HRVATSKA ISKUSTVA

Treba li ukinuti komentare na portalima?

Iako interakcija čitalaca i medija putem interneta može doprinijeti javnoj raspravi, praksa pokazuje da komentatori članaka nerijetko posežu za uvredama i govorom mržnje zbog čega je portal Net.hr nedavno ukinuo komentare čitalaca, dok se ostali u Hrvatskoj sa tom savremenom pošasti bore strogim nadzorom komentara.

Net.hr je procijenio da se komentari čak u 95 odsto slučajeva svode na vrijeđanje, a agencija Hina je upitnikom ispitala kakvo je stanje na najposjećenijim hrvatskim portalima.

Portali 24sata, Večernjeg, Slobodne Dalmacije i HRT-a odgovorili su da udio govora mržnje kod njih nije ni približan procjeni Net.hr-a, i da se kreće od 5 do 30 odsto.

RTL je naveo da se kod njih većina članaka ne komentariše i da dosad nije bilo slučajeva narušavanja zakonskih normi. Večernji se nije složio da je 95 odsto komentara govor mržnje. „To se može dogoditi samo na portalima gdje su komentari ostavljeni potpuno bez nadzora“, kazao je Anton Smolčić sa tog portala.

Tportal je, pak, odgovorio da su u početku prevladavali dobronamjerni komentari, ali je pod uticajem opšte vulgarizacije javnog prostora i kod njih počeo da dominira, teško obuzdavajući, govor mržnje.