Ditari 30.04.2025

Ditarin e përgatiti Marash Dedvukaj

Jakov Millatoviq - Gjykata Kushtetuese duhet të interpretojë tezën se Marrëveshja me Emiratet e Bashkuara Arabe

Presidenti i Malit të Zi, Jakov Millatoviq, tha se Gjykata Kushtetuese duhet të interpretojë tezën se Marrëveshja me Emiratet e Bashkuara Arabe (EBA) për turizmin dhe zhvillimin e pasurive të paluajtshme duhet të verifikohet me shumicë prej dy të tretash në Parlamentin e Malit të Zi. Milatoviq beson se Mali i Zi ka nevojë për investime, por që, siç thekson ai, e gjithë kjo duhet të jetë në përputhje me rendin ligjor. Ai kujtoi se OJQ-të e besueshme, si dhe Shoqata e Avokatëve, paraqitën tezën se Marrëveshja me Emiratet e Bashkuara Arabe për turizmin dhe zhvillimin e pasurive të paluajtshme duhet të verifikohet me shumicë prej dy të tretash në Kuvend, dhe deklaroi se kjo duhet të analizohet dhe shqyrtohet seriozisht. "Do të doja të dëgjoja mendimin e disa institucioneve të tjera dhe komisionit kompetent parlamentar. Është kjo një mundësi e mirë që Gjykata Kushtetuese të japë interpretim e vetë. Kjo është një pyetje e rëndësishme dhe institucionet duhet të japin një përgjigje të qartë", tha Millatoviq.

Mandiq, tha se nuk mendon se deputetët mësuan ndonjë gjë të re nga shpjegimi i gjerë i Presidentit të Shtetit, Jakov Millatoviq

Kryetari i Parlamentit të Malit të Zi, Andrija Mandiq, tha se nuk mendon se deputetët mësuan ndonjë gjë të re nga shpjegimi i gjerë i Presidentit të Shtetit, Jakov Milatoviq, pse Ligji që konfirmon Marrëveshjen për bashkëpunim në fushën e turizmit dhe zhvillimit të pasurive të paluajtshme me Emiratet e Bashkuara Arabe u kthye në Parlament për rivendim. Ai shpalli Ligjin për Konfirmimin e Marrëveshjes për Bashkëpunim Ekonomik, ndërsa Ligji që konfirmonte Marrëveshjen për Bashkëpunim në fushën e turizmit dhe zhvillimit të pasurive të paluajtshme iu kthye deputetëve për rivendim. Mandiq u tha gazetarëve në Murin se, në përputhje me Kushtetutën, ata morën nga Presidenti i Malit të Zi, Jakov Milatoviq, një shpjegim të hollësishëm pse ai nuk dëshiron ta nënshkruajë ligjin e miratuar nga kuvendi.

Andrija Mandiq ka vendosë sot kurorë me lule në memorialin për viktimat e bombardimeve të NATO-s në Murinë

Kryetari i Parlamentit Andrija Mandiq ka vendosë sot kurorë me lule në memorialin për viktimat e bombardimeve të NATO-s në Murinë, njoftoi parlamenti. Siç thanë ata, në këtë mënyrë, Mandiq tregoi respekt të thellë dhe kujtim të përjetshëm për civilët e pafajshëm që, në këtë ditë 26 vjet më parë, humbën jetën gjatë një ngjarjeje tragjike. “Mandiq ua kushtoi kurorën “Martirëve të Rinj të Murinës”, duke theksuar se sot ata përkulën para gjashtë martirëve të pafajshëm, thuhet në njoftim. Mandiq tha se Mali i Zi nuk do t'i harrojë kurrë ata. “Mali i Zi e di që unë vija në Murino pothuajse çdo vit në këtë ditë dhe se që nga viti i kaluar kam qenë së bashku me të gjithë ju si kryetar i Kuvendit, duke përfaqësuar shtetin e Malit të Zi, për të nderuar dhe për t'u përulur para viktimave të pafajshme”, tha Mandiq.

