Ditari 17.01.2022

Ditarin e përgatiti Marash Dedvukaj

Ne propozojmë një qeveri të pakicës, të gjithë mund ta mbështesin

Qeveria e pakicës, e propozuar nga Koalicioni Bardh e Zi, është një zgjidhje për krizën dhe një mënyrë për të zhbllokuar rrugën evropiane të Malit të Zi, tha lideri i Lëvizjes Qytetare URA, Dritan Abazoviq. Abazoviq tha në konferencën për media se këtë koncept e ofrojnë si zgjidhje të mundshme, por që nuk ia imponojnë askujt. “Ky model do t'u ofrohet 81 deputetëve me dëshirën që konsensusi të jetë sa më i gjerë”, tha Abazoviq. Sipas tij, koncepti i propozuar nga Koalicioni E bardha mbi të Zezën është i qartë. Duke folur se kush mundet dhe kush nuk mundet të hyjë në qeverinë e pakicës, Abazoviq tha se nënshkruesit e memorandumit do të kenë përparësi. "Është logjike që në qeverinë e pakicës të mos ketë vend për PDS dhe FD". Abazoviq u bëri thirrje të gjithëve që kanë një zgjidhje më të mirë ta paraqesin atë, me kusht që, siç tha ai, kjo zgjidhje të jetë e qëndrueshme. Lideri i Aleancës Qytetare CIVIS, Srgja Paviqeviq, tha se Qeveria po funksionon më vete dhe se nuk ka mbështetje nga shumica parlamentare.

"Nuk jemi gati për një eksperiment të ri" 

Fronti Demokratik është gati për një shkëmbim të drejtpërdrejtë mendimesh me nismëtarët e qeverisë së re, për t'u njohur me një ide konkrete dhe për të shprehur mendimin e tyre. Prioriteti i tyre, siç thanë ata, nuk është rrëzimi i kësaj Qeverie, por zgjedhja e një të reje, por mos t'i lihet mundësi PDS-së që të ndikojë në rrjedhat politike në Mal të Zi. “Çështja e zgjedhjes së qeverisë së re është çështje demokratike. Prandaj çdo vendim në këtë drejtim është çështje respektimi i vullnetit të popullit dhe respektimi i shumicës së qytetarëve që ishin pro largimit të PDS-së dhe ndryshimit të qeverisë së mëparshme. Kriza në funksionimin e qeverisë aktuale ka lindur pikërisht si pasojë e mosrespektimit të vullnetit demokratik të qytetarëve dhe injorimit të shumicës në Kuvend”, thuhet në deklaratë. Sipas tyre, mënyra e vetme për zgjidhjen e kësaj krize është respektimi i këtij vullneti në marrëveshje me të gjithë nga shumica parlamentare.“Ne jemi të gatshëm për një shkëmbim të drejtpërdrejtë të mendimeve me nismëtarët e votimit, në mënyrë që të njihemi drejtpërdrejt me idenë konkrete dhe të paraqesim mendimin dhe propozimet tona”, thuhet në kumtesë.

Shumica parlamentare nuk duhet të marrë pjesë në marrëveshjen mes Abazoviqit dhe Gjukanoviqit

Mali i Zi i vërtetë i bëri thirrje shumicës parlamentare që të mos marrë pjesë në, siç thanë ata, marrëveshjen e prapaskenave ndërmjet liderëve të Lëvizjes Qytetare URA dhe Partisë Demokratike të Socialistëve, Dritan Abazoviq dhe Millo Gjukanoviq. Më herët gjatë ditës së sotme, koalicioni E bardha mbi të zezën njoftoi se  ofron konceptin e një qeverie të pakicës pa PDS dhe FD, duke deklaruar se kjo ështe një mënyrë për të zhbllokuar rrugën evropiane të Malit të Zi. Kryetari i  Malit të Zi të vërtetë, Marko Millaçiq, ka vlerësuar se pas konferencës për media të Abazoviqit është e qartë se Gjukanoviq është pjesë e procesit të memorandumit për rrëzimin e Qeverisë aktuale, me qëllim kthimin në skenën politike. Sipas Millaçiqit, kjo është vërtetuar publikisht nga qëndrimi i Abazoviqit se mbështetja e PDS-së ështe e pranueshme për formimin e të ashtuquajturës qeveri të pakicës. Mali i Zi i vëretë i bën thirrje shumicës parlamentare që të mos marrë pjesë në marrëveshjen e prapaskenave mes Dritan Abazoviq dhe Millo Gjukanoviq”, tha Millaçiq. 

