Ditari 30.05.2025

Ditarin e përgatiti Marash Dedvukaj

Presidenti i Malit të Zi, Jakov Millatoviq, tha se shpreson që ligji për Qeverinë të miratohet së shpejti në parlamentin malazez

Presidenti i Malit të Zi, Jakov Millatoviq, tha se shpreson që ligji për Qeverinë të miratohet së shpejti në parlamentin malazez dhe se kjo zgjidhje ligjore do të parandalojë tregtinë politike. Ai e tha këtë në një konferencë për shtyp pas një takimi me Presidentin e Sllovakisë, Peter Pellegrini, i cili po viziton Malin e Zi. Millatoviq deklaroi se Mali i Zi ka qeverinë e dytë më të madhe në botë. "Nuk është diçka për të cilën duhet të krenohemi. Ishte rezultat i negociatave politike dhe kompromiseve të pothuajse dhjetë partive politike që mbështesin qeverinë ekzistuese", tha Millatoviq. Ai shtoi se foli qartë për aspektet negative të tij. "Shpresoj që ky ligj të miratohet së shpejti në parlament, si pjesë e axhendës së reformave dhe procesit të pranimit në Bashkimin Evropian (BE). Shpresoj që ligji, sapo të miratohet, do të parandalojë tregtinë politike që mund të shohim në formimin e qeverisë aktuale", deklaroi Millatoviq.

Kryeministri Millojko Spajiq njoftoi në rrjetin X se tregtari më i madh i gazit në Japoni është i interesuar të investojë në Mal të Zi

Kryeministri Millojko Spajiq njoftoi në rrjetin X se tregtari më i madh i gazit në Japoni është i interesuar të investojë në Mal të Zi. “ERA - tregtari më i madh i gazit dhe një kompani motër e dy kompanive më të mëdha të energjisë në Japoni, e cila menaxhon një nga termocentralet më të mëdha miqësore me mjedisin në botë - Futtsu, kapaciteti i të cilit është 5.16 GW brenda 21 blloqeve, që është pesë herë më shumë se nevojat totale vjetore të Malit të Zi dhe 20 herë më shumë se TEPV, është e interesuar të investojë në Mal të Zi dhe të vlerësojë së bashku potencialet tona energjetike”, shkroi Spajiq.

Shtetet e Bashkuara të Amerikës (SHBA) dhe Mali i Zi do të shqyrtojnë përmirësimin e procedurave në hetimet nderkufitare

Shtetet e Bashkuara të Amerikës (SHBA) dhe Mali i Zi do të shqyrtojnë përmirësimin e procedurave të ekstradimit, shkëmbimin e provave dhe bashkëpunimin operacional në hetimet ndërkufitare. Kjo rrjedh nga platforma për vizitën e Ministrit të Drejtësisë të Malit të Zi në Nju Jork dhe Uashington. Ministri i Drejtësisë Bojan Bozhoviq do të vizitojë zyrtarisht Shtetet e Bashkuara të Amerikës nga 1 deri në 7 qershor, njoftoi Qeveria."Me këtë rast, Ministri Bozhoviq planifikon të zhvillojë takime me përfaqësues të institucioneve kryesore amerikane në fushën e drejtësisë, të vendosura në Uashington dhe Nju Jork, me mbështetjen e Ambasadës Malazeze në Uashington. Vizita në institucionet kryesore gjyqësore të SHBA-së synon të shqyrtojë ndihmën e mundshme teknike për gjyqësorin malazez, si dhe edukimin e stafit gjyqësor dhe bashkëpunimin në fushën e luftimit të korrupsionit dhe krimit të organizuar", thuhet në platformën e vizitës, të publikuar nga Qeveria në faqen e saj të internetit.   

