Ditari 21.05.2025

Ditarin e përgatiti, Violeta Gjokaj

MALI I ZI SHËNON DITËN E PAVARËSISË

Mali i Zi  shënon Ditën e Pavarësisë dhe 19 vjet që kur rivendosi pavarësinë shtetërore në një referendum.

Në referendumin e 21 majit 2006, votuan 419,240 qytetarë, ose 86.5 përqind e numrit të përgjithshëm të votuesve.

Pavarësia e shtetit u mbështet nga 230,661, ose 55.5 përqind e qytetarëve malazezë që shkuan në referendum, ndërsa 185,002 ose 44.5 përqind votuan për të mbetur në një shtet të përbashkët me Serbinë.

Parlamenti i Malit të Zi më parë miratoi Ligjin për Referendumin, i cili u dakordësua me rekomandimin e Bashkimit Evropian. Që referendumi të ishte i suksesshëm, ishte e nevojshme që ai të mbështetej nga 55 përqind e votuesve.

Pyetja e referendumit ishte - A dëshironi që Republika e Malit të Zi të jetë shtet i pavarur me subjektivitet të plotë juridik ndërkombëtar?

Më 2 mars, me propozim të Presidentit të Republikës, Filip Vujanoviq, Parlamenti i Malit të Zi vendosi që referendumi për statusin shtetëror-juridik të mbahej më 21 maj.

Sllovaku Frantishek Lipka u zgjodh president i Komisionit të Referendumit të Republikës.

Për të festuar Ditën e Pavarësisë, mbrëmë në Podgoricë, në përputhje me rregullat e Protokollit të Shtetit u ndezën fishekzjarre. Gjithashtu, për nder të Ditës së Pavarësisë, ndërtesa e Qeverisë ndriçohet me ngjyrat e flamurit malazez.

MILLATOVIQ: I DËRGUAM BOTËS NJË MESAZH TË QARTË - MALI I ZI E DI KUSH ËSHTË, KU PO SHKON DHE ME KË

Lufta kundër korrupsionit, forcimi i institucioneve dhe reformat evropiane mbeten detyrim i përhershëm në mënyrë që Mali i Zi të jetë i fortë, evropian dhe i drejtë për çdo person që jeton në këtë vend, thotë presidenti i Malit të Zi Jakov Millatoviq.

Në fjalimin e tij me rastin e 21 Majit - Ditës së Pavarësisë dhe dy viteve të mandatit të tij si President i shtetit, Millatoviq tha se dy vjet më parë kishte dhënë fjalën se do të punonte me përkushtim për përmirësimin e Malit të Zi dhe, si i pari midis të barabartëve, do të qëndrojë vendosmërisht në anën e rendit kushtetues dhe ligjor.

Sot, Mali i Zi është në rrugën evropiane dhe kurrë më afër anëtarësimit të plotë në Bashkimin Evropian, deklaroi mes tjerash presidenti Millatoviq.

ZYRTARET EVROPAN, KOS, SHARE E FETLER URUAN DITËN E PAVARËSISË

Zyrtarët evropianë gjithashtu uruan Ditën e Pavarësisë. Komisionerja Evropiane për Zgjerimin, Marta Kos, tha se para 19 vitesh, qytetarët e Malit të Zi zgjodhën lirisht dhe në mënyrë demokratike pavarësinë. Sot punojmë së bashku për hir të së ardhmes evropiane të Malit të Zi dhe se BE-ja është krenare që mbështet këtë rrugë u shpreh Kos.

 Edhe raportuesi i Parlamentit Evropian për Malin e Zi, Marjan Sharec uroi të gjithë qytetarët e Malit të Zi për Ditën e Pavarësisë me mesazhin se 19 vjet më parë, Mali i Zi nisi një rrugë të re pas fitimit të pavarësisë. Qytetarët, thotë ai, kanë vendosur që duan të jetojnë sipas vlerave evropiane dhe shton se një arritje e madhe u arrit me anëtarësimin në NATO. Në urimin e tij, Sharec përfundoi se vetëm duke u anëtarësuar në Bashkimin Evropian , Mali i Zi do të jetë në gjendje të shfrytëzojë të gjitha përfitimet e anëtarësimit. Ndërsa ambasadori gjerman, Peter Felten, uroi Ditën e Pavarësisë i veshur me kostum malazez me një mesazh për të kultivuar marrëdhëniet malazezo-gjermane.

