Ditari 12.05.2025

Ditarin e përgatiti Marash Dedvukaj

Në Kuvend ka përfunduar debati mbi raportet e përgjithshme të Malit të Zi për integrimet evropiane

Në Kuvend ka përfunduar debati mbi raportet e përgjithshme të Malit të Zi për integrimet evropiane. Ministrja e Çështjeve Evropiane, Maida Gorçeviq, deklaroi se Bashkimi Evropian dëshiron zgjerim për hir të stabilitetit dhe prosperitetit dhe se Mali i Zi po e udhëheqë këtë proces. Mali i Zi ka nevojë për rezultate dhe se kjo qeveri është e vendosur ti ofrojë ato. Ne duhet të kujdesemi për oborrin tonë dhe rezultatet tona. Nuk po i referohem vetëm parlamentit dhe qeverisë, por edhe gjyqësorit. I gjithë muaji qershor do të shënohet me mbylljen e kapitujve me BE-në", tha Gorçeviq. Nga ana tjetër, opozita thekson se pavarësisht mbylljes së tre kapitujve, shumica parlamentare dhe qeveria janë anti-evropiane dhe e kanë treguar këtë në disa shembuj. Ndër të tjera, ata përmendin miratimin e rezolutës për Jasenovacin, zgjedhjen e gjyqtarëve të Gjykatës Kushtetuese dhe ligjet e IBAR-it.

Mandiq bisedoi sot me Presidenten e Parlamentit Evropian, Roberta Metsola

Kryetari i Kuvendit të Malit të Zi Andria Mandiq bisedoi sot me Presidenten e Parlamentit Evropian, Roberta Metsola, gjatë Konferencës së Kryetarëve të Parlamenteve të Shteteve Anëtare të Bashkimit Evropian, e cila po mbahet në Budapest. Siç u njoftua nga kabineti i tij, kryetari Mandiq ka thënë se do të ishte një nder për të që të priste Presidenten e Parlamentit Evropian gjatë vizitës së saj në Mal të Zi, e cila, siç ka bërë me dije ajo, do të zhvillohet së shpejti.

Koshta - Shqipëria dhe Mali i Zi mund të bëhen anëtarë të Bashkimit Evropian (BE) përpara vendeve të tjera kandidate

Mali i Zi dhe Shqipëria mund të bëhen anëtarë të Bashkimit Evropian (BE) përpara vendeve të tjera kandidate, tha Presidenti i Këshillit Evropian, Antonio Koshta. Ai e tha këtë në një intervistë për Euronews, përpara vizitës së tij në vendet e Ballkanit Perëndimor. Koshta theksoi se zgjerimi drejt Ballkanit Perëndimor është përsëri një nga prioritetet e BE-së, duke deklaruar se stabiliteti dhe prosperiteti i ardhshëm i kontinentit varen nga zgjerimi. Duke komentuar mbi datat e mundshme për zgjerimin dhe duke deklaruar se mund të jetë viti 2030, Koshta tha se nuk ka një datë të caktuar. "Pse në vitin 2030 dhe pse jo më parë," pyeti Koshta. Ai theksoi se anëtarësimi është një proces i bazuar në meritë. "Nëse shtetet zbatojnë reforma, ato mund të bashkohen me BE-në edhe para vitit 2030", tha Koshta. Sipas tij, janë meritat ato që mund të ndryshohen. “Shqipëria dhe Mali i Zi janë qartësisht më të përparuara se vendet e tjera”, tha Koshta. Ai përmendi luftën e Rusisë në Ukrainë dhe rigjallërimin e tensioneve në Ballkanin Perëndimor, veçanërisht kur bëhet fjalë për Bosnjën dhe Hercegovinën, por edhe tensionet midis Serbisë dhe Kosovës. “Nuk njoh një nxitje më të mirë për të kapërcyer konfliktet që janë ende të hapura sesa kjo mundësi ndoshta unike, që është anëtarësimi në BE”, tha Koshta.

