Ditari 27.05.2025

Përgatiti, Musa Gjoka

VRASJA E DUSHKO JOVANOVIQIT: KUSH ËSHTË PËRGJEGJËS PËR 21 VJET PANDËSHKUESHMËRI?

Sot bëhen 21 vjet nga vrasja e Dushko Jovanoviq, redaktorit të gazetës “Dan”, dhe autorët, organizatorët e këtij akti kriminal janë ende të panjohur. Edhe pse autoritetet hetuese premtojnë të zbulojnë të vërtetën e plotë, ajo mbetet e fshehur edhe sot e kësaj dite.

Dushko Jovanoviq u vra natën e 27 majit 2004 në Podgoricë, pasi doli nga redaksia e gazetës "Dan".

Prokuroria malazeze pohon se po punohet intensivisht për të zbardhur rastin e vrasjes së Jovanoviqit, por ende nuk janë gjetur personat përgjegjës.

Dje, Prokuroria e Lartë e Shtetit në Podgoricë njoftoi për portalin tonë se puna në rastin e vrasjes së kryeredaktorit të gazetës "Dan" është intensifikuar dhe është formuar një ekip i posaçëm prokurorësh shtetërorë për të ndërmarrë veprime.

"Në lidhje me rastin janë ndërmarrë disa veprime dhe masa, janë dëgjuar disa dëshmitarë dhe vazhdimisht po ndërmerren veprime të shumta provuese, të gjitha me qëllim arritjen e një vendimi përfundimtar ligjor. Për shkak të mbrojtjes së interesave të procedurës, nuk jemi në gjendje t'u përgjigjemi pyetjeve tuaja më saktë, as të japim më shumë detaje", thuhet në përgjigjen nga Prokuroria e Lartë.

Drejtori i Policisë në detyrë, Llazar Shqepanoviq, i tha për RTMZ se ky rast nuk është i pezulluar dhe se ata po punojnë intensivisht për zbardhjen e plotë të tij.

Shqepanoviq theksoi se Drejtoria e Policisë ndërmerr në mënyrë të pavarur masa dhe veprime të caktuara dhe vlerësoi punën e prokurores së shtetit në detyrë, e cila, me iniciativën e saj, lëshon udhëzime dhe urdhra detyrues për Drejtorinë e Policisë.

SHQEPANOVIQ, SARANOVIQ DHE BEÇIQ VENDOSËN KURORË ME LULE ME RASTIN E 21 VJETORIT NGA VRASJA E JOVANOVIQIT.

Drejtori në detyrë i Administratës së Policisë, Llazar Shqepanoviq, Ministri i Punëve të Brendshme, Danillo Sharanoviq dhe Zëvendëskryeministri për Siguri, Mbrojtje, dhe Politikë të Brendshme, Aleksa Beçiq, vendosën një kurorë me rastin e 21-vjetorit të vrasjes së redaktorit të gazetës "Dana", Dushko Jovanoviq.

Sot bëhen 21 vjet nga vrasja e Dushko Jovanoviq, redaktorit të gazetës “Dan”, autorët dhe organizatorët e krimit janë ende të panjohur. Edhe pse autoritetet hetuese premtojnë të zbulojnë të vërtetën e plotë, ajo mbetet e pa zbardhur edhe sot e kësaj dite.

Dushko Jovanoviq u vra natën e 27 majit 2004 në Podgoricë, pasi doli nga redaksia e gazetës "Dan".

SPAJIQ: ËSHTË KOHA E DUHUR PËR TË INVESTUAR NË MAL TË ZI

Kryeministri i Malit të Zi, Millojko Spajiq shkroi në rrjetin X se ata prezantuan projekte me interes të mundshëm në Forumin e Biznesit në Osaka dhe tha se tani është koha e duhur për të investuar në Mal të Zi.

