Ditari 29.04.2025

Ditarin e përgatiti, Violeta Gjokaj

MILLATOVIQ KTHEU LIGJIN PËR MARRËVESHJEN PËR TURIZMIN DHE PASURITË E PALUAJTSHME ME EMIRATET E BASHKUARA ARABE PËR RISHQYRTIM

Presidenti i Malit të Zi, Jakov Millatoviq e ktheu në Kuvend për rishqyrtim Ligjin për Konfirmimin e Marrëveshjes për Bashkëpunim në Fushën e Turizmit dhe Zhvillimit të Pasurive të Paluajtshme me Emiratet e Bashkuara Arabe, ndërsa Ligjin për ratifikimin e Marrëveshjes për Bashkëpunim Ekonomik me Emiratet e nënshkroi.

Vërejtjet kryesore, siç njoftohet kanë të bëjnë me: - shmangien nga dispozitat kushtetuese lidhur me sigurimin e konkurrencës së lirë dhe pozicionit të barabartë në treg; - pezullimin e zbatimit të legjislacionit malazez në lidhje me prokurimin publik, tenderët dhe pronën shtetërore; - përcaktimin e interesit publik nga Marrëveshja, paraprakisht, gjë që sjell pasiguri ligjore për të gjithë qytetarët e Malit të Zi, prona e të cilëve mund të jetë objekt i interesit të investitorëve; - si dhe dështimin për të përcaktuar projektet e ardhshme kur bëhet fjalë për marrëdhënien midis zhvillimit të turizmit dhe zhvillimit të pasurive të paluajtshme.

NË NJË BISEDË ME AL NAHJAN, MILLATOVIQ SHPJEGOI PSE E KTHEU MARRËVESHJEN NË KUVEND

Presidenti i Malit të Zi, Jakov Millatoviq, zhvilloi sot një bisedë telefonike me Ministrin e Punëve të Jashtme të Emirateve të Bashkuara Arabe, Sheikh Abdullah bin Zayed Al Nahyan, të cilin e informoi për arsyet e kthimit në Parlamentin e Malit të Zi të Marrëveshjes për Bashkëpunim në Fushën e Turizmit dhe Zhvillimit të Pasurive të Paluajtshme midis Qeverisë së Malit të Zi dhe Qeverisë së Emirateve të Bashkuara Arabe.

Në një bisedë telefonike të iniciuar nga pala e Emirateve të Bashkuara Arabe, Millatoviq, siç thuhet në llogarinë X të Kabinetit të Presidentit të Shtetit, theksoi se Mali i Zi mbetet i përkushtuar për përmirësimin dhe zhvillimin e mëtejshëm të marrëdhënieve me Emiratet e Bashkuara Arabe, si një partner i rëndësishëm dhe i besueshëm i vendit tonë.

Kjo, siç u tha, konfirmohet nga fakti që Millatoviq nënshkroi Ligjin për Konfirmimin e Marrëveshjes për Bashkëpunim Ekonomik midis Malit të Zi dhe Emirateve të Bashkuara Arabe, i cili inkurajon bashkëpunimin e ardhshëm midis dy vendeve në interes të ndërsjellë.

“Gjithashtu, Presidenti Millatoviq e informoi bashkëbiseduesin për arsyet e kthimit në Parlamentin e Malit të Zi të Marrëveshjes për bashkëpunim në fushën e turizmit dhe zhvillimit të pasurive të paluajtshme midis Qeverisë së Malit të Zi dhe Qeverisë së Emirateve të Bashkuara Arabe.

KRYETARËT E KOMUNAVE NË TË GJITHË MALIN E ZI DUAN INVESTIMET E ALABARIT

Pasi u konfirmua se investitori i njohur Mohamed Alabar do ta ridrejtojë interesin e tij në veri të vendit, komunat e kësaj pjese të Malit të Zi reaguan shpejt, duke shprehur gatishmërinë e tyre për të tërhequr investime përmes projekteve konkrete që do të sillnin zhvillim, vende të reja pune dhe do të stimulonin rritjen ekonomike.

Kryetarët e komunave veriore theksojnë se janë të hapur për ardhjen e Alabarit, por edhe të të gjithë investitorëve të tjerë seriozë dhe të përshtatshëm, me kusht që të gjitha projektet të zbatohen në mënyrë plotësisht transparente, në përputhje me ligjet dhe në interes të komuniteteve lokale dhe qytetarëve.

