Ditari 03.07.2025

Përgatiti, Musa Gjoka

TË HËNËN, PROTESTË E PUNËTORËVE TË ARSIMIT NËSE NUK ARRIHET KOMPROMIS

Sindikata e arsimit do të organizojë një protestë para Ministrisë së Arsimit të hënën, nëse nuk arrihet kompromis dhe pagat e edukatorëve ulen, tha organizata sindikale Kryetari i Sindikatës së Arsimit, Radomir Bozhoviq, tha në konferencën për medie se kjo është vendosur nga Këshilli Ekzekutiv dhe Këshilli Qendror i Sindikatës "Nëse kompromisi nuk ndodh dhe kompromisi është që pagat tona të mos ulen, ne kemi planifikuar një protestë para Ministrisë së Arsimit të hënën në orën 11:00 të mëngjesit", tha Bozhoviq. Ai tha se ndihet i zhgënjyer nga ky qëndrim i shtetit ndaj edukatorëve. "Shteti shkel rëndë Marrëveshjen Kolektive të Arsimit që e shkroi vetë", tha Bozhoviq, duke shtuar se paga e korrikut e edukatorëve ka shumë të ngjarë të rregullohet sipas llogaritjes së re, pra të ulet. "Ne ende shpresojmë që arsyeja të mbizotërojë. Ne po i kërkojmë kryeministrit të mbrojë edukatorët", tha Bozhoviq.

SHIMUN: QËLLIMI ËSHTË PËRMIRËSIMI I STANDARDIT TË JETESËS SË TË GJITHË STAFIT MJEKËSOR

Ministri i Shëndetësisë, Dr. Vojislav Shimun, deklaroi në emisionin "Link" të RTMZ se ka filluar negociatat me sindikatat përfaqësuese dhe të gjitha ministritë përkatëse brenda Qeverisë, me qëllim përmirësimin e standardit të jetesës së të gjithë stafit mjekësor. Shimun e tha këtë duke komentuar njoftimin e sotëm për një protestë nga Sindikata e Shëndetësisë përpara Ministrisë së Shëndetësisë në orën 15:30. Fakti është se si ministër, kam ndërmend të përmirësoj standardin e jetesës së stafit tonë mjekësor, dhe kjo dëshmohet nga fakti se në vitin 2024 jam në negociata me sindikatat, dhe kam ofruar një masë që është ndihmë praktike për stafin e mesëm mjekësor, që nënkuptonte një rritje page për ata që nuk kanë asnjë pagesë shtesë. Pas kësaj, ne e rishikuam dhe e forcuam ofertën edhe këtë vit, kështu që tani 10 përqind rritje page e marrin të gjithë ata që nuk janë në pushim mjekësor, dhe e gjithë paketa përfshin më shumë staf mjekësor me rreth 5 përqind stimulim", theksoi ministri.

NUK ËSHTË KOHA PËR TË ULUR AKCIZËN E KARBURANTEVE

Edhe pse çmimet e karburanteve po rriten, kjo nuk është koha që shteti të reagojë duke ulur akcizat, tha analisti ekonomik Davor Dokiq. Kjo, thotë ai, nuk do të ishte e mirë për mbushjen e buxhetit, i cili, sipas tij, është i brishtë. Ministria e Energjisë dhe Minierave pret që çmimet e karburanteve të stabilizohen dhe të bien në periudhën e ardhshme, ndërsa qytetarët e anketuar besojnë se rritja e fundit e çmimeve në pikat e karburanteve është një tjetër goditje për standardin e jetesës.  Fakti që çmimet e karburanteve janë më të larta deri në 8 centë, siç shpjegohet nga Ministria e Energjisë dhe Minierave, është rezultat i tensioneve të fundit në Lindjen e Mesme, kështu që në llogaritjen e fundit, ndryshimet e llogaritura u regjistruan në gjysmën e dytë të qershorit. Analisti ekonomik Davor Dokiq pajtohet me këtë vlerësim. "Në periudhën e ardhshme, presim që situata në tregun botëror të naftës të stabilizohet dhe derivatet e naftës sigurisht që do të bëhen më të lira në pompa, kështu që nuk ka arsye për panik", thekson ai. Ministria e Energjisë dhe Minierave njoftoi se në periudhën e ardhshme pritet stabilizim dhe një rënie graduale e çmimeve të karburantit, të cilat do të konfirmohen ose mohohen gjatë llogaritjes së radhës, më 12 qershor.