A.Beçiq - Mali i Zi nuk i ka harruar dhe nuk do t’i harrojë kurrë viktimat e bombardimit të Murinës

Mali i Zi nuk i ka harruar dhe nuk do t’i harrojë kurrë viktimat e bombardimit të Murinës, tha zëvendëskryeministri për Sigurinë, Mbrojtjen, Luftimin e Krimit dhe Politikën e Brendshme Aleksa Beçiq. "Sot, me trishtim dhe respekt, kujtojmë Murinin - një qytet të vogël dhe paqësor ku, 26 vjet më parë, një ditë paqësore u ndërpre nga zhurma e aeroplanëve gjatë bombardimeve të NATO-s", tha Beçiq në një deklaratë. Atë ditë, siç tha ai, u shuan jetët e gjashtë njerëzve të pafajshëm, përfshirë tre fëmijë. Beçiq theksoi se për herë të parë, Mali i Zi e njohu përgjegjësinë e tij për të korrigjuar të paktën pjesërisht padrejtësinë e dekadave të gjata, duke u dhënë 100,000 euro familjeve të viktimave. “Mali i Zi nuk ju ka harruar dhe nuk do t’ju ​​harrojë kurrë”, tha pos tjerash Beçiq.

Krapoviq - Mali i Zi ka përgjegjësinë dhe detyrën për të kultivuar kulturën e kujtesës

Mali i Zi ka përgjegjësinë dhe detyrën për të kultivuar kulturën e kujtesës, por edhe për të punuar pa u lodhur për të parandaluar çdo tragjedi në të ardhmen, tha Ministri i Mbrojtjes Dragan Krapoviq. Me rastin e përvjetorit të bombardimit të Murinës nga NATO-ja në vitin 1999, në të cilin humbën jetën gjashtë civilë të pafajshëm, përfshirë tre fëmijë. Krapoviq theksoi rëndësinë e ruajtjes së kujtesës dhe të vërtetës rreth kësaj ngjarjeje tragjike. “Sot, kur kujtojmë tragjedinë që goditi Murinën dhe të gjithë Malin e Zi, shpreh ngushëllimet e mia më të thella familjeve të viktimave”, tha Krapoviq. Siç raportohet nga Ministria e Mbrojtjes, ai tha se ngjarja la plagë të thella në shoqërinë malazeze. "Humbja e jetës së fëmijëve dhe civilëve, duhet të ruhën nga harresa, tha pos tjerash Krapoviq.

Presidenti i Malit të Zi, Jakov Millatoviq, mori pjesë në akademinë e parë sindikale të 1 Majit

Presidenti i Malit të Zi, Jakov Millatoviq, mori pjesë në akademinë e parë sindikale të 1 Majit, e cila u organizua nga Bashkimi i Sindikatave të Lira të Malit të Zi me rastin e 1 Majit - Ditës Ndërkombëtare të Punës. Në fjalimin e tij drejtuar të pranishmëve, Presidenti Millatoviq theksoi kënaqësinë që po mbante një fjalim me rastin e 1 Majit - një festë që e festojmë si shprehje respekti për punën dhe punëtorët, themeli i çdo shoqërie që përpiqet për përparim, drejtësi dhe dinjitet. "Jam i sigurt se pa Bashkimin e Sindikatave të Lira dhe punën e përkushtuar në dy dekadat e mëparshme, të drejtat e punëtorëve në Mal të Zi nuk do të ishin në nivelin që janë sot. Në emër të qytetarëve të Malit të Zi dhe në emër të punëtorëve, ju faleminderoj për këtë luftë, tha Millatoviq. Sot u bëjmë homazh brezave që luftuan për të drejtat e punëtorëve - për punë dinjitoze, siguri dhe kushte të drejta. Lufta e tyre na obligon dhe na kujton se progresi nuk jepet vetvetiu, por është rezultat i përpjekjeve të përbashkëta, solidaritetit, luftës dhe këmbënguljes", tha presidenti. Millatoviq.