"Reformat e kanë bërë ekonominë tonë më konkurruese dhe projektet në infrastrukturë, energji, turizëm, ekologji dhe teknologji të larta do t'i japin një shtysë të fortë zhvillimit të saj të mëtejshëm. Kjo është arsyeja pse prezantuam projekte me interes potencial në Forumin e Biznesit, i cili u organizua në bashkëpunim me Odën Ekonomike të Malit të Zi në Osaka dhe në të cilin morën pjesë mbi 50 kompani japoneze, dhe thamë se tani është koha e duhur për të investuar në Mal të Zi", shkroi Spajiq.

MANDIQ: LIGJI PËR ZGJEDHJEN E KËSHILLTARËVE DHE DEPUTETËVE MUND TË MIRATOHET DERI NË FUND TË KORRIKUT

Reforma e legjislacionit zgjedhor është një nga detyrimet më të rëndësishme të Kuvendit, tha Kryetari i Parlamentit Andrija Mandiq, duke shtuar se beson që Ligji për Zgjedhjen e Këshilltarëve dhe Anëtarëve të Parlamentit mund të miratohet deri në fund të korrikut.

Në një takim me delegacionin e Komitetit të Buxhetit të Parlamentit Evropian, i cili po qëndron në Podgoricë, Mandiq tha se Mali i Zi ka privilegjin që 80 % e qytetarëve mbështesin ambicien për t'u bërë anëtar i Bashkimit Evropian dhe se nuk ka asnjë parti politike në Parlament që është kundër kësaj.

Siç u njoftua nga parlamenti, Mandiq kujtoi planin për të mbyllur të gjitha kapitujt deri në fund të vitit të ardhshëm, në mënyrë që deri në vitin 2028, Mali i Zi të jetë gati për anëtarësim në BE.

Në këtë kontekst, ai theksoi rolin e parlamentit, i cili ka miratuar mbi 300 akte të harmonizuara me legjislacionin evropian.

“Kuvendi, në bashkëpunim me Ministrin e Integrimit Evropian, po planifikon ta shënojë ligjin me një flamur blu me qëllim miratimin më të shpejtë dhe më efikas të ligjeve që nevojiten për të mbyllur kapitullin”, tha Mandiq.

DIPLOMATËT NË BE KANË FILLUAR DISKUTIMIN E KAPITULLIT PESË ME MALIN E ZI

Diplomatët në Grupin Punues për Zgjerim të Këshillit të BE-së filluan diskutimin e kapitullit të pestë, prokurimi publik, të cilin Mali i Zi planifikon ta mbyllë deri në fund të qershorit. Siç mësoi RTMZ nga burime diplomatike që morën pjesë në takim, diskutimi ishte konstruktiv, si pjesë e diskutimit parimor u fol edhe për marrëveshjen që Mali i Zi nënshkroi me Emiratet e Bashkuara Arabe. Diskutimet mbi Kapitullin 5 para Grupit Punues për Zgjerim do të vazhdojnë javën e ardhshme. Kryenegociatori i Malit të Zi me BE-në, Predrag Zenoviq, thekson se Rezoluta për Malin e Zi, e cila iu paraqit së fundmi komitetit të politikës së jashtme të Parlamentit Evropian, konfirmoi se Mali i Zi është lider në procesin e zgjerimit të BE-së dhe se është e nevojshme të vazhdohet me reformat. Vlerësimi i përgjithshëm mbeti pozitiv dhe afirmativ,  thotë ai. Plani fillestar është të mbyllen gjashtë kapituj këtë vit, duke lënë mundësinë e mbylljes së më shumë.  Ai tha për RTMZ se plani fillestar për anëtarësim në BE deri në vitin 2028 është ende i vlefshëm në të gjitha segmentet dhe është ende i mundur, megjithëse është shumë ambicioz. “Komisioni Evropian e vëren këtë dhe është shumë e rëndësishme që ne të këmbëngulim dhe t’i përmbahemi planit, madje duke e përshpejtuar atë”, tha më parë Zenoviq.