PSD do të mbështesë çdo nismë për largimin e qeverisë

Partia Socialdemokrate, PSD, do të mbështesë çdo iniciativë për votimin e mosbesimit ndaj Qeverisë së Malit të Zi, kushdo qoftë dhe për çfarëdo arsye të ketë qenë propozuesi, ka shkruar në Twitter nënkryetari i kësaj partie, Bojan Zekoviq.“Rënia e një qeverie të tillë është e nevojshme për një distancim të qartë nga nacionalizmi, klerikalizimi i shoqërisë dhe përpjekjet për të zëvendësuar Bashkimin Evropian me ‘botën serbe’, për të forcuar mbështetjen politike në luftën kundër krimit të organizuar dhe për të vazhduar rrugën evropiane. , e cila fatkeqësisht është e bllokuar”, tha Zekoviq. Edhe Socialdemokratët mbështesin çdo iniciativë me qëllim të mirë që e nxjerr Malin e Zi nga kriza politike dhe institucionale në të cilën ndodhet shoqëria jonë, është kumtuar nga kjo parti pas ofertës së sotme të koalicionit  E bardha mbi të Zezën për krijimin e një qeverie të pakicës. 

Udhëheqësit të vendosin nëse do të ketë qeveri të pakicave

Udhëheqësit malazezë duhet të marrin një vendim nëse do të ketë qeveri të pakicave, tha zëvendësndihmës sekretari amerikan i shtetit dhe i dërguar special për Ballkanin Gabriell Eskobar. Në një intervistë për Zërin e Amerikës për situatën në Mal të Zi, Eskobar tha se nuk i takon Shteteve të Bashkuara të zgjidhin tensionet dhe problemet e koalicionit qeverisës brenda një vendi anëtar të NATO-s. “Uashingtoni e ka bërë të qartë se çfarë pret, duke shpresuar se Mali i Zi do të mbetet një vend me orientim perëndimor, një anëtar i fortë i NATO-s dhe se do të vazhdojë të bëjë përparim në rrugën drejt anëtarësimit në Bashkimin Evropian”, tha ai.

Në shkurt rënia e Qeverisë dhe zgjedhja e një qeverie të re

Nënkryetari i Partisë Socialdemokrate të Malit të Zi e deputeti Damir Shehoviq tha se pret rënien e Qeverisë dhe zgjedhjen e një të reje në seancën e jashtëzakonshme të Kuvendit në muajin shkurt. Ai tha se është vetëm çështje ditësh se kur nisma për votëbesimin e Qeverisë do të gjendet në procedurë parlamentare. Ai paralajmëroi një lloj rigrupimi në skenën politike dhe bashkëpunim më të ngushtë programor të partive me orientim qytetar. Sipas tij, që të ndodhë kjo, që subjektet politike  me programe të ngjashmetë bashkëpunojnë, duhet të kuptojnë të gjitha palët se mbrojtja e interesave të vogla, të veçanta nuk është më opsion dhe se të gjithë duhet të ndryshojnë. 

