L.V.

Junajted preživio sa desetoricom, Haland riješio Totenhem

Mančester Junajted sa desetoricom igrača uspio je da upiše pobjedu od 3:2 protiv Ipsvič Tauna, kompletirajući tako het-trik pobjeda protiv premijerligaških novajlija na Old Trafordu ove sezone.

Ipsvič je ušao u meč s jasnom namjerom i dobio poklon već u četvrtom minutu, kada je duga lopta Sama Morsija izazvala haos – Andre Onana je istrčao sa linije, a Patrik Dorgu ga je prebacio, omogućivši Džejdenu Filodžinu da rutinski sprovede loptu u mrežu.

Hari Megvajer je glavom natjerao Aleksa Palmera na dobru odbranu, a Crveni đavoli imali su posjed, ali su do izjednačenja ipak stigli uz pomoć gostiju – Morsi je skrenuo slobodan udarac Bruna Fernandeša u sopstvenu mrežu.

Još jedan Fernandešov prekid izazvao je haos samo četiri minuta kasnije – Palmer je odbranio pokušaje Megvajera i Dioga Dalota, ali je lopta na kraju pala pred Matijsa de Lihta, koji je bio brži od Jensa Kajusta i poslao je u mrežu.

Dorgu je zatim snažnim udarcem testirao Onanu, a potom je sjajna intervencija Aksela Tuanzebea spriječila Alehandra Garanča da zatrese mrežu.

Međutim, domaćini su ostali s igračem manje nakon što je Dorgu dobio direktan crveni karton zbog starta na Omariju Hačinsonu. Situacija se dodatno pogoršala za Junajted pred odlazak na odmor, kada je centaršut Filodžina prošao pored svih, uključujući i Lijama Delapa i Onanu, te završio u donjem uglu gola.

S desetoricom igrača i izjednačenim rezultatom, Junajtedu je bio potreban podsticaj – i dobili su ga već u drugom minutu nastavka, kada je Megvajer dominantno skočio na Fernandešov korner i glavom pogodio donji ugao.

Ipsvič se ponovo stabilizovao poslije primljenog gola, ali Megvajer je skrenuo Delapov udarac pored gola, Kajuste je imao dva pokušaja blokirana, dok je Džek Tejlor šutirao pored stative nakon što je ušao s klupe. Kako je pritisak rastao, Fernandeš je blokirao Tuanzebeov pokušaj, zatim napravio sprint preko cijelog terena i poslao pas koji je zamalo prošao pored Nusaira Mazrauija.

Džordž Hirst je potom glavom šutirao pored gola iz kornera, dok je Onana ukrotio Filodžinov udarac u dalji ugao. Mančester Junajted je izdržao i upisao prvu pobjedu u posljednje četiri utakmice Premijer lige. Ujedno su Ipsviču nanijeli šesti poraz u posljednjih sedam mečeva, zadržavši Traktor Bojse pet bodova iza Vulverhempton Vonderersa i zone opstanka.

Haland rješio Totenhem - Siti preživio drugo poluvrijeme

Mančester Siti se vratio u top četiri Premijer lige zahvaljujući tijesnoj pobjedi od 1:0 nad Totenhemom na gostujućem stadionu, izbjegavši tako treći poraz u sezoni od Sparsa.

Iako je Siti aktuelni šampion, mnogo govori o njihovoj neubjedljivoj sezoni činjenica da je ubjedljiv poraz od 2:0 protiv Liverpula na "Etihadu" proteklog vikenda bio očekivan.

Taj rezultat takođe je ugrozio njihove šanse za plasman u Ligu šampiona, a pošto je Čelsi u utorak pobijedio Sautempton sa 4:0 i skočio na četvrto mjesto, "građani" nisu smjeli sebi dopustiti još jedno prosipanje bodova.

U prvom poluvremenu uradili su sve što su mogli da osiguraju tri boda što prije, i realno, trebalo je da već tada riješe pitanje pobjednika.

Jedini pogodak postigao je Erling Haland, koji je zatresao mrežu nakon odličnog prodora Žeremija Dokua, ali Norvežanin je već prije toga imao dobru priliku koju mu je odbranio Giljermo Vikario, a kasnije je propustio još bolju šansu iz neposredne blizine.

Ponovo je Vikario bio na visini zadatka, kao i kod niskog udarca Dokua s ivice kaznenog prostora. Ipak, Halandov promašaj nije bio ni blizu onome što je uradio Savinjo, koji je potpuno neometan na osam metara od gola nakon Dokuovog dodavanja poslao loptu visoko preko prečke. Totenhem, s druge strane, nije uspio da kreira ozbiljniju priliku sve do 45. minuta, kada je Ederson krajnjim naporom uspio da skrene udarac glavom Kevina Dansoa preko prečke.

Nakon pauze, uloge su se promijenile. Siti nije bio bezopasan, ali je Totenhem bio taj koji je preuzeo inicijativu i stvorio najbolje prilike. Najveća prijetnja dolazila je iz prekida – Ederson je uspio da ukroti pokušaje glavom Dansoa i Rodriga Bentankura, dok je Pedro Poro poslao još jedan udarac preko gola.

Ipak, najbolja šansa pripala je dvadesetogodišnjem Vilsonu Odoberu, koji je na kraju promašio cijeli gol na drugoj stativi nakon Poroovog centaršuta, iako je samo trebao da pravilno usmjeri loptu.

Međutim, kako je utakmica odmicala, intenzitet i energija Sparsa su počeli da opadaju, iako je Ederson morao da reaguje i kod udarca Son Hjung-mina iz prve.

U sudijskoj nadoknadi Siti je postigao još jedan pogodak, ali je on poništen nakon dugog VAR pregleda – što na kraju nije uticalo na ishod. Građani su sada bod ispred Čelsija, koji je peti, uz 11 preostalih kola, dok je Totenhem ostao na 13. mjestu. Nakon tri uzastopne pobjede u Premijer ligi, Anže Postekoglu može izvući neke pozitivne stvari iz ove utakmice, a ostaje nada da ovaj poraz neće dodatno poljuljati ionako krhko samopouzdanje njegovog mladog tima.

OSTALI REZULTATI 

Brentford - Everton 1:1

Notingem Forest - Aresnal 0:0