Ditari 01.07.2025

Ditarin e përgatiti, Violeta Gjokaj

E DYSHUARI U ARRESTUA PËR SHKAKTIM TË RREZIKUT TË PËRGJITHSHËM

Shtetasja e huaj, e cila është lënduar mbrëmë përpara Kishës së Ringjalljes së Krishtit në Podgoricë, ndodhet në repartin e kujdesit intensiv, ndërsa shtetasja malazeze është pranuar në Qendrën Klinike dhe është në gjendje shoku. E dyshuara për sulmin, Jelena Radonjiq, u arrestua pasi mbrëmë u përplas me veturë në një grup njerëzish përpara kishës, ndërkohë që prokurori kujdestar i Prokurorisë Themelore Shtetërore, Ivan Bojoviq, urdhëroi edhe testimin për lëndë narkotike, pasi analiza e parë tregoi se në gjakun e të dyshuarës nuk kishte prani të alkoolit. Bojoviq deklaroi për portalin Radiotelevizionit të Malit të Zi se gjatë ditës do të zhvillohet marrja në pyetje e të dyshuarës dhe se ndaj Radonjiqit do të ngrihet kallëzim penal. Nga policia kanë bërë apel që qytetarët të përmbahen nga komentet negative dhe postimet që shqetësojnë opinionin publik.

THIRRJE PUBLIKE PËR ZGJEDHJEN E NJË GJYQTARI TË GJYKATË KUSHTETUESE

Presidenti i Malit të Zi, Jakov Millatoviq, ka shpallur thirrjen publike për zgjedhjen e një gjyqtari të Gjykatë Kushtetuese. Nga kabineti i kryetarit të shtetit u bë e ditur se Gjykata Kushtetuese, në përputhje me Ligjin për Gjykatën Kushtetuese të Malit të Zi, e ka njoftuar Millatoviqin se në mbledhjen e kësaj gjykate më 26 qershor u konstatua përfundimi i mandatit të gjyqtares Desanka Llopiçiq. Duke pasur parasysh se plotësimi i vendit të gjyqtarit për të cilin ishte zgjedhur gjyqtarja Llopiçiq bëhet në bazë të propozimit të presidentit të Malit të Zi, janë përmbushur kushtet kushtetuese dhe ligjore që presidenti të shpallë thirrjen publike për zgjedhjen e një gjyqtari të Gjykatës Kushtetuese, thuhet në njoftim. Bëhet e ditur se afati për paraqitjen e kandidatëve është 45 ditë nga data e publikimit të thirrjes publike.

AFERA "MOZHURA" DUHET TË SQAROHET DERI NË FUND

Zëvendëskryeministri për sistemin politik, drejtësi dhe antikorrupsion, Momo Koprivica, gjatë një  vizite zyrtare në Maltë, është takuar me Kryeprokuroren e shtetit të atij vendi, Viktoria Butixhixh, dhe një vëmendje e veçantë gjatë bisedës iu kushtua bashkëpunimit midis Malit të Zi dhe Maltës në luftën kundër korrupsionit ndërkombëtar. Në këtë kontekst, Koprivica theksoi rëndësinë që institucionet e të dy vendeve të ndriçojnë së bashku aferën “Mozhur”, e cila, përveç korrupsionit, lidhet edhe me vrasjen e gazetares Daphne Caruana Galizia. Gjatë takimit të Koprivicës me Ministrin e Drejtësisë së Maltës, Xhonatan Atard, u shkëmbyen përvoja të ndërsjella në zbatimin e standardeve evropiane dhe rekomandimeve të Komisionit të Venecias në fushën e reformës së drejtësisë që po ndërmarrin të dyja vendet. Koprivica shprehu mirënjohjen për mbështetjen e vazhdueshme që Malta i jep Malit të Zi në procesin e integrimit europian.

MILLATOVIQ VIZITON MADRIDIN ME FTESË TË MBRETIT TË SPANJËS

Presidenti i Malit të Zi, Jakov Millatoviq, do të udhëtojë sot për në Madrid, ku do të pritet nga Mbreti i Spanjës, Felipe VI, në pallatin mbretëror.

Zyra e Millatoviq njoftoi se ky takim historik përfaqëson pritjen e parë zyrtare të një presidenti malazez nga monarku spanjoll në kryeqytetin e Spanjës, duke hapur kështu një kapitull të ri dhe të rëndësishëm në marrëdhëniet diplomatike të dy vendeve mike.

"Takimi midis Millatoviq dhe Mbretit Felipe VI do të jetë një mundësi për të shkëmbyer mendime mbi temat kryesore në fushën e sigurisë dhe marrëdhënieve ndërkombëtare, si dhe për të përcaktuar drejtimet për përmirësimin e bashkëpunimit dypalësh midis Malit të Zi dhe Spanjës", thuhet në deklaratë.

