FA KUP

Vigan se plasirao u finale

U ligi se grčevito bore za opstanak, ali su u FA kupu odigrali perfektno cijele sezone - Vigan je preskočio i posljednju ljestvicu, pobijedio Milvol 2:0 i otišao u finale najstarijeg kup takmičenja na svijetu.

Milvol je odigrao dobro protiv Premijerligaša, posebno u drugom poluvremenu kada je imao više šansi od rivala, ali je Vigan bio koncentrisaniji u napadu i pobijedio.

Vigan je poveo u 25. minutu preko svog najboljeg igrača Šona Malonija. Kone je prošao po desnoj strani i pasom po dubini pronašao Škota koji se oslobodio svog čuvara i volej udarcem sa 11 metara pogodio mrežu.

U nastavku meča, Milvol se potrudio da stigne do izjednačenja, ali je Vigan iskusno sačuvao rezultat i 12 minuta prije kraja iskoristio otvorenu igru rivala. Đordi Gomes je uposlio MekManamana u šesnaestercu, a ovaj zaobišao golmana Milvola i loptu gurnuo u nebranjenu mrežu za plasman u istorijsko finale FA Kupa.