PËRFAQËSUES TË DISA PARTIVE POLITIKE NË MAL TË ZI URUAN DITËN E PAVARËSISË

Me rastin e festimit të 21 Majit- Ditës së Pavarësisë, urime dërguan zyrtarë të shumtë publikë dhe udhëheqës partiakë. Kryetari i Partisë Demokratike të Socialistëve, Daniell Zhivkoviq, tha se në këtë ditë, 19 vjet më parë, Mali i Zi rishpalli pavarësinë e tij shtetërore, duke shkruar një faqe të re në historinë e vet.

Udhëheqësit e Aleancës Evropian, Damir Shehoviq, Ivan Vujoviq dhe Vatrosllav Belan, përmes urimit të tyre theksuan se Dita e Pavarësisë nuk mund të jetë thjesht një datë që festohet, por një parim sipas të cilit jetojmë.

Ministri i Punëve të Jashtme, Ervin Ibrahimoviq uroi sot të gjithë qytetarët, si dhe diasporën, me vlerësimin se më 21 maj 2006 u vendos rruga drejt demokracisë, harmonisë multikonfesionale dhe shumënacionale.

 Zëvendëskryeministri Momo Koprivica tha se tradita shtetërore juridike e Malit të Zi është një nxitje e vazhdueshme për çdo brez për të ndërtuar një të ardhme të bazuar në drejtësi, liri dhe solidaritet.

Kryetarja e Kuvendit të Kryeqytetit, Dr. Jelena Boroviniq Bojoviq, gjithashtu uroi qytetarët për Ditën e Pavarësisë, me vlerësimin se kjo festë është një mundësi për të kapërcyer dallimet dhe për të bërë përpjekje edhe më të forta për mirëqenien e të gjithë qytetarëve dhe të ardhmen e Malit të Zi.

LIGJI PËR LISTËN E VOTUESVE ËSHTË ÇELËSI PËR ZGJIDHJEN E BLLOKADËS SHUMËVJEÇARE NË SHAVNIK

Propozimi për të ndryshuar Ligjin për listën e zgjedhësve, i cili u paraqit në procedurë parlamentare nga Demokratët, është çelësi i daljes së Shavnikut nga bllokada shumëvjeçare, sipas përfaqësuesve të asaj partie.

Demokratët njoftuan se deputetët Angjela Vojinoviq dhe Nikolla Rovcanin, së bashku me anëtarin e Presidencës Neven Goshoviq, të martën vizituan qytetarët e Shavnikut, të cilët kanë qenë në rrugë për muaj të tërë "duke këmbëngulur në luftën që procesi zgjedhor në Shavnik të përfundojë më në fund, së bashku me mandatin shtatëvjeçar të kryetarit të komunës Jugosllav Jakiq".

Thuhet se Vojinoviq, Rovçanin dhe Goshoviq u paraqitën qytetarëve të Shavnikut Propozimin për një Ligj për Ndryshimet në Ligjin për Listën Zgjedhore - një iniciativë që demokratët ia paraqitën së fundmi Kuvendit për shqyrtim me procedurë urgjente.

“Ky ligj, siç theksuan ata, është çelësi për të dalë nga Shavniku nga bllokada shumëvjeçare”, thuhet në njoftim.

NË AKSIDENTIN E MBRËMSHËM NJË PERSON HUMBI JETËN

Një person u humbi jetën në aksidentin që ndodhi mbrëmë pranë Urës Milenium para Fakultetit të Drejtësisë në Podgoricë, u konfirmua për Portalin RTMZ nga  Qendra e Komunikimit Operativ të Drejtorisë së Policisë.

“Në aksidentin një, person humbi jetën, një tjetër u plagos rëndë, ndërsa i treti mori lëndime të lehta”, tha QKO për Portalin tonë.

Në aksident u përfshinë dy automjete.

Të lënduarit u transportuan në Qendrën e Emergjencës ku morën ndihmë mjekësore, njoftoi policia.

NXËNËSIT E SHKOLLËS FILLORE “MAHMUT LEKIQ” NGA TUZI VIZITUAN INSTITUCIONIN E PRESIDENTIT TË REPUBLIKËS SË SHQIPËRISË

Një grup nxënësish nga shkolla fillore “Mahmut Lekiq” nga Tuzi vizituan sot Institucionin e Presidentit të Republikës së Shqipërisë.