Staniq - Votimi i iniciativës për shkarkimin e Kryetarit të Kuvendit Andrija Mandiq do të jetë një provë për të gjithë aktorët politikë në Mal të Zi

Votimi i iniciativës për shkarkimin e Kryetarit të Kuvendit Andrija Mandiq do të jetë një provë për të gjithë aktorët politikë në Mal të Zi, tha kryetari i Bordit Kryesor të Partisë Socialdemokrate dhe përfaqësuesi i Bashkimit Evropian, Mirko Staniq. Ai tha se votimi për këtë iniciativë do të jetë gjithashtu një provë për deputetët, sepse sipas Kushtetutës, ata janë pronarë të mandatit të tyre. "Votimi për Mandiqin, pas gjithçkaje që kemi përjetuar prej tij, strukturës së tij, por edhe mjedisit si qytetarë dhe vendit në periudhën e kaluar, do të jetë një provë për të gjithë aktorët politikë në Mal të Zi", deklaroi Staniq. Ai tha se kushdo që ngre dorën për Mandiqin po ngre dorën për poshtërimin e Malit të Zi, prishjen e marrëdhënieve me fqinjët e tij, ndalimin e rrugës evropiane, nxitjen e urrejtjes kombëtare, fetare dhe çdo urrejtjeje tjetër në vend. "Ai ngre dorën gjithashtu për efektet katastrofike ekonomike, punësimet partiake, marrëveshjet e dakorduara dhe kombinimet e dyshimta", theksoi po tjerash Staniq.

M.Dukaj - Ministria e Administratës Publike (MJU) përfundoi të gjitha detyrimet nga Axhenda e Reformës

Në më pak se tetë muaj, Ministria e Administratës Publike (MJU) përfundoi të gjitha detyrimet nga Axhenda e Reformës që ishin planifikuar për krejtë vitin, tha ministri përkatës Marash Dukaj, duke shtuar se kjo konfirmon angazhimin ndaj procesit të reformave. Në Takimin e Koordinimit të Donatorëve, ai tha se drejtimi është zgjedhur dhe se pyetja e vetme është se sa kohë do t'i duhet vendit për të arritur qëllimin e tij - anëtarësimin në Bashkimin Evropian (BE). "Ne e kemi zgjedhur drejtimin. Pyetja e vetme është se sa kohë do të na duhet për të arritur qëllimin dhe për t'u bërë anëtar i plotë i familjes demokratike të vendeve të BE-së. E shoh takimin e sotëm si një pjesë tjetër në mozaikun e partneritetit dhe aktiviteteve tona miqësore", tha Dukaj.

Danilo Sharanoviq nënshkroi vendimin për të krijuar një sistem video mbikëqyrjeje në territorin e Herceg Novit

Ministri i Punëve të Brendshme Danilo Sharanoviq nënshkroi vendimin për të krijuar një sistem video mbikëqyrjeje në territorin e Herceg Novit, i cili, siç njoftoi ai, përfaqëson një hap të rëndësishëm drejt krijimit të një mjedisi shoqëror më të sigurt. Sharanoviq tha se 15 ditë më parë nënshkroi vendimin për të krijuar një sistem mbikëqyrjeje me video në territorin e Kryeqytetit, duke thënë se ata po vazhdojnë një proces të fortë dhe të orientuar strategjikisht për forcimin e infrastrukturës së sigurisë në të gjithë Malin e Zi. Sipas tij, futja e mbikëqyrjes me video në zonat publike është një nga instrumentet më moderne dhe efektive në mbrojtjen e sigurisë si të qytetarëve ashtu edhe të pronës së tyre. "Është një mekanizëm i fuqishëm i cili jo vetëm që mundëson një reagim më të shpejtë dhe më të saktë të oficerëve të policisë, por gjithashtu ka një efekt të theksuar parandalues ​​në pengimin e kryerjes së veprave penale dhe prishjes së rendit dhe qetësisë publike", thuhet në deklaratë.

Gjykata Administrative anuloi vendimin e Këshillit të Agjencisë për Parandalimin e Korrupsionit lidhur me rastin e Jelena Peroviq

Gjykata Administrative e Malit të Zi e ka anuluar vendimin për shkarkimin e ish-drejtoreshës së Agjencisë Kundër Korrupsionit, Jellena Peroviq, dhe urdhëroi marrjen e një vendimi të ri. Më parë Peroviq është liruar nga akuzat për shmangie taksash dhe kontributesh gjatë shitjes së një apartamenti në Cetinë. Ndërkohë Prokuroria Themelore Shtetërore në Podgoricë ka paralajmëruar se do të ankimojë vendimin e Gjykatës Themelore, e cila e shpalli të pafajshme të pandehurën J.P. për veprën penale të fshehjes së taksave dhe kontributeve.