Ivan Vujoviq - Andrija Mandiq vazhdon të sabotojë rrugën evropiane të Malit të Zi dhe përdor takimet me krerët e parlamenteve të vendeve të BE për të folur për shtetësinë

Kryetari i Kuvendit Andrija Mandiq vazhdon të sabotojë rrugën evropiane të Malit të Zi dhe përdor takimet me krerët e parlamenteve të vendeve të Bashkimit Evropian (BE) për të folur për shtetësinë, tha kryetari i Partisë Socialdemokrate  Ivan Vujoviq. Asambleja njoftoi të dielën se takimi i Mandiqit me homologun e tij të Luksemburgut, Claude Wisel, deklaroi se Ligji aktual për Shtetësinë përfaqëson një problem potencial për diasporën malazeze dhe se ndryshimi i politikës mbi shtetësinë është një hap në drejtimin e duhur. Vujoviq, në një postim në rrjetin social X, tha se sabotimi i rrugës së Malit të Zi drejt BE-së nga Mandiqi vazhdon. “Ai i përdor takimet me krerët e parlamenteve të vendeve të BE-së, jo për të folur për reforma, të cilat nuk ekzistojnë, por për shtetësinë”, deklaroi Vujoviq.

Qytetarët e Cetinës vazhdojnë të bllokojnë qarkullimin në rrugën kryesore midis kësaj komune dhe Podgoricës

Qytetarët e Cetinës vazhdojnë të bllokojnë qarkullimin në rrugën kryesore midis kësaj komune dhe Podgoricës, në Krushevo Zhdrjello. Ata njoftuan bllokim dy-orësh të trafikut, nga ora 17 e 26 minuta, që është vazhdim i protestave të vazhdueshme në të cilat qytetarët shprehin pakënaqësinë dhe shqetësimin e tyre për shkak të, siç pretendojnë ata, reagimit joadekuat të institucioneve kompetente ndaj dy krimeve të rënda që ndodhën në Cetinë, gjatë dy vjet e gjashtë muaj të fundit.

Millojko Spajiq – sot fillon ndërtimi i Bulevardit Vojisllavljeviq

Kryeministri Millojko Spajiq tha se ndërtimi i Bulevardit Vojisllavljeviq fillon sot dhe se ky është një hap i madh drejt zgjidhjes së një prej problemeve më kritike të trafikut në Podgoricë, por edhe më gjerë. “Sot fillon ndërtimi i Bulevardit Vojisllavljeviq- një hap i madh drejt zgjidhjes së njërit prej problemeve më kritike të trafikut në Podgoricë, por edhe më gjerë”, shkroi Spajiq në një postim në rrjetin X. Brenda 18 muajsh, sipas tij, do të kemi një bulevard modern me katër korsi, i cili do t’ua lehtësojë jetën qytetarëve. “Meqenëse modeli i bashkëpunimit midis Qeverisë dhe Kryeqytetit ka rezultuar shumë i suksesshëm, ne po vazhdojmë me projekte të tjera kapitale bazuar në të njëjtin model, tha Kryeministri Spajiq në njoftim.

Oficerët e policisë kanë arrestua sot  S.B. (26) nga Danilovgradi dhe D.U. (21) nga Podgorica, të dyshuar për veprën penale të sjelljes së dhunshme

Oficerët e policisë kanë arrestua sot  S.B. (26) nga Danilovgradi dhe D.U. (21) nga Podgorica, të dyshuar për veprën penale të sjelljes së dhunshme, njoftoi Administrata e Policisë. Policia tha se të shtunën, rreth orës gjashtë, personi i plagosur raportoi në Departamentin e Sigurisë së Podgoricës se dy burra të panjohur e sulmuan atë në lagjen Blloku V në Podgoricë. “Oficerët e policisë vepruan mbi bazën e raportit dhe duke ndërmarrë masa dhe veprime operative-taktike, shpejt gjetën identitetin e të dy personave, S.B. dhe D.U., dhe më pas u morën deklarata nga të gjithë personat e regjistruar në procesverbal në lidhje me rrethanat e ngjarjes”, thuhet në deklaratë.

