Ditari 04.07.2025

Ditarin e përgatiti, Violeta Gjokaj

MILLATOVIQ: KUVENDI ËSHTË I PAPËRGJEGJSHËM NË PROPOZIMIN E KANDIDATËVE PËR GJYQTARË TË GJYKATËS KUSHTETUESE

Presidenti i Malit të Zi, Jakov Millatoviq, tha se Kuvendi është i papërgjegjshëm në propozimin e kandidatëve për gjyqtarë në Gjykatën Kushtetuese.

Duke komentuar faktin që Kuvendi ende nuk i ka zgjedhur gjyqtarët që mungojnë në Gjykatën Kushtetuese, ai vlerësoi se kjo është një zgjatim i krizës së rëndë kushtetuese në të cilën ndodhet vendi ynë, e cila filloi vitin e kaluar në dhjetor.

"Kriza tani konfirmohet qartë nga mendimi i Komisionit të Venecias në lidhje me daljen në pension jokushtetuese të gjyqtares së Gjykatës Kushtetuese, znj. Gjuranoviq. Gjithashtu, i njëjti mendim u konfirmua edhe në raportin e Komisionit Evropian. Kemi një papërgjegjësi të madhe nga ana e Kuvendit kur bëhet fjalë për plotësimin e kandidatëve të propozuar për gjyqtarë të Gjykatës Kushtetuese", tha Millatoviq në përgjigje të pyetjeve nga media.

Sipas tij, vendi është në një krizë kushtetuese dhe nuk do të donte që kjo çështje të përfundonte pa përgjegjësinë e askujt.

SPAJIQ FOLI ME PAPA LEON XIV

Kryeministri Millojko Spajiq dhe kreu i Kishës Katolike Romake, Papa Leo XIV, folën sot në Pallatin Apostolik të Vatikanit.

Vatican News shkruan se Spajiq foli edhe me Sekretarin e Shtetit, Kardinal Pietro Parolin, i shoqëruar nga Sekretari për Marrëdhëniet me Shtetet dhe Organizatat Ndërkombëtare, Kryepeshkopi Paul Richard Gallagher.

Thuhet se gjatë bisedimeve të përzemërta në Sekretariatin e Shtetit, palët shprehën kënaqësinë e tyre për marrëdhëniet e mira aktuale dypalëshe, si dhe se u diskutuan çështje të ndryshme që lidhen me marrëdhëniet Kishë-shtet.

Në takim u diskutuan edhe çështje të ndryshme rajonale dhe ndërkombëtare, me vëmendje të veçantë që iu kushtua zgjerimit të Bashkimit Evropian në vendet e Ballkanit Perëndimor dhe konfliktit të vazhdueshëm në Ukrainë.

MIKIQ DHE VUKOVIQ JANË DEPUTETË TË RINJ TË LËVIZJES QYTETARE URA

Zoran Mikiq dhe Millena Vukoviq janë deputetët e rinj të Lëvizjes Qytetare URA në parlament, u vendos në atë parti. Ata do të zëvendësojnë nënkryetarin aktual Filip Axhiq dhe drejtoreshën politike të asaj partie, Ana Novakoviq Gjuroviq. Kjo u njoftua në konferencën për shtyp. Siç thanë ata, vitin e ardhshëm Millosh Konatar do të zëvendësohet nga Milleta Radovaniq, dhe presidenti i partisë Dritan Abazoviq do të zëvendësohet nga Luka Rakceviq.

Siç tha Konatar në konferencën për shtyp, ata nuk bënë reklamë për këtë çështje sepse po punonin për përgatitjen e Kongresit që do të mbahet nesër në Lovqen. Ai ftoi përfaqësuesit e medias për të përkujtuar atë jubile, 10 vjet nga themelimi i Levizjes qytetare URA.

"U njoftuan rotacionet në klub dhe vendosëm të paraqesim tetë zëvendëspresidentë dhe të tregojmë se URA ka njerëz që e bëjnë mirë punën e tyre", tha Konatar.

Ai thotë se Axhiq dhe Novakoviq Gjuroviq kanë treguar aktivitete përmes klubeve të tyre parlamentare dhe se janë vendosur standarde të larta.

"Nuk kam dyshim se ata që do të vijnë do të jenë të mirë dhe ndoshta më të mirë se ne që jemi këtu tani", tha Konatar.