RAJZING RAJNKE: LIDERËT NË MAL TË ZI KANË MUNDËSI PËR TË TREGUAR PËRKUSHTIMIN E TYRE NDAJ DEMOKRACISË

Liderët malazezë kanë një mundësi unike, ashtu siç kishin dikur themeluesit e Amerikës, për të treguar angazhim ndaj vlerave demokratike që pasqyrojnë ëndrrat e qytetarëve, tha Ambasadorja e Shteteve të Bashkuara të Amerikës Xhudi Rajzing Rajnke. Me rastin e 249-vjetorit të festimit të Ditës së Pavarësisë së SHBA-së, ajo tha se kur fjalët kuptimplote shndërrohen në vepra, fati i kombit mund të realizohet. "Përmbushja e detyrimeve të NATO-s, forcimi i sundimit të ligjit dhe përmirësimi i tregtisë me SHBA-në dhe Evropën nuk janë vetëm çështje zgjedhjesh politike. Ato janë gjithashtu shprehje e qëllimeve dhe vendosmërisë", thotë Rajzing Rajnke. Ajo kujtoi se javën e kaluar, në takimin e udhëheqësve të NATO-s në Hagë, Mali i Zi shprehu qartë qëllimin e tij për të forcuar sigurinë evropiane dhe aleate. Rajzing Rajnke shtoi se angazhimi i fortë i Malit të Zi tani duhet të shoqërohet me veprime vendimtare. Ajo tha se kur Mali i Zi forcon aftësitë e tij mbrojtëse, e bën Unionin më të fortë, kur siguron kufijtë e tij, kontribuon në një rajon më të qëndrueshëm, kur forcon institucionet dhe investon në ekonominë dhe njerëzit e tij, gjeneron prosperitet.

KUVENDI I KOSOVËS DËSHTON TË KONSTITUOHET PËR HERË TË 41-TË

Për të 41-ën herë me radhë, Kuvendi i Kosovës ka dështuar të konstituohet. Seanca zgjati sërish vetëm pak minuta dhe udhëheqësi i saj, Avni Dehari, i ftoi deputetët të mblidhen sërish pas 48 orësh, të shtunën, më 5 korrik. Seanca e thirrur për të zgjedhur kryetarin e Kuvendit dhe për të vazhduar me hapat e tjerë të konstituimit nuk pati sukses, për shkak të mungesës së pajtueshmërisë ndërmjet partive politike rreth formimit të një komisioni për votim të fshehtë të kandidates për kryetare të Kuvendit, Albulena Haxhiu. Prej kohësh, partitë më të mëdha kanë kundërshtuar propozimin e Vetëvendosjes që Haxhiu, aktualisht ministre në detyrë e Drejtësisë, të zgjidhet në krye të Kuvendit. Pavarësisht kësaj, Vetëvendosje ka refuzuar të bëjë një ndryshim, duke thënë se propozimi i emrit të kryetarit është e drejtë ekskluzive e fituesit të zgjedhjeve. Katër muaj pas zgjedhjeve të 9 shkurtit, Kosova vazhdon të funksionojë pa institucione të reja, ndërsa afati kushtetues 30-ditor për konstituimin e Kuvendit, i riinterpretuar nga Gjykata Kushtetuese, po shkon drejt përfundimit.

OSMANI VAZHDON KONSULTIMET PËR ZHBLLOKIMIN E KUVENDIT

Presidentja e Kosovës, Vjosa Osmani, ka vazhduar takimet me përfaqësuesit e subjekteve politike në përpjekje për të gjetur një zgjidhje për zhbllokimin e situatës politike në Kuvend. Bashkëkryetari i partisë Guxo, Faton Peci, pas takimit me presidenten, deklaroi për media se këto konsultime janë në funksion të daljes nga bllokada institucionale. “U bëj thirrje të gjitha partive politike t’i thërrasin arsyes, t’i thërrasin mendjes së shëndoshë dhe të mundësojnë zgjedhjen e kryetarit të Kuvendit dhe konstituimin e tij. Vetëm në këtë mënyrë do të mund ta kemi një qeveri brenda 15 ditësh,” tha ai. Peci shtoi se ekziston paqartësi lidhur me atë se çfarë ndodh nëse Kuvendi dështon të konstituohet brenda afatit 30-ditor. “Ekziston mundësia reale që presidentja t’i drejtohet Gjykatës Kushtetuese për të kërkuar sqarim shtesë lidhur me kuptimin e afatit 30-ditor, kur dihet se në momentin e publikimit të këtij afati, tashmë kishin kaluar 30 ditë nga moskonstituimi i Kuvendit – nëse e marrim si bazë datën 15 prill, kur u bë përpjekja e parë,” tha Peci.