Shimun  - Ekspertiza, vetëmohimi, forca e infermierëve dhe teknikëve formojnë themelin e sistemit shëndetësor malazez

Ekspertiza, vetëmohimi, forca e infermierëve dhe teknikëve formojnë themelin e sistemit shëndetësor malazez, tha Ministri i Shëndetësisë Vojisllav Shimun me rastin e Ditës Ndërkombëtare të Infermierisë. "Sot, kur e gjithë bota feston Ditën Ndërkombëtare të Infermierisë, dua t'ju dërgoj urimet më të sinqerta, me respekt dhe mirënjohje të thellë - në emër të Ministrisë së Shëndetësisë dhe në emrin tim personal", tha Shimun në urimin e tij drejtuar infermierëve dhe teknikëve. Ai theksoi se infermierët dhe teknikët janë heronjtë e heshtur të shoqërisë. "Duart tuaja ofrojnë kujdes, fjalët tuaja frymëzojnë shpresë dhe prania juaj sjell siguri dhe lehtësim në momentet më të vështira. Ekspertiza, vetëmohimi dhe forca juaj janë themeli i sistemit tonë shëndetësor", theksoi Shimun. Siç tha ai, kontributi i infermierëve dhe teknikëve në çdo qendër shëndetësore, spital dhe institucion është i pamatshëm dhe i paçmuar.  Sot festojmë ditën tuaj, dijen tuaj dhe përkushtimin tuaj dhe unë jam i lumtur dhe mund të them që çdo ditë në vazhdim qoftë e mbushur me respektin që meritoni", thuhet në urimin e minsitrit Vojisllav Shimun.

Socialistët në epërsi në zgjedhjet parlamentare në Shqipëri

Rezultatet preliminare të zgjedhjeve parlamentare në Shqipëri tregojnë se Partia Socialiste në pushtet është në epërsi, teksa votuesit kanë mbështetur përpjekjet e vendit për anëtarësim në Bashkimin Evropian dhe kandidaturën e kryeministrit aktual, Edi Rama, për një mandat të katërt. Me rreth 25 për qind të votave të numëruara, socialistët e majtë të Ramës kanë siguruar 53 për qind të votave, ndërsa koalicioni opozitar i djathtë, i udhëhequr nga Partia Demokratike dhe Sali Berisha, ka marrë 35 për qind. Këto përqindje u japin socialistëve së paku 71 mandate të nevojshme për të qeverisur të vetëm dhe, sipas gjasave, edhe më shumë se në mandatin e kaluar. Pjesëmarrja preliminare në votime të dielën ishte rreth 42.16 për qind, ose 4 për qind më pak se katër vjet më parë. Rreth 3.7 milionë qytetarë me të drejtë vote në Shqipëri dhe jashtë saj votuan për të zgjedhur 140 deputetë për një mandat katërvjeçar. Për shkak të emigracionit të lartë, vendi me 2.8 milionë banorë ka një numër më të madh të votuesve të regjistruar. Për herë të parë, rreth 191.000 shqiptarë të diasporës kishin mundësinë të votonin me postë. Kreu i Komisionit Qendror të Zgjedhjeve, Ilirjan Celibashi, deklaroi se procesi i votimit të dielën ka qenë në përgjithësi i qetë, me disa parregullsi të izoluara që përfshinin kandidatë dhe mbështetës të tyre, por që nuk pritet të ndikojnë në rezultat. “Procesi, në tërësi, përveç rasteve sporadike, ka qenë në përputhje me rregullat dhe standardet", tha ai në mbrëmje, pas përfundimit të votimit.

Deputetët dështojnë për herë të 14-të ta konstituojnë Kuvendin

Kosova vazhdon të jetë pa Kuvend funksional, pasi deputetët kanë dështuar sërish – në përpjekjen e tyre të katërmbëdhjetë– ta konstituojnë Kuvendin e ri. Dështimi më i fundit ndodhi të dielën, kur kanë kaluar tre muaj pas mbajtjes së zgjedhjeve parlamentare më 9 shkurt. Sikurse në seancat e ditëve të kaluara, edhe të dielën kryesuesi i seancës konstituive, Avni Dehari, kërkoi sërish formimin e një komisioni për mbikëqyrjen e votimit të fshehtë për kryeparlamentar. Propozimi nuk i mori votat e mjaftueshme dhe seanca u ndërpre për të vazhduar pas dy ditëve, të martën në mëngjes. Në seancën e së dielës u pa edhe një mungesë më e theksuar e deputetëve, pasi të pranishëm ishin vetëm 92 deputetë nga 120 sa ka Kuvendi i Kosovës. Dështimet e njëpasnjëshme për ta konstituuar Kuvendin e ri e kanë thelluar ngërçin politik të vendit, duke ngritur shqetësime për paralizë institucionale dhe shihen si test për pjekurinë shtetërore të Kosovës. Asnjë parti nuk e fitoi shumicën për të qeverisur e vetme. Lëvizja Vetëvendosje doli e para duke i fituar 48 ulëse, 13 më pak se të paktën 61 të nevojshme ta formuar qeverinë e re e vetme. Megjithëse janë thirrur dhjetëra seanca për konstituimin e Kuvendit, por ndarjet politike e kanë penguar vazhdimisht këtë proces.