Gjatë kësaj vizite, nxënësit u njohën me ambientet e Institucionit të Presidentit, ku zhvillohen takime të rëndësishme kombëtare e ndërkombëtare, funksionin, vendimmarrjet, si dhe aktivitetet kryesore.

Ndërkohë që Presidenti i Republikës, Bajram Begaj i uroi mirëseardhjen miqve të vegjël nga Tuzi, nxënësit e përshëndetën me një këngë me çifteli dhe me interpretimin e një poezie patriotike.

Duke theksuar rëndësinë e intensifikimit të vizitave të ndërsjella mes shqiptarëve të Shqipërisë dhe atyre të Malit të Zi, Presidenti Begaj u shpreh se “me anëtarësimin e përbashkët në Bashkimin Evropian, kufijtë do të mbeten vetëm në hartë”.

Kreu i Shtetit propozoi hapjen e dyerve të institucioneve për fëmijët nga të gjitha trevat dhe zhvillimin e vizitave të tyre në familjet shqiptare, por edhe mësimin e historisë në institucionet përkatëse.

Begaj përgëzoi drejtorin e shkollës, Luigj Dedvukaj, dhe mësimdhënësen Hana Camaj për pasionin dhe dashurinë në ushtrimin e profesionit dedikuar mësimit të gjuhës shqipe.

VIJON NGËRÇI: AS PËRPJEKJA E 19-TË NUK E ZHBLLOKON KUVENDIN E KOSOVËS

Deputetët e Kuvendit të Kosovës kanë dështuar për të nëntëmbëdhjetën herë me radhë që ta konstituojnë përbërjen e nëntë parlamentare, të dalë nga zgjedhjet e shkurtit.

Sot, ligjbërësit refuzuan për të njëmbëdhjetën herë rresht që ta formonin një komision për mbikëqyrjen e një votimi të fshehtë për kreun e ri të organit ligjvënës – sipas një propozimi të bërë më 1 maj nga kryesuesi i seancës, Avni Dehari, pasi kandidatja e Lëvizjes Vetëvendosje (LVV) për kryetare të Kuvendit, Albulena Haxhiu, nuk arriti në disa votime t’i merrte 61 votat e nevojshme për t’u konfirmuar në post.

Dështimi i radhës ndodhi një ditë pasi kryeministri në detyrë i Kosovës, njëherësh udhëheqës i LVV-së, Albin Kurti, ngulmoi se kandidatura e Haxhiut për kryetare të Kuvendit është vendim i partisë dhe se ajo nuk do të tërhiqet.

 KRYEDIPLOMATJA EVROPIANE KALLAS KËTË JAVË VIZITON SERBINË DHE KOSOVËN

Përfaqësuesja e Lartë e Bashkimit Evropian për Politikë të Jashtme dhe Siguri, Kaja Kallas, do ta    vizitojë Kosovën më 22 maj, në kuadër të një turneu që do ta nisë sot në Ballkanin Perëndimor, ka bërë të ditur Shërbimi Diplomatik i BE-së.Kallas do të udhëtojë edhe në Serbi dhe në Maqedoninë e Veriut gjatë vizitës së saj të dytë në rajon, ka njoftuar Brukseli.

“Në Kosovë, përfaqësuesja e Lartë Kallas do të takohet me përfaqësues të partive politike dhe të organizatave të shoqërisë civile”, thuhet në një njoftim të BE-së.

Kallas do ta vizitojë Kosovën në kohën kur autoritetet kosovare po përsërisin thirrjet për heqjen e masave ndaj vendit nga ana e BE-së, madje kanë kërkuar që kjo të ndodhë para vazhdimit të dialogut për normalizim marrëdhëniesh me Serbinë.

Në Prishtinë, Kallas pritet të vizitojë edhe Misionin e BE-së për Sundim të Ligjit (EULEX), si dhe komandantin e misionit paqeruajtës të Organizatës së Traktatit të Atlantikut Verior (NATO) në Kosovë – KFOR, Enrico Barduani.

Para vizitës në Kosovë, Kallas do të qëndrojë në Serbi.