“Qëllimi është përshpejtimi i dinamikës së progresit të shtetit”

Prioritet i Malit të Zi është zhvillimi dhe një standard më i mirë për qytetarët e tij, i cili tashmë po sigurohet përmes reformës ekonomike Evropa tani, tha ministri i Financave dhe Mirëqenies Sociale, Millojko Spajiq në Dubai dhe vuri në dukje rëndësinë e bashkëpunimit në investime. Së bashku me ministrin e Zhvillimit Ekonomik, Jakov Millatoviq, ai u takua me ministrin e Ekonomisë në Qeverinë e Emirateve të Bashkuara Arabe , Abdul Bin Touk Al Marie, me të cilin biseduan për mundësitë e përmirësimit të bashkëpunimit ndërmjet  dy shteteve.
Al-Marie tha se ështe i kënaqur që vendi i tij do të jetë partner në Forumin  Investues, organizuar nga Mali i Zi më 7 shkurt për të shënuar Ditën Kombëtare në Expo 2020. Delegacioni malazez, i kryesuar nga Millatoviq, u ftua të marrë pjesë në Konferencën Vjetore të Investimeve në fund të marsit në Dubai.Millatoviq bëri të ditur se në periudhën e ardhshme do të intensifikojë bashkëpunimin me Emiratet e Bashkuara Arabe në disa nivele, duke shpresuar se së shpejti do të ketë lidhje me fluturimet gjatë gjithë vitit, gjë që mbështetet fuqishëm nga ministri i Ekonomisë në Qeverinë e Emirateve të Bashkuara Arabe. 

Vendimi për protestë pas bisedimeve me ministrin Spajiq

Nuk përjashtohet mundësia për grevë të mësimdhënësve dhe për këtë do të vendoset pas bisedimeve me ministrin e Financave dhe Mirëqenies Sociale, Millojko Spaiq, tha kryetari i Sindikatës së Arsimit Radomir Bozhoviq. Në programin e mëngjesit të Televizionit të Malit të Zi,ai tha se do të përpiqet të gjejë një zgjidhje me Spajiqin për t'iu afruar mjekëve dhe profesorëve universitarë sa i përket të ardhurave, të paktën për gjysmë hapi. Bozhoviq theksoi se edukatorët nuk janë të kënaqur me pagën, statusin në shoqëri dhe aspektet ligjore. "Rritja e paralajmëruar e pagave përmes programit  Evropa tani nuk është e parëndësishme , por ne të gjithë presim një shkurtin për të parë se si do të duket në praktikë," tha Bozhoviq. Ai theksoi se opsioni i grevës së mësimdhënësve nuk është përjashtuar asnjëherë dhe gjithmonë ekziston. “Nëse bisedimet me ministrin e financave nuk shkojnë në drejtimin e dëshiruar, atëherë do të flasim për protesta dhe grevë”, tha Bozhoviq.

Shtrenjtohen të gjitha llojet e karburanteve

Të gjitha llojet e karburanteve prej sonte në mesnatë do të rriten nga tre deri në gjashtë cent për litër, njoftoi Ministria e Investimeve Kapitale. Çmimet e eurosuper 95 dhe 98 do të rriten për tre cent, kështu që në dy javët e ardhshme do të kushtojnë 1.45, respektivisht 1.49 euro. Nafta për ngrohje dhe eurodizel do të shtrenjëtohen gjashtë cent dhe do të kushtojnë  1.32 përkatësisht 1.34 euro. Ndryshimi i fundit i çmimeve të karburanteve ka qenë më 5 janar, kur të gjitha llojet e karburanteve u rritën prej një deri në dy cent për litër. 