Ndermarrja "Komunalja Kotor" njoftoi se zjarri i mëngjesit ndodhi në punishten e mekanikëve për riparimin e automjeteve në Kavç

Ndermarrja "Komunalja Kotor" njoftoi se zjarri i mëngjesit ndodhi në punishten e mekanikëve për riparimin e automjeteve në Kavç, duke shtuar se shkaku i zjarrit, si dhe sasia e dëmit material, ende nuk janë përcaktuar. Ata tregojnë se zjarri nuk ka ndodhur në stacionin e transbordimit "Lovanja", por në punishten e mekanikut për riparimin e automjeteve të ndčrmarrjes e cila ndodhet në pronë, pra në zonën në pronësi të D.O.O. "Komunalj e Kotorrit". "Vërejmë se stacioni i transferimit 'Lovanja', i cili gjithashtu menaxhohet nga ndermarrja jonë, është rreth një kilometër larg punishtes që u prek nga zjarri. Për këtë arsye, ne i mohojmë kategorikisht pretendimet e disa mediave se ka pasur djegie gomash dhe mbeturinash, me qëllim hedhjen poshtë të gjitha aludimeve të mundshme për pasojat ekologjikisht të dëmshme të zjarrit", deklarojnë ata në përgjigjen e tyre.

M. Dukaj - Situata në vetëqeverisjet lokale kërkon reforma themelore

Situata në vetëqeverisjet lokale kërkon reforma themelore, zgjidhje të reja dhe konkrete. Ministria e Administratës Publike, në këtë drejtim, zbatoi aktivitete kyçe dhe këto ditë, së bashku me Ekipin e Ekspertëve, ia ka prezantua publikut Konceptin e Ligjit për Zgjedhjet Lokale. Ky është një proces në të cilin të gjitha institucionet kanë vendin dhe përgjegjësinë e tyre. Falënderoj Presidentin JakovMillatoviq për mbështetjen e tij për Konceptin e Ligjit për Zgjedhjet Vendore. Gjithmonë e kam përsëritur se askush nuk mund ta kryejë këtë punë i vetëm, madje as sektori civil dhe komuniteti akademik kanë të njëjtin pikëpamje mbi Konceptin. Në këtë kuptim, mbështetja e Presidentit të Shtetit dhe vlerësimi i tij është një rrugë përpara inkurajuese, theksoi Ministri i Administratës Publike, Marash Dukaj, për rrjetin X.

QTD - Në Mal të Zi, pavarësisht përparimit formal në rrugën drejt Bashkimit Evropian (BE), nuk ka ndonjë përparim mbresëlënës

Në Mal të Zi, pavarësisht përparimit formal në rrugën drejt Bashkimit Evropian (BE), nuk ka ndonjë përparim mbresëlënës, u vlerësua në një botim në të cilin Qendra për Tranzicion Demokratik (QTD) analizon aktivitetet politike dhe reformuese të Qeverisë dhe shumicës qeverisëse në gjashtë muajt e mëparshëm. QTD në publikimin e vetë "Stabiliteti" ose reformat: Status quo si "politikë evropiane", analizon aktivitetet politike dhe reformuese të Qeverisë dhe shumicës qeverisëse, të cilat u zhvilluan nga nëntori i kaluar deri në fund të prillit të këtij viti, në fund të një viti e gjysmë të mandatit të Qeverisë së 44-të. Drejtori Ekzekutiv i QTD-së, Dragan Koprivica, deklaroi se disa nga përfundimet e publikimit janë se reforma zgjedhore pas më shumë se një viti nuk po jep rezultate serioze dhe se transparenca e vendimmarrjes së Qeverisë po zvogëlohet.

