastin dhe urdhëroi arrestimin e P.G. me dyshimin se ka kryer veprën penale të posedimit dhe mbajtjes pa leje të armëve dhe substancave shpërthyese", thuhet në deklaratë.

Kuvendi nuk konstituohet as në përpjekjen e 45-të

Kuvendi i Kosovës nuk është konstituuar as në përpjekjen e 45-të, meqë partitë politike vazhdojnë të ngulojnë se kanë të drejtë në qëndrimet e veta. Në seancën e 11 korrikut kanë marrë pjesë 93 deputetë. Abelard Tahiri nga Partia Demokratike e Kosovës e ka akuzuar kryesuesin e seancës Avni Dehari - nga Lëvizja Vetëvendosje - për shkelje të Kushtetutës. “Kjo është e papranueshme”, ka thënë Tahiri nga foltorja e Kuvendit, teksa Dehari ka kërkuar që atij t’i ndalet mikrofoni. Akuza kundër Deharit kanë pasur edhe përfaqësues të partive tjera, të cilëve, gjithashtu u është ndalur mikrofoni. Partia Demokratike e Kosovës (PDK), Lidhja Demokratike e Kosovës (LDK), Aleanca për Ardhmërinë e Kosovës (AAK) dhe Lista Serbe – partia më e madhe e serbëve në Kosovë – nuk pranojnë të propozojnë nga një kandidat për formim të një komisioni për votim të fshehtë, me arsyetimin se mënyra e ndryshimit të votimit është jokushtetuese. Lëvizja Vetëvendosje - fituese e më së shumti votave në zgjedhjet e 9 shkurtit - kërkon që për Albulena Haxhiun – të propozuar për kryeparlamentare – të votohet vetëm një herë përmes votimit të fshehtë dhe nëse nuk i siguron 61 votat e nevojshme, ajo do të tërhiqet nga gara. Ajo nuk i ka siguruar votat e nevojshme në disa seanca radhazi që janë mbajtur me votim të hapur. Për disa parti, ajo është figurë përçarëse dhe e papranueshme. Pjesëtarë të shoqërisë civile kanë protestuar sërish para ndërtesës së Kuvendit duke i thirrur deputetët në përgjegjësi. Ata janë parë duke mbajtur në duart pankarta me mbishkrimet: “Demokracia nuk është veç procedurë”, “Cirku i Republikës së Kosovës”, “120 rroga, 0 përgjegjësi”, e tjera.

Osmani diskuton me zëvendëssekretarin Landau për bashkëpunimin ekonomik Kosovë - SHBA

Presidentja e Kosovës, Vjosa Osmani është takuar me zëvendëssekretarin amerikan të Shtetit, Christopher Landau në Uashington për t’i diskutuar fushat potenciale për bashkëpunimin ekonomik mes dy vendeve në të ardhmen. Zëdhënësja e Departamentit amerikan të Shtetit, Tammy Bruce, ka thënë se palët kanë shprehur bindje që “prosperiteti ekonomik dhe bashkëpunimi do t’i ndihmojnë Ballkanit Perëndimor që të largohet nga ndasitë e së kaluarës dhe të promovojë paqe të qëndrueshme dhe stabilitet në rajon”. Osmani ka thënë përmes një postimi në Facebook se “Kosova qëndron krah për krah me Shtetet e Bashkuara për të ndërtuar kapituj të rinj të bashkëpunimit strategjik, në përputhje me vizionin e fortë të Presidentit Trump". Më heret, Osmani është takuar edhe me zyrtarin e lartë të Departamentit amerikan të Shtetit për Çështje Evropiane, Brendan Hanrahan, i cili pritet të vizitojë Kosovën në ditët në vijim. Përmes një postimi tjetër në Facebook, Osmani ka thënë se bashkë me diplomatin amerikan kanë diskutuar për "thellimin e partneritetit strategjik midis Kosovës dhe Shteteve të Bashkuara”. “Kosova është e gatshme ta avancojë bashkëpunimin me SHBA-të në fusha kyç si mbrojtja, ekonomia, si dhe investimet strategjike me interes të ndërsjellë”.

S'ka amnisti për kosovarët që luftuan në Siri, edhe pse SHBA-ja s'e sheh më Al-Nusrën si terroriste

Dikur terroristë, sot jo më - të paktën për SHBA-në. Por, për drejtësinë në Kosovë, ligji s’ndryshon me diplomacinë. Kosovarët që i ishin bashkuar Frontit Al-Nusra në Siri, do të vazhdojnë të ndiqen penalisht dhe dënohen, edhe pasi SHBA-ja e hoqi atë nga lista e organizatave terroriste. Një dekadë, gjykatat në Kosovë kanë trajtuar e dhënë verdikte përfundimtare për shumë kosovarë që kanë shkuar, nga viti 2011, për të luftuar në Siri e Irak. Pse janë dënuar ata? Sepse, në vitin 2015, Kosova ka miratuar një ligj që ua ndalon shtetasve të saj të përfshihen në luftëra të huaja. Dënimet variojnë deri me 15 vjet burgim për vepra të ndryshme, jo vetëm për pjesëmarrje në luftë jashtë Kosovës. Dënim parashihet edhe për këdo që i nxit të tjerët të marrin pjesë në këto luftëra, këdo që mbledh fonde për to dhe këdo që fsheh dëshmi për kryerjen e këtyre veprave. Shumë prej dënimeve të shqiptuara lidhen me kosovarët që i janë bashkuar organizatës Hayat Tahrir al-Sham (HTS), e njohur edhe si Fronti Al-Nusra. Ajo është shpallur organizatë terroriste nga SHBA-ja në vitin 2013, për shkak të lidhjeve të mëparshme të saj me Al-Kaidën e Sirisë.