Partitë i drejtohen Gjykatës Kushtetuese për seancën konstituive të Kuvendit të Kosovës

Aleanca për Ardhmërinë e Kosovës (AAK) ka dërguar të hënën në Gjykatën Kushtetuese të Kosovës çështjen e votimit të fshehtë për kryetarin e Kuvendit të Kosovës. Kërkesa, e paraqitur nga deputetët nga radhët e AAK-së dhe e mbështetur edhe nga deputetë të Partisë Demokratike të Kosovës (PDK) dhe të Lidhjes Demokratike të Kosovës (LDK), erdhi në mes të ngërçit në Kuvendin e Kosovës, i cili nuk është konstituuar as pas 14 përpjekjeve rresht, kur kanë kaluar tre muaj nga mbajtja e zgjedhjeve. “Si Aleancë për Ardhmërinë e Kosovës, me nënshkrimet e deputetëve të Aleancës, të Lidhjes Demokratike të Kosovës, por edhe të Partisë Demokratike të Kosovës, e kemi dërguar në Gjykatë Kushtetuese për interpretim ndryshimin e votimit në mes të procedurave për zgjedhjen e kryeparlamentarit”, tha deputetja e AAK-së, Time Kadrijaj, para gazetarëve. “Kërkuam nga Gjykata Kushtetuese që kjo të trajtohet me prioritet, duke konsideruar që është shkelje ligjore, kështu po mendojmë që po zhvleftësohet vlera e Kuvendit të Kosovës, duke mbajtur seanca plenare çdo 48 orë, dhe seanca me të cilat konsiderojmë që po shkelet Kushtetuta e Kosovës”, u shpreh ajo.

Papa Leoni XIV bën thirrje për lirimin e gazetarëve të burgosur

Para një audience me mbi 6.000 mijë gazetarë, Papa Leoni XIV, bëri thirrje për lirimin e gazetarëve të burgosur në mbarë botën. Duke folur para gazetarëve që kishin shkuar në Romë për të mbuluar zgjedhjen e tij si papa i parë amerikan, lirinë e fjalës dhe të medias, ai e quajti “dhuratë të çmuar”. Papa Leoni u prit me ovacione ndërsa hyri në auditorin e Vatikanit për takimin e tij të parë me përfaqësues të publikut të gjerë. Ai u bëri thirrje gazetarëve të përdorin fjalët për paqe, të refuzojnë luftën dhe tu “japin zë” atyre që nuk kanë. “Kisha sheh te këta dëshmitarë - po mendoj për ata që raportojnë nga lufta edhe duke rrezikuar jetën e tyre, guximin e atyre që mbrojnë dinjitetin, drejtësinë dhe të drejtën e njerëzve për t’u informuar, sepse vetëm njerëzit e informuar mund të bëjnë zgjedhje të lira”, tha ai. Papa Leoni shprehu solidaritet me gazetarët e burgosur anembanë botës. “Vuajtja e këtyre gazetarëve të burgosur sfidon ndërgjegjen e kombeve dhe të komunitetit ndërkombëtar, duke na thirrur të gjithëve që të mbrojmë dhuratën e çmuar të lirisë së fjalës dhe të shtypit”.

Fiona Hill - Politika e jashtme e Trumpit po përmbys rendin botëror

Siguria ndërkombëtare dhe sistemi financiar, të ndërtuara dhe të drejtuara nga Shtetet e Bashkuara pas Luftës së Dytë Botërore i kanë bërë ballë Luftës së Ftohtë, luftërave rajonale, krizave ekonomike dhe madje edhe një pandemie botërore. Por, sipas një ish-këshilltareje të presidentit amerikan, Donald Trump, - që tashmë është një nga kritiket më të mëdha të tij – ndoshta nuk do t’i mbijetojnë mandatit katërvjeçar të Trumpit. “Ky është fundi i sistemit ndërkombëtar, siç e njohim ne”, tha Fiona Hill, ish-këshilltare e Trumpit për Rusinë dhe tani eksperte në Institutin Brookings. Intervista e Hillit për Radion Evropa e Lirë, është pjesë e një serie me tri pjesë, e quajtur Ndryshimet e Politikës së Jashtme të Amerikës. “Sinqerisht, ka qenë duke u shembur që një kohë të gjatë”. “Presidenti Trump më nuk do që të paguajë për këtë rendin ndërkombëtar apo ta mbështesë, madje as në aspektin e udhëheqjes politike dhe kjo vlen edhe për institucionet vendore që janë të lidhura me projeksionin e ndikimit dhe fuqisë së SHBA-së jashtë vendit”, tha ajo.

