Ditari 25.06.2025

Ditarin e përgatiti, Violeta Gjokaj

MILLATOVIQ KRYESON DELEGACIONIN MALAZEZ NË SAMITIN E NATO-S NË HAGË

Mali i Zi është një anëtar i besueshëm i NATO-s dhe është i përkushtuar ndaj vendimeve që do të merren bashkërisht në samitin e Hagës, tha Presidenti Jakov Millatoviq, i cili kryeson delegacionin malazez në Samitin e Aleancës. Në margjinat e samitit, Millatoviq do të takohet me udhëheqës të shumtë evropianë dhe do të përsërisë angazhimin e Malit të Zi për të arritur qëllimin e tij strategjik – anëtarësimin në Bashkimit Evropian deri në vitin 2028.

RAKOÇEVIQ, NËNKRYETAR I KUVENDIT

Deputeti Nikolla Rakoçeviq i propozuar nga Partia Demokratike e socialistëve, është zgjedhur nënkryetar i Kuvendit. Me një votim të fshehtë atë e mbështetën 54 deputetë, ndërsa një ishte kundër. Në rendin e ditës të seancës së sotme është propozim- vendimi për miratimin e Planit Hapësinor të Malit të Zi. Deputetët pranuan propozimin e qeverisë për të diskutuar Ndryshimet në Ligjin për Tubimet Publike, të cilat ndalojnë protestat në rrugët kryesore. Me këto ndryshime, parashikohen gjoba prej 500 deri në 10 mijë euro për ata që nuk zbatojnë ligjin, ndërsa udhëheqësit e tubimeve do të gjobiten nga 1 mijë deri në 2 mijë euro.

MANDIQ: SPAJIQ NUK DO TË VIJË NË ORËN E KRYEMINISTRIT TË PREMTEN

Kryeministri Millojko Spajiq nuk do të vijë në seancën e Kuvendit kushtuar Orës së Kryeministrit të premten, njoftoi Kryetari i Parlamentit Andrija Mandiq. Mandiq tha në seancën e Kuvendit se të martën ata morën një njoftim nga Spajiq se ai nuk mund të merrte pjesë në seancën e orës së kryeministrit të premten. Ai deklaroi se Spajiq sugjeroi që seanca të mbahej të hënën.
"Unë nuk iu përgjigja kësaj, sepse kemi një vizitë nga parlamentarët evropianë të hënën," tha Mandiq.
Siç tha ai, ata kanë një plan në parlament dhe nuk mund t'i përgjigjen pozitivisht kërkesës së Spajiq.
"Kryeministri nuk do të vijë në parlament të premten, ne kemi planifikuar një seancë dhe tani janë krijuar kushtet që opozita të ngrejë çështjen e besimit ndaj kryeministrit dhe qeverisë," tha Mandiq.
Sipas tij, ka dy mënyra - njëra është të ngrihet një çështje besimi ndaj Kryetarit të Parlamentit, dhe tjetra është një çështje besimi ndaj Qeverisë.

GORÇEVIQ: LIGJET PËR QEVERINË DHE KUVENDIN DUHET TË MIRATOHEN NË TË NJËJTËN KOHË

Ligjet për Qeverinë dhe Kuvendin duhet të miratohen së bashku, dhe besoj se nuk do të ketë problem sa i përket vetë mbështetjes, në pjesën politike, sepse të dy ligjet janë të rëndësishme për të gjithë ne, tha Ministrja e Çështjeve Evropiane Maida Gorçeviq në emisionin "Link" të Radios se Malit të Zi.
"Ligji për Qeverinë është një nga kornizat kryesore mbi bazën e të cilit duhet të funksionojë Qeveria, por unë gjithashtu besoj se do të ishte plotësisht e gabuar të miratohej më parë ligji për Qeverinë pa pasur gati një ligj për Kuvendin. Ato duhet të miratohen së bashku, në të njëjtën kohë. Unë besoj se është bërë një punë e mirë dhe këto ishin rekomandimet e Komisionit të Vencias", deklaroi Gorceviq. Ajo kujton se Konferenca Ndërqeveritare është më 27 korrik të këtij viti dhe thekson mbylljen e Kapitullit 5, i cili i referohet prokurimit publik.
"Jam e kënaqur me dinamikën dhe besoj se, përveç datës 27, do të ketë një sërë takimesh në Bruksel ku do të diskutojmë vazhdimin e mbylljes së kapitullit deri në fund të vitit, atë që na pret dhe sfidat e fundit dhe mbështetjen për Malin e Zi, e cila është e nevojshme në këtë moment", thotë ajo. Gorceviq thekson se Mali i Zi i ka përmbushur të gjitha kriteret përfundimtare për mbylljen e Kapitullit 31. Ajo thekson se paralajmërimi i Kryetarit te Kuvendit Andrija Mandiq se duhet të mbyllim shtatë kapituj deri në fund të vitit është ambicioz, por i realizueshëm.