MANDIQ: URIME TË SINQERTA TË GJITHË QYTETARËVE AMERIKAN NË MAL TË ZI

Gjatë historisë, Mali i Zi është ndërtua mbi themelet e lirisë -individuale dhe kolektive , deklaroi kryeparlamentari malazez, Andija Mandiq.” Është pikërisht kjo vlerë e lirisë , e cila është thelbi i shoqërive demokratike , që Mali i Zi ndan me SHBA-të” , tha Mandiq në rrjetin X.

Këto komente ai i bëri me rastin e 4 korrikut , Ditës së pavarësisë së Amerikës, me c’rast u dërgoi urime të sinqerta të gjithë qytetarëve amerikan në Mal të Zi , si dhe emigranteve në Aerikë.  

MILLATOVIQ: BALANCA GJINORE, PËRGJEGJËSIA POLITIKE E MBAJTËSVE TË PUSHTETIT

Balanca gjinore nuk është korrektësi politike, por përgjegjësi politike e pushtetmbajtësve për të siguruar një sistem të drejtë, të barabartë dhe të bazuar në parime, tha Presidenti i Shtetit Jakov Millatoviq, duke shtuar se është e nevojshme të forcohet roli i grave në shoqërinë malazeze.

Siç u njoftua nga zyra e tij, Millatoviq mori pjesë në konferencën "Fuqia e vendimmarrjes pa balancim gjinor", e cila u organizua nga Aleanca Qytetare.

Millatoviq tha se temat që lidhen me barazinë në vendimmarrje nuk duhet të trajtohen kurrë si dytësore.

Ai theksoi se institucionet nuk mund t'u shërbejnë të gjithëve nëse nuk i përfaqësojnë të gjithë.

Ai kujtoi se, sipas analizës së përgatitur nga Aleanca Qytetare, ka 53 anëtarë të bordit të drejtorëve në dhjetë ndërmarrjet më të mëdha shtetërore, por vetëm tetë janë gra.

Siç theksoi ai, është veçanërisht i kënaqur që kandidatja për gjyqtare të Gjykatës Kushtetuese e propozuar nga presidenti është gjithashtu një grua.

Ai tha gjithashtu se barazia në vendimmarrje nuk është një kërkesë, por një standard i demokracive të zhvilluara.

GJELAJ: SULMI POLITIK I MINISTRIT AXHOVIQ NDAJ TUZIT

Kryetari i Komunës së Tuzit, Lindon Gjelaj , i bëri thirrje kryeministrit Millojko Spajiq që të përcaktojë qartë nëse mbështet, siç tha ai, lëvizjet dhe politikën e njëanshme të ministres së Punëve Publike, Majda Adxhoviq , e cila anuloi tenderin për ndërtimin e një palestre sportive në Tuz, duke vlerësuar se në këtë mënyrë ajo dëshiron ta poshtërojë, shantazhojë dhe dobësojë Komunën e Tuzit.

Në një deklaratë dërguar medias, Gjelaj e quajti vendimin e ministres skandaloz dhe një nga të preferuarat e Partisë Demokratike të Socialistëve në opozitë.

Kryetari i Komunës së Tuzit pretendon se po bëhet një përpjekje për të ndaluar përparimin e një komuniteti lokal për hir të pikëve të vogla politike.

Ai i bën thirrje Kryeministrit të marrë një vendim dhe pyet nëse qëllimi i Qeverisë është të shkatërrojë apo të ndihmojë realizimin e projekteve kapitale në Komunën e Tuzit.

Kryetari i Komunës së Tuzit thotë se do të përdorë të gjitha mjetet ligjore për të mbrojtur interesat e Komunës.

CILËSIA ËSHTË NJË KUSHT I DOMOSDOSHËM I ADMINISTRATËS PUBLIKE MODERNE

Cilësia është një kusht i domosdoshëm i administratës publike moderne dhe është një domosdoshmëri në epokën e transformimit dixhital dhe pritjeve në rritje të qytetarëve dhe ekonomisë.

Kjo u vlerësua në panelin e diskutimit "Cilësia si çelës për administratë publike efektive - përfitime dhe shembuj praktikë", të organizuar nga Ministria e Administratës Publike në bashkëpunim me Shkollën Rajonale për Administratë Publike (ReSPA).

Në hapje të panelit, ministri përkatës Marash Dukaj tha se cilësia është një kusht i domosdoshëm i administratës publike moderne.

