Ditari 10.05.2024

Ditarin e përgatiti, Violeta Gjokaj

Rezoluta për gjenocidin në Jasenovac do të propozohet nga Kuvendi

Qeveria e Malit të Zi nuk ka diskutuar sot për Rezolutën mbi gjenocidin në Srebrenicë, tha në konferencën për medie kryeministri Millojko Spajiq.

Pasi lideri dhe deputeti i Partisë Popullore Demokratike, Millan Knezheviq, i bëri thirrje publikisht kryeministrit që deri të premten të dorëzojë në Kuvend një propozim për një rezolutë për gjenocidin në Jasenovac, në mënyrë që të dënohet gjenocidi ndaj popullit serb, hebre dhe rom, Spajiq tha se nuk po ikë nga përgjegjësia dhe se kjo rezolutë është më shumë politike sesa teknike. Mendoj se është më tipike që kjo të ndodhë në Kuvend, që shumica parlamentare të ulet dhe të bëjë një propozim për rezolutë.

Ne si Qeveri nuk ikim nga asnjë punë, kështu që do të arrijmë marrëveshje, tha Spajiq.

Sasha Çagjenoviq do të gjykohet në procedurë të veçantë

Procesi gjyqësor kundër ish-prokurorit special Sasha Çagjenoviq është i ndarë nga procesi ndaj grupit në të cilën i pandehuri i parë është Radoje Zvicer.

Kështu është vendosur pasi Prokuroria Speciale Shtetërore paraditen e sotme ka dorëzuar në gjykatë propozimin për ndarjen e procesit ndaj Çagjenoviqit, në mënyrë që ai të gjykohet brenda një afati të arsyeshëm.

 Përveç Zvicerit, Lubo Milloviqit dhe Petar Llazoviqit, në këtë aktakuzë janë të përfshirë edhe 8 persona të tjerë. Sipas Prokurorisë Speciale Shtetërore, Llazoviq dyshohet se ka punuar për anëtarët e klanit Kavaçit, gjë që ai e ka mohuar para prokurorit.

Avokati i Çagjenoviqit, Llazar Akoviq, tha se sot u pajtuam në parim me propozimin e përfaqësuesit të prokurorisë për ndarjen e proceseve, megjithatë po vendnumërojmë.

 Sasha është në paraburgim gati një vit e gjysmë, kurse shqyrtimi kryesor nuk ka filluar, tha Akoviq.

Gjykata Administrative e hodhi poshtë padinë e Saranoviqit

Gjykata Administrative e hodhi poshtë padinë e ministrit të Punëve të Brendshme, Danillo Sharanoviq, i cili e paditi Qeverinë për shkak se e kishte emëruar Aleksandar Radoviqin ushtrues detyre të drejtorit të Policisë, pasi më parë e kishte shkarkuar Zoran Bërgjaninin nga ajo pozitë.

Gjykata vlerësoi se Sharanoviqi paraqitet si paditës në këtë kontest, ndonëse me vendimin e Qeverisë nuk është vendosur për asnjë të drejtë të tij, dhe as që i është shkelur ndonjë e drejtë, kështu që gjykata as nuk ka hyrë në vlerësimin e bazueshmërisë së padisë së Sharanoviqit.

Ligji i propozuar për sigurinë e informacionit

Qeveria e Malit të Zi në seancën e sotme ka miratuar Projektligjin për sigurinë e informacionit.

Siç njoftoi ministri i Administratës Publike Marash Dukaj, Mali i Zi është vendi i parë në rajon që propozon një akt të tillë, duke e harmonizuar atë me direktivat e BE-së dhe i referohet kapitullit 10.

“Në rastin konkret kemi pasur bashkëpunim të shkëlqyer me partnerët e BE-së dhe NATO-s, ky ligj është shumë i rëndësishëm në fushën e mbrojtjes kibernetike dhe sigurisë”, tha Dukaj.

