[ Pobjeda; Objavila: M.M ]

HARADINAJ

"Vrijeme zidova je davna prošlost"

Premijer Kosova u ostavci Ramuš Haradinaj kazao je da je vrijeme zidova između zemalja Zapadnog Balkana davna prošlost i da među susjedima nema mjesta za mržnju i netrpeljivost.

Komentarišući izjave poslanika Demokratskog fronta Nebojše Medojevića koji je naveo da bi ,,trebalo podići zid prema Kosovu i Albaniji kako bi se spriječio šverc i kriminal koji ugrožava nacionalne i državne interese“, Haradinaj je za Pobjedu kazao da Kosovo njeguje odlične odnose sa Crnom Gorom.

"Vrijeme zidova i bilo kakvih prepreka između zemalja Zapadnog Balkana davna je prošlost. Kosovo njeguje tradicionalno odlične odnose sa Crnom Gorom i u kontinuitetu se zalaže za unapređenje ekonomske saradnje i zajedničke integracije u porodicu evroatlantskih država. Za mržnju i netrpeljivost nema mjesta, stoga nepokolebljivo podržavamo progresivne snage koje će još snažnije afirmisati saradnju između dvije dobrosusjedske i prijateljske države. Duboko sam uvjeren da sa obje strane postoji snažna volja da takve odnose i dalje produbljujemo u interesu naših građana", rekao je Haradinaj Pobjedi.

Medojević je ranije kazao da DF neće priznati nikakve promjene granica i pomirenja na štetu države Crne Gore.

"Bićemo spremni, kada dođemo na vlast, da Vojsku Crne Gore vratimo na granice kako bi se zaštitio teritorijalni integritet države. Granica prema Kosovu i Albaniji je jedan od najvećih bezbjednosnih problema Crne Gore i ako bude potrebe tu se treba podići zid, da bi se spriječio šverc i kriminal koji ugrožava nacionalne i državne interese Crne Gore. Za nas nemadileme. Prvo Crna Gora", izjavio je Medojević.