Armëpushimi mes Indisë dhe Pakistanit besohet se po zbatohet kryesisht

Një armëpushim midis Indisë dhe Pakistanit është duke u zbatuar kryesisht, megjithëse të dyja palët e kanë akuzuar njëra-tjetrën për shkelje të marrëveshjes vetëm disa orë pas nënshkrimit të saj. Armëpushimi, i ndërmjetësuar nga Shtetet e Bashkuara, synon ndaljen e valës më të fundit të dhunës në rajonin e kontestuar të Kashmirit. India dhe Pakistani u pajtuan për ndalimin e menjëhershëm të luftimeve të shtunën, njoftuan presidenti amerikan, Donald Trump, dhe zyrtarë nga të dyja vendet e Azisë Jugore, pasi përshkallëzimi i luftimeve ndërmjet fqinjëve me armë bërthamore kishte nxitur frikën për një luftë të përgjithshme. “Pas një nate të gjatë bisedimesh të ndërmjetësuara nga Shtetet e Bashkuara, jam i kënaqur të njoftoj se India dhe Pakistani kanë rënë dakord për një ARMËPUSHIM TË PLOTË DHE TË MENJËHERSHËM”, tha Trump në një postim në platformën e tij Truth Social. “Urime të dyja vendeve për përdorimin e arsyes së shëndoshë dhe inteligjencës së lartë”, tha Tramp.

PKK-ja kurde shpërbëhet dhe i jep fund kryengritjes së armatosur në Turqi

Grupi militant Partia e Punëtorëve të Kurdistanit (PKK), që ka qenë në konflikt me shtetin turk për më shumë se katër dekada, ka vendosur të shpërbëhet dhe t’i japë fund kryengritjes së armatosur, raportoi sot një agjenci lajmesh e afërt me të. Vendimi i PKK-së pritet të ketë pasoja të gjera politike dhe të sigurisë për rajonin, përfshirë edhe për Sirinë fqinje, ku forcat kurde janë aleate të forcave amerikane. Agjencia e lajmeve Firat publikoi atë që e quajti deklaratë përmbyllëse të një kongresi që PKK-ja mbajti javën e kaluar në veri të Irakut, si përgjigje ndaj thirrjes që bëri në shkurt udhëheqësi i burgosur kurd, Abdullah Öcalan, për shpërbërjen e grupit. Zyra e presidentit turk, Recep Tayyip Erdogan, dhe Ministria e Punëve të Jashtme e Turqisë nuk e kanë komentuar ende këtë njoftim. Më shumë se 40.000 njerëz janë vrarë gjatë konfliktit që nga viti 1984, kur PKK-ja nisi kryengritjen. Turqia dhe aleatët e saj perëndimorë e kanë shpallur PKK-në organizatë terroriste.

Nesër mot i ngjashëm me të sotmin

Sot në Mal të Zi mban mot kryesisht i vranët dhe vende vende me reshje të dobëta të shiut dhe bubullimë. Frynë erë e dobët deri e mesme nga drejtimet e ndryshme. Temperaturat në orën 14: Podgoricë 25 gradë, Tivar e Ulqin 22, H. Novi, Budvë e B. Pole 21, Beranë e Plluzhinë 20, Nikshiq 19, Plevle, Andrievicë e Shavnik 18, Kollashin 17, Rozhajë 16 dhe Cetinë e Guci 15 gradë.

                   Për nesër metereologët parashohin të mbajë mot kryesisht i vranët dhe vende vende me shi të dobët dhe bubullimë. Do të fryjë erë e mesme deri e fortë nga drejtimi i veriut dhe verilindjes. Temperatura e mëngjesit do të sillet prej 3 deri në 16 kurse më e larta e ditës prej 10 deri në 23 gc.