Ditari 22.10.2024

Ditarin e përgatiti, Violeta Gjokaj

NËNSHKRUHET MEMORANDUMI I MIRËKUPTIMIT NDËRMJET QEVERISË SË MALIT TË ZI DHE QEVERISË SË SHTETEVE TË BASHKUARA TË AMERIKËS

Në Uashington u nënshkrua Memorandumi i Mirëkuptimit ndërmjet Qeverisë së Malit të Zi dhe Qeverisë së Shteteve të Bashkuara të Amerikës për bashkëpunimin ekonomik

Ky Memorandum është një nga rezultatet e dialogut ekonomik mes dy vendeve dhe paraqet shembull konkret të orientimit properëndimor dhe euroatlantik të Malit të Zi, deklaroi kryesuesi i delegacionit të Qeverisës së Malit të Zi në SHBA, Nik Gjeloshaj.

“Sot nënshkruam këtë Memorandum të rëndësishëm historik ku Mali i Zi dhe SHBA-të forcuan më tej marrëdhëniet ekonomike dypalëshe dhe hapën një kapitull të ri për zhvillimin e përbashkët dhe prosperitetin ekonomik”, njoftoi zëvendëskryeministri për Politikën Ekonomike dhe Ministër i Zhvillimit Ekonomik, Nik Gjeloshaj.

PËRMIRËSIMI I BASHKËPUNIMIT NDËRMJET MALIT TË ZI DHE SHBA-SË NË FUSHËN E SIGURISË KIBERNETIKE

Ministri i Administratës Publike, Marash Dukaj, vuri në dukje punën e jashtëzakonshme të ekipeve të përziera të Malit të Zi dhe SHBA-së, me koordinim të Ambasadës Amerikane në Mal të Zi, fryt i së cilës është nënshkrimi i Memorandumit për Bashkëpunim Ekonomik ndërmjet SHBA-së dhe Malit të Zi në Uashington.

Në Dialogun e Dytë Ekonomik midis Malit të Zi dhe SHBA-së në kuadër të Grupit III të Punës - Teknologjia, Siguria Kibernetike, Inovacioni dhe Dixhitalizimi, i cili koordinohet nga Ministria e Administratës Publike, drejtimet kryesore të veprimit në kuadër të partneritetit do të jenë në forcimin shtesë të kapaciteteve për një hapësirë ​​të përshtatshme kibernetike në Mal të Zi për sa i përket personelit, kapaciteteve teknologjike dhe organizative dhe kornizës institucionale. Mbështetja është reflektuar edhe në ngritjen dhe vendosjen e funksionalitetit të plotë të Agjencisë për Sigurinë Kibernetike.

Dukaj theksoi se sigurimi i një hapësire të sigurt kibernetike në Mal të Zi është parakusht për tërheqjen e investimeve të njohura, dhe në të njëjtën kohë ajo përshkon të gjitha segmentet dhe sektorët e bashkëpunimit përmes dialogut ekonomik, si në fushën e ekonomisë, energjisë dhe transportit, që nga sigurimi i infrastrukturës kritike është një parakusht kyç për realizimin e potencialit të saj ekonomik.

GORCEVIQ NË MARGJINAT E SAMITIT TË EVROPËS

Ministrja e Çështjeve Evropiane Maida Gorçeviq, në margjinat e Samitit të Evropës, të organizuar nga Instituti i Rajoneve të Evropës, i cili u mbajt në Salzburg, pati disa takime dypalëshe me zyrtarë të vendeve anëtare të BE-së.

Ajo i informoi bashkëbiseduesit për progresin e Malit të Zi në procesin e negociatave dhe agjendën e reformës të përfunduar me sukses për Planin e Rritjes për Ballkanin Perëndimor. Kur është fjala për Agjendën, Gorçeviq shpjegoi se Mali i Zi ka përgatitur një sërë reformash, por edhe projektesh që janë përfshirë në këtë dokument dhe që do të financohen me 383 milionë euro të ndara për Malin e Zi deri në vitin 2027.