Përmes projekteve të ofruara në fushën e turizmit, energjisë dhe infrastrukturës, qeveritë lokale duan të shfrytëzojnë mundësinë për ta bërë veriun e Malit të Zi një destinacion të ri tërheqës për investime. Disa komuna, si Berani dhe Gucia, kanë përgatitur tashmë propozime konkrete për projekte dhe ia kanë dorëzuar ekipit të Alabarit, duke shpresuar se ky do të jetë një hap i rëndësishëm drejt zhvillimit të qëndrueshëm të këtij rajoni.

Ndërsa investimet e planifikuara më parë ishin të përqendruara në Ulqin, tani është e qartë se Alabar do t'i ridrejtojë planet e  tij të investimeve në veri.

NIMANBEGU: ME ZBATIMIN E MARRËVESHJES ME EMIRATET E BASHKUARA, MALI I ZI HEQË DORË NGA BASHKIMI EVROPIAN

Zbatimi i Marrëveshjes me Emiratet e Bashkuara Arabe do të thoshte që Mali i Zi heqë dorë nga Bashkimi Evropian, deklaroi Kryetari i Komunës së Ulqinit, Genci Nimanbeg. Duke folur për Programin e Mëngjesit, ai theksoi se me këtë marrëveshje interesat e investitorëve do të viheshin përpara interesave të komunitetit lokal, gjë që, siç theksoi, është e papranueshme.

Nga ana tjetër ministër pa portofol Millutin Butoroviq, thotë se Marrëveshja me Emiratet e Bashkuara Arabe është një nga më të mirat për Malin e Zi. Ai pret që marrëveshja do t’i mundësojë Malit të Zi të bëhet një destinacion më i mirë dhe më luksoz.

MANS PERSHENDETI VENDIMIN E PRESIDENTIT

OJQ-ja MANS përshëndeti vendimin e Presidentit të Malit të Zi për të kthyer Ligjin për Konfirmimin e Marrëveshjes me Emiratet në Parlamentin e Malit të Zi për rivendim.

Ky vendim, siç theksohet në MANS, u jep deputetëve një shans të ri për të marrë një vendim në interes të publikut.

“Para votimit të radhës, i ftojmë deputetët të lexojnë me kujdes dokumentin mbi të cilin po vendosin, të kërkojnë interpretime ligjore nga ekspertë, të kërkojnë mendime nga ekspertë të fushave të ndryshme, të dëgjojnë nevojat e qytetarëve që jetojnë në zonat ku planifikohet ndërtimi, por edhe të atyre që kërkojnë me dëshpërim çdo investim, të dëgjojnë pikëpamjet e BE-së dhe ekspertëve ndërkombëtarë”, deklarojnë ata në një postim në X.

"Faleminderit presidentit që përdori autoritetin e tij ligjor dhe që i lejoi ata të mendojnë edhe një herë dhe të marrin një vendim në favor të qytetarëve, jo në favor të interesave personale të askujt", theksoi MANS.

AKSIONI PËR TË DREJTAT E NJERIUT SHPREHU SHQETËSIMIN PËR  SHKELJEN E KUSHTETUTËS GJATË MIRATIMIT TË LIGJIT PËR RATIFIKIMIN E MARRËVESHJES PËR BASHKËPUNIM

Organizata joqeveritare Aksioni për të Drejtat e Njeriut shprehu shqetësimin e saj për, siç u shpreh, shkeljen e Kushtetutës gjatë miratimit të Ligjit për ratifikimin e Marrëveshjes për Bashkëpunim midis Qeverive të Malit të Zi dhe Emirateve të Bashkuara Arabe. Kjo marrëveshje mundëson zbatimin e projekteve në fushën e "zhvillimit të turizmit dhe pasurive të patundshme" në territorin e Malit të Zi. Sipas kësaj organizate ligji në fjalë është miratuar nga Parlamenti i Malit të Zi me shumicë të thjeshtë, prej 46 votash, megjithëse, sipas tyre, neni 91 paragrafi 3 i Kushtetutës së Malit të Zi përcakton që ligjet që rregullojnë të drejtat pronësore të të huajve duhet të miratohen me shumicën e dy të tretave të të gjithë deputetëve në Parlamentin e Malit të Zi, që do të thotë se për miratimin e tyre nevojiten të paktën 54 vota.