Ai ligj, siç ka bërë të ditur ai, parasheh formimin e një agjencie të sigurisë kibernetike, e cila kryesisht do të jetë e ngarkuar me mbrojtjen nga luftërat kibernetike.

“Në vitin 2022 nuk kemi pasur mbrojtje 24/7 si sot”, tha Dukaj dhe shtoi se luftërat kibernetike janë luftërat më të rrezikshme sot në botë.

Millatoviq në Uashington me senatorë dhe kongresmenë

Presidenti i Malit të Zi, Jakov Millatoviq, javën e ardhshme do të qëndrojë në Shtetet e Bashkuara të Amerikës (SHBA), ku do të bisedojë me senatorë dhe kongresmenë të shumtë.

Siç kanë njoftuar nga kabineti i Millatoviqit, duke marrë parasysh rëndësinë e SHBA-së si partner kyç i politikës së jashtme të Malit të Zi, temat kryesore të takimeve janë forcimi i partneritetit strategjik mes dy vendeve, me theks në mbështetjen e SHBA-së për procesin e reformave malazeze.

Theks i veçantë do të vendoset në intensifikimin e bashkëpunimit në fushën e sigurisë, sundimit të ligjit dhe zgjerimit të bashkëpunimit ekonomik”, thuhet në kumtesë.

Vizita, siç u tha nga kabineti i Millatoviqit, konfirmon fuqishëm përkushtimin e Malit të Zi për anëtarësim të besueshëm në NATO dhe proceset reformuese në rrugën drejt anëtarësimit të plotë në Bashkimin Evropian (BE).

Në kuadër të qëndrimit në SHBA, presidenti do të mbajë një ligjëratën në Universitetin John Hopkins - SAIS, do të jetë i ftuar nderi në një sesion speciale të Këshillit Atlantik dhe si kreu më i ri i shtetit të një shteti anëtar të NATO-s. , ai do të hapë Samitin e Rinisë së NATO-s që do të mbahet në Florida.

Është e vështirë të arrihet "Evropa tani 2" pa rritur taksat dhe borxhet

Nëse do të zbatohej programi i paralajmëruar "Evropa tani 2", do të çonte në borxhe të reja dhe inflacion akoma më të lartë, konsideron analisti ekonomik Mirza Mulleshkoviq.

Ai thekson se ky program do të jetë i vështirë për t'u realizuar pa rritje të taksave dhe borxheve, gjë që do të sillte edhe rritjen e borxhit publik.

Ai thotë se raporti i FMN-së nga njëra anë tregon përkushtimin e mirë të Malit të Zi për integrim evropian, tregon se ka një stabilitet fiskal në periudhën paraprake, por paralajmëron edhe për disa gjëra që mund të jenë problematike në periudhën e ardhshme.

“Sa i përket vetë borxhit publik, nëse do të zbatohej ajo që deklaroi dje kryeministri, fakti është se me këtë gjendje të ekonomisë do të duhej të merrnim borxhe shtesë për të financuar të gjitha këto detyrime, dhe për rrjedhojë borxhi publik i Malit të Zi do të rritet. Për sa i përket vetë programit, fillimisht duhet theksuar se ne ende nuk kemi informacion nëse dhe në çfarë mënyre mund të zbatohet dhe më duket se ky është problemi më i madh për ne që veprojmë në territor të Malit të Zi si dhe për institucionet ndërkombëtare që duhet të ofrojnë projeksione të caktuara. Nuk mund të gjeni në asnjë dokument zyrtar në Mal të Zi se si do të bëhet kjo, edhe pse është paralajmëruar se do të realizohet deri në fund të vitit”, tha Mulleshkoviq në programin e mëngjesit të TVMZ.

Ai tha se ende nuk e dimë zyrtarisht dhe saktësisht se çfarë do të bëhet për rritjen e pagave.