Ai kujtoi, siç u njoftua nga Ministria e Administratës Publike, se ky departament qeveritar është institucioni i parë në Mal të Zi që prezantoi menaxhimin e cilësisë përmes modelit të vetëvlerësimit të përbashkët - CAF.

Siç theksoi Dukaj, Ministria ishte e para që mori certifikatën CAF.

Dukaj tha se Ministria është e gatshme të ofrojë mbështetje teknike dhe këshillimore për të gjitha institucionet që duan të fillojnë ose përmirësojnë procesin e menaxhimit të cilësisë.

Drejtoresha, Maja Handjiska Trendafilova, theksoi rëndësinë e bashkëpunimit rajonal dhe zbatimin e standardeve të përbashkëta evropiane të cilësisë.

Sipas saj, kur institucionet publike miratojnë standarde cilësie si CAF, ato jo vetëm që rrisin transparencën, efikasitetin dhe llogaridhënien, por edhe forcojnë besimin dhe krijojnë rezultate më të mira për të gjithë.

ASANOVIQ: KOMUNA E ZETËS NUK DO TË LEJOJË  QË MBETJET E RREZIKSHME  TË HIDHEN  NË TERRITORIN E KOMBINATIT TË ALUMINIT

Komuna e Zetës  nuk do të lejojë  që mbetjet e rrezikshme  të hidhen  në territorin e Kombinatit të Aluminit , tha Mihaillo  Asanoviq, kryetar i Komunës së Zetës. Asgjësimi i mbetjeve parashikohet në planin shtetëror  dhe ata u bëjnë thirrje autoriteteve që ta braktisin këtë ide për asgjësimin e mbetjeve për periudhën deri në vitin 2029. Kryetari i Partisë Demokratike Popullore, Millan Knezheviq, paralajmëroi se do të rezistojnë nëse agjencia vazhdon të asgjësojë  materialet të rrezikshme në atë vend.

OSMANI: VOTIMI I FSHEHTË NUK PËRJASHTOHET SI MUNDËSI, POR KËRKON KONSENSUS

Presidentja e Kosovës, Vjosa Osmani, ka komentuar situatën e bllokadës për konstituimin e Kuvendit, duke theksuar se votimi i fshehtë është i mundur nëse arrihet konsensus ndërmjet deputetëve për këtë formë të votimit.

E para e shtetit paralajmëroi pasoja juridike në rast se Kuvendi nuk konstituohet brenda 30 ditëve, siç ka vendosur Gjykata Kushtetuese.

Në përpjekje për të gjetur zgjidhje, Osmani ka zhvilluar takime konsultative të mërkurën dhe të enjten me liderët e partive politike Albin Kurti (LVV), Memli Krasniqi (PDK), Lumir Abdixhiku (LDK), Ramush Haradinaj (AAK) dhe atyre të nga komunitetet joshumicë.

Ajo tha se megjithëse qëndrimet e partive mbeten “diametralisht të kundërta”, kjo nuk e përjashton mundësinë e afrimeve të reja gjatë ditëve në vijim.

Aktgjykimi i Gjykatës Kushtetuese e ka vendosur datën 26 korrik si afatin e fundit për përmbylljen e këtij procesi.

POLICIA HEQ BLLOKADAT, DISA TË NDALUAR NË SERBI

Policia me pajisje për shpërndarjen e protestave po heq bllokadat e trafikut nëpër gjithë Serbinë, ndërsa gazetarët e Radios Evropa e Lirë kanë raportuar edhe për arrestimet e para.

Studentët dhe qytetarët nisën të mblidhen herët në mëngjes, më 4 korrik, në Beograd, Novi Sad, Nish dhe qytete të tjera, ku vendosën kontejnerë dhe pengesa të tjera në rrugë.

Forcat e forta të policisë ndërhynë për t’i larguar ata nga rruga. Nuk ka pasur incidente më të mëdha deri tani, pasi protestuesit po largohen vetë në trotuar sapo mbërrin policia.

Në qendër të Beogradit janë ndaluar disa pjesëmarrës të bllokadave, ndërsa arrestime janë shënuar edhe në Novi Beograd, afër Fakultetit të Arteve Dramatike.

Studentët në bllokadë kishin bërë thirrje një ditë më parë për një “bllokadë totale të Serbisë për shkak të brutalitetit policor”.

