[ Beta ]

MEKSIKO

U igraonici devet ubijeno, uključujući troje djece

Četiri naoružana muškarca ubila su devet osoba u video-igraonici u zapadnom Meksiku, a među mrtvim je troje djece starih 12, 13 i 14 godina.

Tužioci meksičke države Mičoakan rekli su kasno sinoć da su u napadu povrijeđene još dvije osobe.

Napad se dogodio juče u gradu Uruapanu, gdje je nasilje zadobilo šokantne razmjere.

Napadači su kako izgleda tragali za nekim, ali su ipak neselektivno pucali na sve posjetioce igraonice. Dvoje žrtava staro je 17 i 18 godina.

Porode toga, tokom vikenda istražitelji su našli raspadnuta tijela 11 ljudi u tajnim grobovima u Uruapanu. Policija je navela da su istraživali slučaj nestale osobe kada su dobili dojavu o tajnim grobovima.

U petak u istom gradu, izvršen je oružani napad na patrolu gradske policije, kada je ubijen jedan policajac, a dvoje je ranjeno.

Napad je moguće bio odmazda za hapšenje u petak vođe grupe Viagras koji je umiješan u 19 ubistava.

Rat narkokartela Halisko i Viagras, kao i njihovih prethodnika, godinama donosi krvoproliće na ulice tog grada.