NË NIKSHIQ DAKORDOHET KOALICIONI

Bartësi i listës për të ardhmen e Nikshiqit, Marko Kovaçeviq, tha sot, pas një pauze të dhënë në seancën e Kuvendit Komunal të Nikshiqit, se është rënë dakord që kryetari i komunës të jetë nga koalicioni “Për të ardhmen e Nikshiqit”, kryetari i parlamentit do të jetë nga Lëvizja Evropa Tani, ndërsa nënkryetari i komunës nga Mali i Zi Demokratik, raportojnë korrespondentët e RTMZ. Jozyrtarisht, spekulohet se Marko Kovaçeviq duhet të mbetet kryetar komune, Zoran Mrkiq do të jetë kreu i parlamentit të Nikshiqit dhe Nemanja Vukoviq do të jetë nënkryetar i komunës. Megjithatë, kjo ende nuk është konfirmuar.

Seanca konstituive e Kuvendit Komunal të Nikshiqit, e para pas zgjedhjeve të fundit lokale, u ndërpre me kërkesë të Marko Kovaçeviqit, bartësit të listës "Për të Ardhmen e Nikshiqit", i cili kërkoi një pushim deri në nënshkrimin e marrëveshjes së koalicionit. Kryetari i Kuvendit pritej të zgjedhet sot në  seancë, megjithatë, mbledhja u ndërpre dhe vazhdimi i saj për  2 qershor.

Pasi u konfirmuan mandatet e këshilltarëve, Kovaçeviq kërkoi pushim.

"Para së gjithash, dua të përgëzoj konfirmimin e mandatit të këshilltarëve. Dua të kërkoj një pauzë. Ne, si shumicë e ardhshme, kemi një kandidat për kryetar të Kuvendit të Komunës, por me kërkesë të kolegëve tanë, me të cilën jemi pajtuar, nuk do të marrim pjesë në zgjedhje derisa të nënshkruajmë marrëveshjen e koalicionit", tha Kovaçeviq.

KËRCËNIMET ONLINE NDAJ PUNONJËSVE TË MEDIAS JANË BËRË TË PËRDITSHME

Kërcënimet online ndaj punonjësve të medias në Mal të Zi janë bërë të përditshme dhe gazetarët nuk janë më të sigurt as në sferën private, than nga Sindikata e Medias.

Sindikata e Medias tha se janë të shqetësuar për mesazhin kërcënues që iu dërgua gazetares së TV E, Itana Kallugjeroviq, në llogarinë e saj në Facebook.

SMCG tha se janë gjithashtu të shqetësuar për dimensionin kombëtar të incidentit, pasi një koment kërcënues u la nën një foto të bërë në Cetinje, në të cilën Kalugjeroviq mban veshur një bluzë malazeze.

"Ky lloj konteksti inkurajon më tej urrejtjen dhe polarizimin dhe përfaqëson një kërcënim për paqen sociale", than nga  Sindikata e Medias.

Ata u bënë thirrje institucioneve kompetente që urgjentisht të identifikojnë dhe ndjekin penalisht personin që dërgoi kërcënimin, me qëllim që të dërgohet një mesazh se hapësira online nuk është jashtë mundësive të ligjit dhe se anonimati nuk mund të jetë mbulesë për kërcënime, gjuhë urrejtjeje dhe dhunë.

BE MIRATOI NJË PLAN PREJ 150 MILIARDË EUROSH PËR TË FORCUAR KAPACITETET MBROJTËSE.

Ministrat e Bashkimit Evropian miratuan sot një program prej 150 miliardë eurosh për të rritur shpenzimet e mbrojtjes në bllok.

Rregullorja SAFE (Veprimi i Sigurisë për Evropën) u propozua për herë të parë në mars nga Komisioni Evropian në përgjigje të thirrjeve nga shtetet anëtare për mbështetje financiare dhe politike për të përmbushur objektivat e reja të mbrojtjes të promovuara nga NATO dhe për të ndërhyrë potencialisht në favor të Ukrainës nëse Shtetet e Bashkuara e zhvendosin fokusin e tyre diku tjetër.

Dekreti përfundimtar, në të cilin Radio Evropa e Lirë kishte qasje, thotë se "kërcënimet e paraqitura nga Rusia dhe Bjellorusia janë me urgjencë dhe rëndësi të veçantë" dhe duhet të kundërshtohen shpejt.