Në qendër të bisedës, siç tha zyra e Presidentit, do të jenë tema të tilla si forcimi i dialogut politik, thellimi i marrëdhënieve ndërshtetërore dhe mbështetja e Spanjës për integrimin evropian të Malit të Zi.

KORDIQ - LUKASHIK: RËNIE E DUKSHME E JASHTËZAKONSHME E TURISTËVE RUSË

Ministrja e Turizmit, Simonida Kordiq u takua me ambasadorin e Rusisë në Mal të Zi, Aleksandar Petrovilç Lukashik, dhe në takim, siç raportohet, u tha se turistët rusë janë ende të pranishëm në Mal të Zi, megjithëse vihet re një rënie e jashtëzakonshme për shkak të ngjarjeve gjeopolitike.

Kordiq theksoi gjithashtu se Mali i Zi dëshiron sinqerisht të arrijë paqe dhe stabilitet afatgjatë.

"Prioriteti ynë mbetet anëtarësimi në Bashkimin Evropian, të cilin shpresojmë ta arrijmë deri në fund të vitit 2028", tha Kordiq. Ajo shtoi se Mali i Zi ka marrë përsipër kryesimin e Komisionit për Evropën në Kombet e Bashkuara brenda Organizatës Botërore të Turizmit, gjë që përfaqëson një nga kornizat e mundshme për bashkëpunim në të ardhmen.

Ambasadorja theksoi se turizmi, përveç sportit, kulturës dhe arsimit, është një nga fushat kryesore në të cilat të dy vendet mund të bashkëpunojnë më shumë.

"Gjatë bisedës, u fol edhe për flukset migratore të qytetarëve të Rusisë dhe Ukrainës në Mal të Zi, të cilët janë të regjistruar si turistë në sistemin tonë", njoftoi Ministria.

MALI I ZI ME MBËSHTETJEN E HUNGARISË PËR RRUGË MË TË MIRA, HEKURUDHA MODERNE DHE PËRMIRËSIM TË ADMINISTRATËS

Kryeministri i Malit të Zi, Millojko Spajiq, dhe kryeministri i Hungarisë, Viktor Orban, nënshkruan në Budapest marrëveshje, të cilat krijojnë bazën për bashkëpunim në projekte strategjike, kapital për zhvillimin e mëtejshëm të Malit të Zi, njoftoi Zyra e Kryeministrit.

Siç u deklarua, mbajtësit e pushtetit ekzekutiv inicializuan Marrëveshjen për bashkëpunim në fushën e zhvillimit të infrastrukturës dhe Marrëveshjen për bashkëpunim në fushën e telekomunikacionit, teknologjisë së informacionit dhe zbatimit të ligjit, e cila krijon kushtet për zbatimin e projekteve që do ta ndryshojnë Malin e Zi përmes përmirësimit të kushteve të jetesës, rritjes ekonomike dhe vlerësimit të potencialit.

Përmes punës së përbashkët në përzgjedhjen e projekteve, sigurimit të burimeve financiare duke respektuar të gjitha standardet ligjore dhe mjedisore, Mali i Zi, shtohet, tani ka hapësirën për të zgjidhur sfidat, të cilat janë pengesa e zhvillimit, ndërtimit të rrugëve dhe modernizimit të hekurudhave, me bashkëpunim të ngushtë me anëtaren e BE-së.

Krahas zhvillimit të infrastrukturës, u ra dakord për formalizimin e bashkëpunimit në fushën e telekomunikacionit, teknologjisë së informacionit dhe zhvillimin e zbatimit të ligjit midis dy qeverive.

KOS NË SHKUP: PLANI I RRITJES ËSHTË PLOTËSISHT NË DUART TUAJA

Komisionarja evropiane për Zgjerim, Marta Kos, zhvilloi sot në Shkup një takim me liderët e vendeve të Ballkanit Perëndimor, në kuadër të Samitit të dedikuar Planit të Rritjes së Bashkimit Evropian prej 6 miliardë eurosh për këtë rajon.Nga Plani i Rritjes, të gjitha shtetet e Ballkanit Perëndimor - përveç Kosovës dhe Bosnje e Hercegovinës - kanë marrë fondet e para të parafinancimit. Kosovën në këtë takim e përfaqëson kryeministri në detyrë, Albin Kurti.

Gjatë një konference për media pas takimit të së martës, komisionarja Kos tha se për herë të parë ky samit ishte i fokusuar në zbatimin e Planit të Rritjes.Ajo bëri të ditur se 75 për qind e reformave të dakorduara – të përbashkëta për të gjitha vendet e rajonit – janë ose të zbatuara plotësisht ose janë në proces, ndërsa 25 për qind ende mbeten për t’u realizuar.