SATTLER: REFORMA E PROCESIT ZGJEDHOR NË MAL TË ZI MBETET NJË NGA PRIORITETET KRYESORE

Reforma e procesit zgjedhor në Mal të Zi mbetet një nga prioritetet kryesore, tha ambasadori i Bashkimit Evropian (BE) në Podgoricë, Johan Sattler, duke theksuar se Këshilli Parlamentar për Reformën Gjithëpërfshirëse Zgjedhore duhet të rikthehet në punë.

Në konferencën “Reforma e zgjedhjeve lokale: Më shumë zgjedhje për qytetarët, më shumë përgjegjësi për qeverinë”, e cila u organizua nga Ministria e Administratës Publike (MJU) dhe Qendra për Tranzicion Demokratik (CDT), Satler tha se kapitujt 23 dhe 24, lufta kundër korrupsionit, sundimi i ligjit, gjyqësori, janë po aq të rëndësishëm sa reforma zgjedhore.

Ai vlerësoi se nisma në lidhje me ligjin për zgjedhjet lokale vjen në kohën e duhur, sepse nuk ka zgjedhje në gjashtë deri në shtatë muajt e ardhshëm.

Satler theksoi se roli udhëheqës dhe angazhimi i Parlamentit të Malit të Zi është i nevojshëm.

Ai tha se Komisioni për Reformën Zgjedhore duhet të rifillojë punën.

"Planet janë paraqitur dhe ekzistojnë, unë jam në komunikim me OSBE-në dhe ODIHR-in dhe ata duhet të bëjnë disa sugjerime në lidhje me draftet dhe planet e propozuara", tha Sattler.

Ministri i Administratës Publike Marash Dukaj tha se Mali i Zi ka nevojë për reforma thelbësore, jo vetëm deklarative, në shumë sfera.

Drejtoresha e programit të Qendrës për Tranzicion Demokratik, Milica Kovaceviq, tha se reforma e ligjeve zgjedhore është bllokuar në mosveprimin e Këshillit për Reformë Gjithëpërfshirëse Zgjedhore.

DUKAJ: MALI I ZI ENDE NUK KA LIGJE PËR QEVERINË DHE PARLAMENTIN

Edhe pse është paralajmëruar prej pesë vitesh, Mali i Zi ende nuk ka ligje për Qeverinë dhe Parlamentin. Ministri i Administratës Publike Marash Dukaj përsëriti për Radion tonë se Ligji për Qeverinë iu dërgua Komisionit Evropian dhe atij të Venedikut për mendim. Nuk kemi mundur të zbulojmë se deri ku ka arritur Ligji për Kuvendin. Politologu Millosh Peroviq beson se as autoritetet aktuale dhe as ato të mëparshmet nuk po nxitojnë t’i miratojnë këto ligje, sepse, siç tha ai, boshllëqet ligjore janë qartësisht të përshtatshme për interesat e tyre partiake dhe shpesh personale.

Parlamenti i Malit të Zi njoftoi vitin e kaluar se zgjidhja që do të rregullonte mënyrën e punës, konstituimin dhe organizimin e parlamentit, si dhe të drejtat dhe detyrat e deputetëve, është ende duke u punuar. Ne nuk arritëm të gjenim një bashkëbisedues në dhomën më të lartë legjislative sot, dhe Dukaj nuk ka informacion se deri ku ka arritur ligji për Kuvendin.

Megjithatë, ai vëren se është shumë e rëndësishme që këto dy ligje të miratohen paralelisht.

KA FILLUAR ARRESTIMI I TË DYSHUARVE NË OPERACIONIN E PSSH

Anëtarët e Departamentit Special të Policisë kanë filluar arrestimin e të dyshuarve në aksionin e Prokurorisë Speciale të Shtetit, të drejtuar kundër tregtisë së paligjshme të cigareve, i cili po kryhet sot në disa komuna malazeze.

Prokuroria Speciale e Shtetit njoftoi se është duke u zhvilluar arrestimi i disa personave për shkak të ekzistencës së bazave të dyshimit se ata kanë kryer veprat penale të krijimit të një organizate kriminale, pastrimit të parave dhe kontrabandës.