"Ne do t'i ndihmojmë ish-punëtorët e Koshutës, por nuk mund të them se kur"

Ministrja e Punës dhe Mirëqenies Sociale, Naida Nishiq, tha se Qeveria do të bëjë atë që është në kompetencën e saj kur bëhet fjalë për ish-punëtorët e Koshutës, por se në gjendjen e tyre janë 20.000 punëtorë dhe se ata nuk mund të ndihmojnë vetëm një grup.

Nishiq tha se Qeveria po e shqyrton edhe çështjen e ish-punëtorëve të Koshutës, por ajo thekson se fjala është për shumat milionëshe.

"Ne si qeveri e përgjegjshme do të bëjmë gjithçka që kemi në dorë dhe do t'i shqyrtojmë të gjitha këto çështje. Megjithatë, duhet të jemi të vetëdijshëm se këto çështje janë të shumta dhe se nuk mund të fokusohemi vetëm në një grup", tha ajo.

Ajo theksoi se janë habitur që prej vitesh nuk është zgjidhur asnjë çështje.

Radulloviq: Masa më të rrepta kundër ndotësve të detit

Ministria e Transportit dhe Çështjeve Detare është e përkushtuar për rritjen e përgjegjësisë mjedisore, veçanërisht kur bëhet fjalë për parandalimin e ndotjes së detit dhe sipërfaqeve ujore, tha ministri përkatës Filip Radulloviq dhe shtoi se qëllimi është vendosja e masave më të rrepta kundër ndotësve të detit.

Radulloviq, duke hapur konferencën ndërkombëtare "Boka e Kotorrit si destinacion i qëndrueshëm detar" në Tivat, njoftoi se këtë vit do të prezantohet një zgjidhje e re ligjore lidhur me mbrojtjen e detit dhe do të harmonizohet me rregulloret e Organizatës Ndërkombëtare Detare dhe konventat e tjera ndërkombëtare.

“Qëllimi ynë është të vendosim masa më të rrepta për mbrojtjen e mjedisit tonë natyror duke ndaluar ndotjen nga anijet dhe duke përmirësuar sigurinë e lundrimit”, tha Radulloviq.

Ai tha, siç njoftojnë nga MPB-ja, se këto janë hapa që do të kontribuojnë që Mali i Zi jo vetëm të përmbush standardet ndërkombëtare, por edhe të vendosë synime të reja e më të larta në fushën e zhvillimit të qëndrueshëm.

Radulloviq theksoi se promovimi i dekarbonizimit dhe parandalimi i ndotjes së sipërfaqeve detare dhe ujore, si dhe natyrës në tërësi, mbetet një synim i përhershëm.

Inspektorë turistikë për dy muaj në gjashtë komuna bregdetare

Drejtoria për Çështje të Inspektimit do të qëndrojë në gjashtë komuna bregdetare për 60 ditë, nga 1 korriku deri më 29 gusht, ndërsa vetëm në Herceg Novi është planifikuar të ketë rreth 13 inspektorë.

Drejtoresha e Drejtorisë për Çështje të Inspektimit , Ana Vujosheviq dhe kryetari i komunës së Herceg Novi-t, Stevan Katiq, kanë diskutuar në takimin e djeshëm për planin e punës së inspektorëve turistikë për sezonin veror, si dhe për bashkëpunimin e administratës dhe shërbimeve komunale në periudhën e ardhshme.

Vujosheviq tha se bashkëpunimi ndërmjet Administratës dhe vetëqeverisjes lokale të Herce Novi-t ka vite që është në nivel të lakmueshëm dhe me përfaqësuesit e qytetit kanë biseduar për aktivitetet parasezonale dhe sezonale.

KE: Progresi në dialog, kusht për përfitime financiare për Kosovën e Serbinë

Kosova ka të drejtë për financim sipas Planit të Rritjes, njëjtë sikurse pjesa tjetër e Ballkanit Perëndimor. Kjo e drejtë mund të realizohen nëse plotësohen kushtet për pranim të pagesave.