Policia e Kosovës me plan operativ për parandalimin e ngacmimeve seksuale në veri

Autoritetet kosovare kanë filluar zbatimin e një plani operativ, mbi bazën e të cilit është formuar një grup pune që do të merret ekskluzivisht me ngacmimin seksual të grave në veriun e Kosovës, ka konfirmuar për Radion Evropa e Lirë (REL) zëvendësdrejtori i Policisë së Kosovës për rajonin e veriut, Veton Elshani. “Në grupin e punës janë përfshirë policia për rendin dhe qetësinë publike, pjesëtarë të policisë kufitare, një përfaqësues i Ministrisë së Punëve të Brendshme, ndërsa grupi do të monitorohet nga Inspektorati Policor i Kosovës dhe EULEX-i [Misioni i Bashkimit Evropian për Sundimin e Ligjit]”, ka thënë Elshani. Më 14 maj, Radio Evropa e Lirë raportoi për denoncimet gjithnjë e më të shpeshta për ngacmime seksuale ndaj grave në komunat me shumicë serbe në veri të Kosovës. Gratë që kanë pohuar se kanë përjetuar këto përvoja të pakëndshme kanë dëshmuar tek REL-i për frikën dhe zemërimin që ndiejnë, por edhe për mungesën e besimit në institucionet që, sipas tyre, nuk kanë reaguar në mënyrë adekuate.

PDK-ja paralajmëron ZRRE-në me padi ligjore nëse s'e anulon vendimin për liberalizim të tregut të energjisë

Partia Demokratike e Kosovës (PDK) ka bërë sot ankesë ndaj vendimit të rregullatorit të energjisë për liberalizimin e tregut të energjisë për bizneset e mëdha në vend, duke thënë se do të ngrejë padi në gjykatë, nëse nuk shfuqizohet vendimi brenda 15 ditëve. Deputeti i PDK-së, Abelard Tahiri, tha në një konferencë për media në Prishtinë se partia ka dorëzuar kundërshtim administrativ në Zyrën e Rregullatorit për Energji (ZRRE). Ai tha se ZRRE-ja duhet ta pezullojë “menjëherë zbatimin e këtij vendimi, në të kundërtën pas 15 ditësh PDK-ja do të procedojë në Gjykatën Themelore të Prishtinës, ku do të kërkohet që sa më parë t’i vihet masë e përkohshme zbatimit të tij”. Vendimi i ZRRE-së për liberalizimin e tregut të energjisë do të hyjë në fuqi më 1 qershor, dhe ai nënkupton se të gjitha bizneset e mëdha nuk do të furnizohen më me energji përmes tarifave të rregulluara, por duhet të gjejnë vetë furnizuesin e tyre në tregun e lirë. Kështu, nëse nuk arrijnë ta bëjnë këtë, ato kalojnë automatikisht në treg të hapur me çmime të parregulluara. Tahiri argumentoi se vendimi i ZRRE-së përbën “një goditje të rëndë ndaj ekonomisë së vendit, duke rrezikuar falimentime masive, rritje të papërballueshme të çmimeve dhe një valë të re inflacioni që godet qytetarët dhe konsumatorët”.

Serbia thotë se do t’i hetojë akuzat nga Rusia se e furnizoi Ukrainën me armë

Serbia dhe Rusia do ta kryejnë një hetim të përbashkët për atë se si municionet e prodhuara nga Serbia arritën në Ukrainë, tha presidenti serb Aleksandar Vuçiq. Moska ka akuzua dje Beogradin  për furnizimin e Kievit me armë. Shërbimi i Inteligjencës së Jashtme të Rusisë (SVR) e akuzoi Beogradin për "thikë pas shpine", duke thënë se prodhuesit serbë të armatimit po shisnin municione dhe armë në Ukrainë."Ato  kanë një qëllim të qartë – të vrasin dhe plagosin personelin ushtarak rus dhe popullsinë civile", thuhet në një komunikatë të SVR-së të publikuar në faqen e saj zyrtare. SVR-ja pretendoi se Serbia dërgon armë në Ukrainë përmes ndërmjetësve të NATO-s, duke përfshirë Republikën Çeke, Poloninë dhe Bullgarinë, si dhe disa vende afrikane.