HUTER: DEPUTETËT NUK DUHET TË JENË EKSPERTË TË KIBERNETIKËS

Këshilli parlamentar për siguri do t'i propozojë Kuvendit projektligjin për sigurinë kibernetike.

Sipas deputetit të Partisë Demokratike Popullore, Vlladislav Bojoviq, nëse ky ligj do të kalojë në Kuvend, atëherë në këtë sektor nevojitet staf profesional.

 Kurse deputeti i Partisë demokratike të Socialistëve, Oskar Huter tha se deputetët nuk duhet të jenë ekspertë të kibernetikës për të diskutuar këtë temë.

Naim Gjokaj, sekretar shtetëror në Ministrinë e Administratës Publike, tha se nëse miratohet ky projektligj, vëmendje e veçantë do t'i kushtohet komunikacionit hekurudhor dhe ajror.

“NJË FAQE E RE ËSHTË KTHYER NË MARRËDHËNIET MES MALIT TË ZI DHE SERBISË”

Kryetari i Parlamentit të Malit të Zi, Andrija Mandiq, ka takuar sot në Beograd kryeministrin e Republikës së Serbisë, Millosh Vuçeviq, kanë bërë të ditur Parlamenti i Malit të Zi.

 Siç thanë ata, Mandiq vlerësoi se ky takim vëllazëror është jashtëzakonisht i rëndësishëm për forcimin e marrëdhënieve mes dy vendeve më të afërta në rajon - Serbisë dhe Malit të Zi dhe se duhet të ndërtojmë një të ardhme më të mirë të përbashkët në bazë të një ekonomie të shëndetshme dhe lidhje më të mirë infrastrukturore.

Mandiq dhe Vuciq diskutuan për projektet kapitale infrastrukturore të autostradës, rindërtimin e hekurudhës Beograd-Tivar dhe valorizimin e Portit të Tivarit.

Siç thuhet në njoftim, Mandiq ka theksuar se Mali i Zi ka siguruar mjete për pjesën e autostradës deri në Andrievica, si dhe për rindërtimin e pjesës së hekurudhës që ndodhet në Mal të Zi.

“MONTENEGRO 2024”, ORGANIZUAR NGA ODA EKONOMIKE, MBAHET SOT NË BUDVA

Konferenca për ekonominë, “Montenegro 2024”, organizuar nga Oda ekonomike për herë të 13-të, po mbahet sot në Budva.

Tema kryesore e Konferencës dyditore është Dekada e Procesit të Berlinit dhe çështjet e rëndësishme për perspektivën ekonomike të rajonit ndërsa do të diskutohet me fokus në arritjet e kaluara si dhe sfidat aktuale dhe të ardhshme.

Kryeministri Millojko Spajiq në hapje të konferencës tha se Procesi i Berlinit do të jetë i suksesshëm kur përshkrimi për të ardhmen të zëvendësohet me atë për veprimet tona brenda Bashkimit Evropian.

Gjatë konferencës dyditore do të mbahen gjashtë panele me tema të ndryshme aktuale dhe relevante.

Ashtu si edicionet e mëparshme të konferencës, edhe sivjet ofron mundësinë e organizimit të takimeve të biznesit në margjinat e kësaj konference.

RINDËRTIMI I HEKURUDHËS JANË DISA NGA PROJEKTET PRIORITARE PËR QEVERINË

Ndërtimi i aksit të dytë të autostradës, nga Matesheva në Andrijevicë, si dhe rehabilitimi dhe rindërtimi i hekurudhës janë disa nga projektet prioritare për Qeverinë, tha ministrja e Transportit, Maja Vukiqeviq, në mbledhjen e ministrat e transportit në Slloveni.

Duke marrë pjesë në takimin ministror për përmirësimin e lidhjes multimodale për gjelbërimin e transportit në vendet e rajonit të Danubit, ajo tha se prioritetet në BE dhe shumë axhenda të transportit kombëtar përfshijnë mirëmbajtjen e rrugëve, sigurinë rrugore, integrimin e trafikut hekurudhor të mallrave dhe përmirësimin e lidhjes ajrore.