BE-ja ka njoftuar se Kallas do ta takojë në Beograd presidentin Aleksandar Vuçiq, kryeministrin Gjuro Macut, si dhe ministrin e Jashtëm, Marko Gjuriq, atë për Integrime Evropiane, Nemanja Staroviq, dhe kryetaren e Kuvendit, Ana Bërnabiq, dhe grupet parlamentare opozitare.

Ndërkaq, kryediplomatja evropiane në Shkup do ta takojë kryeministrin Hristijan Mickoski, ka bërë të ditur Brukseli.

Në kryeqendrën maqedonase, Kallas “do ta hapë Dialogun e parë për Siguri dhe Mbrojtje ndërmjet BE-së dhe Maqedonisë së Veriut me ministrin për Punë të Jashtme dhe Tregti, Timço Mucunski”, ka njoftuar Shërbimi Diplomatik i BE-së.

MAQEDONIA E VERIUT PRITET TË NËNSHKRUAJË MARRËVESHJE PËR PARTNERITET STRATEGJIK ME BRITANINË

Maqedonia e Veriut pritet të bëhet vendi i parë nga Ballkani Perëndimor që nënshkruan marrëveshje për partneritetit strategjik me Britaninë e Madhe.

Marrëveshja në vlerë rreth 6 miliardë euro pritet të nënshkruhet sot në Londër nga një delegacion i Qeverisë maqedonase, i udhëhequr nga zëvendëskryeministri Aleksandar Nikolovski.

Megjithatë, hollësitë e këtij partneriteti dhe kushtet sipas të cilave Maqedonia e Veriut do të marrë burimet financiare nga Britani, nuk janë bërë të ditura ende.

Autoritetet maqedonase dhe Londra e mohojnë se marrëveshja përfshin pranimin e emigrantëve në Maqedoni, të cilëve nuk u është pranuar azili në Britani.

PUTIN E BËRI NJË VIZITË TË PAPRITUR SOT NË RAJONIN KURSK

Presidenti i Rusisë, Vladimir Putin, e bëri një vizitë të papritur sot në rajonin Kursk të Rusisë, në një kohë kur ai po akuzohet se po i zvarrit bisedimet për paqe me Ukrainën.

Kjo ishte vizita e tij e parë në Kursk prej kur trupat ruse i zmbrapsën forcat ukrainase nga pjesët e pushtuara të këtij rajoni pas një inkursioni ukrainas vitin e kaluar.

Televizioni shtetëror shfaqi Putinin duke u takuar me disa grupe banorësh në Kursk, si dhe me guvernatorin e përkohshëm të rajonit, Aleksander Khinshtein.

BALOCISTAN: TË PAKTËN KATËR FËMIJË HUMBËN JETËN DHE 38 PERSONA TË TJERË U PLAGOSËN

Të paktën katër fëmijë humbën jetën dhe 38 persona të tjerë u plagosën si pasojë e një shpërthimi që kishte në shënjestër një autobus shkolle në provincën Balocistan të Pakistanit, njoftuan autoritetet lokale.

Ministri i Brendshëm i Pakistanit , Mohsin Navki, dënoi ashpër sulmin , ndërsa shprehu dhimbjen dhe pikëllim të thellë për humbjen e jetëve të fëmijëve.

Armiku sulmoi fëmijë, të pafajshëm me barbari.

 Ky sulm ndaj një autobusi shkolle është një akt i urryer që synon të destabilizojë vendin, thuhet në deklaratën e ministrit.

TRE PERSONA HUMBËN JETËN NGA PËRMBYTJET NË JUG TË FRANCËS

Tre persona humbën tragjikisht në jug të Francës, pas përmbytjeve të papritura dhe të dhunshme që goditën zonën. Reshjet ekstreme e kthyen këtë ngjarje në një krizë rajonale.

Brenda një ore, në Le Lavandou ra mbi 250 mm shi, duke e bërë këtë një nga përmbytjet më intensive të regjistruara ndonjëherë në këtë zonë.

Ujërat e rrëmbyeshëm mbuluan rrugët, ndërprenë energjinë elektrike, dëmtuan infrastrukturën dhe izoluan lagje të tëra. U raportuan dëme serioze në ura dhe rrugë të rëndësishme për transportin lokal.