Zyrtarët e policisë së Danilovgradit kanë arrestua dy persona të dyshuar për posedim dhe mbajtje të paligjshme të armëve

Zyrtarët e policisë së Danilovgradit kanë arrestua dy persona të dyshuar për posedim dhe mbajtje të paligjshme të armëve dhe materialeve shpërthyese dhe kanë sekuestrua edhe armë zjarri, eksplozivë dhe municione në posedim të paligjshëm, njoftoi Administrata e Policisë. Thuhet se oficerët e Departamentit të Sigurisë të Danilovgradit, duke vepruar sipas urdhrit të gjykatës, kontrolluan apartamentin dhe ambientet e tjera të përdorura nga N.SH. (28) dhe gjetën e sekuestruan një pistoletë të tipit CZ, shtatë copë municione dhe një kornizë pistolete. Siç shtohet, u konfiskuan gjithashtu tetë copë kapsula detonatori elektrik me përçues elektrikë, 11 copë kapsula detonatori dhe pako me substanca të ngjashme me eksploziv. Oficerët e policisë gjetën gjithashtu, siç u tha, një qese PVC që përmbante një tufë shkopinjsh për aktivizimin e eksplozivëve, një minë mortaje dhe një predhë artilerie të kalibrit Haub 105 milimetër, si dhe një tufë me një përçues elektrik.

Lista Serbe jashtë loje: Si do të mbrohen interesat e serbëve në Kosovë?

Në një kohë kur çdo votë deputeti ka rëndësi vendimtare, nëntë votat e Listës Serbe në Kosovë nuk po merren parasysh nga askush. Deputetët e zgjedhur në zgjedhjet parlamentare të 9 shkurtit nuk arritën ta konstituojnë Kuvendin e Kosovës as në tentimin e tetë, më 29 prill, për shkak të mungesës së votave. Ndërsa viteve të kaluara Lista Serbe ishte pjesë e rregullt e koalicioneve qeverisëse, këtë herë askush nuk i afrohet, dhe askush nuk pret bashkëpunim me të – as Lëvizja Vetëvendosje e kryeministrit në detyrë Albin Kurti, e as partitë që deri vonë ishin në opozitë. Për këtë situatë është përgjegjës sulmi i armatosur dhe vrasja e një polici të Kosovës në Banjskë, në shtator të vitit 2023, thotë për Radion Evropa e Lirë, Miodrag Miliqeviq nga organizata joqeveritare Aktiv, me seli në Mitrovicën e Veriut. Ai shton se, pas këtij sulmi në veri të Kosovës, të kryer nga një grup serbësh dhe për të cilin përgjegjësinë e mori ish-nënkryetari i Listës Serbe, Millan Radoiçiq, kjo listë ka humbur “potencialin për koalicion”. “Kjo paraqet një problem shtesë për komunitetin serb, kur bëhet fjalë për përfaqësimin e interesave të tyre, që zakonisht ndodh përmes Listës Serbe”, thekson Miliqeviq. Lista Serbe nuk ka reaguar publikisht për sulmin në Banjskë, dhe nuk është distancuar nga Radoiçiqi, të cilin më parë e kishte mbështetur hapur. Ai aktualisht është në arrati, dhe besohet se gjendet në Serbi. Nga ana tjetër, politologu nga Beogradi, Ognjen Gogiq, thotë se si partitë shqiptare, ashtu edhe Lista Serbe, pajtohen që bashkëpunimi mes tyre nuk është i mundur. Ai shton se Lista Serbe as nuk e sheh veten si përfaqësuese të serbëve në institucionet e Kosovës.

Marta Kos - Anëtarësimi juaj në Bashkimin Evropian mund të bëhet i mundur përmes bashkëpunimit me ne

Anëtarësimi juaj në Bashkimin Evropian mund të bëhet i mundur përmes bashkëpunimit me ne për reformat e domosdoshme, u shpreh në Beograd komisionarja evropiane për Zgjerim, Marta Kos, pas takimit me kryeministrin e Serbisë, Gjuro Macut. Kos theksoi reformën në drejtësi, luftën kundër korrupsionit, lirinë e medias dhe përmirësimin e procesit zgjedhor si probleme në të cilat Serbia duhet të punojë. “Bashkëpunoni me ne për krijimin e një gjyqësori të pavarur që mund të luftojë në mënyrë efektive korrupsionin, për zbatimin e ligjit dhe krijimin e institucioneve që do të mundësojnë media të lira, ku të gjitha mendimet të përfaqësohen”, theksoi komisionerja evropiane. “Bashkëpunoni me ne për të vendosur një kornizë zgjedhore që do të sigurojë që vullneti i popullit serb të dëgjohet dhe që vendimet të merren në bazë të tij”, shtoi ajo. Komisionerja evropiane vlerësoi se pa këto ndryshime, Serbia “nuk mund të përparojë”. “Ajo që po kërkojmë është në fakt shumë afër asaj që po kërkojnë njerëzit që protestojnë në rrugë”, tha Kos, duke iu referuar protestave masive disamujore në Serbi.