PPK-ja dorëzon armët si hap drejt përfundimit të konfliktit në Turqi

Pas 40 vjetësh të konfliktit kundër shtetit turk, grupi militant Partia Popullore e Kurdistanit (PKK) sot do të mbajë një ceremoni për të shënuar hapin e parë drejt dorëzimit të armëve. Procesi i çarmatimit do të nisë nën masa të rrepta të sigurisë dhe pritet të zgjasë gjithë verën. Presidenti turk, Recep Tayyip Erdogan, e ka përshëndetur këtë veprim duke e përshkruar si "shkatërrim total dhe hedhje tutje të prangave të përgjakshme që iu vunë këmbëve të vendit tonë". Rreth 40.000 njerëz janë vrarë prej nisjes së konfliktit, ndërsa PKK-ja konsiderohet grup terrorist në Turqi, Shtetet e Bashkuara, Mbretëri të Bashkuar dhe Bashkimin Evropian. Çarmatimi i tij do të ketë ndikim jo vetëm në Turqi, por edhe në Irak, Siri dhe Iran. Një grup i vogël i anëtarëve të PKK-së do t’i dorëzojë simbolikisht armët në rajonin irakian të Kurdistanit, për t’u kthyer më pas në bazë. Përmes një videoje, lideri i burgosur i PKK-së, Abdullah Ocalan, ka thënë se ky ka qenë “tranzicion vullnetar nga faza e konfliktit të armatosur në fazën e politikës demokratike dhe ligjit”. Ai është mbajtur në qeli në një burg në ishullin e vogël Imrali, në jugperëndim të Stambollit, prej vitit 1999. Ky nuk është tentimi i parë për paqe në mes të Turqisë dhe këtij grupi, mirëpo ky veprim konsiderohet shpresa më e madhe që grupi i armatosur prej vitit 1984, do t’i japë fund kësaj qasjeje. Fillimisht si grup marksist, PKK-ja i ka kapur armët në duar me thirrjet për shtet të pavarur brenda Turqisë.

Trump: Armët amerikane do të dërgohen në Ukrainë përmes NATO-s

Presidenti amerikan, Donald Trump ka thënë se Shtetet e Bashkuara janë duke dërguar armë në Ukrainë përmes NATO-s, një javë pasi Pentagoni ka bërë të ditur që do të ndalojë së dërguari disa armë në këtë shtet të goditur nga lufta e Rusisë. Trump ka thënë se do të bëjë një “deklarim të madh” për Rusinë më 14 korrik. Ai nuk ka dhënë më shumë hollësi në këtë aspekt, mirëpo ka folur për dërgimin e armëve. “Po i dërgojmë armë NATO-s, dhe NATO-ja po paguan për këto armë 100%. Pra, çfarë po bëjmë është se armët që po nisen, po shkojnë në NATO, dhe më pas NATO-ja do t’i dorëzojë këto armë në Ukrainë dhe NATO-ja do të paguajë për këto armë”, ka thënë Trump në një intervistë për transmetuesin amerikan NBC. Më herët gjatë javës, Trump ka thënë se do të kërkojë nisjen e disa armëve për mbrojtje për Ukrainën, pas komenteve negative të disa anëtarëve të Kongresit rreth njoftimit të Pentagonit, më 2 korrik, që disa armë nuk do të dërgohen, pas shqetësimeve se rezervat amerikane kanë rënë në mënyrë të konsiderueshme. Trump duket se e ka përmbysur këtë vendim më 8 korrik, kur ka thënë se Shtetet e Bashkuara do të dërgojnë armë për mbrojtje Ukrainës, teksa intensifikohen sulmet ruse. Ai, gjithashtu, është shprehur i zemëruar me presidentin rus, Vladimir Putin, duke thënë se po e shqyrton mundësinë e vendosjes së sanksioneve të reja ndaj Moskës.

Sulmi ajror izraelit vret 10 fëmijë pranë një qendre mjekësore në Gazë

Nga një sulm i mbrëmshëm ajror izraelit i cili ka goditur qendrën mjekësore në Rripin e Gazës, janë  vrarë 10 fëmijë dhe gjashtë të rritur, sipas zyrtarëve shëndetësorë. Sulmi ndodhi në një kohë kur nuk duket se do të arrihet së shpejti ndonjë marrëveshje në bisedimet për armëpushim që janë duke u zhvilluar. Pamjet e verifikuara nga sulmi në Deir al-Balah, në pjesën qendrore të Rripit të Gazës, shfaqin trupat e grave dhe fëmijëve të shtrirë në pellgje gjaku, raporton Reuters. Një video tjetër shfaq disa fëmijë të palëvizshëm të shtrirë mbi një karrocë.“Ajo nuk bëri asgjë, ishte e pafajshme, betohem. Ëndrra e saj ishte që lufta të përfundonte dhe që ata të njoftonin sot, në mënyrë që ajo të kthehej në shkollë”, tha Samah al-Nouri, duke qëndruar pranë trupit të vajzës së saj që u vra në sulm. “Ajo thjesht po merrte trajtim në një qendër mjekësore. Pse i vranë?” tha ajo. Ushtria izraelite tha se e goditi një militant që kishte marrë pjesë në sulmin e udhëhequr nga Hamasi më 7 tetor 2023 në Izrael, i cili e shkaktoi fillimin e luftës në Gazë.

Nesër mot i ngjashëm me të sotmin

Për nesër metereologët parashikojnë mot kryesisht të kthjellët. Do të fryjë erë kryesisht e dobët, nga drejtimet e ndryshme. Temperatura e mëngjesit do të sillet prej 6 deri në 22 kurse më e larta e ditës prej 20 deri në 32 gc.