Shërbimet e emergjencës morën mbi 500 thirrje ndihme. Pjesëtarë të zjarrfikësve, xhandarmërisë dhe njësive të mbrojtjes civile ndërhynë me helikopterë dhe mjete të blinduara për të shpëtuar banorët e bllokuar.

PAPA LEONI I LUTET IZRAELIT T’I LEJOJË NDIHMAT HUMANITARE NË GAZË

Papa Leoni XIV i ka bërë thirrje sot Izraelit ta lejojë hyrjen e ndihmave humanitare në Rripin e Gazës, duke e përshkruar gjendjen në enklavën palestineze si "shqetësuese dhe tronditëse".

"Ripërtërij thirrjen time të zjarrtë për të lejuar hyrjen e ndihmës së drejtë humanitare dhe për t’i dhënë fund armiqësive, çmimin shkatërrues të të cilave po e paguajnë fëmijët, të moshuarit dhe të sëmurët", tha papa i ri në sheshin e Shën Pjetrit.

Leoni – i cili u zgjodh papë më 8 maj duke pasuar të ndjerin Papa Françesku – e ka përmendur luftën në Gazë disa herë në javët e para të papatit të tij.

Ai e bëri këtë lutje në fund të fjalimit para audiencës, duke shtuar disa fjalë përtej tekstit të përgatitur.

Në mesazhin e tij të parë të së dielës më 11 maj, Papa Leoni bëri thirrje për armëpushim të menjëhershëm në Gazë dhe për lirimin e të gjithë pengjeve izraelite që po mbahen nga grupi militant Hamas – i cili është i shpallur organizatë terroriste nga SHBA-ja dhe BE-ja.

Izraeli tha të hënën se do ta lejojë hyrjen e ndihmave në Gazë pas një bllokade 11-javore ndaj enklavës, por Kombet e Bashkuara thanë se deri të martën nuk është shpërndarë asnjë ndihmë.

QENDRA SHËNDETËSORE NË BLLOKUN V, TUZ DHE ZETË KUJDESTARE

Qendra Shëndetësore e Podgoricës në Bllokun V, Tuz dhe Zetë do të jetë në  kujdestare sot dhe nesër, gjatë festës së Ditës së Pavarësisë së Malit të Zi.

Qendra Shëndetësore e Kryeqytetit njoftoi se mjekët e përzgjedhur për të rritur dhe fëmijë për territorin e Podgoricës do të punojnë ekskluzivisht në ndërtesën e Bllokut V në dy turne, nga ora 7:00 e mëngjesit deri në orën 14:00 dhe nga ora 14:00 deri në orën 21:00.

Thuhet se në Tuzi dhe Zetë mjeku i zgjedhur për të rriturit do të punojë nga ora 7 e mëngjesit deri në orën 3 të pasdites.

Qendra për diagnostikim laboratorik në qendrën shëndetësore të Bllokut V do të funksionojë nga ora 7 e mëngjesit deri në orën 9 të mbrëmjes.

Qendra Shëndetësore tha se njësia e patronazhit do të punojë sipas orarit të përcaktuar dhe se porositë do të pranohen në qendrën shëndetësore të Bllokut V nga ora 7:00 e mëngjesit deri në orën 19:00.

Shtohet se terapia do të jepet me urdhër të mjekut të përzgjedhur, në apartamentin e pacientit, çdo ditë nga ora 7:00 e mëngjesit deri në orën 19:00.

NESËR MOT ME VRANËSIRA MESATARE

Në Mal të Zi mban mot i vranët dhe vende- vende me shi. Frynë erë mesatare deri e fortë e drejtimeve të jugut.

Temperaturat në orën 14:00: Tivar e B. Pole 25, Ulqin 24, Podgoricë e Budvë 23, H. Novi, Plevle e Beran 21, Shavnik e Rozhajë 20, Andrievicë e Plluzhinë 18, Guci 17, Nikshiq 16, Cetinë 14 dhe në Zhablak 13 gradë.

Për nesër pritet mot me vranësira mesatare dhe intervale me diell. Janë të mundshme edhe reshje të dobëta të shiut. Do të fryjë erë e dobët deri mesatare nga drejtimet e jugut. Temperatura e mëngjesit nga 7 deri në 16 , ndërsa më e lartë ditore nga 15 deri në 24 gradë.