Vuçiq: 60 për qind e qytetarëve votuan për ndryshime kushtetuese 

Qytetarët e Serbisë kanë pranuar propozimin për ndryshimin e Kushtetutës në fushën e drejtësisë, sipas rezultateve preliminare të referendumit të mbajtur dje  më 16 janar. Siç ka njoftuar presidenti i Serbisë, Aleksandar Vuçiq, në bazë të 97,02 për qind të vendvotimeve të numëruara, për kanë votuar 60,40 për qind, ndërsa kundër 39,52 për qind. Sipas të dhënave të Komisionit Republikan të Zgjedhjeve (KRZ), deri në orën 18:00, në referendum dolën 25.25 për qind e qytetarëve me të drejtë vote. Qendrat e votimit janë mbyllur në orën 20:00. Të drejtë vote në referendum kishin mbi 6 milionë e 510 mojë votues, sipas Komisionit Republikan të Zgjedhjeve (KRZ). Ndryshimet kanë të bëjnë me mënyrën e zgjedhjes së gjyqtarëve dhe prokurorëve në mënyrë që të zvogëlohet ndikimi politik në këtë proces, ka thënë Qeveria e Serbisë. Presidenti i Serbisë, Aleksandar Vuçiq, tha më herët dje para gazetarëve se ndryshimet në Kushtetutë janë të rëndësishme për investitorët e huaj për të cilët sundimi i ligjit është një nga faktorët kryesorë kur vendosin për investime në Serbi. Vuçiq dënoi vendimin e autoriteteve të Kosovës për të mos lejuar votimin në territorin e Kosovës. Rikujtojmë se deputetët e Kuvendit të Kosovës të shtunën (15 janar) kanë miratuar një rezolutëHYPERLINK "https://www.kuvendikosoves.org/Uploads/Data/SessionFiles/2022_01_15_(15_01_2022)Rezolutanr.08-R-002_YetF4dJGTR.pdf" që shpreh kundërshtimin që në Kosovë të mbahen votime për referendumin e lartcekur të shtetit të Serbisë për ndryshime kushtetuese. Kuvendi miratoi rezolutën gjatë një seancë të jashtëzakonshme të thirrur nga kryeministri, Albin Kurti. Sipas rezolutës, mbajtja e referendumit të Serbisë në Republikën e Kosovës, "cenon sovranitetin dhe rendin kushtetues të Republikës së Kosovës dhe  është në kundërshtim me Kushtetutën, ligjet e Republikës së Kosovës, si dhe me normat e praktikat ndërkombëtare". 

Votohet Qeveria e re maqedonase

Me 62 vota për dhe 46 kundër, Kuvendi i Maqedonisë së Veriut zgjodhi Qeverinë e re që do të drejtohet nga kryeministri, Dimitar Kovaçevski. Votimit i parapriu një debat dyditor që përfundoi të dielën para mesnate. Qeveria e re numëron 21 anëtarë; 17 ministra dhe katër zëvendëskryeministra. Lidhja Social Demokrate ka 12 anëtarë, gjashtë Bashkimi Demokratik për Integrim dhe tre partia Alternativa. Njëmbëdhjetë anëtarë të Qeverisë janë maqedonas, ndërsa dhjetë shqiptarë. Qeveria e Maqedonisë së Veriut ka një plan të detajuar që të përballet me sukses me të gjitha sfidat që ndodhet para saj, ka deklaruar kryeministri i ri, Dimitar Kovaçevski. Prioritetet kryesore të ekzekutivit të ri të Maqedonisë së Veriut do të jenë përballja me krizën energjetike, zhvillimi ekonomik dhe investimet e huaja, tha shpreh Kovaçevski, i cili në Qeverinë e deritanishme ishte zëvendësministër i Financave. “Nuk kemi dilema se duhet të jemi më efikas në punën tonë që të kemi rezultate më të mira në punë. Programi jonë i Qeverisë bazohet në disa shtylla, por prioritet mbetet përballja me krizën energjetike, ngritja e standardit jetësor si dhe investimet e huaja. “Negociatat me Bullgarinë do të vazhdojnë me intensitet edhe më të madh, pasi jemi shtete fqinje dhe duhet të bashkëpunojmë në të gjitha sferat, si mundësi e vetme për të mirën e dy popujve dhe shteteve tona”, ka a theksuar Kovaçevski.  Në postin e kryeministrit, Kovaçevski zëvendëson Zoran Zaevin, i cili dha dorëheqje për shkak të disfatës së LSDM-së në zgjedhjet lokale që u mbajtën më 31 tetor të vitit 2021. Pjesë e Qeverisë së re janë edhe tri parti shqiptare, Bashkimi Demokratik për Integrim, Alternativa dhe Partia Demokratike Shqiptare. Arbër Ademi, deputet nga BDI-ja, tha se Qeveria e re do të zbatojë në tërësi programin e saj, ndërsa u shpreh i bindur se në tre muajt e fundit të mandatit të saj, Qeverinë do ta drejtojë një kuadër shqiptar, pasi për këtë, sipas Ademit, janë pajtuar si LSDM-ja ashtu edhe VMRO-DPMEN-ja.

