SERIA A

Spektakl i pobjeda Atalante u Milanu

Predvođeni fenomenalnim Hermanom Denisom, koji je postigao het-trik Atalanta je u spektakularnom meču pobijedila Inter u Milanu sa 4:3. Napoli je bio siguran protiv Đenove 2:0 i održao kakav-takav korak sa Juventusom u borbi za titulu.

Samo jedan gol je viđen u prvom poluvremenu u Milanu. Strijelac je bio Tomaso Roki u 44. minutu. Veteran je odlično reagovao nakon kornera Pereire i poslao loptu iza leđa rezervnog čuvara mreže gostiju Polita.

Izjednačio je Bonaventura, poslije asistencije Livaje. Ipak, Riki Alvarez je za samo pet minuta postigao dva gola i čini se obezbijedio pobjedu Interu, jer je do kraja bilo ostalo manje od pola sata.

Tada na scenu stupa Herman Denis. Prvo je iskoristio najstrožiju kaznu, zatim je savladao Handanovića udarcem sa ivice šesnaestrca, da bi het-trik kompletirao u 77 minutu. Bonaventura je poslao loptu u srce kaznenog prostora, a Denis je uhvatio u raskoraku Handanovića i donio veliku pobjedu gostima.

Napoli je bez mnogo muke, golovima Gorana Pandeva i Blerima Džemailija slavio pobjedu nad Đenovom - 2:0.