Kështu thuhet në një përgjigje me shkrim për RTK-në nga zyra e shtypit e Komisionit Evropian. Megjithatë, në këtë përgjigje nuk ka sqarim nëse masat e Brukselit ndaj Prishtinës zyrtare mund të jenë pengesë për marrjen e fondeve nga kjo pako financiare.

Sidoqoftë, pavarësisht masave në fuqi, të dyja vendet duhet të përparojnë në procesin e dialogut në mënyrë që të kenë të drejtën t'i gëzojnë fondet evropiane nga Plani i Rritjes.

“Normalizimi i marrëdhënieve është një kusht thelbësor në rrugën evropiane të të dyja palëve. Të dyja rrezikojnë të humbasin mundësi të rëndësishme në mungesë të përparimit”, thuhet nga zyra e shtypit e KE-së.

Për të gëzuar fondet nga Plani i Rritjes, Kosova dhe  Serbia duhet të angazhohen në mënyrë konstruktive në normalizimin e marrëdhënieve të tyre.

Kjo nënkupton zbatimin e plotë të të gjitha detyrimeve që rrjedhin nga Marrëveshja për rrugën drejt normalizimit si dhe aneksi i zbatimit. Gjithashtu, kërkohet zbatimi i të gjitha marrëveshjeve të së kaluarës të arritura në kuadër të dialogut, si dhe përfshirja në negociata për Marrëveshjen Gjithëpërfshirëse për normalizimin e marrëdhënieve.

Ndryshe Plani i Rritjes prej 6 miliardë eurosh për gjashtë shtete e Ballkanit Perëndimor, konsiderohet një ofertë gjithëpërfshirëse e BE-së për të rritur gjendjen e tyre socio-ekonomike.

Kurti: Shqiptarët e Luginës e kanë mbështetjen e palëkundur

Kryeministri Kosovës, Albin Kurti, mirëpriti në takim deputetin e vetëm shqiptar në Kuvendin e Serbisë, Shaip Kamberi, me bashkëpunëtorët, kandidatët për kryetarë komunash në Preshevë e Bujanoc, Ardita Sinani e Ragmi Mustafi.

Siç njoftojnë nga Qeveria, bashkëbisedimi u fokusua rreth situatës politike dhe të sigurisë në rajon, gjithashtu u diskutua edhe për mundësitë e zgjerimit të mbështetjes për shqiptarët e Luginës së Preshevës.

Qeveria e Republikës së Kosovës tashmë ka ndarë 3 milionë euro për Luginën në buxhetin e këtij viti, jo vetëm për të ndihmuar në ruajtjen e kulturës e identitetit, por edhe për të rritur mbështetjen për programe të tjera siç është ai i bujqësisë.

“Shqiptarët në Luginën e Preshevës vazhdojnë ta kenë mbështetjen e palëkundur të Qeverisë së Republikës së Kosovës përballë diskriminimit e politikave shtypëse të Beogradit ndaj komunitetit shqiptar”, thuhet në njoftim.

Kryeministri britanik bisedë telefonike me Edi Ramën, zbardhen diskutimet, Sunak: Progres i fortë partneriteti mes dy vendeve

Kryeministri britanik Rishi Sunak ka zhvilluar sot paradite një bisedë telefonike me Edi Ramën.

Sipas zyrës së shtypit të kryeministrisë britanike, ata kanë diskutuar për marrëdhëniet e ngushta mes Britanisë së Madhe dhe Shqipërisë, duke vënë në dukje bashkëpunimin e rëndësishëm dypalësh, duke përfshirë tregtinë dhe investimet.

Kryeministri Sunak vuri në dukje progresin e fortë të bërë nëpërmjet partneritetit MB-Shqipëri për migracionin.

Të dy udhëheqësit pranuan se duhet më shumë punë për trajtimin e sfidës e migracionit të paligjshëm në Evropë.