KOVACEVIQ: PËRPJEKJET PËR TË CILAT MALI I ZI U NJOH NË ATË KOHË NUK PRODHUAN REZULTATE TË QËNDRUESHME

Një vit pas miratimit të Raportit pozitiv mbi përmbushjen e standardeve të përkohshme në kapitujt 23 dhe 24, është e qartë se përpjekjet për të cilat Mali i Zi u njoh në atë kohë nuk prodhuan rezultate të qëndrueshme dhe proceset kryesore të reformës tani duhet të fillojnë nga e para, tha drejtoresha e programit të Qendrës për Tranzicion demokratik, Milica Kovaçeviq. Siç deklaroi ajo, në vend që të miratonin reforma thelbësore dhe funksionale që forcojnë sundimin e ligjit, pushteti në Mal të Zi, gjatë procesit të marrjes së IBAR, prodhuan një sërë ligjesh që nuk kanë zbatim në praktikë. Një nga shembujt më të dukshëm të një qasje të tillë është Ligji për Parandalimin e Korrupsionit, por Kovaçeviq pohon se situata nuk është shumë e ndryshme as me setin e ligjeve të miratuara për medien.

GJEKA - FELTEN: FOKUS NË PËRMBUSHJEN E STANDARDEVE PËRFUNDIMTARE NË KAPITUJT KRYESORË

Mali i Zi është i përkushtuar ndaj anëtarësimit të plotë në Bashkimin Evropian dhe ky është qëllimi kryesor i politikës së jashtme. Aktualisht, fokusi është në përmbushjen e standardeve përfundimtare në kapitujt kryesorë, veçanërisht ato që lidhen me sundimin e ligjit, pajtohen Ministri i të Drejtave të Njeriut dhe të Pakicave, Fatmir Gjeka, dhe Peter Felten.
Sot, ata diskutuan përpjekjet e intensifikuara për reformat, pas marrjes së IBAR, marrja e së cilës i dha një vrull të ri procesit të negociatave të Malit të Zi për anëtarësim në Bashkimin Evropian. Në kontekstin e mbrojtjes dhe promovimit të të drejtave dhe lirive të njeriut, bashkëbiseduesit diskutuan statusin e Projektligjit për njohjen ligjore të identitetit gjinor bazuar në vetëvendosje.
Ministri informoi se organet qeveritare e shqyrtuan Projektligjin në fjalë, por se votimi i tij është ende në pritje. Ai gjithashtu falënderoi SH.T. Felten për mbështetjen e të gjitha politikave që përqendrohen në të drejtat e njeriut.Ai theksoi se në seancën e nesërme Qeveria do të shqyrtojë Projektligjin ombrellë kundër diskriminimit për Mbrojtjen e Barazisë dhe Ndalimin e Diskriminimit.