  “Është e qartë se të gjitha mënyrat e transportit ndajnë çështje të përbashkëta që lidhen me efikasitetin e energjisë dhe emetimin e ndotësve konvencionalë, gjë që kërkon përgjigje gjithëpërfshirëse në nivel lokal, rajonal dhe global”, tha Vukiqeviq.

FILLON FUSHATA KOMBËTARE PËR EDUKIMIN MEDIATIK

Ministria e Kulturës dhe Medias (MKM) do të nisë një fushatë kombëtare për edukimin mediatik, me qëllim të sensibilizimit dhe forcimit të rezistencës së qytetarëve ndaj dezinformatave, njoftoi Qeveria.

Bëhet e ditur se MKM-ja po e lanson fushatën INFO në bashkëpunim me Ministrinë e Arsimit, Shkencës dhe Inovacionit, Shërbimin Qeveritar për Marrëdhënie me Publikun dhe Ambasadën Britanike në Podgoricë.

Fushata do të organizohet si pjesë e Javës Globale të Edukimit Mediatike, një nismë e Kombeve të Bashkuara që promovon përdorimin e përgjegjshëm të përmbajtjes mediatike në epokën moderne dixhitale.

“Progresi teknologjik ka transformuar mënyrën se si ne marrim dhe shkëmbejmë informacione, por me rritjen e disponueshmërisë së informacionit po rritet edhe rreziku i dezinformatave, lajmeve të rreme dhe manipulimit”, thuhet në Qeveri.

Siç thanë ata, qëllimi i fushatës INFO është t'u ofrojë qytetarëve mjete praktike për shqyrtimin kritik të përmbajtjes që konsumojnë.

Ministrja e Kulturës dhe Mediave, Tamara Vujoviq, theksoi rëndësinë e burimeve adekuate për identifikimin e dezinformatave.

ËSHTË E NEVOJSHME TË SHQYRTOHET ASHPËRSIMI I SANKSIONEVE

Kryeministri Millojko Spajiq ka biseduar sot me prindërit e Daris Mujiq, nxënësit të plagosur të gjimnazit të Tivarit, i cili u sulmua më 7 tetor në oborrin e shkollës.

Kryeministri, Ministri i drejtësisë dhe Ministrja e arsimit, të cilët morën pjesë në takim, u dakorduan se është e nevojshme të shqyrtohet ashpërsimi i sanksioneve, edhe pse sipas zgjidhjes ekzistuese ligjore kishte bazë për caktimin e masës së paraburgimit për sulmuesin A.K.

Nga ana tjetër Gjykata e Apelit e ka konfirmuar sot vendimin e Gjykatës së Lartë në Podgoricë me të cilën është hedhur poshtë propozimi i Prokurorisë së Lartë të Shtetit në Podgoricë për caktimin e paraburgimit për të miturit A.K.

HAKER: PËR TË HYRË SERBIA NË BE, DUHET TË NJOHË KOSOVËN

Deputeti gjerman dhe raportuesi për Kosovën në Bundestag, Tomas Haker, tha se për të hyrë Serbia në BE, duhet të njohë Kosovën.

 Ai e cilëson procesin e Berlinit një sukses të madh, teksa falënderon Kosovën që zhbllokoi marrëveshjen e CEFTA-s.

Sa i përket dialogut, Haker vlerëson se duhet një qasje e re dhe se Lajçak nuk ka qenë i drejtë. Sipas tij, masat ndaj Kosovës janë të padrejta dhe duhet të hiqen menjëherë.

Ai në një intervistë për A2 Si- En- En i ka kritikuar veprimet jo demokratike e të dëmshme të Serbisë.

RIHO TERRAS, PRITET TË EMËROHET RAPORTUESI I RI I PE-SË PËR KOSOVËN

Eurodeputeti nga Estonia, Riho Terras, pritet të emërohet raportues për Kosovën në Parlamentin Evropian.

Bëhet fjalë për funksion që nënkupton mbulimin e të gjitha temave që kanë të bëjnë me marrëdhëniet ndërmjet Bashkimit Evropian dhe Kosovës.

