Srđa Vuković [ Beta ]

KUP AFRIČKIH NACIJA

Senegal ostao bez titule, Obala Slonovače u četvrtfinalu

Fudbalska reprezentacija Senegala neće odbraniti titulu na Afričkom kupu nacija, pošto je večeras izgubila od domaćina takmičenja Obale Slonovače poslije izvođenja jedanaesteraca 5:4, nakon što je u regularnom dijelu i poslije produžetaka bilo neriješeno 1:1.

Senegal je poveo u četvrtom minutu golom koji je postigao Habib Dijalo, poslije dodavanja Sadija Manea, a izjednačio je Frank Kesje u 86. minutu iz jedanaesterca.

Regularni dio utakmice završen je neriješeno 1:1, poslije toga, uprkos šansama sa obje strane golova nije bilo u produžecima, pa su pobjednika odlučili penali.

Obala Slonovače postigla je svih pet golova, a strijelci su bili Nikolas Pepe, Kristijan Kuame, Sebastijen Ale, Serž Orije i Frank Kesje, koji je postigao pobjedonosni.

U ekipi Senegala golove su postigli Kalidu Kulibali, Pape Sar, Bamba Dijeng i Sadio Mane, dok je Musa Nijakate u trećoj seriji pogodio stativu.

Obala Slonovače će u četvrtfinalu igrati protiv pobjednika duela Malija i Burkine Faso.