“Sipas urdhrit të Prokurorisë Speciale të Shtetit, Departamenti Special i Policisë po kryen veprime urgjente provuese kundër disa personave në Podgoricë, Tivar, Ulqin dhe Rozhajë, për shkak të ekzistencës së bazave të dyshimit se ata kanë kryer veprat penale të krijimit të një organizate kriminale, pastrimit të parave dhe kontrabandës, dhe po ndërmerr masa dhe veprime për t'i privuar ata nga liria”, thuhet në deklaratë.

MEDENICA: DO TË RRJEDHË SHUMË UJË DERISA GJYKATA E LARTË TË JETË AJO QË ISHTE

Në Gjykatën e Lartë vazhdoi gjyqi i ish-kryetares së Gjykatës Supreme, Vesna Medenica, e cila theksoi se do të duhet shumë kohë që ajo gjykatë të jetë siç ishte kur ajo nuk ishte në krye të saj.

"Shumë ujë do të kalojë derisa përbërja e Gjykatës Supreme të Malit të Zi të jetë përsëri e njëjtë me atë që ishte kur unë isha në krye të saj. Nderim për përjashtimet", tha sot ish-kryetarja e gjyqësorit, Vesna Medenica, në gjyqin në Gjykatën e Lartë në Podgoricë.

Ajo akuzohet për ushtrim ndikimi të paligjshëm dhe për anëtare të organizatës kriminale të djalit të saj, Millosh, të cilën, sipas pretendimeve të Prokurorisë Speciale të Shtetit, ai e ka formuar për të kontrabanduar drogë dhe cigare.

Gjykimi vazhdon nesër.

DËSHTIMI I TETË PËR KONSTITUIMIN E KUVENDIT

Për të tetën herë me radhë, deputetët e Kuvendit të Kosovës kanë dështuar të konstituojnë përbërjen e nëntë parlamentare, të dalë nga zgjedhjet e 9 shkurtit. Seanca konstituive do të vazhdojë të enjten, në ora 10:00.

Deputetja e Lëvizjes Vetëvendosje, Albulena Haxhiu, për të gjashtë herë nuk mori mbështetjen për postin e kryeparlamentares.

Kësaj radhe, ajo mori 54 vota për, 44 kundër dhe 3 abstenuan. Në seancat paraprake, për të kishin votuar 57 deputetë - por kësaj radhe disa deputetë të LVV-së munguan.

Seanca konstituive ka nisur më 15 prill dhe në shtatë seancat paraprake deputetët kanë arritur të kalojnë vetëm dy pikat e para të rendit të ditës – miratimin e raportit të Komisionit të përkohshëm për verifikimin e mandateve dhe betimin e deputetëve – por, kanë ngecur në pikën e tretë, atë të zgjedhjes së kreut të ri të organit legjislativ.

Pas përfundimit të seancës, deputeti i Lëvizjes Vetëvendosje, Hekuran Murati, tha se si kompromis kanë ofruar që partia e tij, së bashku me Partinë Demokratike të Kosovës dhe Lidhjen Demokratike të Kosovës të pajtohen që të votohen në paketën kryeparlamentare dhe tri nënkryetarët.

“SHQIPËRIA NË BE BRENDA VITIT 2027”/ KOMISIONERJA PËR ZGJERIMIN, MARTA KOS: DËSHTIM NËSE NUK ANËTARËSOHEN BRENDA MANDATIT TIM

Komisionerja e Bashkimit Evropian për Zgjerim, Marta Kos, shprehet e bindur se gjatë mandatit të saj do të ketë anëtarë të rinj në Bashkimin Evropian.

E kundërta për të do të ishte dështim, ndërsa mendon se anëtarët e rinj do të jenë Shqipëria dhe Mali i Zi. “Mund të përfundojmë me Malin e Zi [si anëtar] deri në fund të vitit 2026, dhe me Shqipërinë [si anëtar] deri në fund të vitit 2027”.

Në një intervistë për Radio Evropa e Lirë, komisionerja e BE për Zgjerim vë në pikëpyetje rrugëtimin e Serbisë në union, teksa shprehet se “Më pëlqen të them që unë jam mbështetësja më e madhe e protestuesve, sepse nëse Serbia është serioze për rrugën drejt BE-së, atëherë do të duhet të japin rezultate”.