SHBA-ja në OKB: Rusia duhet ta pranojë marrëveshjen për përfundimin e luftës në Ukrainë

Përfaqësuesi i Shteteve të Bashkuara të Amerikës në Kombet e Bashkuara, John Kelley, tha para Këshillit të Sigurimit të OKB-së se marrëveshja e tanishme që është ofruar për t’i dhënë fund luftës në Ukrainë, është rezultati më i mirë i mundshëm për Rusinë dhe se presidenti Vladimir Putin duhet ta pranojë atë. "Zgjatja e luftës nuk është në interesin e askujt", tha John Kelley, përfaqësuesi i përkohshëm i SHBA-së në OKB, duke paralajmëruar se Shtetet e Bashkuara mund ta shqyrtojnë “tërheqjen” nga përpjekjet për bisedime, nëse Rusia “merr vendimin e gabuar për ta vazhduar këtë luftë katastrofike”. Kelley shtoi se sanksione shtesë kundër Rusisë janë ende në tavolinë. Kremlini tha se po pret përgjigjen e Kievit për propozimin e tij për bisedime të reja në Stamboll më 2 qershor. “Me aq sa di unë, ende nuk ka përgjigje. Duhet të presim një përgjigje nga pala ukrainase”, tha zëdhënësi i Kremlinit, Dmitry Peskov.

Macron: Franca mund ta ashpërsojë qëndrimin ndaj Izraelit, nëse vazhdon bllokimi i ndihmave në Gazë

Franca mund të ashpërsojë qëndrimin e vetë ndaj Izraelit, nëse ai vazhdon t’i bllokojë ndihmat humanitare për Rripin e Gazës, tha sot presidenti i Francës, Emmanuel Macron. Ai e përsëriti se Parisi është i përkushtuar ndaj zgjidhjes me dy shtete për ta zgjidhur konfliktin izraelito-palestinez. “Bllokada humanitare po krijon situatë të papërballueshme në terren”, tha Macron në një konferencë të përbashkët për shtyp me kryeministrin e Singaporit, Lawrence Wong, në Singapor. “Dhe, kështu, nëse nuk ka përgjigje të përshtatshme për situatën humanitare në orët dhe ditët në vijim, atëherë padyshim që do të duhet ta ashpërsojmë qëndrimin tonë të përbashkët”, shtoi Macron, duke theksuar se Franca mund ta shqyrtojë vendosjen e sanksioneve ndaj kolonëve izraelitë.

Futbollistët e Deçiqit janë fituesit e Kupës së Malit të Zi

Futbollistët e Deçiqit janë fituesit e Kupës së Malit të Zi. Në ndeshjen finale, që u zhvillua mbrëmë në Nikshiq, Deçiqi mposhti Mornarin me rezultatin 1:0. Ekipi nga Tuzi fitoi trofeun e parë të Kupës me një gol të Asmir Kajeviqit në minutën e 23-të. Në këtë mënyrë, klubi nga Tuzi fitoi njëkohësisht të drejtën për gara të mëtejshme në Evropë, ku pritet të luajë në Ligën e Konferencave. Për ekipin e Deçiqit kjo ishte hera e tretë që luajti në finalen e Kupës së Malit të Zi, ndërsa Mornari luajti në finale për herë të parë.

Nesër kryesisht mot i kthiellët

Në pjesët jugore sot po mban mot kryesisht i kthjellët, kurse ne veri me vranësira të ndryshueshme por kryesisht i thatë. Fryn erë e mesme deri e fortë, vende vende shumë e fortë nga drejtimet e veriut dhe verilindjes. Temperaturat në orën 14 u shënuan: në Budvë e Herceg Novi 27 gradë, Tivar 26, Podgoricë e Ulqin 24, Cetinë e Nikshiq 19, Plevle 17, Beranë 16, Kollashin 14, Rozhajë 12 dhe në Zhablak 11 gradë.

                     Për nesër paralajmërohet të mbajë mot kryesisht i kthjellët, në veri me vranësira të pakta. Do të fryjë erë mesme deri e fortë, vende vende shumë e fortë veriore dhe verilindore. Pas dite me intensitet diçka më të dobët. Temperatura e mëngjesit do të jetë prej 2 deri në 16 kurse më e larta e ditës prej 16 deri në 29 gradë celsius.