PAVLLICIQ: GJYQTARËT DUHET TË MBETEN REZISTENTË NDAJ PRESIONIT DHE BESNIKË NDAJ NDËRGJEGJES DHE LIGJEVE TË TYRE

Gjyqtarët duhet të mbeten të qëndrueshëm, rezistentë ndaj presionit dhe besnikë vetëm ndaj ndërgjegjes dhe ligjit të tyre, sepse gjykata është vija e fundit e mbrojtjes së një shoqërie të lirë, tha kryetarja e Gjykatës Supreme të Malit të Zi, Vallentina Pavliciq, në forumin online të nivelit të lartë mbi demokracinë dhe pavarësinë gjyqësore, të organizuar nga Instituti Ligjor Evropian (ELI).
Siç u tha në njoftimin e Gjykatës Supreme, Pavlliciq theksoi se ky forum u mbajt në një kohë kur vlerat e drejtësisë, sundimit të ligjit dhe integritetit institucional po testoheshin seriozisht në shumë rajone.
Kryetarja e i Gjykatës Supreme theksoi veçanërisht se gjyqësori duhet të jetë jo vetëm i pavarur dhe i paanshëm, por edhe efikas, i përgjegjshëm dhe i arritshëm për çdo qytetar, dhe se këto qëllime kërkojnë përpjekje dhe reforma të vazhdueshme për të cilat Mali i Zi është i përkushtuar.

DËSHTON SËRISH KONSTITUIMI I LEGJISLATURËS SË NËNTË

Për herë të 37-të ka dështuar përpjekja për konstituimin e legjislaturës së nëntë të Kuvendit të Republikës së Kosovës.
Kryesuesi i seancës, Avni Dehari, kërkoi sërish sot nga subjektet politike parlamentare të cilat nuk i kanë propozuar emrat për anëtarë të komisionit për votim të fshehtë për zgjedhjen e kryetarit të Kuvendit që ta bëjnë këtë, por propozime nuk pati as kësaj here nga PDK, LDK, AAK dhe Lista Serbe.
Nga 92 deputetët që ishin në sallë, 52 votuan për, kundër dhe abstenim nuk pati. Seanca tjetër mbahet pas 48 orësh.

SAMITI NË HAGË, NATO MIRATON PLANIN E RI TË SHPENZIMEVE PËR MBROJTJEN, 5% E PBB-SË SË ÇDO SHTETI ANËTAR 

Samiti i NATO-s në Hagë zhvillon sot ditën e dytë të punimeve , me pjesëmarrjen e liderve të vendeve anëtare dhe partnere të Aleancës. Udhëheqësit e NATO-s janë zotuar të investojnë 5% të PBB-së çdo vit në shpenzimet e mbrojtjes dhe sigurisë deri në vitin 2035 “për të siguruar që detyrimet tona individuale dhe kolektive” të përmbushen, sipas deklaratës së samitit të Hagës. Deklarata thotë se anëtarët do të paraqesin “plane vjetore” që vërtetojnë “një rrugë të besueshme dhe graduale për të arritur këtë qëllim”, me një shqyrtim më gjithëpërfshirës të progresit të bërë në vitin 2029.
Sipas The Guardian, deklarata me pesë pika përfshin “angazhimin e palëkundur të 32 vendeve për mbrojtje kolektive, siç përcaktohet në Nenin 5 të Traktatit të Uashingtonit, se një sulm ndaj njërit është një sulm ndaj të gjithëve”.
Dokumenti përfshin një rresht që premton mbështetje të mëtejshme për Ukrainën dhe vë në dukje se “siguria e saj kontribuon në tonën”, por nuk e dënon drejtpërdrejt Rusinë.
Megjithatë, ai përfshin një rresht të veçantë mbi “kërcënimin afatgjatë që paraqet Rusia për sigurinë euroatlantike”.

ARMËPUSHIMI MES IRANIT DHE IZRAELIT PO ZBATOHET

Armëpushimi i ndërmjetësuar nga presidenti i Shteteve të Bashkuara të Amerikës, Donald Trump, mes Iranit dhe Izraelit, është duke u zbatuar. Presidenti Iranian njoftoi fundin e luftës dymbëdhjetë ditore kundër Izraelit , ndërsa kryeministri izraelit shpalli një fitore historike. Presidenti turk mbrëmë foli me homologun e tij amerikan dhe shprehu besimin se do të jetë një armëpushim i përhershëm. Ai theksoi rëndësinë e dialogut për ti dhënë fund krizës humanitare në Gaza sa më shpejt të jetë e mundur dhe për të gjetur një zgjidhje paqësore për luftën midis Rusisë dhe Ukrainës. Gjatë konferencës për shtyp në Hage , Donald Trump , në pyetjen se për sa kohë mendon se programi bërthamor iranian është penguar nga sulmet ajrore , tha se mendon se për dekada është kthyer pas.