Në fokus të intervistës ishte edhe normalizimi i marrëdhënieve të Kosovës me Serbinë, si parakusht që Kosova të mund të marrë statusin e vendit kandidat dhe të nisë procesin e anëtarësimit në BE.

E pyetur nëse Bashkimi Evropian do të heqë masat ndaj Kosovës, Marta Kos u shpreh se “Jemi duke e diskutuar këtë. Nëse shtetet anëtare do të jenë për heqjen e tyre, sigurisht që do ta bëjmë këtë. Por, për momentin, jo të gjitha shtetet anëtare janë për heqjen e masave”.

STUDENTËT SERBË I JAPIN FUND BLLOKADËS PARA ZYRËS SË TRANSMETUESIT PUBLIK

Studentët serbë  dje i dhanë fund një bllokade dyjavore të zyrave të transmetuesit publik në Beograd, pasi ligjvënësit plotësuan një nga kërkesat e tyre dhe thirrën për zgjedhjen e anëtarëve të një organi rregullator të mediave.

Serbia ka përjetuar që disa muaj protesta të udhëhequra nga studentët, të nxitura nga vdekja e 16 personave kur çatia e një stacioni hekurudhor u shemb në qytetin e Novi Sadit në nëntor.

Vdekjet ndezën zemërimin e akumuluar prej kohësh lidhur me korrupsionin dhe mungesën e mbikëqyrjes të supozuar për projektet e ndërtimit dhe zhvillimit.

Qindra studentë, të mbështetur nga qytetarë si dhe nga drejtues të disa universiteteve, kanë bllokuar që nga 14 prilli dy zyra të Radio Televizionit të Serbisë (RTS) në kryeqytet, selinë qendrore në Beograd dhe një studio.

Ata kishin bllokuar gjithashtu Radio Televizionin e Vojvodinës (RTV) në Novi Sad, megjithatë kjo bllokadë kishte zgjatur vetëm një ditë. Ata akuzuan transmetuesit kombëtarë për injorimin e protestave të tyre dhe kërkuan raportim në interes të publikut dhe një zgjedhje transparente të anëtarëve të organit rregullator të medias.

RIKTHEHEN FURNIZIMET ME RRYMË NË SHUMICËN E SPANJËS DHE PORTUGALISË

Furnizimi me energji elektrike u rikthye në shumicën e Spanjës dhe Portugalisë më 29 prill pasi një ndërprerje masive e rrymës goditi gadishullin Iberik, duke lënë pasagjerët të bllokuar në trena dhe qindra ashensorë, ndërsa miliona njerëz mbetën pa sinjal në telefonat e tyre dhe pa qasje në internet.

Operatori i energjisë REE tha se energjia elektrike ishte rikthyer në më shumë se 90 për qind të territorit të Spanjës kontinentale, në orët e para të së martës. Dritat u ndezën sërish në Madrid dhe në kryeqytetin e Portugalisë.

Pothuajse asnjë cep i gadishullit, i cili ka një popullsi të përbashkët prej gati 60 milionë banorësh, nuk i shpëtoi ndërprerjes të rrymës. Megjithatë, ende nuk dihet pse pati ndërprerje të energjisë, ndonëse në rrjetet sociale u përhapën thashetheme se kishte pasur një sulm kibernetik.

KREMLINI REFUZON OFERTËN E ZELENSKYT PËR ARMËPUSHIM 30-DITOR

Kremlini refuzoi thirrjen e presidentit ukrainas, Volodymyr Zelensky, për një armëpushim 30-ditor, pasi udhëheqësi i Ukrainës kritikoi propozimin e presidentit rus, Vladimir Putin, për një ndalesë treditore të luftës në Ukrainë që përkonte me festimet vjetore të Ditës së Fitores në Moskë.

Armëpushimi i propozuar nga Rusia do të ndodhte nga 8 deri më 10 maj, kur Rusia shënon 80-vjetorin e fitores kundër Gjermanisë naziste në Luftën e Dytë Botërore.

Zelensky vuri në dyshim nevojën për të pritur deri atëherë për një armëpushim, duke thënë se kjo ishte një lëvizje “vetëm për t’i siguruar Putinit heshtje për paradën e tij”.

“Ne vlerësojmë jetët njerëzore, jo paradat”, tha Zelensky në adresimin e tij të përnatshëm, duke propozuar një armëpushim “të menjëhershëm, të plotë dhe të pakushtëzuar” për 30 ditë.