Për shkak të kohës së nevojshme për të zhvilluar produkte mbrojtëse dhe për të rritur kapacitetin e prodhimit industrial në të gjithë BE-në, rregullorja gjithashtu thotë se do të jetë jetike që Unioni të fillojë mbështetjen e shteteve anëtare sa më shpejt të jetë e mundur, në mënyrë që ato të mund të porosisin shumë shpejt pajisjet ushtarake.

Brukseli iu përgjigj fillimisht thirrjeve të shteteve anëtare duke aktivizuar klauzolën e përjashtimit kombëtar të BE-së për shpenzimet ushtarake, që do të thotë se shpenzimet për artikuj të tillë si armët dhe municionet nuk do të llogariten kundër mekanizmit të ndëshkimit të bllokut për vendet që shkelin kufijtë e shpenzimeve të BE-së.

KUVENDI NUK U BË AS PAS PËRPJEKJES SË 22-të

Si në njëzet e një përpjekje të mëhershme, deputetët e Kuvendit të Kosovës kanë dështuar edhe sot, për të njëzet e dytën herë, ta konstituojnë përbërjen e nëntë parlamentare, të dalë nga zgjedhjet e shkurtit.  Ligjbërësit refuzuan për të katërmbëdhjetën herë rresht që ta formonin një komision për mbikëqyrjen e një votimi të fshehtë për kreun e ri të organit ligjvënës – sipas një propozimi të bërë më 1 maj nga kryesuesi i seancës, Avni Dehari, pasi kandidatja e Lëvizjes Vetëvendosje për kryetare të Kuvendit, Albulena Haxhiu, nuk arriti në disa votime t’i merrte 61 votat e nevojshme për t’u konfirmuar në post.     Partia Demokratike e Kosovës (PDK), Lidhja Demokratike e Kosovës (LDK), Aleanca për Ardhmërinë e Kosovës (AAK) dhe Lista Serbe refuzuan sërish, në vazhdimin e seancës konstituive, më 27 maj, që ta propozonin një përfaqësues që do të siguronte mbarëvajtjen e votimit të fshehtë.

RUSIA E AKUZON UKRAINËN PËR PENGIM TË BISEDIMEVE PËR PAQE

Rusia tha sot se sulmet ajrore të kryera ditëve të fundit ndaj Ukrainës ishin “përgjigje” ndaj përshkallëzimit të sulmeve ukrainase me dronë ndaj civilëve rusë, duke e akuzuar Kievin se po tenton të “pengojë” përpjekjet për paqe.  Moska ka kryer qindra sulme me dronë në Ukrainë nga mbrëmja e së premtes deri mëngjesin e së hënës, duke vrarë dhjetëra persona. Presidenti amerikan, Donald Trump, që po teton të ndërmjetësojë përfundimin e pushtimit Rus të Ukrainës, të nisur tre vjet më parë, ka deklaruar se presidenti rus, Vladimir Putin, “është çmendur” dhe e ka kërcënuar Rusinë me sanksione për shkak të sulmeve.

OBSH-JA KËRKON TË LEJOHET HYRJA E KAMIONËVE ME NDIHMA MJEKËSORE NË GAZË

Një zyrtar i lartë i Organizatës Botërore të Shëndetësisë dënoi dje faktin që asnjë nga kamionët e agjencisë me ndihma mjekësore nuk u lejua të hynte në Rripin e Gazës që nga përfundimi i bllokadës nga Izraeli. Ndihma humanitare ka filluar të depërtojë sërish në territorin palestinez gjatë ditëve të fundit, pas më shumë se dy muajsh me qasje të bllokuar.  Por, për më shumë se 11 javë, “nuk ka pasur asnjë kamion të OBSH-së që ka hyrë në Gazë për mbështetje në kujdesin mjekësor”, tha drejtoresha rajonale për Mesdheun Lindor e OBSH-së, Hanan Balkhy, gjatë një konference për media në Gjenevë. Situata është shkatërruese. Ne jo vetëm që jemi të shqetësuar për punën që po mbështesim, dhe dëshirojmë e shpresojmë të vazhdojmë ta mbështesim popullin, por jemi jashtëzakonisht të shqetësuar për pasojat e kësaj”, tha ajo, duke përmendur ndikimin për brezat që do të vijnë.