Parlamenti hungarez ka votua sot për tërheqjen e vendit nga Gjykata Ndërkombëtare Penale

Parlamenti hungarez ka votua sot për tërheqjen e vendit nga Gjykata Ndërkombëtare Penale, njoftoi Ministri i Punëve të Jashtme Peter Szijártó. “Me këtë vendim, ne refuzojmë të jemi pjesë e një institucioni të politizuar që ka humbur paanshmërinë dhe besueshmërinë e tij”, shkroi Sijarto në platformën X. Më 3 prill, Hungaria njoftoi qëllimin e saj për t'u tërhequr nga Gjykata Ndërkombëtare Penale, menjëherë pas mbërritjes së kryeministrit izraelit Benjamin Netanyahu në një vizitë katër-ditore në Budapest, njoton Anadolia.

Rubio: SHBA-ja do të tërhiqet nëse s’ka propozime konkrete nga Ukraina dhe Rusia

Sekretari amerikan i Shtetit, Marco Rubio, ka deklarua se tashmë ka ardhur koha për propozime konkrete nga Rusia dhe Ukraina për t’i dhënë fund luftës në Ukrainë. Ai paralajmëroi se nëse nuk ka përparim në negociata, SHBA-ja do të tërhiqet si ndërmjetësuese, deklaroi zëdhënësja e Departamentit të Shtetit, Tammy Bruce. “Tani jemi në një moment kur dy palët duhet të paraqesin propozime konkrete për mënyrën se si të përfundojë ky konflikt”, tha Bruce, duke cituar një deklaratë të Rubios. “Se si do të veprohet më tej është tashmë një vendim që i përket Presidentit. Nëse nuk ka përparim, ne do të tërhiqemi si ndërmjetësues në këtë proces”, shtoi ajo. Kjo deklaratë vjen në të njëjtën ditë kur Kremlini refuzoi propozimin e presidentit ukrainas, Volodymyr Zelensky, për një armëpushim 30-ditor në vend të armëpushimit të propozuar nga homologu i tij rus, Vladimir Putin, për tre ditët kur shënohet Dita e Fitores në Rusi, nga 8 deri më 10 maj.

SHBA-ja dhe Britania kryejnë sulme ndaj rebelëve në Jemen

Ushtria britanike së bashku me Shtetet e Bashkuara kanë kryer sulme ajrore ndaj rebelëve Huthi në Jemen, thanë zyrtarët britanikë mëngjesin e 30 prillit. Kjo është përfshirja e parë e ushtrisë britanike në fushatën e re ajrore amerikane që ka për shënjestër grupin që mbështetet nga Irani. Mbretëria e Bashkuar ka ofruar një shpjegim të detajuar për kryerjen e sulmeve, ndryshe nga SHBA-ja, e cila ka ndarë pak detaje lidhur me mbi 800 sulmet që ka kryer që kur ka nisur fushatën ajrore më 15 mars. Operacioni i quajtur “Rough Rider”, ka shënjestruar rebelët teksa administrata e presidentit amerikan, Donald Trump, po negocion me përkrahësin kryesor të rebelëve jemenas, Iranin, lidhur me programin bërthamor të Teheranit që po përparon me shpejtësi. Ministria e Mbrojtjes e Mbretërisë së Bashkuar tha se ka sulmuar “një grup ndërtesash, që përdoren nga rebelët Huthi për të prodhuar dronë të llojit që përdoren për të sulmuar anijet në Detin e Kuq dhe Gjirin e Adenit, dhe vendndodhja e sulmit ishte rreth 25 kilometra në jug të kryeqytetit, Sana”. Sipas Ministrisë, në sulme morën pjesë aeroplanët e llojit Typhoon FGR4, të cilët lëshuan bomba të llojit Paveway IV. “Sulmet u kryen pasi ra nata, kur mundësia që civilët të ndodheshin në atë zonë ishte më e ulët”, tha Ministria e Mbrojtjes.