“I inkurajova liderët që të shtojnë përkushtimin për zbatimin e mëtejmë”, tha Kos.

Ajo shtoi se mjetet financiare që janë vënë në dispozicion për të gjitha vendet e Ballkanit Perëndimor do të jenë të qasshme deri në fund të vitit 2027 dhe, nëse nuk shfrytëzohen, do të kthehen në buxhetin e BE-së.

Kos theksoi disa rezultate konkrete të arritura deri më tani, përfshirë përparimin drejt SEPA-s (Zona e Vetme e Pagesave në Euro), një sistem që lehtëson kryerjen e pagesave brenda hapësirës evropiane. Sipas saj, katër vende të Ballkanit Perëndimor janë në rrugë për t’iu bashkuar së shpejti këtij sistemi.

DËSHTON EDHE PËRPJEKJA E 40-TË PËR KONSTITUIMIN E LEGJISLATURËS SË NËNTË

Për herë të 40-të ka dështuar përpjekja për konstituimin e legjislaturës së nëntë të Kuvendit të Republikës së Kosovës. Sot u shënua hera e tretë që deputetët nuk arritën kurrfarë progresi në konstituimin e Kuvendit që nga shpallja e një aktgjykimi nga Gjykata Kushtetuese e Kosovës, e cila me 26 qershor obligoi  deputetet që brenda 30 ditësh të konstituoin Kuvendin-afat që skadon më 26 korrik.

Kryesuesi i seancës, Avni Dehari edhe këtë herë kërkoi nga subjektet politike parlamentare të cilat nuk i kanë propozuar emrat për anëtarë të Komisionit për votim të fshehtë për zgjedhjen e kryetarit të Kuvendit që ta bëjnë këtë, por propozime nuk pati as kësaj here nga PDK, LDK, AAK dhe Lista Serbe.

VAZHDOJNË PROTESTAT NË SERBI, STUDENTËT BLLOKOJNË RRUGËT

Protestuesit kanë bllokuar rrugët në të gjithë Serbinë sot në mëngjes, teksa grupe studentësh dhe mbështetësit e tyre qëndronin në kryqëzimet e rrugëve për të ndaluar qarkullimin.

Në Valevë, banorët lokalë bllokuan rrugë në tre kryqëzime në një rrugë kryesore. Në Çaçak, dy kryqëzime kryesore u bllokuan që në orët e para të mëngjesit.

Në Novi Sad, bllokimet e rrugëve u hoqën rreth orës 2 të mëngjesit. Videot e postuara në llogaritë e studentëve në mediat sociale treguan policinë duke përdorur forcë disa herë.

Studentët serbë për më shumë se gjashtë muaj po bllokojnë fakultetet publike dhe po organizojnë protesta në gjithë Serbinë.

100 persona të vrarë në Rripin e Gazës

Forcat izraelite i kanë vrarë në 24 ore e fundit të paktën 100 persona në Rripin e Gazës, ndërsa 23 palestinez u vranë gjate të shtënave teksa përpiqeshin të merrnin ndihme humanitare, njoftuan zyrtaret shtetëror. Njëkohësisht , Izraeli  paralajmëroi se operacioni ne gaza po I afrohet fundit . pas kryeministrit Netanjahu , edhe ministri izraelit i mbrojtjes deklaroi se fundi i luftës në Rripin e Gazës është afër.

IRANI MINIMIZON MUNDËSINË PËR RINISJEN E SHPEJTË TË BISEDIMEVE BËRTHAMORE

Ministri i Jashtëm i Iranit, Abbas Araqchi, e përjashtoi mundësinë për rinisjen e shpejtë të bisedimeve me Shtetet e Bashkuara, pasi presidenti amerikan, Donald Trump, tha se ai aktualisht nuk po flet me Iranin, duke ndryshuar qëndrimin e deritanishëm se bisedimet me Iranin do të rinisnin këtë javë.

Gjatë një interviste të publikuar më 30 qershor, Araqchi u pyet për deklarimin e Trumpit javën e kaluar se negociatat bërthamore me Iranin do të rinisnin së shpejti.

“Nuk mendoj se negociatat do të rifillojnë kaq shpejt”, tha ministri i Jashtëm iranian gjatë intervistës për transmetuesin amerikan, CBS.

“Që ne të vendosin për rikthim në bisedime, fillimisht ne duhet të sigurohemi që Amerika nuk do të kryejë sulm ushtarak ndaj nesh gjatë negociatave”.

Nevojitet më shumë kohë për të shqyrtuar të gjitha pikat, tha ai, duke shtuar se “dyert e diplomacisë nuk do të mbyllen kurrë plotësisht”.