Një propozim nga Shtetet e Bashkuara të Amerikës për një armëpushim të pakushtëzuar, me të cilin Ukraina ishte pajtuar, gjithashtu mbetet opsion, përsëriti Zelensky.

“Rusia e di saktësisht se çfarë duhet të bëjë dhe si të përgjigjet: të ndalojë sinqerisht sulmet”, tha ai.

RRITET NUMRI I VIKTIMAVE NGA SHPËRTHIMI NË PORTIN IRANIAN

Numri i viktimave nga shpërthimi masiv në portin kyç të Iranit, Shahid Rajaei, ka shkuar në 70, thanë autoritetet lokale. Ndërkaq, ministri i Brendshëm iranian fajësoi "neglizhencën" për incidentin, ku u plagosën më shumë se 1.000 persona.

Eskandar Momeni deklaroi për televizionin shtetëror iranian në mbrëmjen e 28 prillit se “mosrespektimi i masave të sigurisë dhe pakujdesia” kishin shkaktuar incidentin, megjithëse nuk ishte e qartë menjëherë se çfarë e shkaktoi zjarrin në depot e materialeve të rrezikshme dhe kimike.

Momeni tha se disa “fajtorë janë identifikuar dhe thirrur nga autoritetet” por nuk dha më shumë detaje.

Mehrdad Hassanzadeh, drejtori i zyrës për menaxhimin e krizave në provincën jugore Hormozgan, ku ndodhet porti që u përball me shpërthimin masiv, tha për televizionin shtetëror iranian se shumica e të plagosurve, veçse janë liruar nga spitali.

Më 27 prill, një ditë pas shpërthimit, Hossein Zafari, zëdhënës i organizatës për menaxhimin e krizave në Iran, dukej se i la fajin ruajtjes në mënyrë jo të duhur të kemikateve që gjendeshin në kontejnerë në këtë port.

RTMZ, TV VIJESTI DHE TV E NËNSHKRUAN NJË DOKUMENT ME UDHËZIME PËR NJË MJEDIS MË TË MIRË PUNE

Në pritje të Ditës Botërore të Lirisë së Medias, përfaqësuesit e UZOR, Radio Televizionit të Malit të Zi, TV Vijesti dhe TV E nënshkruan një dokument me udhëzime për një mjedis më të mirë pune për gazetarët në Mal të Zi, thuhet në deklaratën e tyre.

Sipas udhëzimeve të krijuara nga ekipi i ekspertëve të Shoqatës për Zhvillim të Përgjegjshëm dhe të Qëndrueshëm, mediat marrin përsipër të krijojnë mekanizma të brendshëm për raportimin e presionit ndaj gazetarëve, të organizojnë seanca trajnimi specifike dhe të ofrojnë ndihmë psikologjike për punonjësit, si dhe të forcojnë mbështetjen dhe bashkëpunimin institucional.

Nga ana tjetër, ata deklarojnë se UZOR do t'u ofrojë mbështetje të vazhdueshme nënshkruesve në zbatimin e masave të rëna dakord.

Udhëzimet u nënshkruan nga: drejtori ekzekutiv i UZOR, Danko Jokanoviq; drejtori i përgjithshëm i RTMZ-së, Boris Raoniq; kryeredaktor i TV Vijesti, Radomir Kraçkoviq; dhe redaktori i televizionit E, Drashko Gjuranoviq.

NESËR MOT KRYESISHT ME DIELL

Në Mal të Zi mban mot me diell. Frynë erë e lehtë deri e mesme, vende- vende edhe e fortë nga drejtimet e lindjes. Temperaturat në orën 14 u shënuan në: Ulqin 27, Budvë 25, Podgoricë e Herceg Novi 24, Nikshiq 23, Tivar e Cetinë 22, Beran, Bjello Pole e Shavnik 21, Plevle 20, Andrijevicë, Plluzhinë, Rozhajë e Kollashin 19, Petnjicë e Guci 18 dhe në Zhablak 14 gradë.

Për nesër meteorologët parashikojnë mot kryesisht të kthjellët. Do të fryjë erë e lehtë deri e mesme, herë pas here edhe e fortë e drejtimeve të veriut. Temperatura e mëngjesit prej 1 deri në 13, kurse më e larta e ditës prej 17 deri në 27 gradë.