Turqia burgos disa zyrtarë të Stambollit

Një gjykatë turke ka burgosur 18 punonjës të Komunës së Stambollit, të cilët po presin gjykimin nën akuza për korrupsion, raportoi agjencia shtetërore e lajmeve, Anadolu. Njoftimi vjen në mes të shtypjes së opozitës në Turqi dhe pas arrestimit të kryetarit të Stambollit, Ekrem Imamoglu. Imamoglu, rivali kryesor politik i presidentit turk, Recep Tayyip Erdogan, u burgos në mars dhe tani po pret gjykimin nën akuza për korrupsion. Ai po ashtu akuzohet se ka ndihmuar një grup terrorist. Imamoglu i ka mohuar të gjitha akuzat dhe arrestimi i tij nxiti protestat më të mëdha në Turqi në dekadën e fundit, trazira dhe akuza për gjyqësor të politizuar. Qeveria turke mohon të gjitha këto pretendime dhe thotë se gjyqësori është i pavarur. Transmetuesi NTV ka raportuar se 34 nga 52 personat që u arrestuan gjatë fundjavës janë liruar me kusht. Mediat turke raportuan të shtunën se autoritetet kishin ndaluar dhjetëra punonjës të Komunës së Stambollit, si pjesë e hetimit gjyqësor të fokusuar rreth Imamoglut, duke zgjeruar shtypjen ndaj opozitës, që nisi vitin e kaluar. Në mesin e zyrtarëve të arrestuarve janë edhe sekretari i Përgjithshëm i Komunës, shefi i stafit të Imamoglut, kryetari dhe nënkryetari i administratës për ujëra në Stamboll dhe kreu i këtij departamenti.

Irani ekzekuton një person të akuzuar për spiunazh

Një iranian, i dënuar për spiunazh dhe bashkëpunim të inteligjencës me Izraelin, është ekzekutuar sot me 30 prill, raportoi media shtetërore iraniane. I përfshirë për dekada të tëra në një luftë në hije me Izraelin, Irani ka dënuar me vdekje shumë persona që i ka akuzuar se kishin pasur lidhje me shërbimin izraelit të inteligjencës, Mossad, dhe për ndihmën e operacioneve të këtij shërbimi në Iran, veçanërisht për vrasje apo akte sabotimi, që Teherani thotë se synonin minimin e programit bërthamor të tij. Sipas agjencisë së lajmeve të gjyqësorit iranian, Mizan, i pandehuri u identifikua si Mohsen Langarneshin. Ai ishte akuzuar për përfshirje në disa raste, përfshirë në vdekjen e një koloneli të Gardës Revolucionare Islamike në vitin 2022. “Gjatë dy vjetëve sa ai ka spiunuar, ai ishte përgjegjës për veprime të rëndësishme, përfshirë mbështetjen e operacioneve terroriste dhe ishte i pranishëm në vendin ku u vra Sayad Khodaei”, tha media shtetërore.

Nesër mot i ngjashëm me të sotmin

Sot nëMal të Zi mban mot kryesisht me diell dhe vranësira kalimtare. Frynë erë e dobët deri e mesme nga drejtimet e ndryshme. Temepraturat në orën 14: Ulqin 27 gradë, Podgoricë, H.Novi e Budvë 26, Tivar, Nikshiq, Cetinë e B.Pole 23, Beranë 22, Shavnik 21, Plevle, Kollashin, Andrievicë e Plluzhinë 20, Rozhajë e Guci 19 dhe në Zhablak 14 gc.
Edhe për nesër metereologët parashohin të mbajë mot kryesisht me diell dhe me vranësira kalimtere. Do të fryjë erë e mesme e vende vende deri e forte nga drejtimi i veriut . Temperatura e mëngjesit do të sillet prej 2 deri në 17 kurse më e larta e ditës prej 14 deri në 28 gc.