TRAGJIKE NË SHBA! DY TË VDEKUR DHE TETË TË PLAGOSUR PAS TË SHTËNAVE ME ARMË ZJARRI NË FILADELFIA

Një ngjarje tragjike ndodhi vonë mbrëmjen e së hënës në Fairmount Park të Filadelfias, ku një incident me armë zjarri la dy persona të vdekur dhe të paktën tetë të tjerë të plagosur. Sipas autoriteteve, të shtënat ndodhën rreth orës 22:30 (sipas kohës lokale), në afërsi të kryqëzimit midis Lemon Hill Drive dhe Poplar Drive. Policia raportoi se incidenti shpërtheu pas një gare makinash që po zhvillohej në zonë.  Mes të plagosurve ndodhen edhe të paktën dy të mitur, ndërsa një person tjetër është goditur nga një makinë teksa përpiqej të largohej nga vendi i ngjarjes në mes të kaosit. Ai është dërguar menjëherë në spital për trajtim. Mediat lokale theksojnë se parku ishte i mbushur gjatë gjithë ditës me familje që festonin Ditën e Përkujtimit, duke organizuar barbeque dhe aktivitete të tjera festive. Moshat dhe identiteti i viktimave nuk janë bërë ende të ditura. Deri më tani nuk është konfirmuar nëse është kryer ndonjë arrestim në lidhje me të shtënat.   

VETURA PËRPLASET ME TIFOZË NË LIVERPUL, 27 PERSONA DËRGOHEN NË SPITAL

Një veturë është përplasur me një turmë tifozësh të klubit të futbollit, Liverpool FC, gjatë një parade për festimin e titullit të kampionit të ligës elitare angleze, të dje, duke bërë që 27 persona të dërgohen në spital, prej të cilëve dy me lëndime të rënda. Policia ka thënë se nuk beson se incidenti i 26 majit në qytetin e Liverpulit ka të bëjë me terrorizëm, raporton Reuters. Autoritetet kanë thënë se është arrestuar një “burrë i bardhë britanik, 53-vjeçar, nga zona e Liverpulit”, i cili, besojnë ata, ishte ngasësi i automjetit që goditi një grup të madh mbështetësish që po festonin në qytetin veriperëndimor të Anglisë.   Njëzet njerëz u trajtuan nga mjekët në vendin e ngjarjes. Zyrtarët e ambulancës thanë se nga 27 të dërguarit në spital, katër janë fëmijë.  Një fëmijë dhe një i rritur ndodhen në gjendje të rëndë, njoftuan autoritetet shëndetësore. Katër persona, të ngujuar nën automjet, u desh të shpëtoheshin nga zjarrfikësit.

DIELL E RE, DERI NË 28 GRADË

Në Mal të Zi mban mot me vranësira graduale dhe i thatë. Vende vend, kryesisht në zonat malore me shi të dobët. Frynë erë e lehtë nga drejtime të veriut. Temperaturat në ora 14 u shënuan; Podgoricë 27, Budvë e Nikshiq 24, Tivar Ulqin e Beran 23, H. Novi e B. Pole 22, Kollashin, Plevle e Shavnik 20, Plluzhinë 19, Rozhajë, Andrievicë, Guci e Petnicë 18, Cetinë 16, dhe në Zhablak 14 gradë.

Meteorologët për nesër paralajmërojnë mot të ndryshueshëm me vranësira graduale dhe me intervale të gjata me diell. Do të fryjë erë e lehtë deri e mesme vende vende e fortë nga drejtimet e veriut. Temperatura e mëngjesit prej 5 deri në 17, kurse më e larta e ditës prej 15 deri në 28 gradë.