POLICIA SERBE LARGON BLLOKADAT PAS NJË NATE TË TENSIONUAR NË BEOGRAD DHE NË NOVI SAD

Policia e Serbisë ka ndërhyrë gjatë natës së mbrëmshme në disa lokacione në Beograd dhe Novi Sad, ku qytetarë dhe studentë ishin mbledhur për të bllokuar rrugët.  Ministria e Punëve të Brendshme njoftoi në mëngjes se janë larguar të gjitha bllokadat. Sipas MPB-së, gjatë natës janë kontrolluar gjithsej 1.297 persona, ndërsa 79 janë shoqëruar në stacione policore. Prej tyre, 72 për kundërvajtje dhe shtatë të tjerë për dyshim të shkeljes së Kodit Penal. "Janë hequr të gjitha bllokadat në territorin e Serbisë dhe Beogradit dhe të gjitha rrugët janë të kalueshme", thuhet në njoftim. Policia konfirmoi se në disa vende ka pasur incidente të izoluara, përfshirë në Beograd, Nish, Novi Pazar dhe Novi Sad. Në këto lokacione janë arrestuar disa persona për prishje të rendit dhe kryerje të veprave penale. MPB-ja njoftoi se gjatë bllokadave janë lënduar katër policë dhe është dëmtuar një veturë zyrtare e policisë.

MBRËMË NË GAZA U VRANË 82 PALESTINEZË, PËRFSHIRË 38 QË PRISNIN NDIHMË HUMANITARE

Gjatë natës, 82 palestinezë u vranë në Gaza nga sulmet ajrore dhe të shtënat, përfshirë 38 të cilët përpiqeshin të merrnin ndihmë humanitare, njoftuan sot spitalet dhe Ministria e Shëndetësisë.

Pesë persona u vranë rreth vendeve të lidhura me Fondacionin Humanitar të Gazës, një organizatë sekrete amerikane e krijuar rishtazi e mbështetur nga Izraeli për të ushqyer popullsinë e Rripit të Gazës, ndërsa 33 të tjerë u vranë ndërsa prisnin kamionë ndihme në vende të tjera në të gjithë Rripin e Gazës.

Ushtria izraelite nuk komentoi mbi sulmet e të mërkurës në mbrëmje dhe këtë mëngjes. 

TË SHTËNA ME ARMË JASHTË NJË KLUBI NATE NË ÇIKAGO, TË PAKTËN 3 TË VDEKUR DHE 16 TË PLAGOSUR

Të paktën tre persona u vranë dhe 16 të tjerë u plagosën gjatë të shtënave masive jashtë një klubi nate në qendër të Çikagos mbrëmë vonë, sipas autoriteteve lokale. Policia konfirmoi se të paktën 19 persona u qëlluan, tre prej tyre për vdekje, kur sulmues të panjohur hapën zjarr nga një makinë që po kalonte.

Sulmi ndodhi ndërsa njerëzit po largoheshin nga klubi i natës pas një feste për publikimin e albumit të reperit Mello Buckzz. 

Në nëntor të vitit 2022 pati një të shtënë masive në të njëjtin bllok. Në atë kohë, një person u vra dhe tre të tjerë u plagosën.

FUTBOLLISTI PORTUGEZ DIEGO ZHOTA HUMB JETËN NË NJË AKSIDENT TRAFIKU

Futbollisti i Liverpoolit dhe i përfaqësueses së Portugalisë, Diego Zhota, ka vdekur si pasojë e një aksidenti të rëndë trafiku në Spanjë, ka konfirmuar policia spanjolle. Ngjarja tragjike ka ndodhur në autostradën në zonën e Zamorës, afër qytetit Palacios de Sanabria, sipas të përditshmes spanjolle Marca. Zhota ndodhej në automjet së bashku me vëllain e tij 26-vjeçar, Andre, i cili gjithashtu ka humbur jetën.   Raportohet se automjeti është përfshirë nga flakët pas përplasjes, duke e bërë të pamundur shpëtimin e dy vëllezërve.  I lindur në Porto, Zhota e nisi karrierën futbollistike në akademinë e të rinjve, përpara se të transferohej te Atletico Madrid në vitin 2016. Ai më pas u bashkua me Wolverhampton Wanderers, para se të bëhej pjesë e Liverpoolit, ku spikati si një nga sulmuesit më të rrezikshëm të Premier Ligës.

SHUMË NXEHTË, DERI NË 40 GRADË

Sot mban mot I kthjellët dhe shumë I nxehtë. Frynë erë e lehtë deri e mesme nga drejtimet e veriut. Temperaturat në ora 14 u shënuan: Podgoricë 38, H. Novi 37, Nikshiq e B. Polje 35, Plevle e Cetinë 34, Kollashin, Budvë, Andrijevicë, Shavnik e Rozhajë 33, Ulqin e Plluzhinë 32, Guci e Petnicë 31, Tivar 30 dhe në Zhablak 27 gradë.

Për nesër meteorologët paralajmërojnë mot të kthjellët dhe shumë të nxehtë. Priten vranësira të pakta vende vende. Do të fryjë erë e lehtë deri e mesme nga drejtime të ndryshme. Temperatura e mëngjesit prej 11 deri në 24 kurse më e larta e ditës prej 28 deri në 40 gradë.