Presidenti turk viziton Shqipërinë

Presidenti i Turqisë, Recep Tayyip Erdogan, sot në vizitën njëditëshe është duke qëndruar në Shqipërië. Erdogan fillimisht mori pjesë në ceremoninë e dorëzimit të banesave të ndërtuara nga Qeveria turke për personat që mbetën pa strehë, pas tërmetit të 26 nëntorit të vitit 2019, në qytetin e Laçit. Qeveria turke ka ndërtuar 524 apartamente në këtë qytet. Po në Laç, presidenti turk mori pjesë në ceremoninë e emërtimit të sheshit të qytetit me emrin e tij. Më vonë gjatë ditës, Erdogan qëndroj në  Tiranë, ku në orën 13:00 zhvilloj  një takim me kryeministrin e Shqipërisë, Edi Rama. Ndërsa në orën 15:00 u nënshkruan shtatë marrëveshje, memorandume mirëkuptimi dhe protokolle bashkëpunimi në fusha të ndryshme. Sipas agjendës, mbylljen e vizitës njëditore në Shqipëri, Erdogan do ta ketë përmes një sesioni të ri parlamentar, ku do të ketë një fjalë përshëndetëse. 

SHBA: Mijëra persona mbesin pa rrymë si pasojë e stuhisë dimërore

Një stuhi e madhe dimërore, e përcjellë nga bora dhe akulli, në disa pjesë të Shteteve të Bashkuara dhe Kanadasë, ka përballur mbi 80 milionë banorë me paralajmërime për motin. Më shumë se 145,000 persona janë pa energji elektrike në disa rajone jugore dhe lindore. Virxhinia, Xhorxhia, Karolina Jugore dhe ajo Veriore, kanë shpallur gjendje të jashtëzakonshme. Shërbimi për Motin në SHBA, ka thënë se në disa rajone pritet të ketë mbi 30 centimetra borë. Bora dhe akulli mund të “rrezikojnë udhëtimet, furnizimet me rrymë dhe mund të dëmtojnë pemët”, ka thënë Shërbimi për Motin. Sipas agjencisë së lajmeve, Associated Press, nëpër autostrada është raportuar për qindra aksidente të automjeteve. Më shumë se 3,000 fluturime brenda dhe jashtë SHBA-së janë anuluar ditën e djeshme, sipas faqes që vëzhgon fluturimet, Flight Aware. Aeroporti Charlotte Douglas në Karolinën Veriore është prekur më së keqi, me gati 90 për qind të fluturimeve të anuluara.

Raportohet se Koreja Veriore ka testuar sërish raketa balistike

Koreja Veriore ka testuar dy raketa, që dyshohen se janë balistike, nga kryeqyteti Phenjan. Më vonë është  raportuar që ato të kenë rënë në det. Sipas Qeverisë së Japonisë, testimet e 17 janarit përbëjnë testin e katërt këtë muaj të raketave në Korenë Veriore. Testimet e sotme pasojnë testimet e dy raketave tjera balistike më 14 janar, disa ditë pasi Uashingtoni ka vënë sanksione të reja mbi Phenjanin. Zyrtarët verikoreanë kanë thënë se kanë testuar edhe raketa hipersonike më 5 dhe 11 janar, ndonëse Koreja Jugore ka thënë se dyshon se Koreja Veriore ka aq kapacitet. Koreja Veriore ka shtuar numrin e testimeve të raketave në muajt e fundit, dhe me sa duket po tenton të rrisë pozicionin e saj në negociatat potenciale mes verikoreanëve, Shteteve të Bashkuara dhe Koresë Jugore. 