Gjithashtu roli i raportuesit është që të përgatitë raporte vjetore për situatën në Kosovë në emër të Parlamentit Evropian të cilat më pas marrin formën e Rezolutës.

Në mandatin e kaluar të Parlamentit, këtë detyrë e ka kryer Viola von Cramon.

Riho Terras ka qenë shef i Forcave Mbrojtëse të Estonisë.

 Në cilësinë e eurodeputetit ka qenë gjithmonë i zëshëm kundër agresionit rus në Ukrainë.

Ka iniciuar në Parlamentin Evropian pezullimin e të drejtës së votës për Hungarinë për shkak të veprimeve të kryeministrit Viktor Orban.

Riho Terras është i treti estonez në strukturat e reja të BE-së, që do merret drejtpërsëdrejti me çështjen e Kosovës.

HOVENIER: VIZITA E O’BRIEN PËR TA AVANCUAR KOSOVËN NË RRUGËN EUROATLANTIKE

Ambasadori i ShBA-së në Kosovës, Jeffrey Hovenier, ka shkruar për vizitën e ndihmëssekretarit amerikan të Shtetit për Europën dhe Euroazinë, James O’Brien, dje në Prishtinë, i cili u takua me krerët e shtetit.

Hovenier sot shkroi se kanë pasur biseda të rëndësishme me liderët kosovarë për partneritetin me SHBA-në, si dhe për avancimin e rrugës euroatlantike të Kosovës.

“Faleminderit Ndihmës sekretarit O’Brien për vizitën e tij në Kosovë.

Patëm biseda të rëndësishme me liderët e Qeverisë për partneritetin me ne për të rritur paqen dhe prosperitetin, për të siguruar që të gjithë qytetarët e Kosovës të jetojnë në kushte të dinjitetshme dhe të sigurta dhe për ta avancuar Kosovën në rrugën euroatlantike si një shtet modern dhe europian”, ka thënë Hovenier.

BRITANIA DO T’I JAPË UKRAINËS 2.4 MILIARDË DOLLARË HUA PËR BLERJE TË ARMËVE

Britania do t’i japë Ukrainës 2.4 miliardë dollarë hua për blerjen e më shumë sisteme armësh, njoftoi sekretari i Mbrojtjes, John Healey.

Njoftimi vjen në kohën kur forcat e Kievit po përballen me luftime të ashpra me forcat ruse në lindje, ndërkaq përditë qytetet dhe infrastruktura ukrainase është cak i sulmeve ajrore.

Tre civilë janë vrarë në orët e para të mëngjesit të sotëm gjatë sulmeve ruse me dronë në rajonin verilindor ukrainas të Sumit, që gjendet në kufi me Rusinë, njoftoi administrata rajonale përmes një njoftimin në Telegram.

Zyrtarët thanë po ashtu se sistemet ukrainase të mbrojtjes ajrore kanë rrëzuar më shumë se 25 dronë mbi rajonin Sumi.

Ndërkaq, Ministria ruse e Mbrojtjes, tha se sistemet e mbrojtjes ajrore kanë rrëzuar 18 dronë gjatë natës.

PËRFAQËSUESI I KORESË SË VERIUT NË OKB MOHON DËRGIMIN E TRUPAVE NË RUSI

Koreja e Veriut nuk ka dërguar ushtarë në Rusi për të ndihmuar Moskën në luftën kundër Ukrainës.

Kështu tha një nga përfaqësuesit e Phenianit në Kombet e Bashkuara, duke i cilësuar pretendimet e Seulit si “thashetheme të pabaza”.

 Agjencia e spiunazhit e Koresë së Jugut deklaroi javën e kaluar se Veriu ka kryer një dislokim të madh të trupave për të ndihmuar Rusinë, duke pretenduar se Pheniani veçse ka dërguar 1.500 pjesëtarë të forcave speciale për trajnime në Lindjen e Largët të Rusisë, të cilët më pas do të nisen për në vijat e frontit në luftën në Ukrainë.