Thirrja erdhi pas aksioneve të policisë gjatë natës mes 2 dhe 3 korrikut, kur në disa qytete u arrestuan gati 80 studentë dhe protestues kundër qeverisë.

KIEVI GODITET NGA NJË BRESHËRI SULMESH ME DRONË

Autoritetet ukrainase njoftojnë se sot në mëngjes Kievi u përball me sulme intensive nga ana e Rusisë.Ukraina tha se Rusia kishte lëshuar një rekord prej 550 dronësh dhe 11 raketash gjatë  natës.

Sulmet ndodhën disa orë pas një telefonate mes Donald Trump-it dhe Vladimir Putin-it, pas së cilës presidenti amerikan deklaroi se ishte "i zhgënjyer" që Putini nuk ishte i gatshëm të përfundonte luftën e Rusisë kundër Ukrainës, raporton BBCNews.

Forcat ajrore të Ukrainës thanë se sulmet ajrore të Rusisë gjatë natës thyen një tjetër rekord, me 72 nga 550 dronët që arritën të kalonin mbrojtjen ajrore – më shumë se rekordi i mëparshëm prej 537 dronësh, lëshuar të shtunën e kaluar.Sirenat e alarmit për sulm ajror ranë për më shumë se tetë orë, pasi disa valë sulmesh goditën Kievin, që sipas forcave ajrore ishte "shënjestra kryesore e sulmeve", shkruhet në Telegram.

Ministri i Jashtëm i Ukrainës, Andrii Sybiha, e dënoi këtë si "njërën nga netët më të këqija" në kryeqytet dhe kërkoi që “Moska të përballet me sanksionet më të rënda, pa asnjë vonesë”.“Natë absolutisht e tmerrshme dhe pa gjumë në Kiev. Një nga më të këqijat deri tani”, shkroi Sybiha në rrjetin X.

Ai theksoi se kjo ndodhi menjëherë pas telefonatës së Putinit me Trump-in, teksa shtoi se: "[Putini] e bën me qëllim dhe tregon qartë përbuzjen e tij ndaj Shteteve të Bashkuara dhe çdokujt që ka bërë thirrje për përfundimin e luftës”.

FORCAT PAKISTANEZE VRASIN 30 MILITANTË TALEBANË NË KUFI ME AFGANISTANIN

Forcat e sigurisë pakistaneze vranë 30 militantë talebanë, që u përpoqën të hynin në vend nga Afganistani, tha ushtria pakistaneze.

Sipas saj, anëtarët e talebanëve pakistanezë u panë gjatë natës në distriktin e Vaziristanit të Veriut në provincën Khyber Pakhtunkhwa dhe trupat sekuestruan armë, municione dhe eksplozivë nga militantët. Deklarata e ushtrisë nuk përmendi nëse pati ndonjë shkëmbim zjarri apo detaje të tjera të operacionit, raporton AP.

Ushtria pretendoi se militantët mbështeteshin nga India dhe i kërkoi qeverisë afgane të parandalonte përdorimin e territorit të saj nga "të huajt" për të sulmuar Pakistanin.

Nuk pati asnjë koment të menjëhershëm nga Nju Delhi. Autoritetet pakistaneze shpesh e akuzojnë Indinë për mbështetjen e grupeve të jashtëligjshme si Ushtria Çlirimtare e Baloch-ut dhe talebanët pakistanezë që kryejnë dhunë në Pakistan. Akuza të tilla janë rritur që kur një e shtënë në Kashmirin e kontrolluar nga India në prill rriti tensionet midis kombeve të armatosura me armë bërthamore.

Presidenti i Pakistanit, Asif Ali Zardari, dhe kryeministri Shehbaz Sharif, vlerësuan forcat e sigurisë për operacionin e suksesshëm.      

NESËR MOT SHUMË I NXEHTË

Nesër do të mbaj mot kryesisht me diell dhe shumë i nxehtë, me zhvillime të dobëta deri mesatare të vranësirave në zonat kontinentale, kryesisht në pjesën e dytë të ditës.

Në veri, paradite, është i mundur një zhvillim më i fortë i vranësirave , vende- vende me reshje të shiut dhe bubullima afatshkurtra. Do të fryjë erë e dobët nga drejtimet e ndryshme .

Temperatura e mëngjesit prej 11 deri në 26, kurse më e larta e ditës nga 28 deri në 41 gradë.