Beta [ Objavio: O.Z. ]

IZRAELSKA PIVARA

Izvinjenje zbog fotografije Gandija na pivskim flašama

Jedna izraelska pivara izvinila se Indijcima zato što je stavila sliku legendarnog lidera Mahatme Gandija, zagovornika zabrane alkohola, na jednu od svojih pivskih flaša.

Fotografija Gandija pojavila se uz slike slavnih izraelskih lidera u butik pivari Malka na sjeveru Izraela, objavio je novinski sajt Indija tudej (India Today).

Taj potez je skoro izazvao diplomatsku svadju Izraela i Indije.

"Malka pivo izražava iskreno izvinjenje narodu i vladi Indije zbog povrede njihovih osjećanja. Mi visoko poštujemo i vrednujemo Mahatmu Gandija i žalimo što smo stavili njegovu sliku na naše boce", rekao je menadžer brenda Malka, Gilad Dror.

Fotografija Gandija izazvala je gnijev imigranata iz Indije u Izraelu koji su na nju skrenuli pažnju ambasadi Indije u Tel Avivu.

Predstavnici pivare su rekli da im je namjera bila da odaju počast svjetskim liderima i bilo im je neprijatno kada su saznali da se Gandi zalagao za zabranu prodaje alkohola u Indiji, prenose izraelski mediji.

Kompanija je saopštila da su sporne boce proizvedene povodom Dana nezavisnosti Izraela i da ih uglavnom više nema u prodavnicama.

Članovi Gornjeg doma Parlamenta Indije postavili su pitanje ove nedjelje o spornim bocama i potpredsjednik Indije M. Venkaiah Naidu je dao instrukciju ministru spoljnih poslova Subramanjamu Džaišankaru da preduzme momentalnu akciju, javila je Indija tudej.

Predsjedavajući Nacionalne fondacije Mahatme Gandija u Indiji Ebi Džose je, čuvši za incident, poslao pismo premijeru Izraela Benjaminu Netanjahuu u kojem je ocijenio da je taj potez "dostajan prezira i za žaljenje".

On je zatražio od Netanjahua da se odmah uklone ponižavajuće fotografije sa boca, upozorivši da bi se to moglo pretvoriti u veću kontroverzu i negativno uticati na diplomatske odnose.

Izraelska kompanija je prestala da koristi Gandijevu fotografiju nakon žalbe Ambasade Indije i nastoji da ukloni sporne boce sa tržišta.