HEZBOLLAHU GJUAN RAKETA NË IZRAELIN QENDROR

Hezbollahu ka gjuajtur sot një breshëri raketash në Izraelin qendror më , duke nxitur lëshimin e sirenave paralajmëruese për sulme ajrore në shumicën e pjesëve të banuara në Izrael.

Megjithatë, sulmet e Hezbollahut – grupit militant dhe partisë politike që kontrollon shumicën e Libanit jugor – duket se nuk kanë shkaktuar dëme apo viktima.

Ushtria izraelite tha se pesë predha u lëshuan nga Libani drejt Izraelit, duke shtuar se shumica e tyre u penguan nga sistemet e mbrojtjes ajrore të Izraelit, ndërkaq një raketë ra në një hapësirë të pabanuar.

 Izraeli tha se në të njëjtën kohë, rreth 15 predha u lëshuan nga Libani drejt veriut të Izraelit.

BLINKEN NË IZRAEL, TEKSA SHBA-të SYNOJNË TË RINISIN BISEDIMET PËR ARMËPUSHIM NË GAZË

Sekretari amerikan i Shtetit, Antony Blinken, sot po qëndron në Izrael në vizitën e tij të 11-të në rajon që kur ka nisur lufta mes Izraelit dhe Hamasit, grupit palestinez të shpallur organizatë terroriste nga Shtetet e Bashkuara dhe Bashkimi Evropian.

Ai pritet të takohet me zyrtarët kryesorë, teksa SHBA-ja po synon të rinisë përpjekjet për armëpushim. SHBA, Egjipti dhe Katari për muaj të tërë kanë ndërmjetësuar bisedimet mes Izraelit dhe Hamasit, duke tentuar të arrihet një marrëveshje në mënyrë që Hamasi të lirojë pengjet në këmbim të përfundimit të luftës dhe të arrihet një armëpushim i qëndrueshëm në këmbim të lirimit të të burgosurve palestinezë.

 Si Izraeli, ashtu edhe Hamasi, akuzuan njëri-tjetrin për vendosje të kushteve të papranueshme gjatë verës dhe bisedimet u ndërprenë në muajin gusht.

KANDIDATËT PRESIDENCIALË NË SHBA ASHPËRSOJNË KRITIKAT NË FUSHATAT NË SHTETET KYÇE

Dy javë nga zgjedhjet presidenciale në SHBA, kandidatja demokrate, Kamala Harris zhvilloi takime në shtetet kyçe e cila kritikon ashpër Donald Trump.

Ajo sulmoi rivalin republikan edhe për politikën e jashtme.“Fati i demokracisë amerikane është në rrezik në zgjedhjet presidenciale të nëntorit”, tha ajo.

 Vetëm dy javë deri në ditën e zgjedhjeve, Donald Trump ashpërsoi sulmet kundër rivales demokrate.

“Kamala Harris nuk ka dhembshurinë, zgjuarsinë apo forcën për të qenë presidente e Shteteve të Bashkuara”, tha republikani në një tubim në Karolinën e Veriut.

NESËR MOT KRYESISHT I KTHJELLËT

Sot në Mal të Zi mban mot kryesisht me diell. Frynë erë e dobët deri mesatare nga drejtimet e ndryshme.

  Temperaturat e shënuara në orën  14: Ulqin 27, Budvë 26, Rozhajë 25, Tivar, H. Novi e Cetinë 24, Podgoricë e Nikshiq 23, Kollashin 20, Plevle e Petnjicë 19, Zhablak, Beranë, Andrievicë e Shavnik 18, Plluzhinë 16, dhe në Bjello Pole 15 g.

Edhe për nesër parashihet të mbajë mot kryesisht i kthjellët deri me vranësira të pakta të ndryshueshme. Do të fryjë erë e dobët deri mesatare nga drejtimet e ndryshme, në mbrëmje verilindore. Temperatura e mëngjesit do të jetë prej 0 deri në 14 kurse më e larta e ditës prej 17 deri në 26 gradë celsius.