IRANI PEZULLON BASHKËPUNIMIN ME AGJENCINË PËR ENERGJINË ATOMIKE

Parlamenti iranian ka votuar për pezullimin e bashkëpunimit me Agjencinë Ndërkombëtare për Energjinë Atomike, pas sulmeve të fundit amerikane dhe izraelite mbi objektet bërthamore iraniane. Kryetari i Parlamentit, Mohammad Bagher Ghalibaf, akuzoi ANEA- në se ka dështuar të dënojë këto sulme dhe se ka humbur kredibilitetin ndërkombëtar.

VRITEN 7 USHTARË IZRAELITË NË NJË SHPËRTHIM NË GAZË

Shtatë ushtarë izraelitë u vranë në qytetin jugor të Gazës, Han Junis, kur mjeti i tyre i blinduar u godit nga një shpërthim, tha një zyrtar ushtarak izraelit të mërkurën. Zyrtari, i cili foli në kushte anonimiteti në përputhje me rregullat ushtarake, tha se emrat e gjashtë prej shtatë ushtarëve janë lejuar për publikim, ndërsa njëri ende po mbahet i fshehur.
Më shumë se 860 ushtarë izraelitë janë vrarë që nga fillimi i luftës më 7 tetor 2023 pas sulmit të Hamasit në Izrael - përfshirë mbi 400 gjatë luftimeve brenda Gazës. Hamasi është grup palestinez i shpallur organizatë terroriste nga Shtetet e Bashkuara dhe Bashkimi Evropian. Po ashtu, në zonën e Han Junisit, një ushtar u plagos rëndë të martën nga të shtëna armësh, njoftoi ushtria. Brigadat al-Qassam, krahu ushtarak i Hamasit, theksoi në kanalin e vet në Telegram se kishte ngritur pritë ndaj ushtarëve izraelitë që ishin strehuar në një ndërtesë banimi në jug të Rripit të Gazës.
Sipas Hamasit, disa ushtarë u vranë dhe të tjerë u plagosën pasi u sulmuan me një raketë Yassin 105 dhe një tjetër raketë në jug të Han Junis. Më pas, luftëtarët e al-Qassam goditën ndërtesën me mitraloza.

MASAKËR NË DNIPRO! BILANCI I VIKTIMAVE RRITET NË 18, QYTETI VIJON TË BOMBARDOHET NGA RUSIA

Lufta në Ukrainë ka hyrë në ditën e saj të 1,218-të, ndërsa dhuna dhe bombardimet vijojnë të shkaktojnë viktima të shumta në qytetet lindore dhe juglindore të vendit. Numri i të vdekurve nga sulmet ajrore të djeshme ruse në qytetin e Dnipro-s, në rajonin e Dnipropetrovskut, është rritur në 18 persona, ndërkohë që dy vdekje të tjera janë raportuar në zonën përreth. Lajmin e bëri të ditur kreu i administratës ushtarake rajonale, Serhiy Lysak.

NESËR MOT I KTHJELLËT DHE SHUMË TË NXEHTË

Në Mal të Zi mban mot i kthjellët në veri edhe me vranësira mesatare. Frynë erë kryesisht e lehtë nga drejtimet e ndryshme. Temperaturat në orën 14 u shënuan në: Podgoricë 37, Bjello Pole e Beran 34, Nikshiq, Plluzhinë, Plevle e Andrijevicë 33, Cetinë, Kollashin, Shavnik e Rozhajë 32, Herceg Novi 32, Budvë e Guci 30, Ulqin e Petnjicë 29, Tivar 28 dhe në Zhablak 27 gradë.
Për nesër meteorologët paralajmërojnë mot të kthjellët dhe shumë të nxehtë. Do të fryjë erë kryesisht e lehtë e drejtimeve të ndryshme. Temperatura e mëngjesit prej 11 deri në 23, kurse më e larta e ditës prej 29 deri në 39 gradë.