Pandemia përballi miliona persona me varfëri

Pasuria e 10 burrave më të pasur në botë, është rritur më shumë se dyfish, përkatësisht në 1.5 trilion dollarë, prej shpërthimit të pandemisë. Në të njëjtën kohë, sipas të dhënave të organizatës bamirëse të Britanisë, Oxfam, më shumë se 160 milionë persona vlerësohet se janë përballur me varfërinë gjatë pandemisë. Në raportin e publikuar sot është thënë se të pasurit janë bërë edhe më të pasur, kryesisht për shkak të stimujve fiskalë dhe monetarë, të cilët kanë rritur vlerën e aksioneve dhe aseteve tjera, ka thënë organizata bamirëse. Prej shpërthimit të pandemisë, një person është bërë miliarder çdo 26 orë. Sipas raportit, 10 personat më të pasur në botë kanë më shumë pasuri sesa 3.1 miliardë njerëz të varfër në botë. Në raport është bërë thirrje për rritje të taksave për miliarderët. Sipas organizatës, me paratë e taksave të të pasurve mund të blihen vaksina, më pas të ndahen fonde për kujdes shëndetësor dhe shpenzime tjera, me qëllim që të ndihmohen ata që kanë nevojë më shumë. 

Britania synon heqjen e masave kufizuese kundër COVID-19

Qeveria e Britanisë së Madhe ka njoftua dje se synon të largojë masat e fundit kufizuese më vonë këtë muaj derisa vala e infeksionit me Omicron po bie. Muajin e kaluar, Anglia kaloi te “Plani B” në lidhje me masat kufizuese duke vënë në fuqi sërish udhëzimet për punë nga shtëpia dhe kërkesat për pasaportë vaksinimi për të marrë pjesë në evente më të mëdha. Qeveria do të largojë këto masa më 26 janar por obligimi për vendosjen e maskës mund të vazhdojë sipas raportimeve. Ministri Oliver Doëden, bashkëkryetar i partisë konservatore të kryeministrit, Boris Johnson, tha se "shenjat ishin inkurajuese". "Ka qenë gjithmonë shpresa ime që do të kishim kufizimet e Planit B për periudhën më të shkurtër të mundshme," tha ai në Sky Njuz. "Unë nuk kam asnjë dyshim llojin e ngarkesave që kjo i vendos mikpritjes, biznesit më të gjerë, shkollave dhe kështu me radhë dhe unë dua që ne t'i heqim qafe ato nëse mundemi", deklaroi Doëden. 

Nesër mot me diell

Sot në Mal të Zi ka mbajtur mot kryesisht i vranët . Ka fry erë e dobët deri e mesme nga drejtimet e ndryshme.

      Temperaturat në orën 13: Budvë 14 g. Tivar e H. Novi 13, Podgoricë 10, Ulqin e Cetinë 9, Nikshiq 8, Plluzhinë e Rozhaj 4, Plluzhin e Rozhaj 4,  Kollashin , Shavnik, Andrievicë e Guci 3, Plevle e Zhablak 1, Bjello Pole e Beranë 0.

    Për nesër meteorologët paralajmërojnë mot kryesisht me diell. Do të fryjë erë e mesme deri e fortë nga drejtimet e veriut. Temperatura e mëngjesit do të sillet prej -8 deri në 7, kurse më e larta e ditës prej -4 deri në 13.