Shtetet e Bashkuara dhe Irani kishin zhvilluar pesë runde bisedimesh indirekte lidhur me programin bërthamor të Teheranit, përpara se ato të dështonin dhe Izraeli të fillonte sulmet ajrore ndaj objekteve bërthamore dhe infrastrukturës ushtarake iraniane më 13 qershor.

SHPËRTHIM NË NJË FABRIKË KIMIKE NË INDI, TË PAKTËN 36 VIKTIMA DHE SHUMË TË TJERË ENDE NË RRËNOJA

Një shpërthim pa shkak të panjohur që shkatërroi një fabrikë kimike në shtetin jugor indian të Telanganës, i ka marrë jetën të paktën 36 personave, tha kreu i autoriteteve lokale.

“Vijojnë operacionet e kërkimit”, u tha gazetarëve Kryeministri vendas Revanth Reddy, duke konfirmuar se trupat e 36 personave ishin nxjerrë nga rrënojat.

Ai tha se gjithsej 143 persona ishin brenda fabrikës Sigachi Industries në kohën e shpërthimit. Kompania tha se vendi, i cili prodhon një substancë të përdorur në ilaçe dhe vitamina, pësoi dëme të konsiderueshme dhe se operacionet atje ishin pezulluar për të paktën 90 ditë.

Një hetim është nisur për të përcaktuar shkakun e shpërthimit.

Aksidentet industriale janë të zakonshme në Indi, pasi shumë kompani nuk i përmbahen standardeve të sigurisë në fuqi.

CEREMONIA E NDARJES SË CERTIFIKATAVE PËR ANËTARËT E SAPOZGJEDHUR TË AKADEMISË SË SHKENCAVE DHE ARTEVE TË DUKLËS

Në sallën e Kuvendit të Cetinës, dje u mbajt ceremonia e ndarjes së certifikatave për anëtarët e sapozgjedhur të Akademisë së Shkencave dhe Arteve të Duklës, organizuar me rastin e pranimit të anëtarëve të rinj në Akademi, si dhe kalimit zyrtar të anëtarëve të deritanishëm të jashtëm në anëtarë të rregullt. Certifikatat për anëtarët e rregullt të sapozgjedhur të DANU iu dorëzuan akademikëve: Goran Baroviq, Zllatko Buliq, Miodrag Gomillanoviq, Veselin Ivanoviq, Lubomir Mudresha, Aleksandar Mugosha, Andrej Nikollaidis, Radenko Pejoviq, Sreten Vujoviq, Marjan Masho Miliq, Jovan Mirkoviq, si dhe Rado Ratkoviq. Anëtarë të jashtëzakonshëm u zgjodhën: Nikolla Bellada, Borisllav Cimesha, Veselko Koprivica, Ratimir Raco Mugosha, Sllobodan Vukanoviq, Danillo Gjuroviq, Nik Gashaj, Mirolub Orllandiq, Nenad Stevoviq dhe Lidia Vukçeviq- Vuçuroviq. Anëtarë korrespondentë u emëruan: Lupço Arsov, Zhelko Karaulla, Luigji Lombardo dhe Nenad Popoviq, ndërsa anëtarë nderi: Hadixha Gjoni, Velia Muriq dhe Dragan Hajdukoviq.

NDAHEN ÇMIMET E 13 KORRIKUT PËR KËTË VIT

Shkrimtari Beqir Vukoviq, muzikanti Millosh Karadagliq dhe grafisti Velo Stanishiq janë fituesit e Çmimit të 13 Korrikut për këtë vit, ka vendosur juria për dhënien e njohjes më të lartë shtetërore. Kryetari i jurisë është Nikolla Rakoçeviq, ndërsa anëtarë janë Zhelidrag Nikçeviq, David Kalaj, Radoslav Stanishiq, Miodrag Zhivkoviq, Danillo Marunoviq dhe Dragan Koprivica. Nga Kuvendi i Malit të Zi është njoftuar se juria paraprakisht ka përpiluar një listë prej 36 propozimesh për Çmimin vjetor të 13 Korrikut. Vitin e kaluar këtë çmim e fituan shkrimtari Andria Radulloviq, piktori Branisllav Sekuliq dhe doktori i shkencave teologjike Nikolla Marojeviq, si dhe Dragan Koprivica, i cili mori çmimin për veprimtari jetësore.

NESËR MOT KRYESISHT I KTHJELLËT DHE SHUMË I NXEHTË

Për nesër pritet mot kryesisht i kthjellët dhe shumë i nxehtë. Do të fryjë erë përgjithësisht e dobët deri mesatare, nga drejtime të ndryshme. Temperatura e mëngjesit nga 11 deri në 27 gradë, kurse më e lartë ditore nga 24 deri në 38 gradë.