Po ashtu bëhet me dije se ata nënvizuan rëndësinë e sigurimit të stabilitetit në Ballkanin Perëndimor, veçanërisht në Bosnje dhe Hercegovinë e Kosovë.

Duke iu kthyer situatës në Lindjen e Mesme, udhëheqësit diskutuan rëndësinë e trajtimit të rritjes së antisemitizmit në të gjithë globin dhe mbrojtjen e vlerave tona të përbashkëta të tolerancës dhe respektit.

Izraeli vazhdoj shulmet ajrore kundrejt Gazës gjate gjithë natës

Ushtria izraelite njoftohet se ka bombarduar gjatë gjithë natës shumë rajone të Rripit të Gazës, transmeton Anadoll.

Në lajmin e agjencisë zyrtare palestineze të lajmeve WAFA thuhet se Izraeli ka vazhduar në ditën e 217-të sulmet e tij kundër Rripit të Gazës.

"Avionët izraelitë bombarduan shumë vendbanime në qytetin e Gazës", thuhet në lajm dhe theksohet se janë nxjerrë trupat e pajetë të tre personave dhe pesë të plagosurve nga një shtëpi që u bombardua në rrugën Yarmouk në qytet.

Ushtria izraelite ka kryer sulme gjatë orëve të natës edhe ndaj qytetit Rafah në jug të Rripit të Gazës dhe me sulme ajrore është shënjestruar kampi i refugjatëve Nusseirat në pjesën qendrore të Rripit të Gazës.

Vriten tre civilë dhe plagosën 11 të tjerë nga sulmet ruse në Ukrainë

Tre civilë janë vrarë dhe 11 të tjerë janë plagosur nga bombardimet e reja ruse në katër rajone ukrainase, njoftuan autoritetet sot. Oleh Sinehubov tha se 21 vendbanime në këtë rajon u sulmuan nga Rusia.

Më herët të premten, zyrtarët ukrainas thanë se ushtria ukrainase i shkatërroi të gjithë 10 dronët me të cilët Rusia e sulmoi gjatë natës.

Forcat Ajrore të Ukrainës thanë në një komunikatë në Telegram se Rusia i shkrepi edhe dy raketa kundërajrore.

Pavarësisht provave dhe dëshmive, Moska e mohon se në shënjestër të sulmeve të saj janë objektivat civile.

Rusia e ka nisur pushtimin e plotë të Ukrainës në shkurt të vitit 2022.Perëndimi është përgjigjur duke ndërmarrë një varg sanksionesh kundër saj, ndërsa Ukrainën është duke e ndihmuar me armatim.

Nesër mot i ndryshueshëm

Në Mal të Zi mban mot me vranësira mesatare deri plotësisht i vranët, në rajonin e Bokës dhe vende-vende në pjesët veriore me reshjet të dobëta e shiut. Frynë erë e dobët deri mesatare, vende- vende edhe e fortë nga drejtimet e ndryshme. Temperaturat e shënuara në orën 14: Ulqin 26 gradë, Podgoricë 25, Herceg Novi e Budvë 24, Tivar e Cetinë 22, Nikshiq 21, Beranë 19, , Shavnik e Andrievicë 18, Bijello Pole 17, Kollashin, Plevle , Plluzhinë e Petnjicë 16, Guci 15, Rozhajë 14 dhe në Zhablak 11 gradë.

Për nesër në viset jugore pritet mot me vranësira të pakta deri mesatare, paradite intervale të gjata me diell, pasdite vende-vende me reshje të dobëta shiu ose rrebeshe të përkohshme, kurse në fund të ditës kthjellim gradual. Në veri me vranësira mesatare deri plotësisht i vranët, vende-vende me reshje të dobëta shiu, pasdite me mundësi të vogla të rrebesheve të përkohshme, kurse në fund të ditës dhe gjatë natës kthjellim i pjesshëm. Do të fryjë erë vende -vende mesatare deri e fortë nga drejtimet e veriut. Temperatura më e lartë e ditës prej 12 deri në 27 gradë.